NAKABATI ka na ba hin usa ka tawo nga nag-iistorya mahitungod han kataposan han kalibotan?— Damu yana nga panahon an nag-iistorya mahitungod hito. An iba nga mga tawo naghuhunahuna nga bubungkagon an kalibotan ha girra diin gagamiton han mga tawo an nuklear nga mga bomba. Ha hunahuna mo, tutugotan ba han Dios an mga tawo nga bungkagon an aton matahom nga tuna?—

Sugad han aton hinbaroan na, an Biblia nagsusumat mahitungod han kataposan han kalibotan. “An kalibotan nawawara,”  nasiring an Biblia. (1 Juan 2:17) Ha hunahuna mo, an kataposan ba han kalibotan mangangahulogan han kataposan han tuna?— Diri, an Biblia nasiring nga an Dios naghimo han tuna ‘basi pag-ukyan,’ oo, basi an mga tawo mag-ukoy dida hito ngan matagbaw dida hito. (Isaias 45:18) An Salmo 37:29 nasiring: “An mga magtadong makakapanunod han tuna, ngan maukoy hira dida hin waray kataposan.” Tungod hini nga hinungdan an Biblia nasiring liwat nga an tuna magpapabilin ha kadayonan.​—Salmo 104:5; Eklesiastes 1:4.

Salit kon an kataposan han kalibotan diri nangangahulogan han kataposan han tuna, ano an kahulogan hito?— Mahibabaroan naton an baton kon aton usisahon hin maopay an nahitabo ha panahon ni Noe. An Biblia nasiring: ‘An kalibotan hadto nga panahon nag-antos hin kabungkagan han linibnasan ito [o, ginbahaan] hin tubig.’​—2 Pedro 3:6.

May-ada ba natalwas ha kataposan han kalibotan durante hiton nga Delubyo, o daku nga Baha, ha panahon ni Noe?— An Biblia nasiring nga an Dios ‘nagluwas kan Noe, nga parawali han katadongan, upod an pito nga iba pa han pagpalunupi niya han kalibotan han diri-magtinoohon ha Dios.’​—2 Pedro 2:5.

Salit, ano an kalibotan nga natapos? An tuna ba, o an magraot nga mga tawo?— An Biblia nasiring nga an ‘kalibotan han diri-magtinoohon ha Dios.’ Ngan tigamni, hi Noe tinawag nga ‘parawali.’ Ano ha hunahuna mo an iya iginwawali?— Hi Noe nagpahamangno ha mga tawo mahitungod han kataposan han ‘kalibotan hito nga panahon.’

Han gin-unabi ni Jesus an mahitungod han daku nga Baha, iya ginsumatan an iya mga disipulo mahitungod han ginbubuhat han mga tawo antes gud umabot an kataposan. Ini an iya ginsiring ha ira: ‘Ha mga adlaw han waray pa an paglunop, an mga tawo nagpipinangaon ngan nagpipinanginom, nangangasawa ngan napapangasal, tubtob ha pagsulod ni Noe ha arka; ngan hira waray mamati tubtob ha pag-abot han paglunop ngan igin-anod hira ngatanan.’ Katapos, hi Jesus nagsiring nga an mga tawo magbubuhat hin sugad hito antes matapos ini nga kalibotan.​—Mateo 24:37-39.

 Ipinapakita ha aton han mga pulong ni Jesus nga mahibabaro kita hin importante nga mga leksyon tikang ha ginbinuhat han mga tawo antes han Baha. Ha pagbasa ha Kapitulo 10 hini nga libro, nahinunumdom ka ba kon ano an ginbuhat hito nga mga tawo antes han Baha?— An iba mga mabangis ha mas maluya nga mga tawo ngan nagbuhat hin kamadarahog. Kondi damu nga iba pa, siring ni Jesus, an waray gud la mamati han ginsugo han Dios hi Noe nga magwali ha ira.

Salit inabot an panahon nga nagsiring hi Jehova kan Noe nga Iya bubungkagon an magraot nga mga tawo pinaagi han baha. An katubigan magtatabon han bug-os nga tuna, bisan han kabukiran. Ginsugo ni Jehova hi Noe nga magtukod hin daku nga arka. Pariho ito han daku, hilaba nga kahon, sugad han makikita mo ha retrato ha pahina 238.

An Dios nagsugo kan Noe nga magtukod hin daku nga arka basi hiya ngan an iya pamilya ngan an damu nga mga hayop magin talwas ha sulod hito. Hi Noe ngan an iya pamilya maduruto gud nga nagtrabaho. Nagpulod hira hin dagku nga mga kahoy, ngan nagtikang hira magtukod han arka nga ginagamit an kahoy. Damu hinduro nga mga tuig ini nga pagtrabaho tungod kay daku hinduro an arka.

Nahinunumdom ka ba kon ano pa an ginbuhat ni Noe durante han ngatanan nga katuigan nga gintutukod niya an arka?— Nagwawali hiya, nagpapahamangno ha mga tawo mahitungod han tiarabot nga Baha. May-ada ba namati ha pahamangno? Waray namati gawas han pamilya ni Noe. An iba okupado hinduro ha pagbuhat han iba nga mga butang. Nahinunumdom ka ba han ginsiring ni Jesus nga ira ginbubuhat?— Okupado hira ha pagpinangaon ngan pagpinanginom ngan pangasawa. Waray hira maghunahuna nga magraot hira hinduro nga mga tawo, ngan waray hira maghatag hin panahon ha pamati kan Noe. Salit aton kitaon kon ano an nahitabo ha ira.

