NAHIBALUAN mo bala kon ano ang tanda?— Sa Kapitulo 46 nabasa naton ang tanda nga ginhatag sang Dios nga indi na gid niya paglaglagon liwat ang kalibutan paagi sa anaw. Subong man, ang mga apostoles nangayo sing tanda agod mahibaluan nila kon san-o si Jesus mabalik kag kon san-o malapit na ang katapusan sang kalibutan ukon sang sistema sang mga butang.—Mateo 24:3.

Sanglit indi makita si Jesus sa langit, kinahanglan sang mga tawo ang tanda agod mahibaluan nila nga nagsugod na sia sa paggahom. Gani ginsugid ni Jesus sa iya mga disipulo ang mga butang nga dapat nila bantayan diri sa duta. Kon matabo ining mga butang, magakahulugan ini nga nagbalik na sia kag nagsugod na sa paggahom sa langit subong Hari.

Agod itudlo sa iya mga disipulo ang pagkaimportante sang pagbantay, si Jesus nagsiling sa ila: “Talupangda ninyo ang kahoy nga igos kag ang tanan nga iban pa nga mga kahoy: Kon nagapanalingsing  na ini, paagi sa pagpanilag sa sini mahibaluan ninyo sa inyo kaugalingon nga malapit na ang tig-ilinit.” Mahibaluan mo kon malapit na ang tig-ilinit. Kag mahibaluan mo nga malapit na ang Armagedon kon makita mo ang mga butang nga ginsambit ni Jesus.—Lucas 21:29, 30.

Sa sini kag sa masunod nga pahina, tan-awon naton ang mga butang nga siling ni Jesus mangin bahin sang tanda nga malapit na ang Ginharian sang Dios. Kon matabo ining tanan nga mga butang, dugmukon sang Ginharian sang Dios nga ginagamhan ni Cristo ang  tanan nga iban pa nga mga gobierno, subong sang nabasa naton sa Kapitulo 46.

Gani tan-awa sing maayo ang mga laragway sa duha ka pahina antes sini, kag hambalan naton ini. Sa Mateo 24:6-14 kag Lucas 21:9-11, mabasa mo ang makita mo sa sini nga mga laragway. Subong man, talupangda ang gamay nga numero sa tagsa ka laragway. Pareho man nga numero ang makita sa panugod sang parapo nga nagalaragway sini nga mga laragway. Tan-awon naton karon kon bala ang madamo nga bahin sang tanda nga ginhatag ni Jesus nagakatuman karon.

(1) Si Jesus nagsiling: “Makabati kamo sing mga inaway kag mga balita sang mga inaway; . . . ang pungsod magatindog batok sa pungsod kag ang ginharian batok sa ginharian.” Nakabati ka na bala sing mga balita tuhoy sa mga inaway?— Ang nahauna nga bug-os kalibutan nga inaway natabo sang 1914 tubtob 1918, kag dayon nagsunod ang Bug-os Kalibutan nga Inaway II, sang 1939 tubtob 1945. Antes sini, wala pa sing natabo nga bug-os kalibutan nga mga inaway! Karon, may mga inaway na sa bug-os nga kalibutan. Sa halos kada adlaw sa TV, sa radyo, kag sa pamantalaan, makabati kita ukon makabasa tuhoy sa mga inaway.

(2) Si Jesus nagsiling man: “May kakulang sa kalan-on . . . sa nagakalainlain nga mga duog.” Ayhan nahibaluan mo nga indi tanan may bastante nga makaon. Kada adlaw, linibo ka tawo ang nagakapatay bangod kulang sila sing pagkaon.

(3) Si Jesus nagdugang pa: “Sa nagakalainlain nga mga duog may mga piste.” Nahibaluan mo bala kon ano ang piste?— Isa ini ka balatian, ukon masakit, nga nagapatay sing madamo nga mga tawo. Ang isa ka daku nga piste nga gintawag trangkaso Espanyola nagpatay sing mga 20 milyones ka tawo sa sulod sang mga isa lamang ka tuig. Sa aton adlaw, mahimo nga kapin pa sa sini ang mapatay sang AIDS. Kag yara man ang kanser, balatian sa tagipusuon, kag iban pa nga mga balatian nga nagapatay sing linibo ka tawo kada tuig.

