UKHONA yini umuntfu loke wamuva akhuluma ngekubhubha kwemhlaba?— Lamuhla, bantfu labanyenti bayakhuluma ngako. Labanye bacabanga kutsi umhlaba utawubhubha emphini lapho bantfu batawusebentisa khona emabhomu enyukliya. Ucabanga kutsi Nkulunkulu utawuke awubhubhise yini umhlaba wetfu lomuhle kanye nemazulu lamahle lanetinkhanyeti letikhatimulako?—

Njengobe sike safundza, liBhayibheli likhuluma ngekuphela kwemhlaba. Litsi: “Live liyendlula.” (1 Johane 2:17) Ucabanga  kutsi kuphela kwelive kutawusho kubhubha kwemhlaba lesiphila kuwo?— LiBhayibheli litsi Nkulunkulu wenta umhlaba kutsi bantfu ‘bahlale’ kuwo futsi bawujabulele. (Isaya 45:18) Tihlabelelo 37:29 titsi: ‘Labalungile bayawudla lifa lemhlaba, bahlale kuwo kuze kube phakadze.’ Ngaleso sizatfu, liBhayibheli liphindze litsi umhlaba utawuba khona kuze kube phakadze.​—Tihlabelelo 104:5; Umshumayeli 1:4.

Ngako nangabe kuphela kwelive kungasho kuphela kwemhlaba lesiphila kuwo, kusho kutsini vele?— Imphendvulo singayitfola nangabe sibukisisa lokwenteka ngesikhatsi saNowa. LiBhayibheli liyachaza: “Live langaleso sikhatsi labhujiswa nalimbonywa ngemanti.”​—2 Phetro 3:6.

Ukhona yini umuntfu lowasindza nakubhubha umhlaba ngaZamcolo ngesikhatsi saNowa?— LiBhayibheli litsi Nkulunkulu “walondvolota Nowa umshumayeli wekulunga, wamgcina aphephile kanye nalabanye labasikhombisa, ngesikhatsi aletsa Zamcolo eveni lebantfu labangamesabi Nkulunkulu.”​—2 Phetro 2:5.

Ngako-ke, ngumuphi lomhlaba lowaphela? Bekungumhlaba yini nobe bekubantfu labenta tintfo letimbi?— LiBhayibheli litsi ‘bekubantfu labangamesabi Nkulunkulu.’ Ase unake nekutsi Nowa ubitwa ngekutsi ‘ngumshumayeli.’ Ucabanga kutsi bekashumayela ngani?— Nowa bekecwayisa bantfu ngekuphela ‘kwelive langaleso sikhatsi.’

Ngesikhatsi Jesu akhuluma ngaZamcolo lomkhulu, watjela bafundzi bakhe ngaloko bantfu lebebakwenta ngaphambi nje kwekutsi kuphela kufike. Naku labatjela kona: “Ngesikhatsi usengakefiki Zamcolo, bantfu bebadla, banatsa, labadvuna batsatsa, labasikati bendza, kwadzimate kwaba lilanga Nowa langena ngalo emkhunjini, futsi abazange banake kwate kwefika Zamcolo wabakhukhula bonkhe.” Ngemuva kwaloko, Jesu watsi bantfu batawenta lokufanako ngaphambi kwekutsi lelive liphele.​—Matewu 24:37-39.

 Lamavi aJesu asikhombisa kutsi singatfola sifundvo kuloko lebekwentiwa bantfu ngaphambi kwekutsi kucale Zamcolo. Njengobe safundza eSehlukweni 10 kulencwadzi, usakhumbula yini kutsi labantfu bentani?— Lamanye emadvodza bekahlupha bantfu futsi enta netintfo letilimata labanye. Kodvwa Jesu watsi labanye labanyenti abazange balalele ngesikhatsi Nkulunkulu atfumela Nowa kutsi ayobashumayela.

Ngako lefika lilanga lapho Jehova atjela Nowa kutsi utawubhubhisa bantfu labenta tintfo letimbi ngazamcolo. Lamanti bekatawumbonya wonkhe umhlaba ungabonakali, ngisho netintsaba. Jehova watjela Nowa kutsi akhe umkhumbi lomkhulu. Lomkhumbi bowunjengelibhokisi lelikhulu lelidze, njengobe ungawubona esitfombeni lesisekhasini 238.

Nkulunkulu watjela Nowa kutsi akhe lomkhumbi ube mkhulu kuze yena nemndeni wakhe bakhone kungena kuwo kanye naletinye tilwane letinyenti futsi baphephe. Nowa nemndeni wakhe basebenta matima. Bagawula tihlahla letinkhulu futsi basebentisa tingodvo tato kute bacale kwakha lomkhumbi. Lokwakha kwatsatsa iminyaka leminyenti kakhulu ngobe lomkhumbi bewumkhulu kakhulu.

Usakhumbula kutsi yini lenye Nowa labekayenta kuleyo minyaka njengobe bekakha lomkhumbi?— Bekashumayela, ecwayisa bantfu ngaZamcolo lotawufika. Bakhona yini bantfu labamlalela? Kute ngisho namunye umuntfu lowalalela ngaphandle kwemndeni waNowa. Labanye bona bebamatasatasa kakhulu benta letinye tintfo. Usakhumbula kutsi Jesu watsi yini labantfu lebebayenta?— Watsi bebadla, banatsa futsi bashada. Labantfu bebangacabangi kutsi abamhloniphi Nkulunkulu futsi abazange batinike sikhatsi sekulalela Nowa. Ase sibone-ke kutsi kwentekani kubo.

