HIHI wee nĩ ũĩ kĩmenyithia nĩ kĩĩ?— Thĩinĩ wa Gĩcunjĩ kĩa 46, nĩ twathomire ũhoro wa kĩmenyithia kĩrĩa Ngai aaheanire gĩa kuonania atĩ ndakaanina thĩ na maĩ rĩngĩ. O na atũmwo nĩ meendaga kũmenya kĩmenyithia kĩa ihinda rĩa Jesu gũcoka, na rĩrĩa thĩ ĩno ĩgaathira.—Mathayo 24:3.

Tondũ Jesu ndangĩoneka arĩ igũrũ, andũ nĩ maabataraga kĩmenyithia gĩa kuonania atĩ nĩ ambĩrĩria gũthamaka. Nĩ ũndũ ũcio, Jesu nĩ eerire arutwo ake maũndũ marĩa mangĩonire magĩkĩka gũkũ thĩ. Na mona maũndũ macio nĩ mangĩamenyire atĩ Jesu nĩ acokete na akambĩrĩria gwathana igũrũ arĩ Mũthamaki.

Nĩguo Jesu ateithie arutwo ake mone bata wa gũikara meiguĩte, aamerire ũũ: “Mwĩrutei na mũkũyũ na mĩtĩ ĩrĩa ĩngĩ yothe. Rĩrĩa ĩrathundũra, nĩ muonaga na mũkamenya  atĩ rĩu hĩndĩ ya irio gũkũra nĩ ĩkuhĩrĩirie.” Ithuothe nĩ tũmenyaga hĩndĩ ya irio gũkũra yakuhĩrĩria. Na njĩra o ta ĩyo, tũngĩona maũndũ marĩa Jesu oigire magĩkĩka, no tũmenye atĩ Hari–Magedoni ĩrĩ hakuhĩ.—Luka 21:29, 30.

Karatathi-inĩ gaka na karĩa karũmĩrĩire, nĩ tũrona mbica cia maũndũ marĩa Jesu oigire nĩ makaamenyithania atĩ Ũthamaki wa Ngai ũrĩ hakuhĩ. Rĩrĩa maũndũ macio mothe magekĩka, Ũthamaki wa Ngai ũgĩtongorio nĩ Kristo nĩ ũkaanina  thirikari iria ingĩ ciothe, ta ũrĩa twerutire thĩinĩ wa Gĩcunjĩ kĩa 46.

Kwoguo, rora wega mbica iria irĩ tũratathi-inĩ tũu twĩrĩ twahĩtũka tondũ nĩ tũkwaria ũhoro wacio. Thĩinĩ wa Mathayo 24:6-14 na Luka 21:9-11 no ũthome ũhoro wĩgiĩ maũndũ marĩa ũrona mbica-inĩ ici. Ningĩ ũngĩrora nĩ ũkuona atĩ o mbica ĩrĩ na namba. Namba ĩyo ĩhaanaine na ĩrĩa ĩrĩ kĩambĩrĩria-inĩ gĩa kĩbungo kĩrĩa kĩarĩrĩirie mbica ĩyo. Rĩu reke tuone kana maũndũ macio Jesu oigire nĩ marahinga ũmũthĩ.

(1) Jesu oigire ũũ: “Nĩ mũkaigua ũhoro wa mbaara; . . . rũrĩrĩ nĩ rũgokĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ.” Hihi wee nĩ ũrĩ waigua ũhoro wĩgiĩ mbaara?— Mbaara ya Mbere ya Thĩ yarũirũo kuuma 1914 nginya 1918 nayo Mbaara ya Kerĩ ya Thĩ ĩkĩrũo kuuma 1939 nginya 1945. Mbere ĩyo gũtiagĩte na mbaara o na ĩmwe ya thĩ! Ũmũthĩ kũndũ kũingĩ thĩinĩ wa thĩ nĩ gũkoragwo na mbaara. Hakuhĩ o mũthenya nĩ tuonaga thĩinĩ wa TV ũhoro wĩgiĩ mbaara, kana tũkaũigua redio-inĩ kana tũkaũthoma ngathĩti-inĩ.

(2) Ningĩ Jesu nĩ oigire ũũ: “Nĩ gũkaagĩa ng’aragu . . . kũndũ na kũndũ.” No gũkorũo nĩ ũĩ atĩ andũ amwe matikoragwo na irio cia kũigana. Andũ ngiri nyingĩ nĩ makuaga o mũthenya nĩ ũndũ wa kwaga irio.

(3) Jesu aacokire akiuga atĩrĩ: “Nĩ gũkaagĩa . . . na mĩrimũ ya kũgwatanio kũndũ na kũndũ.” Hihi wee nĩ ũrĩ waigua ũhoro wĩgiĩ mĩrimũ ta ĩyo?— Harĩ mũrimũ ũmwe ta ũcio ũrĩa wetagwo Spanish flu woragire andũ milioni 20 kahinda-inĩ ka mwaka ũmwe. Mahinda-inĩ maya maitũ, no kũhoteke andũ aingĩ makĩria ma acio nĩ makuĩte kuumana na mũrimũ wa Mũkingo. Ningĩ mũrimũ wa kansa, mũrimũ wa ngoro, o hamwe na mĩrimũ ĩngĩ nĩ yũragaga andũ ngiri nyingĩ o mwaka.