 (4) Ginhatag ni Jesus ang isa pa ka bahin sang tanda, nga nagasiling: “May . . . mga linog sa nagakalainlain nga mga duog.” Nahibaluan mo bala kon ano ang linog?— Ginatay-ug sang linog ang duta nga imo ginatindugan. Nagakarusdak ang mga balay, kag masami nga nagakapatay ang mga tawo. Sugod sang tuig 1914, madamo na nga mga linog ang nagakatabo kada tuig. Nakabati ka bala tuhoy sa mga linog?—

(5) Si Jesus nagsiling nga ang isa pa ka bahin sang tanda amo ang ‘dugang kag dugang pa nga kalainan.’ Amo kon ngaa madamo gid ang pagpangawat kag kasingki. Nahadlok ang mga tawo bisan diin nga basi kawatan ang ila balay. Karon pa lang natabo nga may madamo gid nga krimen kag kasingki sa tanan nga bahin sang kalibutan.

(6) Naghatag si Jesus sing tuman ka importante nga bahin sang tanda sang nagsiling sia: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Kon nagapati ka sa ‘sining maayong balita,’ dapat mo ini isugid sa iban. Sa sining paagi makapakigbahin ka sa pagtuman sini nga bahin sang tanda.

Mahimo magasiling ang iban nga mga tawo nga natabo na anay ang mga butang nga gintagna ni Jesus. Apang wala pa gid matabo nga ini nga mga butang dungan nga natabo sa madamo gid nga mga bahin sang kalibutan. Gani nahangpan mo bala kon ano ang kahulugan sang tanda?— Nagakahulugan ini nga kon makita naton nga nagakatabo ining tanan nga mga butang, ining malaut nga kalibutan malapit na buslan sang bag-ong kalibutan sang Dios.

Sang ginhatag ni Jesus ini nga tanda, ginpatuhuyan man niya ang isa ka pinasahi nga panahon sang tuig. Sia nagsiling: “Padayon nga mangamuyo nga ang inyo pagpalagyo indi mahanabo sa tion sang tigtulugnaw.” (Mateo 24:20) Ano sa banta mo ang iya buot silingon sa sini?—

Bueno, kon ang isa ka tawo kinahanglan nga magpalagyo sa isa ka kalamidad sa tion sang tigtulugnaw, isa ka tion nga mabudlay gid ukon makatalagam  pa gani ang paglakbay bangod sang tiempo, ano ang mahimo matabo?— Kon makapalagyo man sia, mabudlayan gid sia. Indi bala makapasubo kon ang isa ka tawo mapatay sa bagyo sa tion sang tigtulugnaw bangod lamang nangin tuman sia kasako sa paghimo sing iban nga mga butang amo nga naatrasar sia sa pagpalagyo?—

Nahangpan mo bala ang punto ni Jesus sa paghambal nga indi paghulaton ang tigtulugnaw sa pagpalagyo?— Ginasingganan niya kita nga sanglit nahibaluan naton nga malapit na ang Armagedon, indi kita magpaatrasar sa paghulag agod pamatud-an nga ginahigugma naton ang Dios paagi sa pag-alagad sa iya. Kon magpaatrasar kita, mahimo nga maulihi na kita. Gani mangin kaangay gid kita sang mga tawo sang panahon sang daku nga Anaw nga nakabati sang paandam ni Noe apang wala sila magsulod sa arka.

Karon naman, hambalan naton kon ano ang mangin kahimtangan pagkatapos sang daku nga inaway sang Armagedon. Matun-an naton kon ano ang ginatigana sang Dios para sa aton tanan nga nagahigugma kag nagaalagad sa iya karon.