ÑEE huayunadiágaluʼ chuʼ tu guiníʼ maʼ chiguinitilú guidxilayú riʼ la?... Ca dxi stinu riʼ stale tu ruzeeteʼ ni. Nuu tu riníʼ ique hombre nga chiguni ni lu ti guendaridinde ra iquiiñecaʼ stale bomba. Xcaadxi runi cré Dios nga chigunitilú Guidxilayú sicarú stinu riʼ, ne zaqueca guibáʼ sicarú ni napa stale beleguí ni ruzaaniʼ ca. Lii yaʼ, xi raʼbuʼ....

Casi maʼ bizíʼdinu ca, Biblia caníʼ: «Canitilú guidxilayú» (1 Juan 2:17). Ñee raʼbuʼ riníʼ nga zadxiña dxi guinitilú  Guidxilayú ripeʼ la?... Coʼ, Biblia cusiene laanu biʼniʼ Dios Guidxilayú riʼ «para cuézacabe luni», para guibani binni luni nayecheʼ (Isaías 45:18). Salmo 37:29 na: «Cani runi jneza ca zacaacaʼ guidxilayú, ne zabánicaʼ luni guiráʼ dxi». Pur nga runi, Stiidxaʼ Dios laaca riníʼ qué ziuu dxi guinitilú Guidxilayú riʼ (Salmo 104:5; Eclesiastés 1:4).

Pa ca diidxaʼ guinitilú guidxilayú riʼ qué riníʼ diʼ ni chiguinitilú planeta stinu riʼ, yanna xi riníʼ cani yaʼ.... Para gánnanu xi riníʼ cani la? guidúʼyanu xi guca ca dxi stiʼ Noé que. Biblia caníʼ: «Binitilú guidxilayú chiqué, dxi bilaahua ni que» (2 Pedro 3:6).

Ñee guyuu tu bilá ora biaba Nisaguié roʼbaʼ ni binitilú guidxilayú ca dxi stiʼ Noé que la?... Biblia na «qué ñá be ca binni ni qué nulabi laabe chiqué, sínuque biseenda be ti nisa roʼ dede bilaahua caʼ, ne guti irá caʼ. Peru bilá be Noé ni gudxi laaca nusaana ca irá enda ruchee sticaʼ, laasi ne xcadxe binni» (2 Pedro 2:5).

Nga runi, xii nga binitilú yaʼ: Guidxilayú riʼ la? o binni malu.... Biblia na binitilú «ca binni ni qué nulabi laabe chiqué». Ne laaca ridúʼyanu guniʼné Noé binni. Xidé guníʼnebe binni yaʼ.... Gúdxibe laacaʼ maʼ zidxiña dxi guinitilú «guidxilayú [de] chiqué».

Ti biaje, guniʼné Jesús ca discípulo stiʼ de Nisaguié roʼbaʼ que ne gúdxibe laacaʼ xi biʼniʼ ca binni que ante guinitilú guidxilayú que: «Ante [...] que la? cayó ca binni que ne cayéʼ caʼ, cachaganá caʼ ne cucheela caʼ, dede dxi biuu Noé ndaani arca que. Ne caʼru guiene ca xi chi gaca dede ora beeda nisa que, ziné irá caʼ». Jesús guníʼ laaca zacaca zuni binni ca dxi stinu ante guinitilú guidxilayú riʼ (Mateo 24:37-39).

 Ca diidxaʼ guníʼ Jesús riʼ rusihuinni cani zanda guizíʼdinu xiixa de ni biʼniʼ ca binni que ante gueeda Nisaguié roʼbaʼ que. Lu capítulo 10 stiʼ libru riʼ maʼ bíʼyanu xi guiráʼ bíʼnicabe. Ñee rietenaláʼdxiluʼ ni la?... Tuudxi de ca hombre que guizáʼ malu gúcacaʼ ne bininacaʼ binni. Peru casi guníʼ Jesús que, stale binni qué nulabi diʼ Noé ora biseendaʼ Dios laa guiniʼné laacaʼ.

Peru bidxiña dxi Jiobá gúdxibe Noé zunitilube binni malu ne ti nisaguié roʼbaʼ. Nisa que zuchii ni guidubi lu Guidxilayú, dede ca dani jma nasoo que. Jiobá biʼniʼ mandarbe Noé guni ti arca ngola. Zeeda gácani casi ti caja ziuulaʼ ne guizáʼ naroʼbaʼ, casi modo ruuyuʼ lu dibuju ni cá lu yaza 238 ca.

Dios gúdxibe Noé guni arca que naroobapeʼ purtiʼ ndaaniʼ ni nga chiguilácabe, cadi laasibe ne binnilídxibe, sínuque ne stale maniʼ. Noé ne binnilidxi bíʼnicaʼ dxiiñaʼ nadipaʼ. Bisábacabe yaga roʼ, ne bigácabe ni para bizulúcabe bíʼnicabe arca que. Bindaacabe stale iza para bilúxecabe ni purtiʼ guizáʼ naroʼbaʼ ni.

Ñee rietenaláʼdxiluʼ xiruʼ biʼniʼ Noé aparte de arca que la?... Yetídxibe binni zeeda ti nisaguié roʼbaʼ. Guyuu tu bicaadiaga laabe la? Binnilídxisibe. Xcaadxi binni que nabé guyuu xhiiñacaʼ lu stuudxi cosa. Rietenaláʼdxiluʼ xi guníʼ Jesús bíʼnicabe la?... Gudócabe, güéʼcabe ne bichaganácabe. Qué niníʼ iquedícabe pa binni malu laacabe, ngue runi qué nibeedicabe tiempu para nucaadiágacabe Noé. Guidúʼyanu xi gúcacabe.

