Ibuot 47

Nte Nnyịn Ikemede Ndifiọk Nte ke Armageddọn Ekpere

AFO ọmọfiọk se idiọn̄ọ edide, nte ufiọkke?— Ke Ibuot 46 nnyịn ima ikot iban̄a idiọn̄ọ oro Abasi ọkọnọde nte ke imọ ididaha ukwọ isobo ererimbot aba tutu amama. N̄ko, mme apostle ẹma ẹyom idiọn̄ọ man mmọ ẹkeme ndifiọk ini oro Jesus edifiakde idi ye ini oro utịt ererimbot, m̀mê editịm n̄kpọ, ekperede.—Matthew 24:3.

Sia owo mîdikwe Jesus ke heaven, ẹma ẹyom idiọn̄ọ oro mme owo ẹkemede ndikụt ndiwụt nte ke enye ama ọtọn̄ọ ndikara. Ntre Jesus ama etịn̄ aban̄a mme n̄kpọ oro mme mbet esie ẹkpenyenede ndidu ke edidemede mban̄a mi ke isọn̄. Ke ini mme n̄kpọ emi ẹtịbede, ediwọrọ nte ke enye ama afiak edi onyụn̄ ọtọn̄ọ ndikara ke heaven nte Edidem.

Man ekpep mme mbet esie nte edide akpan n̄kpọ ndidu ke edidemede, Jesus ọkọdọhọ mmọ ete: ‘Ẹse eto fig ye kpukpru eto; ke ini  mmọ ẹsiahade ikọn̄, mbufo ẹkụt ẹnyụn̄ ẹfiọk ke idem mbufo ikpọn̄ ẹte ndaeyo ke ekpere.’ Afo ọmọfiọk ini emi ndaeyo esikperede. Ndien afo emekeme ndifiọk ini oro Armageddon ekperede ke ini afo okụtde nte mme n̄kpọ oro Jesus eketịn̄de aban̄a ẹtịbede.—Luke 21:29, 30.

Ke page emi ye enye oro etienede, nnyịn imọn̄ ise ndise mme n̄kpọ oro Jesus ọkọdọhọde ke ẹdidi ubak idiọn̄ọ nte ke Obio Ubọn̄ Abasi ekpere. Ke ini kpukpru n̄kpọ emi ẹtịbede, Obio Ubọn̄  Abasi emi Christ edide Andikara ayanuak kpukpru ukara eken, nte nnyịn ikokotde ke Ibuot 46.

Ntre nen̄ede se mme ndise emi ẹdude ke page iba oro ẹkebede, ndien nnyịn iyeneme iban̄a mmọ. Afo emekeme ndikot mban̄a se afo okụtde ke mme ndise emi ke Matthew 24:6-14 ye Luke 21:9-11. N̄ko, tịm se ekpri nọmba oro odude ke ndise kiet kiet. Ukem nọmba oro odu ke ntọn̄ọ ikpehe ekikere emi etịn̄de aban̄a ndise oro. Idahaemi yak ise m̀mê ediwak ikpehe idiọn̄ọ oro Jesus ọkọnọde ẹsu mfịn.

(1) Jesus ọkọdọhọ ete: “Mbufo ẹyenyụn̄ ẹkop ẹban̄a ekọn̄ ye etop ekọn̄; . . . idụt ayadaha an̄wana ye idụt, obio edidem kiet oyonyụn̄ adaha an̄wana ye obio edidem efen.” Ndi afo emesikop etop ekọn̄?— Ẹma ẹn̄wana akpa ekọn̄ ererimbot ọtọn̄ọde ke 1914 esịm 1918, ndien ekem ẹn̄wana ọyọhọ Ekọn̄ Ererimbot II, ọtọn̄ọde ke 1939 esịm 1945. Akananam ekọn̄ ofụri ererimbot ikodụhe! Idahaemi ekọn̄ ọyọyọhọ ofụri ererimbot. Etie nte nnyịn imesikop m̀mê ikot iban̄a ekọn̄ kpukpru usen ke TV, ke ekebe ukopikọ, ye ke n̄wedmbụk n̄kpọntịbe.

(2) Jesus ọkọdọhọ n̄ko ete: ‘Akan̄ oyonyụn̄ odu ke nsio-nsio ebiet.’ Nte ekemede ndidi afo ọmọfiọk, idịghe kpukpru owo ẹnyene udia oro ekemde ndidia. Ediwak tọsịn owo ẹsikpan̄a kpukpru usen ke ntak emi mmọ mînyeneke udia oro ekemde.

(3) Jesus ama adian ete: ‘Idiọk udọn̄ọ oyonyụn̄ odu ke nsio-nsio ebiet.’ Ndi afo ọmọfiọk se idiọk udọn̄ọ edide?— Enye edi udọn̄ọ oro esiwotde ediwak owo. Idiọk udọn̄ọ kiet ẹkotde efiomnsa ama owot n̄kpọ nte owo miliọn 20 ke ufan̄ isua kiet kpọt. Ke eyo nnyịn, ekeme ndidi mme owo ẹwakde ẹkan oro ẹyekpan̄a ke ntak AIDS. Ndien kansa, udọn̄ọ esịt, ye mme udọn̄ọ en̄wen ẹdu emi ẹsiwotde ediwak tọsịn owo kpukpru isua.

