MO MÄ awe mbeni zo asala tënë ti hunzingo ti sese so?— Laso, azo mingi ayeke sala tënë na ndo ni. Ambeni zo atene ti ala so azo ayeke sala ande mbeni bira na lege ti anene ngombe, si a yeke buba sese so. Ti mo, Nzapa ayeke futi ande pendere sese ti e so, na lê ti nduzu nga na atongoro gbâ ni gbâ ni so ayeke dä?—

Tongana ti so e manda awe, Bible asala tënë ti hunzingo ti sese. Lo tene: “Sese so ayeke hon.” (1 Jean 2:17). Ti mo, hunzingo ti sese ayeke duti ande hunzingo ti sese so e yeke dö ndo ni so?— Oko pëpe, Bible atene so Nzapa  asala sese ‘si azo alingbi duti dä’ na ala wara ngia dä (Esaïe 45:18). Psaume 37:29 atene: “Sese ni aga ye ti héritier ti azo ti mbilimbili, na fade ala duti dä lakue.” Ndani la si Bible atene nga so sese ni ayeke ngbâ kpu na kpu.​—Psaume 104:5; Zo-ti-fa-tene 1:4.

Tongaso, tongana hunzingo ti sese so aye ti tene pëpe hunzingo ti sese so e yeke dö ndo ni, a ye ti tene nyen?— E lingbi ti hinga ni tongana e bâ mbilimbili ye so asi ândö na lâ ti Noé. Bible atene: ‘Sese so ayeke giriri abuba, teti ngu ahon [wala asuku na] ndo ti sese kue.’​—2 Pierre 3:6.

Na lâ ti Noé, ambeni zo asö kuâ lani na hunzingo ti sese so na ngoi ti Kota Moa so?— Bible atene so Nzapa ‘abata Noé, zo ti fa tënë ti mbilimbili, legeoko na ambeni zo mbasambala, na lâ ni so Lo tokua moa na ndo sese ti azo so ake Nzapa’.​—2 Pierre 2:5.

Tongaso, sese so a buba ni ayeke lani so wa? Sese so e dö ni dongo so? Wala azo ti sioni?— Bible atene so a duti lani “sese ti azo so ake Nzapa”. Bâ, a hiri Noé ‘zo ti fango tënë’. Lo fa lani tënë ti nyen?— Noé ayeke gboto lani mê ti azo na ndo hunzingo ti ‘sese ti ngoi ni kâ’.

Tongana Jésus asala lani tënë ti kota Moa, lo fa na adisciple ti lo ye so azo ayeke sala lani tâ kozoni si nda ni aga. Bâ tënë so lo tene na ala: ‘Na lâ ni kozoni si moa aga, azo ayeke te, ala yeke nyon, akoli akamata wali, na awali akamata koli, juska lâ ni so Noé alï na yâ arche, na ala hinga tënë ni pëpe juska moa aga akamata ala kue.’ Na pekoni, Jésus atene so azo ayeke sala ande nga ye legeoko tongaso kozoni si sese ti laso ahon.​—Matthieu 24:37-39.

 Atënë ti Jésus afa na e so e lingbi ti manda mbeni kota ye na lege ti ye so azo asala kozoni si Moa aga. Na dikongo chapitre 10 ti buku so, mo dabe ti mo na ye so azo ni asala lani?— Ambeni zo asala ngangu mingi na ala sala sioni na amba ti ala. Me Jésus atene so ambeni mingi adengi lani même mê pëpe tongana Nzapa atokua Noé ti fa tënë na ala.

Ngoi ni asi awe, na Jéhovah atene na Noé so lo yeke fâ azo ti sioni na lege ti kota ngu. Ngu ni ayeke mû ande ndo lê ti sese kue, na ayeke hon ndo ti ahoto kue. Jéhovah atene na Noé ti leke mbeni kota arche. A kpa tâ gi mbeni kota yongoro caisse, tongana ti so mo yeke bâ na lembeti 238.

Nzapa atene na Noé ti leke arche ni kota, ti tene lo na azo ti da ti lo na gbâ ti anyama alingbi ti lï dä. Noé na azo ti da ti lo asala kua ngangu mingi. Ala dë angbongboro keke, na ala leke arche na ni. Ndali ti so arche ni akono mingi, a hunda angu mingi ti leke ni kue.

Mo dabe ti mo na mbeni ye nde so Noé asala lani na yâ angu kue so lo yeke leke na arche ni?— Lo yeke fa lani tënë. Lo yeke gboto mê ti azo na ndo Moa so ayeke ga. Azo amä lo? Zo oko amä lo pëpe, gi azo ti da ti lo. Tanga ti azo ni ayeke lani gi na aye mingi ti sala. Mo dabe ti mo na ye so Jésus atene ala yeke sala lani?— Ala yeke te ye, ala yeke nyon ye na ala yeke mû awali na akoli. Ti ala, ala yeke asioni zo pëpe, ni la ala mû ngoi ti mä Noé pëpe. Zia e bâ ye so asi na ala.

