Mekene 47

Easa Atre Tune Kaa Ka Hape, Calemi Catre Hë Amagedo

NEMENE la aliene koi eö la hna qaja ka hape, hatren?— Hne së lo hna ithanatane ngöne la Mekene 46, la hatrene hna hamëne hnei Akötresie, nyine amamane koi së ka hape tha tro hmaca kö Nyidrëti a apatrene la fene hnene la ketre iwë. Hnene fe la itre aposetolo hna hnyingëne koi Iesu la ketre hatren, nyine troa amamane koi angatre la ijine troa hlepëti hmaca hnei Iesu, me ijine ka troa qajaqaja ka hape, calemi hë la pune la fene ka ngazo celë.—Mataio 24:3.

Angela hmaca ha Iesu, nge nyidrëti hmaca ha e hnengödrai; drei lai kepine matre nyipi ewekë troa hetre hatren nyine xatuane la itre atr troa trotrohnine ka hape, musi hë Iesu. Celë hi matre, e wengëne jë nyidrë la itre ewekë nyine troa hmekëne hnene la itretre dreng e celë fen. E traqa ha la itre ewekë cili, haawe, kolo lai a hape, traqa hmaca ha Iesu, nge ase hë nyidrë xejë la musi e hnengödrai.

 Iesu a hnëkëne la itretre drei nyidrë troa hmek, celë hi matre qaja ju nyidrë koi angatr ka hape: “E sajemu hë it’ ej, nyipunieti a goeën, me ate hmekune laka eashenyi hë la hnaön.” Atreine hi eö wangatrehmekune laka easenyi hë matre traqa pi la ijine hedredrei. Haawe, tro fe hi eö lai a atreine wangatrehmekune ka hape, calemi hi hë Amagedo, jëne la kola eatre la itre ewekë hna ahnithe hnei Iesu.—Luka 21:29, 30.

Kola amamane hnene la itre iatre ngöne la götrane celë memine la götrane thupen, la itre hnepe ewekë ne  lo hatrene hnei Iesu hna ahnith, nyine amamane laka calemi catre hë la Baselaia i Akötresie. E eatr asë hë elanyi la nöjei ewekë cili, haawe, tune lo hne së hna ce wange hë ngöne lo Mekene 46, easenyi catre hë tro la Baselaia i Akötresie hna cilëne hnei Keriso, a lep anyilanyilane la nöjei musi asë.

Pine laka easa troa qeje pengöne la itre iatre celë, loi e tro sa goeëne hnyawa itre ej. Itre ej a anyipicine la itre ewekë hna qaja ngöne Mataio 24:6-14 me Luka 21:9-11. Ketre, ame la itre iatr, tre isa hetre numero, nge ka ihmeku memine la itre paragarafe ka qeje pengöne itre ej. Tro sa ce wange enehila ka hape, eatre jë kö ngöne la hneijine së, lo itre ewekë ne lo hatren hna ahnithe hnei Iesu?

(1) Öni Iesu lo ka hape: “Nge tro hë nyipunieti a denge la ite ishi, me ite uqanyi ne ishi ; . . . tro ha cile la kete nöje kowe la kete nöj, me kete baselaia kowe la kete baselaia.” Hapeu, hnei eö fe hë hna hane drei mejene la itre isi?— Ame lo Pane Isi Ka Tru, tre, hna nyiqaane lo macatre 1914 uti hë 1918, thupene jë hi lai, traqa pi hi lo Hnaaluene Isi Ka Tru lo macatre 1939 koi 1945. Pë pala kö isi ekö ka traqa kowe la fene hnengödrai, tune la lue isi cili! Ame enehila, hna ketr asë hë la fen hnei isi. E goeë televizio ju kö së, maine drei ipoos maine e zonale pena, kolo pala hi a qeje isi.

(2) Hnei Iesu mina fe hna qaja ka hape: “Tro ha jin . . . ngöne la ite hlapa.” Atre fe hi eö, ka hape, tru hnei atr ka xeni ngo mecijine kö nyudren? Itre milio la etrune la itre atr ka meci e nöjei drai, ke tha ijije kö la xen.

(3) Kola sisedrëne hnei Iesu ka hape: ‘Tro ha hete [meci ka solesol] . . . ngöne la ite hlapa.’ Atre fe hi eö ka hape, nemene la meci ka solesol?— Kola qaja la meci ka ixötrekeu nge ka humu atr. Hna traqa ekö la ketre meci ka solesol, hna ati ëjen ka hape, girip qa Sepania; hnene eje hna humuthe la 20 milio lao atr ngöne la macatre. Nge tro pala kö lai a tru catre la hna humuthe hnei SIDA. Nge the qaja kö lo itre atr ka meci hnei kaser, me itre xa meci ju kö, itre thauzane la etrun e nöjei macatre.