Guyuu si Noé ne binnilidxi ndaaniʼ arca que la? bitaaguʼ Jiobá puertaʼ stini. Nin óraque qué ñuni cré ca binni que pa ziaba Nisaguié roʼbaʼ que. Málasi bizulú biaba nisaguié, peru cadi casi diʼ riaba ni yanna, sínuque jma nadipaʼ. Oraqueca guca jma guiiguʼ roʼ ni bisaba jma yaga ngola ne zixhubiyú ni ca guié roʼ que casi ñácacaʼ guiéhuiiniʼ. Xi guca cani qué ñuu ndaaniʼ  arca que yaʼ.... Jesús guníʼ: «Beeda nisa que, ziné irá caʼ». Guirutiʼ tu nilá. Xiñee yaʼ.... Purtiʼ casi guníʼ Jesús que, qué ñénecabe. Qué nucaadiágacabe ni gudxi Noé laacabe (Mateo 24:39; Génesis 6:5-7).

Peru cadi guiaandaʼ lii, Jesús guníʼ ni guca que rusiidiʼ ni laanu xiixa. Xi rusiidiʼ ni laanu yaʼ.... Biaa, ca binni que binitilúcabe cadi purtiʼ si gúcacabe malu, sínuque purtiʼ guyuu xhiiñacabe stale dede qué ñápacabe tiempu niziidicabe de Dios ne de ni chiguni. Naquiiñeʼ gápanu laanu ti cadi gácanu zacaca, njaʼ....

Ñee raʼbuʼ zunitilú Dios guidxilayú riʼ sti biaje ne sti nisaguié roʼbaʼ la?... Coʼ, laabe guniʼbe maʼ qué zúnidibe ni. Guniʼbe: «Dxandipeʼ cudiéʼ arcu iris stinneʼ lu ca za ca, ne zaquiiñeʼ ni casi ti señal». Jiobá guníʼ zaca arcu iris que ti señal para cadi chuʼ dxi guiaba stiʼ nisaguié roʼbaʼ para gunduuxeʼ binni ne maniʼ (Génesis 9:11-17).

Nga runi, zanda gannadxíchinu qué ziuu dxi gunitilú Dios guidxilayú riʼ ne ti nisaguié roʼbaʼ. Peru casi maʼ bíʼyanu ca, Biblia riníʼ zanitilú  guidxilayú riʼ ca dxi stinu. Tu guiráʼ ndiʼ zalá ora gunitilube ni yaʼ.... Ca binni ni nabé guyuuláʼdxicaʼ gúnicaʼ sti cosa ne qué ninacaʼ niziidicaʼ de Dios la? O cani qué liica ñápacaʼ tiempu de ñuundacaʼ Biblia. Lii xi raʼbuʼ yaʼ....

Laanu la? racaláʼdxinu chuʼnu lade ca binni ni gulá Dios ca, njaʼ....Cadi galán nga ñaca ca binnilídxinu casi ca binnilidxi Noé, ne nulá Jiobá guiranu la?... Peru para guilanu ora guinitilú guidxilayú riʼ la? naquiiñeʼ guiénenu primeru ximodo nga chigunitilú Dios ni para guedané guidxilayú chaʼhuiʼ stiʼ. Guidúʼyanu ximodo chigúnibe ni.

Biblia cusiene ni ndaaniʼ Daniel, capítulo 2, versículo 44. Ra caniʼni de ca dxi stinu riʼ la? nani: «Ne dxi stiʼ ca rey que la? Dios ni nuu guibáʼ zaguu ti reinu [o gobiernu] ni qué ziuu dxi guinitilú. Ne reinu riʼ qué zadiʼdiʼ ni lu naʼ nin sti guidxi. Zunideni ne zunduuxeni guiráʼ ca reinu riʼ, ne laani ziaana ni ne qué ziuu dxi guiluxe ni».

Ñee riéneluʼ xi riníʼ nga la?... Biblia na gobiernu stiʼ Dios zunitilú guiráʼ ca gobiernu stiʼ guidxilayú riʼ. Xiñee yaʼ.... Purtiʼ qué ruzuubacabe stiidxaʼ Rey ni gulí Dios. Tuu nga yaʼ.... Laabe nga Jesucristu.

Jiobá Dios napa derechu cuí xi clase gobiernu ndiʼ jma galán, ne maʼ gulibe Xiiñibe, Jesús, para gaca Rey. Maʼ cadi candaa diʼ, Rey ca zunitilú guiráʼ ca gobiernu stiʼ guidxilayú riʼ. Ndaaniʼ libru Apocalipsis, capítulo 19, versículo 11 dede 16, cayabi laanu ximodo chigúnibe ni. Lu dibuju ni cá lu sti yaza ca zanda gúʼyaluʼ ni. Biblia ribee lá guendaridinde ra chigunitilú Jiobá ca gobiernu stiʼ guidxilayú riʼ, Armagedón.

Neca Dios nga na Gobiernu stiʼ nga chigunitilú ca gobiernu riʼ, ñee canábabe laanu gacanenu gáticabe la?... Coʼ, Biblia  na Armagedón ca nga dxi cuidxi Dios ni Jma Nandxóʼ cuenta binni (Apocalipsis 16:14, 16). Zacá nga laani, Armagedón ca nga guendaridinde stiʼ Dios, ne zaquiiñebe Jesucristu para chiné ca ángel nuu guibáʼ lu guendaridinde ca. Ñee nagueendaca zuzulú guendaridinde riʼ la? Guidúʼyanu ximodo zanda gánnanu ni.