47 تاراۋ
ارماگەددوننىڭ جاقىن ەكەنىن قايدان بىلەمىز؟
سەن بەلگى دەگەن نە ەكەنىن بىلەسىڭ عوي، سولاي ما؟ ~ ٴبىز 46 تاراۋدان وقىعانىمىزداي، قۇداي دۇنيەنى ەندى ەشقاشان توپان سۋمەن جويمايتىنىن ۋادە ەتىپ، بەلگى رەتىندە كەمپىرقوساق بەرگەن. سونداي-اق ەلشىلەر يسادان ونىڭ قايتىپ كەلگەنىن كورسەتەتىن جانە دۇنيەنىڭ اقىرى جاقىنداعانىن بىلدىرەتىن بەلگى تۋرالى سۇراعان (ماتاي 24:3).
يسا كوكتەن بيلىك ەتەتىندىكتەن، ادامداردىڭ كوزىنە كورىنبەيدى. سول سەبەپتى ونىڭ بيلىك ەتە باستاعانىن ادامدار ٴبىلۋ ٷشىن، ولارعا كوزگە كورىنەتىن بەلگى قاجەت بولدى. سوندىقتان يسا شاكىرتتەرىنە جەر بەتىندە ورىن الاتىن جايتتار تۋرالى ايتقان. وسى جايتتار بەلگى بولىپ تابىلاتىندىقتان، شاكىرتتەر وعان مۇقيات بولۋ كەرەك ەدى. ويتكەنى بۇل يسانىڭ قايتىپ كەلىپ، كوكتە پاتشا رەتىندە بيلىك ەتە باستاعانىن بىلدىرمەك ەدى.
مۇقيات بولۋدىڭ ماڭىزدى ەكەنىن ۇيرەتپەكشى بولىپ، يسا ولارعا بىلاي دەدى: «ٸنجىر اعاشى مەن باسقا دا اعاشتارعا قاراڭدار: ولاردىڭ بۇرشىك اتقانىن كورگەندە، جازدىڭ جاقىنداپ قالعانىن بىلەسىڭدەر». سەن جازدىڭ جاقىنداپ قالعانىن اعاشتىڭ بۇرشىك اتۋى سياقتى بەلگىگە قاراپ بىلەسىڭ. تۋرا سول سياقتى ارماگەددوننىڭ دا جاقىن قالعانىن يسا ايتقان جايتتاردىڭ ورىندالىپ جاتقانىنا قاراپ بىلە الاسىڭ (لۇقا 21:29، 30).
يسا ٸنجىر اعاشىن مىسالعا كەلتىرىپ، نە نارسەگە ۇيرەتكىسى كەلدى؟
الدىڭعى بەتتەردە يسا ايتقان بەلگىگە جاتاتىن جايتتاردىڭ سۋرەتتەرى بار. بۇل — قۇداي پاتشالىعىنىڭ تاياپ قالعانىن بىلدىرەتىن جايتتار. وسىلاردىڭ بارلىعى ورىندالعاندا، 46 تاراۋدان وقىعانىمىزداي، قۇداي پاتشالىعىنىڭ بيلەۋشىسى ٴماسىح جەردەگى بارلىق ۇكىمەتتەردى تالقاندايدى.
قازىر سۋرەتتەردى جاقسىلاپ كورىپ ال، ويتكەنى ٴبىز سولار جايلى اڭگىمەلەسەمىز. سۋرەتتەگى جايتتار ماتاي 24:6—14 جانە لۇقا 21:9—11 تارماقتاردا ايتىلعان. ٵر سۋرەتتىڭ ٴنومىرى بار. بۇل ٴنومىر سول سۋرەت جايلى ايتىلاتىن ابزاستىڭ نومىرىنە ساي كەلەدى. ال ەندى يسا ايتقان جايتتاردىڭ بۇگىنگى كۇنى قالاي ورىندالىپ جاتقانىن كورەيىك.
