KAY tiempopin yaqa llapa runakuna kay pachaq tukupunanmanta rimashanku. ¿Uyarirankichu chaymanta rimaqta?.... Wakin runakunan ninku: “Runakunan jatun bombakunawan kay pachata ch’usaqman tukuchipunqaku”, nispa. Jujkunataq ninku: “Diosmi kay pachata, cielota, munay ch’askakunatapas ch’usaqman tukuchipunqa”, nispa. Qanri, ¿ima ninki?...

Biblian willashan kay pachaq tukupunanmanta. 1 Juan 2:17 textopi nin: “Kay pacha kausayqa pasashanmi”, nispa. ¿Kay allpanchis tukupunanmantachu chaypi rimashan?...  Manan. Biblian willan kay allpaqa ‘runakuna kusisqa tiyananpaq kamasqa’ kasqanta (Isaías 45:18). Salmo 37:29 textopi nin: “Chanin runakunaqa kay allpatan jap’ikapunqaku, chaypin wiñaypaq tiyanqaku”, nispa. Chayraykun Biblia willallantaq kay allpanchis wiñaypaq kananta (Salmo 104:5; Eclesiastés 1:4).

Manataq allpanchischu tukukapunqa chayqa, ¿imataq tukupunqari?... Chayta yachanapaq qhawarisun Noepa tiemponpi imachus pasasqanta. Biblia nin: ‘Diosqa chay tiempopi runakunatan wañuchipuran. Chaymi pasaran llapa kay pachata unu millp’uqtin’, nispa (2 Pedro 3:6).

¿Pillapas salvakuranchu chay tiempopi?... Biblian nin: ‘Diosqa payta mana manchakuq runakunatan unuwan millp’uchiran, chanin kaqmanta willaq Noetataq qanchis runakunatawan kuskata libraran’, nispa (2 Pedro 2:5).

Chhaynaqa, ¿iman chay tiempopi tukupuran: Kay allpachu icha millay runakunachu?... Arí, Bibliaq willasqan jina, Jehová Diosta ‘mana manchakuq runakunan’ chinkachisqa karanku. Jinaspapas Noeqa llapa runakunamanmi ‘willaran’. ¿Imamantan willaran?... ‘Chay tiempopi millay runakuna’ wañuchisqa kananmantan.

Juj kutinmi Jesusqa qatikuqninkunaman willaran ñaupaq tiempopi jatun para kasqanmanta. Chaypin willaran manaraq para chayamushaqtin imaynatachus runakuna kausasqankuta. Niranmi: “Manaraq jatun para chayamushaqtin runakuna mijusharanku, ujasharanku, qharikunapas warmikunapas casarakusharanku Noepa arcaman jaykusqan p’unchaykama, manataq imatapas repararankuchu jatun para chayamuspa llapankuta  millp’unankama”, nispa. Kay pachaq tukukuynin chayamuqtinpas chhaynatan runakuna kausananku karan (Mateo 24:37-39).

Chay tiempopi runakuna imayna kausasqankumanta yachasqanchisqa sapankanchistan yanapawasun. Chunka capitulopin yacharanchis chay tiempopi runakuna imayna kausasqankuta, ¿yuyashankichu?... Wakinqa millay runakunan karanku, wakintaq Noeq willasqanta mana uyariyta munarankuchu.

Chay qhepamanmi Jehová Dios Noeman willaran llapa millay runakunata jatun parawan wañuchipunanta. Chay paraqa alto orqokunataraqmi millp’upunan karan. Chaymi Diosqa Noeta kamachiran jatunkaray arcata ruwananpaq. 238 paginapi rikusqayki jina, chay arcaqa jatunkaray caja jinan karan.

Chay arcapin Diosqa Noeta familiantawan salvanan karan. Chaymantapas askha animalkunatan chaypi salvanan karan. Chaymi Dios niran jatuntapuni ruwananpaq. Chaypaqmi jatun sach’akunata wit’uranku chaykunawan ruwanankupaq. Chay arcataqa unaypin tukuranku jatun kasqanrayku. Paykunaqa tukuy kallpankuwanmi llank’aranku.

Noeqa manan arcata ruwaspallachu llank’aran. ¿Imatawanmi ruwaran? ¿Yuyashankichu?... Arí, jatun para chayamunanmantan llapa runakunaman willaran. Ichaqa manan pipas uyariyta munaranchu. Paykunaqa imaymana ruwaypin afanakusharanku. ¿Imakunatan ruwasharanku?... Mijusharanku, ujasharanku, casarakusharanku iman. Allin runapaqmi qhawarikuranku, chaymi mana kasurankuchu Noepa willasqanta. Ichaqa, ¿iman paykunata pasaran?

