အခန်း ၄၇
အာမဂေဒုန် နီးပြီလို့ ဘယ်လို ပြောနိုင်သလဲ
ကလေးတို့ နိမိတ်လက္ခဏာကို သိတယ် မဟုတ်လား။— အခန်း ၄၆ မှာ ဒီကမ္ဘာကို ဘုရားသခင် ရေလွှမ်းမိုးဘေးနဲ့ နောက်တစ်ခါ ဘယ်တော့မှ မဖျက်ဆီးတော့ဘူးဆိုတဲ့ အထောက်အထားအကြောင်း ဖတ်ခဲ့ရတယ်။ ပြီးတော့ တမန်တော်တွေကလည်း ယေရှု ပြန်ရောက်နေပြီ ဆိုတာရယ်၊ ဒီလောကစနစ် ကုန်ဆုံးခါနီးပြီ ဆိုတာရယ် သိနိုင်အောင် နိမိတ်လက္ခဏာတစ်ခု တောင်းခဲ့ကြတယ်။—မဿဲ ၂၄:၃။
ယေရှုဟာ ကောင်းကင်ဘုံမှာ ရှိပြီး လူ့မျက်စိနဲ့ မမြင်နိုင်တဲ့အတွက် စတင်အုပ်စိုးနေပြီဆိုတာ လူတွေ သိဖို့ မြင်နိုင်တဲ့ နိမိတ်လက္ခဏာတစ်ခု လိုအပ်တာပေါ့။ ဒါကြောင့် ယေရှုက ဒီကမ္ဘာပေါ်မှာ သူ့တပည့်တွေ သတိထားကြည့်ရမယ့် အရာတွေကို ပြောပြခဲ့တယ်။ အဲဒီအရာတွေ ဖြစ်ပျက်လာပြီဆိုရင် ယေရှု ပြန်ရောက်နေပြီ၊ ပြီးတော့ ကောင်းကင်ဘုံမှာ ရှင်ဘုရင်အနေနဲ့ စတင်အုပ်စိုးနေပြီဆိုတာ သိနိုင်တယ်။
တပည့်တွေ သတိနဲ့ စောင့်နေဖို့ အရေးကြီးတဲ့အကြောင်း သင်ပေးတဲ့အနေနဲ့ ယေရှုက ဒီလိုပြောခဲ့တယ်– “သဖန်းပင်ကအစ အပင်အားလုံးကို လုကာ ၂၁:၂၉၊ ၃၀။
သတိပြုကြည့်ပါ။ ရွက်နုပေါက်လာတာကို မြင်ရရင် နွေရာသီ ရောက်တော့မယ်ဆိုတာ ခင်ဗျားတို့ သိတယ်။” သဘာဝရဲ့ ပြောင်းလဲမှုတွေကို ကြည့်ပြီး နွေရာသီ နီးပြီဆိုတာ တို့သိနိုင်တယ်။ ဒီလိုပါပဲ ယေရှုပြောခဲ့တဲ့ အမှုအရာတွေ ဖြစ်ပျက်လာတာကို တွေ့တဲ့အခါ အာမဂေဒုန် နီးပြီဆိုတာ ပြောနိုင်တာပေါ့။—ဒီစာမျက်နှာနဲ့ နောက်စာမျက်နှာမှာ ပါတဲ့ ပုံတွေကို ကြည့်ရအောင်။ ဒီပုံတွေက ဘုရားသခင့် နိုင်ငံတော် နီးလာပြီဆိုတဲ့ နိမိတ်လက္ခဏာရဲ့ အစိတ်အပိုင်း ဖြစ်မယ်ဆိုပြီး ယေရှု ပြောခဲ့တဲ့ အမှုအရာတွေကို ဖော်ပြထားတယ်။ အခန်း ၄၆ မှာ ဖတ်ခဲ့ရတဲ့အတိုင်းပဲ ဒီအမှုအရာတွေအားလုံး ဖြစ်ပျက်လာပြီဆိုရင် ခရစ်တော်အုပ်စိုးတဲ့ ဘုရားနိုင်ငံတော်က ကျန်တဲ့အစိုးရအားလုံးကို ချေမှုန်းဖျက်ဆီးပါလိမ့်မယ်။
ဒါကြောင့် ရှေ့စာမျက်နှာ နှစ်မျက်နှာကပုံတွေကို သေသေချာချာကြည့်ပြီး အဓိပ္ပာယ် ဖော်ကြည့်ရအောင်။ မဿဲ ၂၄:၆-၁၄ နဲ့ လုကာ ၂၁:၉-၁၁ မှာ ဒီပုံတွေမှာ တွေ့ရတဲ့အကြောင်းတွေကို ဖတ်လို့ရတယ်။ ပြီးတော့ ပုံတစ်ပုံချင်းမှာပါတဲ့ နံပါတ်လေးတွေကို မှတ်ထားပါ။ အဲဒီပုံအကြောင်း ဖော်ပြတဲ့ စာပိုဒ်အစမှာ နံပါတ်တူကို တွေ့ရမယ်။ အခု ယေရှုပေးခဲ့တဲ့ နိမိတ်လက္ခဏာရဲ့ အစိတ်အပိုင်းတွေဟာ အခုခေတ်မှာ ပြည့်စုံနေမနေ ကြည့်ကြရအောင်။
