Cibalo 46

Maanzi Mbwaakanyonyoona Nyika—sena Cili Boobo Ciyoocitika Alimwi Kumbele?

SENA kuli muntu ngowakamvwa wakali kwaamba zyakumana kwanyika?— Mbanji sunu bantu ibaamba makani aayo. Bamwi bayeeya kuti inyika iyoonyonyoonwa munkondo bantu mobanoobelesya mabbomba aanyukkiliya. Sena uyeeya kuti Leza kuli nayoonyonyoona nyika yesu mbotu alimwi ajulu kubikkilizya anyenyeezi zyalyo izimweka?—

Mbubwenya mbotwaiya, Ibbaibbele lilakwaamba kumana kwanyika. Lyaamba kuti: “Nyika ilamana.” (1 Johane  2:17) Sena uyeeya kuti ikumana kwanyina nkolyaamba Bbaibbele caamba kunyonyooka kwanyika yini?— Peepe tacaambi boobo, Ibbaibbele lyaamba kuti Leza wakabumba nyika “kuti ikalwe bantu,” akuti kabakkomene nobakkede aalinjiyo. (Isaya 45:18) Ibbuku lya Intembauzyo 37:29 lyaamba kuti: “Balulami bayookona nyika, bayookala alinjiyo lyoonse.” Akaambo kaceeci, Ibbaibbele alimwi lyaamba kuti nyika inooliko lyoonse.—Intembauzyo 104:5; Mukambausi 1:4.

Aboobo, ikuti ikumana kwanyika takwaambi kunyonyooka kwanyika yini, ino kwaamba nzi?— Tulakonzya kubujana bwiinguzi ikuti twacilanga-langa kabotu cakacitika kuciindi ca Nowa. Ibbaibbele lipandulula kuti: “Eyo nyika yaciindi eciya yakanyonyoonwa . . . mboyakapayizigwa maanzi.”—2 Petro 3:6.

Sena kuli muntu wakafwutuka mamanino aanyika ciindi eco ca Zambangulwe kuciindi ca Nowa?— Ibbaibbele lyaamba kuti Leza “wakamubamba Nowa, mukambausi wabululami, abamwi bali musanu mubabili, naakapazya maanzi kulibasikasampusampu boonse baansi.”—2 Petro 2:5.

Aboobo, ino ninyika nzi yakanyonyoonwa? Sena yakali nyika yini, naa bakali bantu babi?— Ibbaibbele lyaamba kuti ‘ninyika yabasikasampusampu boonse baansi.’ Alimwi kozyiba kuti Nowa waambwa kuti “mukambausi.” Ino uyeeya kuti wakali kukambauka nzi?— Wakali kucenjezya bantu kujatikizya kumana kwa “nyika yaciindi eciya.”

Jesu naakaamba zya Zambangulwe, wakaambila basikwiiya bakwe kujatikizya cakali kucita bantu kakusyeede buyo ciindi cisyoonto kuti mamanino aayo asike. Wakabaambila kuti: ‘Kumazuba ayo maanzi naatakalina kupaya, ibantu bakali kulya akunywa, bakali kukwata akukwatizigwa, kusikila kubuzuba obo mbwaakanjila mubwaato Nowa, nkabela tiibakabikkila maanu mane kupaya kwamaanzi kwakasika akubatola.’ Mpoonya Jesu wakati ibantu bakali kuzyoocita zintu eezyo nzizyonya kaatanasika mamanino aanyika eeyi.—Matayo 24:37-39.

Imajwi aa Jesu atutondezya kuti tulakonzya kwiiya zintu ziyandika  kuli zeezyo nzyobakali kucita bantu kalitanasika Zambangulwe. Kwiinda mukubala Cibalo 10 cabbuku eeli, sena uciziyeeyede zintu bantu aabo nzyobakali kucita?— Ibaalumi bamwi bakali basilunya alimwi bakali kucita zintu zyabulwani. Pele ibambi banji, Jesu wakati kunyina nobakamuswiilila pe Nowa ooyo Leza ngwaakatuma kuti abakambaukile.

