NA E faalogo o talanoa se tagata i le iʻuga o le lalolagi?— E talanoa le toʻatele o tagata i le mea lenā. Ua manatu isi tagata e uma le lalolagi i taua a tagata e faaaogā ai pomu niukilia. O le ā sou manatu, faamata o le a faataga ea e le Atua tagata e faaumatia lo tatou lalolagi matagofie?—

E tusa ma mea ua tatou aʻoaʻoina, o loo taʻua i le Tusi Paia le iʻuga o le lalolagi. Ua faapea mai: ʻE mavae atu le lalolagi.’ (1 Ioane 2:17) O le ā sou manatu, faamata e faaumatia le laueleele o loo tatou nonofo ai pe a uma le  lalolagi?— E leai, o loo fai mai le Tusi Paia na faia e le Atua le lalolagi “ina ia ainā” pe ia nonofo fiafia ai tagata. (Isaia 45:18) Ua faapea mai le Salamo mataupu 37 fuaiupu 29: “E fai lava le nuu mo tagata amiotonu, e nonofo ai pea i latou.” O le māfuaaga lenā ua faapea mai ai le Tusi Paia, o le a tumau le lalolagi e faavavau.​—Salamo 104:5; Failauga 1:4.

Afai la o le a lē faaumatia le laueleele o loo tatou nonofo ai, o le ā la le uiga o le iʻuga o le lalolagi?— E mafai ona iloa le tali pe a tatou iloiloina le mea na tupu i aso o Noa. O loo faamatala e le Tusi Paia faapea: “Sa faaumatia ai le lalolagi tuai ina ua lofia i le vai.”​—2 Peteru 3:6.

Pe na sao se tasi mai le iʻuga o le lalolagi i le taimi o le Lolo tele i aso o Noa?— Na faapea mai le Tusi Paia “na o Noa lē talaʻi le amiotonu, o lona toʻavalu lea na faaolaina, ina ua au mai le lolo i le lalolagi [“o tagata,” NW] faalēmataʻu.”—2 Peteru 2:5.

O le ā le lalolagi na faaumatia? Po o le laueleele na nonofo ai, po o tagata amioleaga?— Ua fai mai le Tusi Paia o “le lalolagi o tagata faalēmataʻu.” Ia mātau, o loo taʻua Noa o “lē talaʻi le amiotonu.” O le ā sou manatu, o le ā le feʻau na talaʻia e Noa?— Na lapataʻi e Noa tagata e faatatau i le iʻuga o “le lalolagi tuai.”

Ina ua fetalai Iesu e uiga i le Lolo tele, na ia taʻu atu i ona soo mea na faia e tagata a o latalata i le iʻuga. O le tala lenei a Iesu i ona soo: ʻE pei ona faia i ona pō a o leʻi oo le lolo, ua latou aai ma inu, ua fai foʻi a latou faaipoipoga, ua oo lava i le aso na ulu atu ai Noa i le vaa, na lē iloa foʻi e i latou ina seʻia oo le lolo, ma aveesea i latou uma.’ Ona faapea atu lea o Iesu e faapena foʻi mea e fai e tagata a o leʻi oo i le iʻuga o lenei lalolagi.​—Mataio 24:37-39.

 Ua faaalia i upu a Iesu, e mafai ona tatou aʻoaʻoina ni lesona mai mea na fai e tagata a o leʻi oo i le Lolo. E te manatua mea na faia e tagata a o tatou faitauina le Mataupu e 10 o le tusi lenei?— E ese le fia malolosi o isi tamāloloa ma na faasauā foʻi i tagata. Peitaʻi, na faapea mai Iesu e leʻi faalogo le toʻatele o tagata ina ua auina atu e le Atua Noa e talaʻi iā i latou.

Ua oo mai le aso na faapea ai Ieova iā Noa, o le a Ia faaumatiaina tagata leaga i se lolo. O le a lofia le lalolagi atoa i le vai, faapea ai ma mauga. Na faatonuina e Ieova Noa e fau se vaa telē. Sa pei lenei vaa o se pusa telē, e pei ona vaaia i le ata i le itulau e 238.

Na faatonuina e le Atua Noa, e fau le vaa ia lava lona telē ina ia mafai ona nonofo saogalemu uma ai lona aiga ma le tele o manu. Na galulue malosi si toeaina o Noa ma lona aiga. Na latou tāina i lalo laau uumi ma faaaogā e fau ai le vaa. E tele tausaga na fau ai le vaa auā o se vaa e telē tele.

E te manatua le isi galuega na faia e Noa a o fau le vaa?— Na talaʻi i tagata ma lapataʻi atu o le a oo mai le Lolo. Faamata na iai se tasi na faalogo? E leai ma se tasi na faalogo seʻi vaganā le aiga o Noa. Na pisi tele tagata i isi mea. E te manatua foʻi le mea na fetalai ai Iesu na latou faia?— Na latou pisi e aai, inu ma faaipoipo. Na latou manatu e lē leaga a latou mea o fai ma e leai se taimi e faalogo ai iā Noa. O lea la, seʻi tatou vāai po o le ā na tupu iā i latou.

