UDI mumanye tshidibu babikila ne: tshimanyinu, ki mmuomu anyi?​— Mu Nshapita wa 46 tuvua babale bualu bua tshimanyinu tshivua Nzambi mufile, tshia ne: kavua mua kubutula kabidi bukua-panu ku mvula to. Bapostolo bakebeja pabu tshimanyinu bua kumanya tshikondo tshivua Yezu ne bua kupingana ne tshivua nshikidilu wa bukua-panu anyi wa ndongoluelu eu ne bua kusemena pabuipi.​—Matayo 24:3.

Bu muvua Yezu kayi mua kumueneka ku mêsu kua bantu bualu udi mu diulu, bivua bikengela tshimanyinu tshivua bantu mua kumona bua kuleja ne: ukavua mutuadije kukokesha. Ke bualu kayi Yezu wakakula bua malu avua bayidi bende ne bua kumona pa buloba apa. Pavua malu aa mua kuenzeka, bivua mua kuleja ne: ukavua mupingane ne mutuadije kukokesha mu diulu bu Mukalenge.

 Bua kulongesha bayidi bende mushinga wa kushala batabale, Yezu wakabambila ne: ‘Tangilayi mutshi wa mfigi ne mitshi mikuabu yonso; pasampilayi, panuamona bualu ebu, nenumanye ne: [tshikondo tshia luya] tshidi pabuipi.’ Udi mumanye mua kuamba padi tshikondo tshia luya tshikale pabuipi. Udi kabidi mua kumanya ne: Armagedone ukadi pabuipi paudi umona malu avua Yezu muambe enzeka.​—Luka 21:29, 30.

Mu dibeji edi ne mu makuabu adi alonda, netuikale mua kutuma ntema yetu ku bimfuanyi bia malu avua Yezu muambe, ne neikale tshitupa tshia tshimanyinu  tshidi tshileja se: Bukalenge bua Nzambi bukadi pabuipi. Padi malu onso aa amueneka, Bukalenge bua Nzambi ne Kristo bu Mukokeshi wabu nebuikale mua kubutula mbulamatadi yonso anu bu mutuvua babale mu Nshapita wa 46.

Nunku tangila bimpe bimfuanyi bidi mu mabeji adi mashale, netuakuile pa bimfuanyi ebi. Udi mua kubala mu Matayo 24:6-14 ne Luka 21:9-11 bua malu audi umona mu bimfuanyi ebi. Tangila kabidi tshishiferi tshikese tshidi pa tshimfuanyi tshionso. Tudi tusangana tshishiferi tshimue tshimue atshi ku mbangilu kua tshikoso tshidi tshiumvuija tshimfuanyi atshi. Mpindieu tumone bikala bitupa bia bungi bia tshimanyinu tshivua Yezu mufile ne bidi bienda bikumbana lelu.

(1) Yezu wakamba ne: ‘Nenumvue bualu bua mvita ne ngumu ya mvita; tshisamba tshikuabu netshiluangane ne tshinga, bukalenge bukuabu nebuluangane ne bunga.’ Ukadi mumvue bantu bakula bua mvita anyi?​— Mvita ya kumpala ya buloba bujima yakenzeka mu 1914 too ne mu 1918, ne pashishe kuakenzeka Mvita mibidi ya buloba bujima mu 1939 too ne mu 1945. Kumpala kakuvua kuanji kuenzeka mvita ya buloba bujima to! Mpindieu kudi mvita pa buloba bujima. Dituku dionso ku televizion, ku bisanji ne mu bikandakanda, tudi tumvua anyi tubala malu a mvita.

(2) Yezu wakamba kabidi ne: ‘Biyole [bia nzala] nebikaleku ku nseke ne ku nseke.’ Anu muudi mua kuikala mumanye, ki mmuntu yonso udi ne biakudia bikumbane to. Dituku dionso bantu ba bungi badi bafua bualu kabena ne biakudia bikumbane to.