Aboobo cakasika ciindi Jehova naakaambila Nowa kuti Wakali kuyoobanyonyoona bantu babi amaanzi. Imaanzi akali kuyoovwumba nyika yoonse amalundu oonse. Jehova wakaambila Nowa kuti ayake bwaato bupati. Bwakali mbuli cibbokesi cipati alimwi cilamfwu mbubwenya mbobona mucifwanikiso cili apeeji 238.

Leza wakaambila Nowa kuti ayake bwaato bupati kapati mbwakonzya kunjila amukwasyi wakwe alimwi abanyama banji. Nowa abanamukwasyi wakwe bakabeleka canguzu kapati. Bakatema zisamu zipati, alimwi kwiinda mukubelesya mapulanga bakatalika kuyaka bwaato. Eeci cakatola myaka minji kapati akaambo kakuti bwaato bwakali bupati kapati.

Sena uciciyeeyede cintu cimbi Nowa ncaakali kucita myaka yoonse eeyo naakali kuyaka bwaato?— Wakali kukambauka, kacenjezya bantu kujatikizya Zambangulwe lyakali kuboola. Sena kuli bantu ibakabikkila maanu kukucenjezya ooko? Kunyina pe ibakaswiilila kunze buyo lyamukwasyi wa Nowa. Ibantu bambi boonse bakajisi bubi kucita zintu zimbi. Sena uciciyeeyede ncaakaamba Jesu kuti ncobakali kucita?— Bakajisi bubi kulya akunywa, kukwatwa alimwi akukwata. Kunyina nobakalibona kuti bakali bantu babi, eelyo kunyina nobakabikkila maanu kumuswiilila Nowa. Aboobo atubone cakabacitikila.

Nowa abanamukwasyi wakwe nobakanjila mubwaato, Jehova wakaujala mulyango wabwaato. Ibantu bakalaanze kunyina neciba ciindi eco nobakali kusyoma kuti Zambangulwe lyakali kunoosika. Pele campoonya-mpoonya, imvwula yakatalika kuwa! Tiiyakali mvwula yalyoonse pe. Wakali mucobocobo! Ndilyonya kwakazula milonga mipati  yakali kusabila kapati. Imaanzi akawisya zisamu zipati alimwi akukunkulisya mabwe mapati mbuli kuti akali tubwe-tubwe buyo. Pele ino ncinzi cakacitikila bantu bakali anze aabwaato?— Jesu wakati: “Kupaya kwamaanzi kwakasika akubatola.” Ibantu boonse batakali mubwaato bakafwa. Ino nkaambo nzi?— Mbubwena Jesu mbwaakaamba, ‘tiibakabikkila maanu.’ Kunyina nobakaswiilila pe!—Matayo 24:39; Matalikilo 6:5-7.

Lino koyeeya kuti Jesu wakaamba kuti eeco cakacitikila bantu aabo ceelede kutucenjezya swebo sunu. Ino nciiyo nzi ncotunga twaiya?— Ibantu tiibakanyonyoonwa akaambo buyo kakuti bakali babi, pele alimwi nkaambo ibanji tiibakajana ciindi cakwiiya zya Leza alimwi azeezyo nzyaakali kuyoocita. Tweelede kucenjela kuti tutabi mbuli mbabo, tee kayi?—

Sena uyeeya kuti Leza uyooinyonyoona nyika alimwi kumbele kwiinda mukubelesya zambangulwe?— Peepe, Leza wakasyomezya kuti takaciti oobo alimwi pe. Wakati: “Ndabika fulicoongo wangu mujoba, abe citondezyo.” Jehova wakaamba kuti fwulicoongo cakali kuyooba citondezyo cakuti “takukooyoosika limbi maanzi aazambangulwe kuzoovwinyauna bantu boonse.”—Matalikilo 9:11-17.