Na tapuni e Ieova le faitotoʻa o le vaa ina ua iai uma i totonu Noa ma lona aiga. E leʻi talitonu lava tagata i fafo o le vaa faapea e sau le Lolo. Peitaʻi, na faafuaseʻi lava ona totō ifo timuga mai le lagi! E lē pei o isi timu. Na matuā maligi lava timuga! Ua  faateteleina le tafe o le vai ma ua paʻō lava. O lea na paʻūʻū ai laau tetele ma pei o se mea fua le taavavale solo o maa lapopoʻa ona o le tafe o le vai. Ae faapefea tagata i fafo o le vaa?— Na fetalai Iesu: ʻNa oo mai le lolo, ma aveesea uma i latou.’ Na feoti uma tagata na i fafo o le vaa. Aiseā?— Na faapea mai Iesu ʻe latou te leʻi iloa.’ Latou te leʻi faalogo!​—Mataio 24:39; Kenese 6:5-7.

Manatua foʻi, na fai mai Iesu e iai le lesona tatou te aʻoaʻoina mai le mea na tupu i na tagata. O le ā le lesona?— Na faaumatia na tagata e lē gata ona sa amioleaga, ae ona sa pisi tele ma e leʻi faalogologo i le tala e uiga i le Atua ma le mea o le a ia faia. E manaʻomia la ona tatou mataala neʻi pei i tatou o na tagata, a ea?—

O le ā sou manatu, faamata e toe faaumatia e le Atua le lalolagi i se lolo?— E leai, na folafola mai e le Atua e lē toe tupu lenā mea. Na ia fetalai mai: “Ua ou tuuina laʻu nuanua i le ao, e fai ma faailoga.” Na fetalai mai Ieova o le a fai le nuanua ma faailoga e “lē toe avea le vai ma lolo e faaumatia ai mea ola uma.”​—Kenese 9:11-17.

E mafai la ona tatou mautinoa, e lē toe faaumatia e le Atua le lalolagi i se lolo. Peitaʻi, e pei ona tatou iloaina, o loo taʻua e le Tusi Paia le iʻuga o le lalolagi. Pe afai e aumai e le Atua le faaumatiaga o lenei lalolagi, o ai o le a sao mai ai?—  Faamata e faasaoina tagata e tele ina pupū i isi mea ae lē mananaʻo e aʻoaʻoina tala e uiga i le Atua? Pe faasaoina tagata e pisi tele, ma lē maua so latou taimi e suʻesuʻe ai le Tusi Paia? O le ā sou manatu?—

Tatou te mananaʻo e faasaoina i tatou e le Atua, a ea?— Ai se manaia pe a pei si o tatou aiga o le aiga o Noa, ma faasaoina uma e le Atua, a ea?— Ina ia mafai ona tatou sao mai le iʻuga o le lalolagi, e moomia ona tatou malamalama i le auala o le a faaumatia ai e le Atua, ma pe faapefea foʻi ona ia aumaia lana lalolagi fou. Seʻi tatou vaai la i ai.

O loo aumaia e le Tusi Paia le tali i le Tanielu mataupu e 2 fuaiupu e 44. O loo faasino le mau i o tatou aso: “O ona pō o ia tupu e faatuina ai e le Atua o le lagi o le malo e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”

O e malamalama i le mau?— O loo faapea mai le Tusi Paia, o le a faaumatia e le malo o le Atua malo uma o i le lalolagi. Aiseā?— Talu ai e lē o usiusitai nei malo i Lē ua tofia e le Atua e avea ma Tupu. O ai ia lenā?— Ioe, o Iesu Keriso!

E iai le aiā a Ieova e filifilia ai le malo e tatau ona pule, ma ua ia filifilia lona Alo o Iesu e fai ma Tupu. Ua toeitiiti nei ona taʻitaʻia lea e Iesu Keriso, le Pule ua filifilia e le Atua, le faaumatiaina o malo o lenei lalolagi. Ua faamatala e le Tusi Paia i le Faaaliga mataupu e 19 fuaiupu e 11 seʻi oo i le 16, le faaumatiaina o malo e Iesu, e pei ona vaaia i le ata. E tusa ai ma le Tusi Paia, o le igoa o le taua a le Atua lea o le a faaumatia ai malo uma o le lalolagi, o Amaketo.

 Ua fetalai mai le Atua e faaumatia e lona Malo, malo o le lalolagi. Peitaʻi, faamata o faatonu i tatou e le Atua e tatou te faia lenā mea?— E leai auā ua faapea mai le Tusi Paia, o Amaketo o “le taua i le aso tele o le Atua e ona le malosi uma lava.” (Faaaliga 16:14, 16) Ioe, o Amaketo o le taua a le Atua, ma ua ia faaaogāina Iesu e taʻitaʻiina le ʻautau o agelu i le taua. Po ua lata mai le taua o Amaketo? Seʻi o tatou vāai la po o le ā le tali.