KAPU 47

Mutindu ya Kuzaba nde Armagedoni Mekuma Penepene

NGE mezaba kana kidimbu kele inki, mpidina ve?— Na Kapu 46, beto tangaka kidimbu yina Nzambi kupesaka sambu na kusonga nde yandi tafwa dyaka ve inza na masa. Dyaka, bantumwa kulombaka kidimbu mosi sambu bo zaba ntangu yina Yezu tavutuka mpi ntangu yina nsuka ya inza, to ya ngidika ya bima, takuma penepene.—Matayo 24:3.

Sambu Yezu tavanda ti nitu ya kukonda kumonana na zulu, yo vandaka mfunu nde bantu kumona kidimbu mosi yina tasonga bo nde yandi meyantika kuyala. Yo yina Yezu kutubilaka mambu yina balongoki na yandi fwe kangudila meso awa na ntoto. Kana mambu yina kusalama, yo tatendula nde yandi mevutuka mpi nde yandi meyantika kuyala na zulu bonso Ntotila.

Sambu na kulonga balongoki na yandi mfunu ya kukangula meso, Yezu kusongaka bo nde: “Beno tala nti ya bafige ti banti yonso. Kana beno mona nde yo me yantika kubasisa matiti, beno fweti zaba nde ntangu ya mvula me kuma penepene.” Nge  kezabaka nde ntangu ya mvula mekuma penepene. Nge le zaba mpi nde Armagedoni mekuma penepene kana nge mona nde mambu yina Yezu kutubilaka kelungana.—Luka 21:29, 30.

Na lutiti yai mpi na yina melanda, beto tatala bifwanisu ya mambu yina Yezu kutubaka nde yo tavanda na kati ya kidimbu yina tasonga nde Kimfumu ya Nzambi mekuma penepene. Kana mambu yai yonso kulungana imene, Kimfumu ya Nzambi ti Mfumu na yo Kristu tafwa baguvernema yankaka yonso, mutindu beto tangaka yo na Kapu 46.

 Yo yina, tala na dikebi yonso bifwanisu na balutiti zole yai ya kele na ntwala ya lutiti yai, beto tatubila yo. Nge le tanga mambu yina nge kemona na bifwanisu yai na Matayo 24:6-14 mpi Luka 21:9-11. Tala dyaka nimero ya fyoti yina ke na konso kifwanisu. Nge tamona dyaka nimero yango na luyantiku ya paragrafe yina ketendula kifwanisu yango. Ntangu yai, beto tala kana mambu ya kidimbu yina Yezu kupesaka kelungana bubu yai.

(1) Yezu kutubaka nde: “Beno ta wa bantu ke nwana bitumba penepene to bo ke tuba sambu na bitumba yina kele ntama . . . bantu ya nsi ya nkaka ta kwisa kunwanisa bantu ya nsi ya nkaka, bantu ya kimfumu ya nkaka ta kwisa kunwanisa bantu ya kimfumu ya nkaka.” Keti nge mewaka dezia bantu ketubila bitumba?— Bantu kunwanaka mvita ya ntete ya inza ya mvimba kubanda 1914 tii na 1918, mpi na nima Mvita ya Zole ya Inza ya Mvimba, kubanda 1939 tii na 1945. Bitumba ya inza ya mvimba ya mutindu yina kusalamaka ntete ve na ntwala! Bubu yai, bitumba kesalama na inza ya mvimba. Yo kemonana bonso nde konso kilumbu na TV, na radio, mpi na bazulunalu, beto kewaka to ketangaka kaka bansangu ya bitumba.

(2) Yezu kutubaka dyaka nde: “Nzala ta vanda mingi mpenza . . . na bisika ya mutindu na mutindu.” Mutindu nge le bakisa yo, bantu yonso kevandaka ve na bima ya kudya ya kufwana. Konso kilumbu, mafunda ya bantu kefwaka sambu bo kele ve na madya ya kufwana.

(3) Yezu kuyikaka nde: “Maladi ya mbi ta vanda na bisika ya mutindu na mutindu.” Keti nge mezaba kana maladi ya mbi kele inki?— Maladi ya mbi kele maladi yina kepanzanaka nswalu kibeni mpi kefwaka bantu mingi. Maladi ya kuluta mbi ya bo vandaka kubinga nde gripi Espaniole kufwaka bantu kiteso ya bamilio 20 kaka na nsungi ya mvula mosi mpamba. Na bilumbu na beto, ntembe kele ve nde bantu mingi kuluta ntalu yina tafwa na maladi ya SIDA. Kansere, maladi ya ntima, mpi bamaladi yankaka ke na kufwa mafunda mingi ya bantu konso mvula.