Na peko ti so Noé na azo ti da ti lo alï na yâ ti arche ni awe, Jéhovah akanga yanga ni. Azo so angbâ na gigi adë kite lakue so Moa ayeke ga. Me mo ye ti bâ, ngu akomanse ti pika. A yeke lani mbeni senge ngu-nzapa pëpe. A yeke pika tâ kota mingi! A ninga pëpe, ngu ni asuku, ayeke sua na ayeke toto ngangu.  A kinda angbongboro keke na ayeke pusu anene tênë mo bâ mo tene gi akete tênë la. Ka ti azo so angbâ na gigi ti arche ni?— Jésus atene: ‘Moa aga amû ala kue.’ Azo ni kue akui. Ngbanga ti nyen?— Jésus atene: “Ala mä tënë ni pëpe.” Biani, ala dengi mê ti ala na tënë ni pëpe!​—Matthieu 24:39; Genèse 6:5-7.

Bâ, Jésus atene lani so e lingbi ti manda ye na lege ti ye so asi na azo so. E lingbi ti manda nyen?— So a fâ lani azo gi pëpe ngbanga ti so ala yeke sioni, me nga ngbanga ti so mingi ti ala ayeke lani gi na aye mingi ti sala, si ngoi ti manda ye na ndo Nzapa nga na ndo ye so lo ye ti sala ayeke pëpe. Zia e sala hange si e sala ye tongana ala pëpe.

Ti mo, Nzapa ayeke kiri ti buba sese so na lege ti kota ngu?— Oko pëpe. Nzapa atene so lo yeke sala ni pëpe. Lo tene: “Mbi zia kongo ti Mbi na yâ mbinda, so ayeke fä.” Jéhovah atene so kongo ayeke duti ande ye so afa atene ‘ngu ayeke ga moa ti futi mi kue mbeni pëpe.’​—Genèse 9:11-17.

Tongaso, e lingbi ti hinga biani so Nzapa ayeke kiri lâ oko pëpe ti buba sese ni na lege ti kota ngu. Me tongana ti so e bâ awe, Bible asala biani tënë ti mbeni hunzingo ti sese. Tongana Nzapa ayeke ga ti buba sese so, lo yeke bata ande azo wa?— A yeke duti ande azo so  abi bê mingi na ndo ti ambeni ye nde, si ala ye lâ oko pëpe ti mä tënë na ndo Nzapa so? A yeke duti ande azo so ayeke nga na ngoi oko pëpe ti manda Bible? Mo tene ti mo nyen?—

E ye ti duti na popo ti azo so Nzapa ayeke bata ande ala na fini, ni la ape?— Tongana afami ti e aduti tongana ti Noé, si Nzapa asö ala kue, a yeke duti ande nzoni ape?— Tongana e ye ti sö kuâ na hunzingo ti sese so, a lingbi e hinga nzoni tongana nyen Jéhovah ayeke buba ni ande na lo yeke ga na fini sese so mbilimbili ayeke duti dä. Zia e bâ tongana nyen lo yeke sala ni.

Bible afa ni na Daniel chapitre 2, versê 44. Versê so asala tënë ti ngoi ti e tongana lo tene: “Na lâ ti agbia so, fade Nzapa ti yayu ayä royaume so afuti lâ oko pëpe, na Lo zia royaume [wala ngorogbia] ni na tïtî ambeni zo nde pëpe; me fade royaume so afâ mbeni royaume so kue ndulu ndulu, na a sala si royaume nde nde so kue awe; na fade royaume so angbâ lakue lakue.”

Mo mä yâ ti tënë so?— Bible atene so ngorogbia ti Nzapa ayeke ga ande ti futi angorogbia ti sese so kue. Ngbanga ti nyen?— Ngbanga ti so ala ke ti mä yanga ti Lo so Nzapa azia lo Gbia. Gbia ni so ayeke zo wa?— Tâ gi Jésus Christ!

Jéhovah Nzapa ayeke na droit ti soro mara ti ngorogbia wa si a lingbi komande. Ni la lo soro Molenge ti lo, Jésus, ti duti Gbia ni. Na yâ ngoi kete, Mokonzi so Nzapa azia lo, Jésus Christ, ayeke mû ande li ni ti futi angorogbia kue ti sese so. Na Apocalypse chapitre 19, versê 11 ti si 16, Bible afa lo na salango ni, tongana ti so foto so afa ni ge. Bible ahiri bira ti Nzapa ti futi angorogbia kue ti sese Harmaguédon.

 Nzapa atene so Royaume ti lo ayeke futi ande angorogbia ti azo. Lo hunda e ti futi ni?— Oko pëpe. Na yâ ti Bible, Harmaguédon ayeke “bira ti kota lâ ti Nzapa, Lo Ti Ngangu Ahon Kue.” (Apocalypse 16:14, 16). Biani, Harmaguédon ayeke bira ti Nzapa, na lo yeke sala kusala na Jésus Christ ti mû li ni na yâ bungbi ti aturugu ti a-ange ti sala bira ni. Bira ti Harmaguédon ayeke ndulu? Zia e gi ti hinga ni.