 (4) Jesu nĩ aagwetire ũndũ ũngĩ rĩrĩa oigire ũũ: “Nĩ gũkaagĩa . . . ithingithia kũndũ na kũndũ.” Hihi wee nĩ ũĩ gĩthingithia nĩ kĩĩ?— Gĩthingithia gĩtũmaga thĩ ĩinaine, nginya nyũmba ikagwa na kaingĩ nĩ kĩũragaga andũ. Kuuma 1914, nĩ kũgĩaga na ithingithia nyingĩ o mwaka. Hihi nĩ ũrĩ waigua ũhoro wĩgiĩ ithingithia?—

(5) Ningĩ Jesu nĩ oigire atĩ, ‘andũ nĩ magaatuĩka oru mũno.’ Nĩkĩo ũmũthĩ gũkoragwo na ũici na ciĩko nyingĩ njũru. Kũndũ guothe andũ nĩ maikaraga magĩtigĩraga gũtigoke mũndũ aiye indo ciao. Thĩinĩ wa thĩ, gũtirĩ gwakorũo na ũici mũingĩ na ciĩko nyingĩ njũru ta ũrĩa kũhaana ũmũthĩ.

(6) Jesu nĩ aagwetire ũndũ ũngĩ wa bata mũno ũngĩgeekĩka rĩrĩa oigire ũũ: “Ũhoro ũyũ mwega wa Ũthamaki nĩ ũkaahunjio thĩ yothe ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.” (Mathayo 24:14) Angĩkorũo nĩ wĩtĩkĩtie ‘ũhoro ũcio mwega,’ nĩ wagĩrĩirũo kũhunjĩria andũ arĩa angĩ. Ũngĩka ũguo ũngĩkorũo ũkĩhingia ciugo icio cia Jesu.

Andũ amwe no moige atĩ maũndũ macio Jesu oigire matũire mekĩkaga. No gũtirĩ hĩndĩ maũndũ macio mothe marĩ meekĩka thĩ yothe ihinda-inĩ rĩmwe ta ũrĩa marekĩka ũmũthĩ. Hihi rĩu nĩ wanyita kĩmenyithia nĩ kĩĩ?— Maũndũ macio mothe marekĩka nĩmo kĩmenyithia gĩa gũteithia andũ mamenye atĩ thĩ ĩno ĩrĩ hakuhĩ gũthira nĩguo kũgĩe na thĩ njerũ ya Ngai.

Hĩndĩ ĩrĩa Jesu aaheanire kĩmenyithia kĩu, harĩ ũndũ ũngĩ aagwetire. Oigire atĩrĩ: “Hoyagai atĩ hĩndĩ yanyu ya kũũra ndĩkaanakinye hĩndĩ ya heho.” (Mathayo 24:20) Hihi ũgwĩciria eendaga kuuga atĩa?—

Nĩ ũndũ mũritũ mũno gũthiĩ rũgendo hĩndĩ ya heho nene kũrĩ na mbarafu, o na nĩ ũgwati. Kwoguo mũndũ angĩgeria kũũrĩra  thĩna hĩndĩ ta ĩyo-rĩ, kũngĩthiĩ atĩa?— No aremwo nĩ kũũra, na o na angĩũra angĩkorũo ũgwati-inĩ. Githĩ ti ũũru mũno mũndũ gũkorũo na mĩhang’o nginya hĩndĩ ya heho ĩkamũkorerera atambĩrĩirie rũgendo agakuĩra rũgendo-inĩ?—

Hihi nĩ wamenya kĩrĩa gĩatũmire Jesu oige mũndũ ndagĩrĩirũo gweterera hĩndĩ ya heho ĩkinye atarĩ arora?— Eendaga gũtwĩra atĩ tondũ Hari–Magedoni ĩrĩ hakuhĩ, tũtiagĩrĩirũo gũikara tũgĩtĩragĩria gũtungatĩra Ngai na kũmuonia nĩ tũmwendete. Tũngĩaga gũtungatĩra Ngai ihinda rĩrĩa, tũtigakorũo na ihinda rĩngĩ rĩagwĩka ũguo. Tũngĩhaana o ta andũ a hĩndĩ ya Mũiyũro ũrĩa mũnene, arĩa maahunjĩirio nĩ Nuhu no makĩaga kũingĩra thabina.

Gĩcunjĩ-inĩ kĩrĩa kĩrũmĩrĩire, nĩ tũkaarĩrĩria ũrĩa gũkahaana thutha wa mbaara ya Hari–Magedoni. Nĩ tũkwĩruta maũndũ marĩa Ngai endaga andũ arĩa mamũtungatagĩra magaakenera hĩndĩ ĩyo.