1) يسا بىلاي دەگەن: «جاقىن ماڭداعى جانە الىستاعى سوعىستار تۋرالى ەستيسىڭدەر. ۇلت ۇلتقا قارسى، مەملەكەت مەملەكەتكە قارسى اتتانادى». سەن سوعىس تۋرالى جاڭالىقتار ەستىگەنسىڭ بە؟ ~ ٴبىرىنشى دۇنيەجۇزىلىك سوعىس 1914 پەن 1918 جىلدار ارالىعىندا بولدى. ال ەكىنشى دۇنيەجۇزىلىك سوعىس 1939 بەن 1945 جىلدار ارالىعىندا بولدى. بۇعان دەيىن دۇنيەجۇزىلىك سوعىس بولعان ەمەس. قازىرگى كەزدە بارلىق جەردە سوعىستار بولىپ جاتىر. ولار جايىندا ٴبىز كۇندە تەلەديدار مەن راديودان ەستىپ، گازەتتەردەن وقىپ ٴجۇرمىز.
2) سونداي-اق يسا: «ٴتۇرلى جەرلەردە اشارشىلىق بولادى»،— دەگەن. قازىرگى كۇنى ادامداردىڭ ٴبارى بىردەي تويىپ تاماق جەمەيدى، مۇنى ٶزىڭ دە بىلەتىن شىعارسىڭ. وسىنىڭ كەسىرىنەن كۇن سايىن مىڭداعان ادام كوز جۇمادى.
3) يسا تاعى بىلاي دەپ قوستى: «ٴتۇرلى جەرلەردە ىندەتتەر بولادى». سەن ىندەتتىڭ نە ەكەنىن بىلەسىڭ بە؟ ~ بۇل — كوپ ادامنىڭ ٶمىرىن قياتىن قاۋىپتى جۇقپالى اۋرۋ. وسىنداي قاۋىپتى ىندەتتەردىڭ ٴبىرى — «يسپانكا» تۇماۋى. بۇل ىندەتتىڭ كەسىرىنەن ٴبىر جىلدىڭ ىشىندە 20 ميلليونعا جۋىق ادام قايتىس بولعان. ال بۇگىندە بۇدان دا كوپ ادام جيتس (سپيد) ىندەتىنەن ٶلىپ جاتىر. سونداي-اق قاتەرلى ىسىك، جۇرەك اۋرۋى جانە تاعى باسقا اۋرۋلاردان جىل سايىن مىڭداعان ادامدار كوز جۇمۋدا.
4) بەلگىگە جاتاتىن تاعى ٴبىر جايت تۋرالى يسا بىلاي دەگەن: «ٴتۇرلى جەرلەردە جەر سىلكىنىستەرى بولادى». جەر سىلكىنىسى دەگەن نە ەكەنىن بىلەسىڭ بە؟ ~ بۇل — جەردىڭ شايقالۋى. جەر سىلكىنىسى كەزىندە ۇيلەر قۇلاپ، ٴجيى ادامدار قازا بولىپ جاتادى. 1914-جىلدان بەرى كوپتەگەن جەر سىلكىنىسى بولدى. سەن جەر سىلكىنىسى بولعانى تۋرالى ەستىگەنسىڭ بە؟ ~
5) يسا تاعى: «زاڭسىزدىق كوبەيەدى»،— دەگەن. سوندىقتان دا قازىر ۇرلىق پەن زورلىق-زومبىلىق وتە كوپ. بارلىق جەردەگى ادامدار ۇيلەرىن بىرەۋ توناپ كەتەدى دەپ قورقادى. دۇنيەجۇزى بويىنشا وسىنشالىقتى كوپ قىلمىس پەن زورلىق بۇرىن-سوڭدى بولماعان.
