YU NO wetin na sayn, nɔto so?— Insay Chapta 46, wi rid bɔt di sayn we Gɔd bin gi fɔ sho se i nɔ go ɛva yuz wata fɔ dɔnawe wit di wɔl igen. Dɔn di apɔsul dɛn bin aks fɔ sayn, so dat dɛn go no ustɛm Jizɔs go kam bak ɛn ustɛm di wɔl go dɔn.—Matyu 24:3.

Bikɔs Jizɔs go de na ɛvin ɛn pipul dɛn nɔ go si am, pipul dɛn go nid sayn we go sho se i dɔn bigin fɔ rul. So Jizɔs bin tɛl in disaypul dɛn bɔt sɔm tin dɛn we dɛn fɔ wach fɔ na dis wɔl. If dɛn si dɛn tin dɛn ya de apin, dat min se i dɔn kam bak, ɛn i dɔn bigin fɔ rul as Kiŋ na ɛvin.

We Jizɔs bin de tich in disaypul dɛn wetin mek i impɔtant fɔ lɛ dɛn de wach, i tɛl dɛn se: “Una luk di fig stik ɛn ɔl di ɔda stik dɛn.  We dɛn de pul nyu lif, una go si am fɔ unasɛf ɛn una go no se dray sizin dɔn nia.” Yu no wetin de sho se dray sizin dɔn nia, nɔto so? So yu kin ebul fɔ no if Amagɛdɔn dɔn nia we yu si di tin dɛn we Jizɔs bin tɔk bɔt de apin.—Lyuk 21:29, 30, NW.

Insay dis pej ɛn di wan we de afta am, wi go si pikchɔ dɛn we de sho difrɛn tin dɛn. Jizɔs bin se dɛn tin ya go bi di sayn we de sho se  Gɔd in Kiŋdɔm dɔn nia. We ɔl dɛn tin ya apin, Gɔd in Kiŋdɔm we Krays de rul go kam dɔnawe wit ɔl di ɔda gɔvmɛnt dɛn, jɔs lɛk aw wi rid na Chapta 46.

So tek tɛm luk di pikchɔ dɛn we de na di tu pej dɛn we de bifo dis wan, bikɔs wi de kam tɔk bɔt dɛn. Yu go rid bɔt wetin yu de si na dɛn tu pej dɛn ya na Matyu 24:6-14 ɛn Lyuk 21:9-11. Dɔn yu go si wan smɔl nɔmba nia ɔl di pikchɔ dɛn. Dis sem nɔmba de bifo di paregraf we tɔk bɔt da pikchɔ de. Naw lɛ wi si if bɔku tin dɛn we Jizɔs bin se go bi di sayn de apin tide.

(1) Jizɔs bin se: ‘Una go yɛri bɔt wɔ ɛn wan kɔntri go fɛt ɔda kɔntri; wan neshɔn go fɛt ɔda neshɔn.’ Yu dɔn ɛva yɛri bɔt wɔ?— Dɛn fɛt di fɔs wɔl wɔ frɔm 1914 to 1918, dɔn dɛn fɛt di sɛkɔn wɔl wɔ frɔm 1939 to 1945. Bifo dis tɛm, dɛn nɔ bin dɔn ɛva fɛt wɔl wɔ! Naw dɛn de fɛt wɔ ɔlsay na di wɔl. Wi de yɛri ɔ rid bɔt wɔ ɛvride we wi de wach tɛlivishɔn, lisin redio, ɛn rid nyuspepa.

(2) Jizɔs bin tɔk bak se: “Bad aŋri go de . . . plɛnti say.” Yu go mɔs no se nɔto ɔlman gɛt bɔku tin fɔ it. Bɔku bɔku pipul dɛn de day ɛvride bikɔs dɛn nɔ gɛt bɛtɛ tin fɔ it.

(3) Jizɔs tɔk bak se: “Dɛn sik we de prɛd go de ɔlsay.” Yu no dɛn sik dɛn ya we de kil bɔku pipul dɛn?— Wan pan dɛn na di Spanish flu we bin kil lɛk 20 milyɔn pipul dɛn so insay jɔs wan ia. Insay wi yon tɛm, AIDS dɔn kil bɔku pipul dɛn. Ɛn ɔda sik dɛn de we de kil bɔku pipul dɛn ɛni ia, lɛk kansa, at prɔblɛm, ɛn ɔda wan dɛn.

