Kauhanyo 47

Mo Lu Kona Ku Zibela Kuli Armagedoni I Fakaufi

SISUPO wa si ziba, nji cwañi?— Mwa Kauhanyo 46, ne lu balile ka za sisupo sa n’a file Mulimu sa kuli n’a si ke a sinya lifasi le ka munda hape. Hape, baapositola ne ba kupile ku fiwa sisupo ilikuli ba zibe fa n’a ka kutela Jesu ni f’o mafelelezo a lifasi, kamba muinelo w’o, n’a ka bela fakaufi.—Mateu 24:3.

Bakeñisa kuli Jesu n’a ka ba mwa lihalimu a sa bonahali, ne ku tokwahala sisupo se ne ba kona ku bona batu kuli u kalisize ku busa. Kacwalo, Jesu n’a bulezi ka za lika zeo balutiwa ba hae ba lukela ku lemuha fa lifasi. Lika zeo ha ne li nze li ezahala, ne ku ka talusa kuli u kutile ni kuli u kalisize ku busa kwa lihalimu sina Mulena.

Kuli a lute balutiwa ba hae ka za butokwa bwa ku tona, Jesu n’a ba bulelezi kuli: ‘Mu bone kota ya feiga ni  likota ze ñwi. Ha li shoshela matali, mwa lemuha mi mu ziba kuli mbumbi i s’e li fakaufi.’ Wa ziba m’o kona ku zibela kuli mbumbi i fakaufi. Mi wa kona ku ziba kuli Armagedoni i fakaufi ha u bona lika za n’a bulezi Jesu li ezahala.—Luka 21:29, 30.

Fa likepe le ni le li tatama, lu ka bona maswaniso a za lika zeo Jesu n’a ize ne li ka ba kalulo ya sisupo sa kuli Mubuso wa Mulimu u fakaufi. Lika zeo kaufela ha li ka ezahala, Mubuso wa Mulimu o  busiwa ki Kreste u ka tuba milonga ye miñwi kaufela, sina ha ne lu balile mwa Kauhanyo 46.

Kacwalo, ha ku talimisise hande fa maswaniso a fa makepe a mabeli a kwamulaho, mi lu ka ambola ka za ona. Kwa Mateu 24:6-14 ni Luka 21:9-11, wa kona ku bala ze u bona mwa maswaniso a. Hape, u bone kanombolo ka ka fa siswaniso ni siswaniso. Kanombolo ka ka swana ka fumaneha kwa makalelo a paragilafu ye talusa siswaniso seo. Cwale ha lu bone nji likalulo ze ñata za sisupo sa n’a file Jesu li sweli za talelezwa kacenu.

(1) Jesu n’a ize: “Mu ka utwa ka za lindwa ni lipiho za lindwa; . . . sicaba si ka lwanisa sicaba se siñwi mi mubuso u lwanise mubuso o muñwi.” (NW) Kana u kile wa utwa ka za lipiho za lindwa?— Ndwa ya Lifasi ya Pili ne i lwanilwe ku kala ka 1914 ku isa 1918, mi kwa taha Ndwa ya Lifasi ya Bubeli, ye n’e lwanilwe ku kala ka 1939 ku isa 1945. Ha ku na nako ye ñwi fo ku kile kwa bela lindwa za lifasi! Cwale lindwa li sweli za lwaniwa mwa lifasi kaufela. Ku bonahala kuli ka zazi fa TV, fa wailesi, ni mwa mitende, lu utwa kamba ku bala za lindwa.

(2) Jesu hape n’a ize: “Litala li ka ba teñi.” Sina ha u ziba, haki batu kaufela ba ba na ni lico ze likani za ku ca. Ka zazi, batu ba bañata ba shwa kakuli ha ba na lico ze likani za ku ca.

(3) Jesu n’a ekelize kuli: ‘Mwa sibaka se siñwi ni se siñwi ku ka ba lincwa.’ (NW) Kana ncwa wa i ziba?— Ki butuku bo bu bulaya batu ba bañata. Ncwa ye ñwi ye tuna ye bizwa Spanish flu ne i bulaile batu ibat’o ba 20 milioni mwa silimo si li siñwi fela. Mwa mazazi a luna, batu ba bañata ku fita bao mwendi ba ka bulaiwa ki butuku bwa AIDS. Mi ku na ni matuku a kansa, a pilu, ni a mañwi cwalo a bulaya batu ba bañata ka silimo ni silimo.

