INGEYO gin ma kilwongo ni lanyut, pe kumeno?— I Dul me 46 wakwano lok i kom lanyut ma Lubanga omiyo me nyutu ni pe dong ebityeko lobo kun etiyo ki pii aluka. Lukwena bene gupenyo pi lanyut wek ginge awene ma Yecu bidwogo iye, ki ka agikki piny dong cok.—Matayo 24:3.

Kit ma Yecu pe binen ki i polo-ni, lanyut ma dano twero nenone omyero onyut ni en dong ocako loc. Pi meno, Yecu otito jami mogo ma lupwonnyene myero gubed ma wanggi twolo me nenogi i lobo kany. Ka jami magi gutimme, nongo nyuto ni en dong odwogo dok ocako loc i polo macalo Kabaka.

Me pwonyo lupwonnyene pi ngeyo ni pire tek me bedo ma wanggi twolo, Yecu owacci: ‘Kong wunen yat oduro, ki yadi mukene ducu; ka dong olot, wuneno piwu kenwu, ci wungeyo ni oro dong cok.’ Ingeyo  kit me wacci oro dong cok. Dong iromo ngeyone ni Armagedon tye cok ka ineno jami ma Yecu owacogi-ni ka timme.—Luka 21:29, 30.

I pot karatac man ki ma oluboni, wabineno cal pa jami ma Yecu owacci gibibedo but lanyut ma bicimo ni Ker pa Lubanga dong cok. Ka jami magi ducu dong gutimme, ci Ker pa Lubanga ma nongo Kricito aye tye Lalocce-ni, binginyo gamente mukene-ni ducu kit ma wakwano kwede i Dul me 46.

 Dong myero inen maber cal ma gitye i pot karatac aryo ma gukato-ni, ci wabilok i komgi. Itwero kwano lok i kom jami ma itye ka nenogi i cal magi i Matayo 24:6-14 ki Luka 21:9-11. Nen bene namba matino tino ma kiketogi i kom cal acel acel. En namba acel-li tye i acakki me paragraf ma loko i kom cal meno. Kong dong wanen ka pol pa but lanyut ma Yecu omiyogi-ni gitye ka cobbe i kare-ni.

(1) Yecu owacci: “Wubiwinyo pi mony, ki lok ma yweko pi mony; . . . rok bilweny ki rok wadi, ki ker bene bilweny ki ker wadi.” Tika dong iwinyo ka dano giloko lok i kom lweny?— Lweny me wi lobo me acel kilwenyo cakke i mwaka 1914 nio i 1918, ka dok Lweny me Wi Lobo me II (aryone) obedo i mwaka 1939 nio i 1945. Ma naka yam lweny me wi lobo onongo pud pe! I kare-ni lweny dong oromo wi lobo ducu. Nen calo nino ducu i TV, redio kacel ki karatac akwana wawinyo nyo wakwano lok i kom lweny.

(2) Yecu bene owacci: “Kec bene bipoto . . . i kabedo mapol.” Kit ma gwok nyo ingeyo kwede, pe dano ducu gitye ki cam muromo me acama. Nino ducu dano alip ki alip gito pien gipe ki cam muromo.

(3) Yecu omedo ni: “Two gemo mapatpat bipoto i kabedo mapol.” Tika ingeyo ngo ma two gemo obedo?— Man obedo two mo ma neko dano mapol. Two gemo mo marac atika ma kilwongo ni two aburu me Spain oneko dano ma romo milion 20 kulu i kine ka mwaka acel keken. I karewa-ni dano ma welgi kato milion 20 kulu ka pe gin mo, gubito ki two jonyo. Dok bene tye two kanca, two adunu, ki two mukene mapat pat ma neko dano alip ki alip mwaka ducu.

 (4) Yecu dok omiyo but lanyut mukene kun wacci: “Oyengoyeng biyengo lobo i kabedo mapol.” In mono ingeyo oyengyeng?— Oyengyeng weko ngom yenge. Odi mapol muk dok pol kare dano gito. Cakke i mwaka 1914, oyengyeng mapol obedo ka timme mwaka ki mwaka. Tika dong iwinyo lok kom oyengyeng?—

(5) Yecu owacci but lanyut mukene tye ni ‘tim maraco bibedo ka medde ameda.’ Man aye gin mumiyo kwalo kwo ki tim gero tye mapol i kin piny. Dano i kabedo ducu gitye ki lworo ni ngat mo twero turo odigi ci kwalo jamigi. Ma naka yam peya turo cik ki tim gero oromo but lobo ducu calo i kare-ni.

(6) Yecu omiyo but lanyut ma pire tek i kare ma en owaco ni: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” (Matayo 24:14) Ka ce iye ‘lok man me kwena maber-ri,’ ci myero itit pire bot jo mukene. I yo ma kit meno in bene ibinywako i cobbe pa but lanyut man.

Jo mogo gitwero wacci jami ma Yecu otito pigi ni gubedo ka timme cakke con. Ento ma naka yam jami magi ducu peya gutimme i but lobo mapol dok i kare acel. Mono dong iniang te lok me lanyut man?— Te lokke ni ka waneno jami magi ducu gitye ka timme, nongo lobo marac-ci dong kicok leyo kakare ki lobo manyen pa Lubanga.

I kare ma Yecu omiyo lanyut man, en bene oloko pi kare mo madok pat ma bedo tye i mwaka. En owaco ni: “Wuleg wek ngwecwu pe otimme i cwir.” (Matayo 24:20) Itamo ni ngo ma en onongo tye ka wacone?—

Wek ngat moni obwot ki i peko mogo ma poto atura i kare me ngico me cwir, ma nongo pinye miyo kwo bedo tek nyo wot pe  yot, ngo ma twero timme?— Ka ce en obwot, ci nongo otute adada. Mono pe bedo me cwer cwiny ka ngat moni oto i kot ma cwer ki yamo magwar pien ni obedo ka lungo wiye i timo jami mukene ma ka cako wotte con?—

Tika iniang pen lok ma Yecu onongo tye ka wacone i kare ma en owacci pe myero kikur wang ma cwir opoto ka kicak ngwec?— En onongo tye ka wacciwa ni kit ma wangeyo ni Armagedon dong cok-ki, omyero pe wagalle me nyutu ni wamaro Lubanga ki tic pire. Ka wagalle, ci kare bibedo pe botwa me tic pi Jehovah. Pi meno wabibedo calo jo me kare me Pii Aluka ma guwinyo lok pa Nua ento pe gudonyo i yeya.

Kong dok wanen kit ma kwo bibedo kwede ka lweny madit me Armagedon okato. Wabipwonyo lok i kom gin ma Lubanga oyubo pi dano ducu ma gimarre dok gitiyo pire i kare-ni.