ICISHIBILO walicishiba, bushe te ifyo?—Mu Cipandwa 46 twabelengele pa lwa cishibilo Lesa apeele ukuti takonaule na kabili icalo ku lyeshi. Abatumwa na bo baipwishe icishibilo pa kuti bakeshibe ilyo Yesu akabwela no kwishiba ukuti ukupwa kwa calo nelyo buno bwikashi nakupalama.—Mateo 24:3.

Apo Yesu ali no kuba ku muulu kabili tali no kumoneka, icishibilo ico abantu bengamona calekabilwa ku kulanga ukuti natendeka ukuteka. E co Yesu alandile pa fintu abasambi bakwe bafwile ukufwaya ukumona ilyo bali pe sonde. Ilyo ifi fintu fyacitika, cali no kulanga ukuti nabwela no kuti natendeka ukuteka ku muulu nge Mfumu.

Ku kusambilisha abasambi bakwe  ubucindami bwa kuba abalola, Yesu abebele ati: “Moneni umukunyu, ne miti yonse; ilyo nailemba, e lyo mwamona no kwishiba mwe bene, ukuti nomba amainsa yali mupepi.” Walishiba ifya kwishiba ukuti amainsa nayapalama. Kabili kuti waishiba ukuti Armagedone naipalama nga wamona ifintu Yesu alandilepo filecitika.—Luka 21:29, 30.

Pali ili bula ne likonkelepo, twalamona ifikope fya fintu Yesu alandile ukuti fyali no kuba ulubali  lwa cishibilo ca kuti Ubufumu bwa kwa Lesa nabupalama. Ilyo ifi fyonse fikacitika, Ubufumu bwa kwa Lesa ubutekwa kuli Kristu bukashonaula amabuteko yonse, nga fintu twabelengele mu Cipandwa 46.

E co lolekesha ifikope fili pa mabula yabili ayafumineko, kabili twalalanshanyapo. Pali Mateo 24:6-14 na Luka 21:9-11, kuti wabelenga pa fyo ulemona muli ifi fikope. Kabili, mona ne nambala ili mu tulembo tunono pa cikope cimo na cimo. Inambala imo ine ili pa ntendekelo ya paragrafu ilelondolola ico cikope. Nomba natumone nga ca kuti ifingi ifya mu cishibilo Yesu apeele filecitika ilelo.

(1) Yesu atile: “Mukomfwo bulwi ne [lyashi lya] bulwi, . . . uluko lukemino luko, no bufumu bukemino bufumu.” Bushe walyumfwa amalyashi pa lwa nkondo?— Inkondo ya calo iya kubalilapo yaliko mu 1914 ukufika ku 1918, kabili Inkondo ya Calo iya Cibili, yaliko ukufuma mu 1939 ukufika ku 1945. Takwabalile akubako inkondo sha calo conse kale! Nomba kwaba inkondo mu calo conse. Cimoneka ukuti cila bushiku pa TV, pa redio, na mu nyunshipepala, tumfwa nelyo ukubelenga pa lwa nkondo.

(2) Yesu asosele no kuti: “Kukaba ne fipowe . . . mumo mumo.” Nga fintu pambi waishiba, te bonse bakwata ifya kulya fyakumanina. Cila bushiku abantu abengi balafwa ku nsala.

(3) Yesu alundilepo ukuti: ‘Uku no ku kukaba ifikuko.’ Bushe icikuko walicishiba?— Bulwele ubwipaya abantu abengi. Icikuko cimo icikalamba icitwa ati fuluensa wa ku Spain caipeye abantu nalimo amamilioni 20 mu mwaka fye napamo umo. Mu nshiku shesu, abantu abengi ukucila pali iyi mpendwa napamo bakafwa kuli AIDS. Kabili kwaba na kansa, ubulwele bwa ku mutima, na malwele yambi ayepaya abantu abengi cila mwaka.

 (4) Yesu apeele ulubali na lumbi ulwa cishibilo pa kusosa ukuti: “Kukaba . . . ifinkukuma mumo mumo.” Bushe icinkukuma walicishiba?— Ifinkukuma filenga umushili ukutenta. Amayanda yalabongoloka, kabili ilingi abantu balepaiwa. Ukutula umwaka wa 1914, kwaliba ifinkukuma ifingi cila mwaka. Bushe walyumfwapo pa lwa finkukuma?—

(5) Yesu atile ulubali na lumbi ulwa cishibilo lwali no kuba ‘ukufulisha kwa bubifi.’ E mulandu wine ubupuupu bufulile sana no lukaakala. Abantu konse konse bali no mwenso ukuti kuti babengilila ku bapuupu mu mayanda. Ilelo bumpulamafunde no lukaakala mu ncende shonse ishe sonde nafifula ukucila kale.

(6) Yesu apeele ulubali lwacindama sana ulwa cishibilo ilyo atile: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:14) Nga walisumina iyi “mbila nsuma,” lyene ufwile ukwebako bambi pali yene. Muli iyo nshila kuti wabombako na iwe ukufishapo ulu lubali lwa cishibilo.

Abantu bamo kuti batila ifintu Yesu asobele ni kale fyatendeke ukucitika. Lelo ifi fintu tafyabalacitikapo fyonse mu fyalo ifingi kabili pa nshita imo ine. E co bushe waumfwikisha ifyo icishibilo cipilibula?— Cipilibula ukuti nga twamona ifi fyonse filecitika, ninshi nomba line cino calo cibifi cili no kupyanikwapo ne calo cipya ica kwa Lesa.

Ilyo Yesu apeele ici cishibilo, alandile na pa nshita yaibela iya mwaka. Atile: “Lombeni ukuti ukufulumuka kwenu kwiba pa mpepo.” (Mateo 24:20) Uletontonkanya ukuti cinshi alepilibula?—

Kwena, umuntu nga ali no kufulumuka akayofi mu nshita ya mpepo lintu ciba icakosa ukwenda, cinshi cingacitika?— Nga ca  kuti engafulumuka, ninshi afulumuka no bwafya. Bushe te kuti cibipe umuntu ukufwa ku cipuupu ca mu mpepo pa mulandu wa kuti apoosele amano ku kucite fintu fimbi ukucila ukutendeka ubulendo bwakwe bwangu?—

Bushe wamona icishinka Yesu alelandapo pa kulanda ukuti tatufwile ukulolela ukufulumuka ukufikila inshita ya mpepo yaisa?— Aletweba ukuti apo twalishiba ukuti Armagedone naipalama, tatufwile ukukokola mu kulanga ukuti twalitemwa Lesa pa kumubombela. Nga twakokola, kuti twaceelwa. E co kuti twaba nga balya aba pa Lyeshi likalamba abaumfwile Noa alebila lelo tabaingile mu cibwato.

Nomba, natulande pa fyo cikaba ilyo inkondo ikalamba iya Armagedone ikapita. Tuli no kusambilila pa fyo Lesa apekanishisha ifwe bonse fwe bamutemwa kabili fwe bamubombela nomba.