OITI yu yere wan sma e taki fu a kaba fu grontapu?— Na ini a ten disi, furu sma e taki fu a sani dati. Son sma e denki taki grontapu sa kon na wan kaba na ini wan feti pe libisma e gebroiki atoombom. Yu denki taki oiti Gado o meki libisma pori wi moi grontapu?—

Soleki fa wi leri, dan Bijbel e taki fu a kaba fu grontapu. Bijbel e taki: „Grontapu e pasa gowe” (1 Yohanes 2:17). Yu denki taki a kaba fu grontapu wani taki dati a grontapu pe wi e libi, no sa de moro?— Nôno, Bijbel e taki dati Gado  meki grontapu „fu sma libi na tapu”, iya, a meki en so taki sma ben kan tan na en tapu èn nyan bun fu en (Yesaya 45:18). Psalm 37:29 e taki: „Na den regtfardikisma srefi sa abi grontapu leki a gudu fu den, èn den sa libi na tapu fu têgo.” Na fu dati ede meki Bijbel e taki tu dati grontapu sa tan fu têgo.​—Psalm 104:5; Preikiman 1:4.

Sobun, efu a kaba fu grontapu no wani taki dati wan kaba sa kon na a grontapu pe wi e libi, dan san a wani taki?— Wi kan kon sabi dati te wi e luku finifini san ben pasa na ini a ten fu Noa. Bijbel e taki: „A grontapu fu a ten dati ben kisi pori di watra sungu en.”​—2 Petrus 3:6.

Sma tan na libi di a Frudu pori grontapu na ini a ten fu Noa?— Bijbel e taki dati Gado „ben kibri Noa, wan preikiman fu regtfardikifasi, makandra nanga seibi tra sma, di a ben tyari wan bigi frudu kon na tapu den ogrisma”.​—2 Petrus 2:5.

We, dan san ben de a grontapu di ben kon na wan kaba? A ben de a grontapu srefi, noso a ben de den ogrisma na grontapu?— Bijbel e taki dati a ben de „den ogrisma”. Èn luku taki Bijbel e kari Noa „wan preikiman”. San yu denki a ben e preiki?— Noa ben e warskow den sma gi a kaba fu „a grontapu fu a ten dati”.

Di Yesus ben taki fu a bigi Frudu, dan a fruteri den disipel fu en san den sma ben e du syatu bifo a kaba kon. Disi na san a ben taigi den: „Na ini a ten dati bifo a frudu, sma ben e nyan, den ben e dringi, man ben e trow èn sma ben e gi umasma fu trow, teleki a dei doro di Noa go na ini na ark; ma den no ben poti prakseri na san ben pasa, teleki a frudu kon èn a wai den alamala puru.” Baka dati, Yesus taki dati sma ben o du leti so, bifo a grontapu disi e kon na wan kaba.​—Mateyus 24:37-39.

 Den wortu fu Yesus e sori wi taki wi kan leri wan prenspari sani fu san den sma ben e du na a ten bifo a Frudu. Yu sabi ete fu kapitel 10 fu a buku disi san den sma dati ben e du?— Sonwan fu den man ben takru srefisrefi èn den ben e du ogri-ati sani nanga sma. Ma Yesus ben taki dati furu tra sma no ben arki Noa, di Gado ben seni en fu go preiki gi den.

Sobun wan dei, Yehovah taigi Noa taki a ben o tyari wan frudu kon fu kiri den ogrisma. Heri grontapu ben o de na ondro watra, srefi den bergi. Yehovah taigi Noa fu bow wan bigi ark. A ben gersi wan bigi, langa kisi, soleki fa yu kan si na tapu a prenki na tapu bladzijde 238.

Gado taigi Noa taki na ark ben musu bigi nofo fu man kibri en nanga en osofamiri èn sosrefi furu fu den meti. Noa nanga en osofamiri ben e wroko bun tranga. Den ben e koti bigi bon, èn den gebroiki na udu fu bigin bow na ark. A sani disi ben teki furu yari langa, bika na ark ben bigi srefisrefi.

Yu sabi san Noa ben e du moro fara na ini ala den yari di a ben e bow na ark?— A ben e preiki, èn a ben e warskow den sma gi a Frudu di ben o kon. Den sma ben arki en? Nowan fu den ben arki, boiti a famiri fu Noa. Den tra sma ben e du tra sani. Yu e memre ete san Yesus ben taki dati den sma ben e du?— Den ben e nyan èn den ben e dringi, èn den ben e trow. Den no ben si densrefi leki ogrisma èn den no ben teki ten fu arki Noa. Sobun, meki wi luku san pasa nanga den.