 (4) Yezu kupesaka kitini yankaka ya kidimbu ntangu yandi tubaka nde: “Ntoto . . . ta nikana na bisika ya mutindu na mutindu.” Keti nge mezaba kana kunikana ya ntoto kele inki?— Kunikana ya ntoto kesalaka nde ntoto kutekita na nsi ya makulu na nge. Yo kebwisaka banzo mpi mbala mingi yo kefwaka bantu. Kubanda na mvu 1914, ntoto kenikanaka bisika mingi bamvula yonso. Keti nge mewaka dezia bantu ketubila kunikana ya ntoto?—

(5) Yezu kutubaka nde kitini yankaka ya kidimbu tavanda nde “mbi ta kwisa mingi.” Yo yina kuyiba mpi nku kele mingi mpenza. Na bisika yonso bantu kevandaka na boma nde muntu kukotila bo na nzo sambu na kuyiba bo. Nku mpi mubulu yina kesalama bubu yai na ntoto ya mvimba mesalamaka ntete ve mutindu yina na ntwala.

(6) Yezu kupesaka kitini mosi ya kidimbu ya kuluta mfunu ntangu yandi tubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Matayo 24:14) Kana nge kekwikila na kyeleka ya “nsangu yai ya mbote,” ebuna nge fwe zabisa yo na bantu yankaka. Kana nge sala mpidina, nge le pesa diboko na kulungana ya kitini yai ya kidimbu.

Bantu yankaka le tuba nde mambu yina Yezu kutubilaka kesalamaka dezia. Kansi ata mbala mosi ve mambu yango yonso mesalamaka dezia na bisika mingi ya inza mpi na mbala mosi. Keti nge kebakisa kana kidimbu ketendula inki?— Yo ketendula nde kana beto mona nde mambu yai yonso kesalama, yo kezola kutuba nde kubika fyoti inza ya mpa ya Nzambi tayinga inza yai ya mbi.

Ntangu Yezu kupesaka kidimbu yai, yandi tubilaka mpi nsungi mosi ya mvula ya kevandaka ve bonso bansungi yonso. Yandi tubaka nde: “Beno samba Nzambi na mpila nde kilumbu yina ya beno ta tina yo vanda ve na ntangu ya madidi.” (Matayo 24:20) Nge keyindula nde Yezu zolaka kutuba inki?—

Inki le salama kana muntu mosi ketina kisumbula na nsungi ya madidi ya ngolo, ntangu mupepe kekumisaka kusala nzyetolo mpasi  kibeni to nkutu kigonsa?— Kansi ata yandi kuka na kutina, yo tavanda na mpasi mingi. Keti yo tavanda ve dyambu mosi ya mawa kana muntu kufwa na mvula mosi ya matadi kaka sambu yandi lutisaka ntangu mingi na kusala mambu yankaka na kisika ya kuyantika nzyetolo na yandi na ntwala?—

Keti nge mebakisa dibanza ya Yezu kumonisaka ntangu yandi tubaka nde beto fwe kinga ve ntangu ya madidi sambu na kutina?— Yandi vandaka kuzabisa beto nde mutindu beto mezaba nde Armagedoni mekuma penepene, beto fwe sukinina ve na kusadila Nzambi sambu na kusonga nde beto kezolaka yandi. Kana beto sukinina, beto talutisa ntangu ya kusadila Yehowa. Ebuna beto tavanda kaka bonso bantu yina kuzingaka na ntangu ya Mvula ya Ngolo, bo waka lukebisu ya Noa kansi bo kotaka ve na maswa.

Na kapu yai melanda, beto tatubila mutindu mambu tavanda na nima ya bitumba ya nene ya Armagedoni. Beto talonguka mambu yina Nzambi mebumbila beto yonso ya kezolaka mpi kesadilaka yandi bubu yai.

Baverse yankaka ya kesonga nde Armagedoni mekuma penepene kele: 2 Timoteo 3:1-5; mpi 2 Piere 3:3, 4.

 [Bifwanisu ya kele na lutiti 244-246]

Yezu vandaka kulonga nki dilongi ntangu yandi tubilaka nti ya bafige?

[Kifwanisu ya kele na lutiti 249]

Ntangu Yezu tubilaka kusosa kutina na ntangu ya madidi, yandi vandaka kulonga nki dilongi?