Noepas familianpas arcaman jaykusqanku qhepamanmi Jehová Diospuni punkuta wisq’aran. Runakunaqa nisharankuchá:  “Manan imapas pasanqachu”, nispa. Ichaqa qonqayllan paramuyta qallariran. Chayqa manan rikusqanchis para jinallachu karan. Sinchitapunin paramuran, chaymi mayukuna jatarispa jatun sach’akunata kumparan, jatunkaray rumikunatataq juch’uy rumita jinalla apapuran. ¿Iman pasaran runakunata?... Jesusmi niran: ‘Jatun para chayamuspan llapankuta millp’upuran’, nispa. Arí, manan juj runallapas salvakuranchu. ¿Imarayku?... Noepa willasqanta mana kasukusqankurayku (Mateo 24:39; Génesis 6:5-7).

¿Imatan yachanchis chay tiempopi pasasqanmanta?... Wañupuqkunaqa manan millay runakuna kasqankuraykullachu wañupuranku. Aswanpas imaymana ruwaykunapi afanakuspan mana tiemponkuta t’aqarankuchu Diosmanta yachanankupaq. Noqanchisqa manan munasunmanchu paykuna jina kaytaqa ¿riki?...

¿Yapamantachu Dios jatun parawan millay runakunata wañuchinqa?... Manan chhaynachu kanqa. Diosmi Noeta prometeran: “K’uychiytan [arco iristan] phuyupi sayachini, kaymi kay pachawan rimanakusqay señal kanqa”, nispa. Jehová Diosmi chay k’uychita señalta jina churaran ‘manaña jayk’aqpas millp’uq para unuwan llapa kausaqta wañuchinanpaq’ (Génesis 9:11-17).

Arí, Diosqa manañan jayk’aqpas jatun parawan runakunata  wañuchinqachu. Chaywanpas Bibliaqa willashanmi kay pachaq tukupunanmanta. ¿Pikunan chay p’unchaypi salvakunqaku?... ¿Imaymana ruwaykunapi afanakuqkunachu? ¿Bibliata mana estudiaq runakunachu? ¿Ima ninkin qan?...

¿Munawaqchu chay p’unchaypi salvasqa kayta?... ¿Munawaqchu Noepa familian jina familiaykipas salvasqa kananta?... Chay p’unchaypi mana wañuchisqa kanapaqqa kaykunatan yachananchis: ¿Imaynatan Jehová Dios millay runakunata wañuchinqa? ¿Imaynatan mosoq pachata apamunqa? Chaykunamanta kunan yachasun.

Daniel 2 capitulopi, 44 versiculopin kay tiemponchismanta willashan. Chaypin nin: ‘Chay reykuna kamachikushaqtinmi, janaq pacha Diosqa mana jayk’aq thunikuq gobiernota sayarichinqa, manataqmi waj llaqtaqa chayta kamachinqachu, aswanpas llapa gobiernokunatan ñut’uspa tukunqa, wiñaypaqtaq kanqapas’, nispa.

¿Entiendenkichu chaypi willasqanta?... Chaypi nisqan jina, Jehová Diosmi kay pachapi kaq llapa gobiernokunata chinkachipunqa. ¿Imarayku?... Diospa ajllasqan reyta mana kasukusqankurayku. ¿Pitaq chay reyri?... Arí, Jesucriston.

Jehová Diosqa derechonpin kashan pi munasqantapas reyta churananpaq. Chaymi wawanta ajllaran rey kananpaq. Pisi tiempomantan chay rey llapa gobiernokunata chinkachipunqa. Apocalipsis libropi, 19 capitulopi, 11-16 versiculokunapin willashan imayna chinkachinanta. Qatimuq paginapi rikusqayki jinan kanqa. Chaytan Biblia nin: “Armagedón”, nispa. Chay guerrapin Jehová Dios llapa gobiernokunata chinkachipunqa.

 Noqanchisri, ¿maqanakusunchu chay guerrapi?... Manan, Biblian willan armagedón guerraqa ‘tukuy atiyniyoq Diospa guerran’ kasqanta (Apocalipsis 16:14, 16). Chay guerrapiqa Diosmi wawanta churanqa maqanakunanpaq. Jesusmi janaq pacha ejercitonwan kuska chay guerrapi maqanakunqa. ¿Jayk’aqtaq chay guerrari qallarinqa? Chaymantan qatimuq capitulopi yachasun.