 (4) Jesus ama ọnọ ikpehe idiọn̄ọ efen, ọdọhọde ete: ‘Unyek-isọn̄ oyonyụn̄ odu ke nsio-nsio ebiet.’ Ndi afo ọmọfiọk se unyekisọn̄ edide?— Unyekisọn̄ esinam isọn̄ enyek. Mme ufọk ẹsiwụre, ndien esiwak ndiwot mme owo. Ediwak unyekisọn̄ ẹtịbe kpukpru isua ọtọn̄ọde ke 1914. Ndi afo emesikop aban̄a unyekisọn̄?—

(5) Jesus ọkọdọhọ ke ikpehe idiọn̄ọ efen edidi ‘ukwan̄ido nditọt.’ Ntak edi oro ekese uyịpinọ ye afai ẹdude. Mme owo ke kpukpru ebiet ẹkop ndịk ẹte ke owo ekeme ndibụn̄ ufọk mmimọ ndụk. Akananam ubiatibet ye afai idụhe ke ofụri ikpehe ererimbot nte ẹdude idahaemi.

(6) Jesus ama ọnọ ata akpan ikpehe idiọn̄ọ ke ini enye ọkọdọhọde ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Edieke afo enịmde “gospel” emi ke akpanikọ, afo do ekpenyene ndikwọrọ enye nnọ mbon efen. Ntre afo emekeme ndibuana ke ndisu ikpehe idiọn̄ọ emi.

Ndusụk owo ẹkeme ndidọhọ nte ke mme n̄kpọ oro Jesus eketịn̄de ẹsitịbe kpukpru ini. Edi akananam kpukpru n̄kpọ emi itịbeke ke ata ediwak ikpehe ererimbot ke ukem ini. Ntre ndi afo ọmọfiọk se idiọn̄ọ oro ọwọrọde?— Enye ọwọrọ ete ke ini nnyịn ikụtde kpukpru n̄kpọ emi ẹtịbede, ibịghike obufa ererimbot Abasi ayada itie idiọk ererimbot emi.

Ke ini Jesus ọkọnọde idiọn̄ọ emi, enye n̄ko ama etịn̄ aban̄a akpan ini ke isua. Enye ọkọdọhọ ete: “Edi mbufo ẹkpe ubọk ẹte, itọk mmimọ okûdi ke ini ukwọ.” (Matthew 24:20) Afo ekere ke ikọ esie ọkọwọrọ nso?—

Ọfọn, edieke owo okpoyomde ndifehe mbọhọ ndusụk afanikọn̄ ke ukwọedịm, ke ini idiọk enyọn̄ anamde edi ata ọkpọsọn̄ n̄kpọ m̀mê akam edi n̄kpọndịk ndika isan̄, nso ikeme nditịbe?— Edidi  ata ọkpọsọn̄ n̄kpọ ọnọ enye ndibọhọ afanikọn̄ oro, edieke edide ayakam ọbọbọhọ. Nte ikpedịghe n̄kpọ mfụhọ owo ndikpa ke ukwọedịm n̄kukụre koro enye akabiatde ini anam mme n̄kpọ en̄wen utu ke ndibak ntọn̄ọ isan̄ esie?—

Ndi afo omokụt akpan n̄kpọ oro Jesus okosiode owụt ke ndidọhọ yak itọk nnyịn okûdi ke ini ukwọ?— Enye ọkọdọhọ nnyịn ete ke sia ifiọkde ite ke Armageddon ekpere, nnyịn iyomke ndiyak ini ebe akaha mbemiso iwụtde ke imama Abasi ebe ke ndinam n̄kpọ esie. Edieke nnyịn ibiatde ini, eyo ekeme ndisọn̄ mbaha nnyịn. Ntre nnyịn idibiet mbon oro ẹkedude ke ini akwa Ukwọ, emi ẹkekopde ntọt Noah edi mîkodụkke esịt ubom.

Idahaemi, yak itịn̄ iban̄a nte n̄kpọ editiede ke ini akwa ekọn̄ Armageddon okụrede. Nnyịn iyọfiọk se Abasi eben̄ede enịm ọnọ kpukpru nnyịn emi imade inyụn̄ inamde n̄kpọ esie idahaemi.

Mmọ emi ẹdi mme itie N̄wed Abasi en̄wen oro ẹwụtde ke Armageddon ekpere: 2 Timothy 3:1-5 ye 2 Peter 3:3, 4.

 [Mme ndise ke page 244-246]

Nso n̄kpọ ke Jesus ekekpep ke ini enye eketịn̄de aban̄a eto fig?

[Ndise ke page 249]

Ke ini Jesus eketịn̄de aban̄a ndidomo ndibọhọ ke ini ukwọ, nso n̄kpọ ke enye ekekpep?