(3) Yezu wakamba kabidi ne: ‘Bipupu nebikale ku nseke ne ku nseke.’ Udi mumanye tshintu tshidibu babikila ne: tshipupu anyi?​— Tshipupu ndisama anyi bubedi budi bushipesha bantu ba bungi. Tshipupu tshikole tshia menemene tshidibu babikila ne: grippe espagnole tshiakashipa bantu batue ku miliyo 20 anu mu tshidimu tshimue. Mu matuku etu aa bantu bapite apu nebafue pamuapa ne disama dia SIDA. Kudi kabidi disama dia kansere, masama a muoyo ne masama makuabu adi ashipa bantu binunu ne binunu tshidimu tshionso.

 (4) Yezu wakafila tshitupa tshikuabu tshia tshimanyinu, wamba ne: “[nekuikale bikumina] ku nseke ne ku nseke.” Udi mumanye tshikumina anyi?​— Bikumina bitu bikankisha buloba. Nzubu ibumbuka, ne misangu ya bungi bantu batu bafua. Katshia ku tshidimu tshia 1914, nkuenzeke bikumina bia bungi tshidimu tshionso. Utuku ukadi mumvue bakula bua bikumina anyi?​—

(5) Yezu wakamba ne: tshitupa tshikuabu tshia tshimanyinu netshikale ne: ‘bubi buvua ne bua kuvula.’ Ke bualu kayi kudi buivi ne tshinyangu bia bungi. Miaba yonso bantu badi batshina ne: muntu udi mua kulua kubabuelela mu nzubu. Katshia ne katshia kakutu kuanji kuikala dibunda dia bilumbu ne tshinyangu bia bungi nunku miaba yonso pa buloba bu mutudi tubimona bienzeka mpindieu to.

(6) Yezu wakafila tshitupa tshia mushinga mukole tshia tshimanyinu etshi pakambaye ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (Matayo 24:14) Biwikala witabuja “lumu luimpe elu,” nanku udi ne bua kuluambila pebe bantu bakuabu. Mu mushindu eu udi mua kuikala ukumbaja pebe tshitupa etshi tshia mulayi.

Bantu bakuabu badi mua kuamba ne: malu avua Yezu mudianjile kuamba atu anu enzeka misangu yonso. Kadi malu aa kaatu manji kuenzeka onso mu bitupa bia bungi bia pa buloba ne mu tshikondo tshimue kumpala mudibi bienzeka emu to. Nunku udi umvua tshidi tshimanyinu etshi tshiumvuija anyi?​— Tshidi tshiumvuija ne: patudi tumona malu aa onso enzeka, bukua-panu bupiabupia bua Nzambi bukadi pa kupingana pa muaba wa bukua-panu bubi ebu.

Pavua Yezu mufile tshimanyinu etshi, wakakula kabidi bua tshikondo tshia pa buatshi tshia tshidimu. Wakamba ne: “Nusambile, bua tshikondo tshinudi nunyema katshikadi tshia mashika.” (Matayo 24:20, MMM) Udi wela meji ne: uvua musue kuamba tshinyi?​—

Bulelela, bikala muntu ne bua kunyema tshipupu kampanda mu tshikondo tshia mashika makole, padi kulu kubi, luendu lulua lukole  ne njiwu ivula, ntshinyi tshidi mua kuenzeka?​— Padiye unyema neikale ne lutatu lua bungi be. Kabiakuikala dibungama dikole dia kumona muntu ufua mu tshipepele tshikole tshia mashika anu bualu uvua wenza malu ende makuabu kayi mua kutuadija luendu luende kumpala kua dîba anyi?​—

Udi mumvue lungenyi luvua Yezu usua kuleja pavuaye muakule bua kubenga kuindila too ne tshikondo tshia mashika bua kushisha kunyema anyi?​— Uvua musue kutuambila ne: bu mutudi bamanye se: Armagedone ukadi pabuipi, katuena mua kujingakana bua kuenza malu adi mua kuleja patoke ne: tudi banange Nzambi mu dimuenzela mudimu to. Tuetu banengakane, dîba didi mua kupita buetu tuetu. Nunku netuikale anu bu bantu ba mu tshikondo tshia Mvula wa kabutu bavua bumvue didimuija dia Noa kadi kubengabu kubuela mu buatu.

Mpindieu, tuakule bua tshikala mua kuenzeka pikala mvita minene ya Armagedone mimane kuenzeka. Tumone tshidi Nzambi mutulongoluele tuetu bonso badi bamunange ne badi bamuenzela mudimu lelu.