Ngemuva kwekutsi Nowa nemndeni wakhe sebangenile kulomkhumbi, Jehova wavala umnyango wawo. Bantfu lebebangephandle kwalomkhumbi bebasolo bangetsembi kutsi Zamcolo utawufika. Kodvwa  ngekushesha nje, imvula yacala kuna. Bekungasiyo nje imvula levamile. Beliyitsela kakhulu. Ngekushesha emanti alemvula bese akhe imifula futsi abanga nemsindvo lomkhulu. Awisa tihlahla letinkhulu futsi agicita ematje lamakhulu kwaba shengatsi kugicika ematje lamancane. Kwentekani kulabantfu labangazange bangene kulomkhumbi?— Jesu watsi: “Zamcolo wabakhukhula bonkhe.” Bonkhe labantfu bafa. Kungani bafa?— Njengobe Jesu asho, “abazange banake.” Abalalelanga.​—Matewu 24:39; Genesisi 6:5-7.

Khumbula kutsi Jesu watsi loko lokwenteka kulabantfu kusibonelo lesisecwayiso kitsi. Ngusiphi sifundvo lesisitfolako?— Sitfola kutsi labantfu abazange babhujiswe ngobe bebenta tintfo letimbi, kodvwa babhujiselwa kutsi linyenti labo belimatasa kakhulu futsi lingatiniki sikhatsi sekufundza ngaNkulunkulu nangaloko bekatakwenta. Natsi kudzingeka sinakisise kutsi singafanani nalabantfu, angitsi kunjalo?—

Ucabanga kutsi Nkulunkulu utawuphindze alibhubhise ngazamcolo yini lelive?— Nkulunkulu wetsembisa kutsi ngeke aphindze ente njalo. Watsi: “Ngibeka umushi wenkosazana emafini, uyawuba luphawu.” Jehova watsi lomushi wenkosazana bewutawuba luphawu lwekutsi “emanti angeke aphindze abe nguzamcolo wekubhubhisa konkhe lokuphilako.”​—Genesisi 9:11-17.

Ngako singaciniseka kutsi Nkulunkulu ngeke aphindze abhubhise umhlaba ngazamcolo. Nanobe kunjalo, njengobe sibonile, liBhayibheli liyakhuluma ngekuphela kwemhlaba.  Ngesikhatsi Nkulunkulu sekabhubhisa lomhlaba, utawusindzisa bobani?— Utawusindzisa bantfu lebebanaka letinye tintfo yini baze bangafuni kufundza ngaYe? Nobe utawusindzisa labo labebahlale bamatasa futsi bete sikhatsi sekufundza liBhayibheli? Ucabanga kutsi bobani latabasindzisa?—

Angitsi mine nawe siyafuna kuba semkhatsini walabo Nkulunkulu latabasindzisa?— Ngeke kube mnandzi yini nangabe umndeni wetfu bowungafana nemndeni waNowa kute Nkulunkulu asisindzise natsi?— Kute sisindze nakuphela lelive, kudzingeka sicondze indlela Nkulunkulu latalibhubhisa ngayo lelive bese usiletsela lelisha lelinekulunga. Ase sibone kutsi utakwenta njani loko.

LiBhayibheli liyaphendvula kuDanyela sehluko 2, evesini 44. Lombhalo ukhuluma ngesikhatsi setfu salamuhla njengobe utsi: “Ngesikhatsi salawo makhosi, Nkulunkulu welizulu uyawumisa umbuso [nobe hulumende] longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”

Uyakucondza yini loku?— LiBhayibheli litsi hulumende waNkulunkulu utawubhubhisa bonkhe bohulumende labasemhlabeni. Utakwentelani loku Nkulunkulu?— Kungenca yekutsi abamlaleli Loyo Nkulunkulu lambeke kutsi abe yiNkhosi. Ngubani lona Nkulunkulu lambekile?— NguJesu Khristu!

Jehova Nkulunkulu unelilungelo lekukhetsa kutsi ngumuphi hulumende lokufanele ubuse, futsi ukhetse iNdvodzana yakhe Jesu kutsi abe yiNkhosi. Madvutane, uMbusi Nkulunkulu lamkhetsile, Jesu Khristu, utawuhola ekubhujisweni kwabo bonkhe bohulumende labasemhlabeni. LiBhayibheli kuSembulo sehluko 19, emavesini 11 kuya ku-16, limchaza enta njalo, njengobe ubona kulesitfombe. EBhayibhelini, lemphi yaNkulunkulu letawubhubhisa bonkhe bohulumende basemhlabeni ibitwa ngekutsi yi-Amagedoni.

 Nyalo, Nkulunkulu utsi uMbuso wakhe utawubhubhisa bohulumende bebantfu. Kodvwa uyasitjela yini natsi kutsi sikwente loko?— Akasitjeli, ngobe eBhayibhelini i-Amagedoni ibitwa ngekutsi “yimphi yelilanga lelikhulu laNkulunkulu Somandla.” (Sembulo 16:14, 16) Ngako, i-Amagedoni yimphi yaNkulunkulu, futsi usebentisa Jesu Khristu kutsi ahole emabutfo asezulwini kulemphi. Sekusedvutane yini kutsi lemphi ye-Amagedoni ifike? Ase sibone kutsi singayitfola yini imphendvulo yalombuto.