 (4) Jizɔs bin se bak: “Di grɔn go trimbul plɛnti say.” Yu no wetin dat min?— I min se di grɔn go shek ɔnda yu fut ɛn dis kin ivin mek os dɛn fɔdɔm, ɛn pipul dɛn kin day bɔku tɛm. Frɔm 1914, di grɔn kin trimbul bɔku say ɛni ia. Yu dɔn ɛva yɛri bɔt dat?—

(5) Jizɔs bin se wan ɔda tin we go de pan di sayn na dat ‘bad go de plɛnti mɔ ɛn mɔ.’ Na dat mek tif ɛn fɛt-fɛt dɔn bɔku. Pipul dɛn de fred se sɔmbɔdi go tray fɔ go tif insay dɛn os. Tif ɛn fɛt-fɛt nɔ ɛva bɔku so ɔlsay na di wɔl lɛk aw i bɔku so naw.

(6) Wan impɔtant pat na di sayn we Jizɔs gi na dat ‘pipul dɛn go tɛl ɔlman na di wɔl di gud nyus bɔt di tɛm we Gɔd go rul di wɔl, so dat ɔlman go gɛt di chans fɔ yɛri ɛn biliv di gud nyus; na da tɛm de di wɔl go dɔn.’ (Matyu 24:14) If yu biliv dis ‘gud nyus,’ yu go de tɛl ɔda pipul dɛn bɔt am. If yu de du dat, yusɛf go de ɛp fɔ du dis tin we Jizɔs bin se.

Sɔm pipul dɛn go tɔk se di tin dɛn we Jizɔs tɔk bɔt bin dɔn de apin frɔm tɛm. Na tru, bɔt dɛn ɔl nɔ wande apin na bɔku say dɛn na di wɔl di sem tɛm. So yu ɔndastand wetin di sayn min?— I min se we wi si ɔl dɛn tin ya de apin, i nɔ go te igen dis wikɛd wɔl nɔ go de igen ɛn na Gɔd in yon nyu wɔl go de naw.

We Jizɔs bin gi dis sayn, i bin tɔk bɔt wan spɛshal sizin na di ia. I bin se: “Una pre mek di tɛm we una de rɔnawe nɔ bin ren sizin.” (Matyu 24:20) Wetin yu tink se i min we i tɔk dat?—

Wɛl, if pɔsin gɛt fɔ rɔnawe pan trɔbul insay ren sizin, we di wɛda kin mek i tranga ɔ i ivin bad fɔ travul, wetin go apin?—  If i ebul rɔnawe, dat min se i nɔ go dɔn rili izi fɔ am. Yu nɔ tink se i go bad fɔ mek pɔsin day pan big big briz, jɔs bikɔs i bin tu bizi de du ɔda tin dɛn ɛn nɔ kɔmɔt de kwik?—

Yu si wetin mek Jizɔs bin tɔk se i nɔ go fayn fɔ wet te ren sizin bifo pɔsin bigin rɔnawe?— I bin de tɔk se bikɔs wi no se Amagɛdɔn dɔn nia, wi nɔ fɔ westɛm fɔ du tin dɛn we de sho se wi lɛk Gɔd. Wan pan dɛn tin dɛn de na fɔ de sav am. If wi westɛm, sɔntɛm wi nɔ go ebul fɔ sav Jiova igen. So i go jɔs tan lɛk di pipul dɛn we bin de di tɛm we da Ebi Ebi Ren bin kam; dɛn bin yɛri wetin Noa bin tɔk, bɔt dɛn nɔ bin go insay di ak.

Insay di nɛks chapta, wi go tɔk bɔt aw di wɔl go tan lɛk afta Amagɛdɔn. Wi go lan bɔt di tin dɛn we Gɔd dɔn rɛdi fɔ wi ɔl we lɛk am ɛn we de sav am naw.