6) بەلگىگە جاتاتىن ماڭىزدى ٴبىر جايتقا نازار اۋدارىپ، يسا بىلاي دەگەن: «پاتشالىق جايلى وسى ىزگى حابار بارلىق ۇلتتارعا كۋالىك ەتىلۋ ٷشىن، بۇكىل جەر بەتىندە ۋاعىزدالادى. سوندا وسى زاماننىڭ سوڭى كەلەدى» (ماتاي 24:14). «وسى ىزگى حاباردى» باعالايتىن بولساڭ، ونى ادامدارعا ايتاسىڭ. وسىلايشا سەن دە وسى جايتتىڭ ورىندالۋىنا ۇلەس قوساسىڭ.
كەيبىر ادامدار يسا الدىن الا ايتقان بۇل جايتتار بۇرىننان بولىپ كەلە جاتىر دەيتىن شىعار. ٴبىراق بۇلاردىڭ ٴبارى ٴبىر ۋاقىتتا ٵرى دۇنيەجۇزى بويىنشا ەشقاشان ورىندالعان ەمەس. سونىمەن، بۇل بەلگىنىڭ ورىندالۋى نەنى بىلدىرەتىنىن بىلەسىڭ بە؟ ~ بۇل جاقىندا وسى زۇلىم دۇنيەنىڭ ورنىنا قۇدايدىڭ جاڭا دۇنيەسى كەلەتىنىن بىلدىرەدى.
يسا وسى بەلگىنى ايتقاندا، جىلدىڭ ٴبىر ەرەكشە مەزگىلىنە كوڭىل ٴبولىپ: «قاشاتىن كەزدەرىڭ قىس مەزگىلىنە تۋرا كەلمەسىن دەپ دۇعا ەتىپ جۇرىڭدەر»،— دەدى (ماتاي 24:20). قالاي ويلايسىڭ، وسى سوزدەرمەن يسا نە ايتقىسى كەلدى؟ ~
قىستا اۋا-رايى سۋىق، ٵرى جول ٴجۇرۋ وتە قاۋىپتى بولۋى مۇمكىن. سوندىقتان ادام قانداي دا ٴبىر اپاتتان قىستىڭ كۇنى قاشاتىن بولسا، ونىمەن نە بولادى؟ ~ ول قاشىپ قۇتىلسا دا، جولدا ۇلكەن قيىندىقتارعا تاپ بولادى. ال ەگەر جولعا ەرتەرەك شىعۋعا قولى تيمەي، كەيىن قارلى بورانعا تاپ بولىپ ٶلىپ كەتسە، وكىنىشتى بولار ەدى، سولاي ەمەس پە؟ ~
«قاشاتىن كەزدەرىڭ قىس مەزگىلىنە تۋرا كەلمەسىن» دەۋىمەن يسا نە ايتقىسى كەلدى؟
قاشۋدى قىسقى مەزگىلگە قالدىرماڭدار دەۋىمەن يسا نە ايتپاق بولعانىن ٴتۇسىندىڭ بە؟ ~ ارماگەددون جاقىن. سوندىقتان قۇدايدى جاقسى كورەتىنىمىزدى دالەلدەۋ ٷشىن، وعان قىزمەت ەتۋدى كەيىنگە قالدىرماۋىمىز كەرەك. كەيىنگە قالدىرا بەرسەك، كەش بولىپ قالۋى مۇمكىن. سوندا توپان سۋدىڭ الدىندا نۇحتىڭ ەسكەرتۋىن ەستي تۇرا، كەمەگە كىرمەگەن ادامدار سياقتى بولىپ قالامىز.
كەلەسى تاراۋدا ۇلى سوعىس ارماگەددون بىتكەننەن كەيىن، جەر بەتىندە ٶمىر قانداي بولاتىنى جايلى اڭگىمەلەسەمىز. قۇدايدى جاقسى كورىپ، وعان قىزمەت ەتىپ جۇرگەن بىزدەر ٷشىن ونىڭ نە دايىنداپ قويعانىن بىلەتىن بولامىز.
كەلەسى تارماقتار دا ارماگەددوننىڭ جاقىن ەكەنىن كورسەتەدى: تىموتەگە 2-حات 3:1—5 جانە پەتىردىڭ 2-حاتى 3:3، 4.