Aboobo tulakonzya kusyoma kuti Leza takiinyonyooni nyika alimwi amaanzi. Nokuba boobo, mbubwenya mbotwabona, Ibbaibbele lilakwaamba kumana kwanyika. Eelyo Leza aakunyonyoona nyika eeyi, ino mbaani  mbayoofwutula?— Sena mbantu ibakabikkilide maanu kapati kuzintu zimbi cakuti tiibakali kuyanda kwiiya zya Leza? Sena banooli baabo ibakajisi bubi lyoonse cakuti tiibakajisi ciindi cakwiiya Bbaibbele? Ino uyeeya kuti mbaani ibayoofwutuka?—

Tuyanda kuti tukabe akati kabaabo Leza mbayoofwutula, tee kayi?— Sena inga tiicakkomanisya kapati ikuti mukwasyi wesu waba mbuli wa Nowa ikutegwa Leza akatufwutule toonse mumukwasyi?— Ikutegwa tukafwutuke mamanino aanyika, tweelede kuteelela mbuli Leza mbwayooinyonyoona akukkazikizya nyika yakwe mpya iiluleme. Atubone mbwayakucicita eeci.

Ibbaibbele litupa bwiinguzi kuli Daniele caandaano 2, akapango ka 44. Ilugwalo oolu lwaamba zyaciindi cesu noluti: “Mumazuba aabaami abo, Leza wakujulu uyoobusya bwami [naa mfwulumende] butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”

Sena ulaciteelela eco?— Ibbaibbele lyaamba kuti imfwulumende ya Leza iyoonyonyoona mfwulumende zyoonse zyabantunsi. Ino nkaambo nzi?— Nkaambo tazimumvwidi Ooyo Leza ngwakabikka kuba Mwami. Ino nguni oyo?— Inzya, ngu Jesu Kristo!

Jehova Leza nguujisi nguzu zyakusala mfwulumende yeelede kweendelezya, alimwi wakasala Mwanaakwe Jesu kuti abe Mwami. Ino-ino Mweendelezi ngwasalide Leza, Jesu Kristo uyoosololela mukunyonyoona mfwulumende zyoonse zyanyika eeyi. Ibbaibbele ku Ciyubunuzyo caandaano 19, tupango 11 kusikila ku 16 lilamupandulula nacita boobo, mbubwenya acalo cifwanikiso eeci mbocitondezya. Mu Bbaibbele, inkondo ya Leza yakunyonyoona mfwulumende zyoonse zyamunyika yiitwa kuti Harmagedoni, naa Armagedoni.

Leza waamba kuti Bwami bwakwe buyoonyonyoona mfwulumende  zyabantunsi. Pele sena utwaambila kuti tuzinyonyoone?— Peepe, mu Bbaibbele Harmagedoni yiitwa kuti “[ni]nkondo yabuzuba bupati bwa-Leza Singuzuzyoonse.” (Ciyubunuzyo 16:14, 16) Inzya, Harmagedoni ninkondo ya Leza, alimwi ubelesya Jesu Kristo kusololela makamu aabangelo mulumamba oolo. Sena nkondo ya Harmagedoni ilaafwaafwi kuboola? Atubone bwiinguzi mbotunga twajana.

Atubalile antoomwe kujatikizya ciindi Leza nayoogwisya bantu babi boonse akufwutula baabo ibamubelekela, ku Tusimpi 2:21, 22; Isaya 26:20, 21; Jeremiya 25:31-33; alimwi a Matayo 24:21, 22.

[Cifwanikiso icili apeeji 238]

Ino ninyika nzi yakanyonyoonwa kuciindi ca Nowa?

[Cifwanikiso icili apeeji 241]

Ino nkaambo nzi ncotuteelede kunooyeeya buyo kulikondelezya?

[Cifwanikiso icili apeeji 243]

Jesu Kristo, Mwami ngwasalide Leza uyooinyonyoona nyika eeyi lya Harmagedoni