 (4) Hetre ketre hatrene fe hna ahnithe hnei Iesu; öni nyidrë: “Tro ha . . . hete sha ngöne la ite hlapa.” Atre fe hi eö la pengöne la sa?— Kolo ka jumejume la ihnadro, me auligötrëne la itre uma, nge ame e itre xa ijin, nyimutre la itre atr ka meci hnene ej. Qaane lo 1914, nyimutre la itre sa ka traqa e nöjei macatre. Hapeu, hetre itre sa fe kö hnei eö hna hane drei mejen?—

(5) Öni Iesu fe lo: “Troa mana la ngazo.” Celë hi la kepine matre nyimutre la itre atr enehila ka atrekënö, me isi, me ihumuth. Ame asë hi ngöne la fen, tru la itre atr ka xou e atrekënö jë la itre ewekë i angatr. Elë catre hë enehila la ihumuthe me isi hune ekö.

(6) Hetre götrane ka sisitria ne la hatren hna qaja hnei Iesu, öni nyidrë: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.” (Mataio 24:14) E ka lapaune fe eö kowe la “maca ka loi” cili, haawe, qa i eö fe troa hane cainöjëne eje kowe la itre xa atr. E tro eö a hane kuca la huliwa cili, eö hi lai a hane ixatua matre eatre jë la götrane ka sisitria ne la hatrene cili.

Öni itre xan, ame la itre ewekë celë hna ahnithe hnei Iesu, tre, tha itre ka xötrei traqa kö lai. Nyipici, ngo ame la eisapengönen, tre tha hnene kö itre eje hna ce traqa ngöne la hneijine ka cas, me ngöne la nöjei götrane asë ne la fen. Matre, trotrohnine kö eö la hna amamane koi së hnene la hatrene cili?— Qa ngöne laka hna ce traqa asë la itre ewekë cili, haawe, kolo hi lai a hape, easenyi catre hë matre nyihnane pi la fene ka ngazo celë hnene la fene ka hnyipixe i Akötresie.

Ame la Iesu a qeje pengöne la hatrene cili, hnei nyidrëti fe hna qaja la ketre hneijin. Öni nyidrë: “Thithiju nyipunie mate tha köte kö nyipunie ngöne la hnaihedö [ijine hnötre catr].” (Mataio 24:20) Ame koi eö, ke nemene jë la aliene la trenge ewekë i Iesu celë?—

Maine tro la ketre atr a kötre hulö e ijine hnötre catr, nge jole troa öhnyi gojenyi ne kötr, nemene ju hë la ewekë ka troa traqa koi angeic?— Luetre hi lai: maine mele kö angeic, ngo ame pe, tro angeic a pane isine  troa mel. Maine pena, tro angeic a meci hnei hnötr, ke tha hna hane kö akötrehnine troa canga kötr. Pane mekune jë eö la ka traqa kowe la atr cili. Tru la hnei angeice hna hnehengazone la itre huliwa i angeic, ngo tha mekune hë troa hane kötr e ijine petre kö; ame hna asesëkötrë angeice ju. Ekölö hi ni pë hë angeic. Tune kaa la hnei eö hna mekun?—

Trotrohnine hë eö la kepine matre qaja jë Iesu, ka hape, tha ijine kötre hmaca kö la ijine hnötr?— Nyidrëti a ajane troa qeje pengöne koi së, ka hape, e atre hnyawa ha së laka Amagedo hë cahmijë, haawe, the hmitre kö. Enehila hi la ijine tro sa amamane la ihnimi së koi Akötresie, ene la troa nyi hlue i Nyidrë. Maine tro sa hulihmitr, tro ha asesëkötrë së. Nge tro hë së a tune lo itre atr ka mele ngöne lo hneijine i Noa, angetre drei Noa e cainöj, ngo tha hane pe lö hnine la aka.

Haawe, tro hmaca pena ha së enehila a ce wange la pengöne la mele elany, e ase pi lo isi ka tru e Amagedo. Tro ha mama hnyawa koi së la hnei Akötresieti hna hnëkëne thatraqane la itre atr ka hnimi Nyidrë me ka nyi hlue i Nyidrëti enehila.

Hanawange la itre xa xötre ka amamane laka calemi hë Amagedo: 2 Timoteo 3:1-5 me 2 Peteru 3:3, 4.

[Iatr ne la götran 244]

Nemene la ini hnei Iesu hna pi hamëne jëne la ceitune ne la hmejieng?

[Iatr ne la götran 245]

1

[Iatr ne la götran 245]

2

[Iatr ne la götran 245]

3

 [Iatr ne la götran 246]

4

[Iatr ne la götran 246]

5

[Iatr ne la götran 246]

6

[Iatr ne la götran 249]

Ame lo Iesu a qeje kötr e ijine hnötr, tre, nemene la ini hnei nyidrëti hna ajane troa hamën?