(4) Jesu n’a bulezi kalulo ye ñwi ya sisupo, ha n’a ize: ‘Ku  ka ba ni lizikinyeho.’ Kana zikinyeho wa i ziba?— Lizikinyeho li nyanganyisa mubu o lu zamayanga ku ona. Mandu a wanga, mi hañata batu ba shwanga. Ku kala ka 1914, se ku bile lizikinyeho ze ñata ka silimo ni silimo. Kana u kile wa utwa fateñi za lizikinyeho?—

(5) Jesu n’a ize kalulo ye ñwi ya sisupo neikaba ‘ku ekezeha kwa bumaswe.’ Ki kabakaleo ha ku na ni busholi bo buñata ni mifilifili. Batu mwa lifasi kaufela ba saba kuli mwendi mutu yo muñwi a ka swana a ba kenela mwa mandu a bona. Ha ku na nako ye ñwi fo ku kile kwa bela bukebenga ni mifilifili mwa lifasi kaufela ku fita mwa linako za cwale.

(6) Jesu n’a bulezi kalulo ya butokwa ya sisupo ha n’a ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mateu 24:14) Haiba wa lumela “evangeli ye ya mubuso,” fohe u lukela ku i bulelela ba bañwi. Ka ku eza cwalo, u ka abana mwa ku taleleza kalulo ye ya sisupo.

Batu ba bañwi ba kana ba bulela kuli lika za n’a polofitile Jesu kamita ne li ezahalanga. Kono lika zeo ha li si ka ezahala kaufel’a zona mwa libaka ze ñata za lifasi ka nako ye swana. Kacwalo, kana wa utwisisa ze si talusa sisupo seo?— Si talusa kuli ha lu bona lika zeo kaufela li ezahala, lifasi le li maswe le li ka tuha li yoliswa ki lifasi le linca la Mulimu.

Jesu ha n’a file sisupo seo, hape n’a bulezi ka za nako ye ipitezi ya silimo. N’a ize: “Mu lapele kuli ku saba kwa mina ku si ke kwa ezwa nako ya maliha.” (Mateu 24:20) Wena u bona kuli n’a talusizeñi ha n’a bulezi cwalo?—

Mutu ha n’a ka mata kozi ye ñwi mwa maliha, ili f’o ku zamaya ku sabisa hahulu, ku kona ku ezahalañi?— Niha n’a ka kona ku mata, n’a ka mata cwalo ka ku katazeha luli. Kana ne ku si ke kwa  swabisa mutu ha n’a ka bulaiwa ki silami bakeñisa fela kuli n’a patehile hahulu ku eza lika ze ñwi mi kacwalo n’a palezwi ku tama musipili ka nako ye nde?—

Kana wa bona sisupo sa n’a talusa Jesu ha n’a bulezi za ku sa libelela kuli konji maliha ha s’a tile, mutu kihona a ka mata?— N’a lu bulelela kuli, bakeñisa kuli lwa ziba kuli Armagedoni i fakaufi, ha lu lati ku liyeha ku nga muhato kuli lu bonise kuli lwa lata Mulimu ka ku mu sebeleza. Ha ne lu ka liyeha, u zibe ha ku sa na nako ya ku eza cwalo. Kacwalo, ne lu ka ba fela sina batu bao ka nako ya Munda ne ba utwile temuso ya Nuwe kono ne ba si ka kena mwa aleka.

Cwale, ha lu ambole ka za mo ku ka bela ndwa ya Armagedoni ha se i felile. Lu ka ituta z’a lu bulukezi Mulimu luna kaufela ba ba mu lata ni ku mu sebeleza cwale.

Ki a mañolo a mañwi a bonisa kuli Armagedoni i fakaufi: 2 Timotea 3:1-5 ni 2 Pitrosi 3:3, 4.

[Maswaniso a fa likepe 244, 245]

Jesu n’a luta tuto mañi ha n’a bulezi za kota ya feiga?

[Siswaniso se si fa likepe 249]

Jesu ha n’a bulela ka za ku lika ku mata mwa maliha, n’a luta tuto mañi?

 [Maswaniso a fa likepe mutumbi la 246]