Han nakasulod na hi Noe ngan an iya pamilya ha arka, ginsadhan ni Jehova an purtahan han arka. An mga tawo ha gawas han arka diri la gihapon natoo nga maabot an Baha. Kondi tigda la nga inuran! Diri ito ordinaryo la nga uran. Makusog hinduro ito nga uran! Waray pag-iha an  tubig pariho na hin dagku nga mga salog, nga maaringasa hinduro. Gintumba hito an dagku nga mga kahoy ngan ginbalintong an dagku nga mga bato nga baga in gudtiay la ito. Ngan ano an nahitabo ha mga tawo ha gawas han arka?— Hi Jesus nagsiring: ‘Inabot an baha ngan igin-anod hira ngatanan.’ Namatay an ngatanan nga mga tawo ha gawas han arka. Kay ano?— Sugad han ginsiring ni Jesus, ‘hira waray mamati!’ Waray gud hira mamati!​—Mateo 24:39; Genesis 6:5-7.

Yana, hinumdumi nga nagsiring hi Jesus nga an nahitabo hiton nga mga tawo usa nga nagpapahamangno nga leksyon para ha aton yana. Ano nga leksyon an mahibabaroan naton?— Aw, ginbungkag an mga tawo diri la tungod kay magraot hira kondi tungod liwat kay damu an okupado hinduro salit waray hira maghatag hin panahon ha paghibaro mahitungod ha Dios ngan mahitungod han iya pagbubuhaton. Kinahanglan mag-ikmat kita nga diri kita magin pariho ha ira, diri ba?—

Ha hunahuna mo, bubungkagon ba utro han Dios an kalibotan pinaagi han baha?— Diri, an Dios nagsaad nga diri na niya bubungkagon an kalibotan pinaagi han baha. Hiya nagsiring: “Akon iginbutang an akon balangaw ha dampog, ngan ito amo an tigaman.” Hi Jehova nagsiring nga an balangaw amo an magigin tigaman nga ‘an mga tubig diri na mahihimo nga lunop nga magruruba han ngatanan nga unod.’​—Genesis 9:11-17.

Salit makakasiguro kita nga diri na gud bubungkagon han Dios an kalibotan pinaagi han baha. Kondi, sugad han aton nasabtan, an Biblia nagsusumat gud mahitungod han kataposan han kalibotan. Kon bungkagon na han Dios ini nga kalibotan, hin-o an iya tatalwason?— An  mga tawo ba nga interesado hinduro ha iba nga mga butang salit diri na nira karuyag nga mahibaro mahitungod ha Dios? Adto ba nga okupado hinduro pirme salit waray panahon ha pag-aram ha Biblia? Ano ha hunahuna mo?—

Karuyag naton nga kaupod kita hadton tatalwason han Dios, diri ba?— Diri ba makalilipay kon an aton pamilya magin pariho han pamilya ni Noe basi talwason kita ngatanan han Dios?— Basi kita matalwas ha kataposan han kalibotan, kinahanglan masabtan naton kon paonan-o bubungkagon ito han Dios ngan kon paonan-o niya ipapahamutang an iya matadong nga bag-o nga kalibotan. Aton kitaon kon paonan-o niya bubuhaton ini.

An Biblia naghahatag ha aton han baton ha Daniel kapitulo 2, bersikulo 44. Gin-uunabi hini nga teksto an mahitungod han aton panahon han ito nasiring: “Ha mga adlaw hito nga kahadian an Dios ha langit magpapabangon hin usa nga ginhadian [o gobyerno], nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.”

Nasasabtan mo ba ito?— An Biblia nasiring nga an gobyerno han Dios magbubungkag han ngatanan nga mga gobyerno han tawo. Kay ano?— Tungod kay diri hira nasugot ha Usa nga pinili han Dios nga Hadi. Ngan hin-o hiya?— Oo, hi Jesu-Kristo!

Hi Jehova nga Dios may-ada katungod ha pagbuot kon ano nga klase hin gobyerno an sadang magmando, ngan pinili niya an iya Anak, hi Jesus, nga magin Hadi. Diri na mag-iiha an Magmarando nga pinili han Dios, hi Jesu-Kristo, mangunguna ha pagbungkag han ngatanan nga mga gobyerno hini nga kalibotan. An Biblia, ha Pahayag kapitulo 19, bersikulo 11 tubtob 16, naghuhulagway ha iya samtang ginbubuhat niya ito, sugad la han ipinapakita hini nga retrato. Ha Biblia, an girra han Dios nga magbubungkag han ngatanan nga mga gobyerno han kalibotan tinatawag nga Har–​Magedon, o Armagedon.

 Yana, an Dios nasiring nga an iya Ginhadian magbubungkag han mga gobyerno han mga tawo. Kondi nagsusugo ba hiya ha aton nga buhaton ito?— Diri, ha Biblia, an Armagedon tinatawag nga ‘an girra han daku nga adlaw han Dios nga Makagarahum-ha-ngatanan.’ (Pahayag 16:​14, 16) Oo, an Armagedon amo an girra han Dios, ngan gagamiton niya hi Jesu-Kristo nga manguna ha mga anghel ha pakig-away. Hirani na ba umabot an Armagedon? Kitaon naton kon paonan-o naton mahibabaroan.