Baka di Noa nanga en famiri go na ini na ark, dan Yehovah tapu a doro. Sma na dorosei no ben wani bribi ete taki a Frudu ben o kon. Ma wantronso, watra bigin fadon komoto na loktu! Na alen disi no ben de wan pikin alen. A ben de wan bun hebi alen! Heri esi a watra kon tron bigi liba, di ben e meki bigi babari.  A watra ben hari bigi bon puru èn a ben e srepi bigi ston gowe neleki den ben de pikinpikin lekti ston. Èn fa a ben de nanga den sma dorosei fu na ark?— Yesus e taki: „A frudu kon èn a wai den alamala puru.” Ala den sma dorosei fu na ark dede. Fu san ede?— Soleki fa Yesus ben taki, dan ’den no ben poti prakseri na san ben e pasa’. Den no ben e arki!​—Mateyus 24:39; Genesis 6:5-7.

Now, memre taki Yesus ben taki dati den sani di ben pasa nanga den sma dati, na wan warskow gi wi na ini a ten disi. San wi kan leri?— We, sma no ben kisi pori soso fu di den ben takru, ma sosrefi fu di furu fu den ben e du tra sani. Den no ben teki ten fu kon sabi moro fu Gado èn fu den sani di a ben o du. Wi musu luku bun taki wi no de leki den, a no so?—

Yu denki taki Gado sa meki wan frudu pori grontapu baka?— Nôno, Gado pramisi taki a no ben o du dati. A ben taki: „Mi e poti mi alenbo na ini a wolku, èn a musu dini leki wan marki.” Yehovah ben taki dati na alenbo ben o de wan marki fu sori taki „noiti moro den watra sa tron wan frudu fu tyari pori kon na ala skin”.​—Genesis 9:11-17.

Sobun, wi kan de seiker taki noiti moro Gado sa meki wan frudu pori grontapu. Ma soleki fa wi si, Bijbel e taki trutru taki wan kaba o kon na grontapu. Te Gado o pori a grontapu disi, dan suma a sa hori  na libi?— A sa de den sma di ben e poti so furu prakseri na tra sani taki den no ben wani leri noti fu Gado? A sa de den sma di noiti no ben abi ten fu studeri Bijbel? San yu denki?—

Wi wani de wan fu den sma di Gado sa hori na libi, a no so?— A no ben o moi efu wi famiri ben de leki a di fu Noa, so taki Gado ben kan kibri wi alamala?— Efu wi wani tan na libi te a grontapu disi o kon na wan kaba, dan wi musu frustan fa Gado sa pori en èn fa a sa tyari a regtfardiki nyun grontapu kon. Meki wi luku fa a e du disi.

Bijbel e gi wi a piki na Danièl kapitel 2, vers 44. A tekst disi e taki fu a ten fu wi, èn drape skrifi: „Na ini den dei fu den kownu dati, a Gado fu hemel sa opo wan kownukondre [noso tirimakti] di noiti no sa kisi pori. Èn a kownukondre srefi no sa gi na nowan tra sma. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.”

Yu e frustan dati?— Bijbel e taki dati a tirimakti fu Gado o pori ala den tirimakti fu grontapu. Fu san ede?— Fu di den no e gi yesi na a Sma di Gado poti leki Kownu. Èn suma na dati?— Iya, Yesus Krestes!

Yehovah Gado abi a reti fu bosroiti sortu tirimakti musu tiri, èn a teki en Manpikin, Yesus, fu tiri leki Kownu. Heri esi Gado en Tiriman, Yesus Krestes, sa bigin fu pori ala den tirimakti fu a grontapu disi. Bijbel e fruteri na ini Openbaring kapitel 19, vers 11 te go miti 16, fa a o du dati, èn yu kan si dati tu na tapu a prenki disi. Bijbel e kari a feti pe Gado sa pori ala den tirimakti fu grontapu, Har–Magedon noso Armagedon.

Soleki fa yu e si, dan Gado e taki dati en Kownukondre sa pori  den tirimakti fu libisma. Ma a e taki dati na wi musu du dati?— Nôno, Bijbel e kari Armagedon „a feti fu a bigi dei fu Gado na Almaktiwan” (Openbaring 16:14, 16). Iya, Armagedon na a feti fu Gado, èn Gado e gebroiki Yesus Krestes leki fesiman fu den hemel legre na ini a feti dati. A feti fu Armagedon de krosibei? Meki wi luku fa wi kan kon sabi dati.