(၁) ယေရှုက “ရပ်နီးရပ်ဝေးက စစ်မက်သတင်းတွေကို ခင်ဗျားတို့ ကြားရလိမ့်မယ်။ . . . လူတစ်မျိုးနဲ့ တစ်မျိုး၊ တစ်နိုင်ငံနဲ့ တစ်နိုင်ငံ တိုက်ခိုက်ကြလိမ့်မယ်” ဆိုပြီး ပြောခဲ့တယ်။ စစ်တိုက်တဲ့သတင်းတွေကို ကလေးတို့ ကြားဖူးသလား။— ပထမ ကမ္ဘာစစ်ဟာ ၁၉၁၄ ခုနှစ်ကနေ ၁၉၁၈ ခုနှစ်အထိ တိုက်ခိုက်ခဲ့တယ်၊ ပြီးတော့ ၁၉၃၉ ခုနှစ်ကနေ ၁၉၄၅ ခုနှစ်အထိ ဒုတိယ ကမ္ဘာစစ် ဖြစ်ခဲ့တယ်။ ဒီ့အရင်က အဲဒီလို ကမ္ဘာစစ်မျိုး မဖြစ်ခဲ့ဖူးဘူး။ အခုဆိုရင် ကမ္ဘာတစ်ဝန်းလုံးမှာ စစ်ပွဲတွေ ဖြစ်နေကြတယ်။ တီဗွီမှာ၊ ရေဒီယိုမှာ၊ သတင်းစာမှာ စစ်သတင်းတွေကို နေ့တိုင်းလိုလို ကြားနေရတယ်။
(၂) ယေရှုက “အစာခေါင်းပါးတာ . . . တစ်နေရာပြီး တစ်နေရာ ဖြစ်လိမ့်မယ်” လို့လည်း ပြောခဲ့တယ်။ လူတိုင်းလူတိုင်း အစာရေစာ ဝဝလင်လင် မစားရဘူးဆိုတာ ကလေးတို့ သိကြမှာပါ။ အစာရေစာဝအောင် မစားရလို့ ထောင်နဲ့ချီတဲ့လူတွေ နေ့တိုင်းလိုလို သေဆုံးနေရကြတယ်။
(၃) ယေရှုက ‘ကပ်ရောဂါဘေးတွေ တစ်နေရာပြီး တစ်နေရာ ဖြစ်လိမ့်မယ်’ ဆိုပြီးတော့လည်း ပြောထားသေးတယ်။ ကပ်ရောဂါဘေးဆိုတာ ဘာလဲ သိသလား။— လူအများကြီးကို သေစေတဲ့ အဖျားအနာတို့၊ ရောဂါတို့ကို ပြောတာ။ စပိန်တုပ်ကွေးလို့ခေါ်တဲ့ ကပ်ရောဂါဘေးကြီးဟာ တစ်နှစ်အတွင်းမှာ လူသန်းပေါင်း ၂၀ လောက်ကို သေဆုံးစေခဲ့တယ်။ အခုခေတ်မှာ အေအိုင်ဒီအက်စ်ရောဂါနဲ့ သေဆုံးမယ့်လူတွေဟာ အဲဒီအရေအတွက်ထက်မက များလိမ့်မယ်။ ပြီးတော့ ကင်ဆာရောဂါ၊ နှလုံးရောဂါနဲ့ တခြားတခြား ဖျားနာမှုတို့ကလည်း နှစ်စဉ်နှစ်တိုင်း လူထောင်ပေါင်းများစွာကို သေဆုံးနေစေတယ်။
(၄) ယေရှုက နိမိတ်လက္ခဏာရဲ့ တခြားအစိတ်အပိုင်းနဲ့ ပတ်သက်ပြီး ဒီလိုပြောခဲ့တယ်– ‘တစ်နေရာပြီး တစ်နေရာ ငလျင်တွေ အကြီးအကျယ် လှုပ်လိမ့်မယ်။’ မြေငလျင်ဆိုတာ ဘာလဲ သိသလား။— မြေငလျင်က မြေကြီး လှုပ်ခါတာကို ပြောတာ။ အိမ်တွေ ပြိုကျပြီး လူတွေ သေကြရတယ်။ ၁၉၁၄ ခုနှစ်ကစပြီး နှစ်တိုင်းလိုလို မြေငလျင် လှုပ်လာခဲ့တယ်။ ငလျင်လှုပ်တဲ့သတင်းတွေ ကြားဖူးသလား။—
(၅) နိမိတ်လက္ခဏာရဲ့ အစိတ်အပိုင်း နောက်တစ်ခုအနေနဲ့ ‘ဆိုးညစ်မှုတွေ ပိုများလာမယ်’ လို့ ယေရှု ပြောခဲ့တယ်။ ဒါကြောင့်မို့လို့ ခိုးမှုတွေ၊ အကြမ်းဖက်မှုတွေ ဒီလောက်တောင် များလာတာကိုး။ နေရာတကာမှာ လူတွေက သူတို့အိမ် ဖောက်ထွင်းခံရမှာ ကြောက်နေကြတယ်။ ဒီကနေ့လို ကမ္ဘာ့ဒေသအားလုံးမှာ ရာဇဝတ်မှုတွေ၊ အကြမ်းဖက်မှုတွေ များပြားနေတာမျိုး အရင်တုန်းက တစ်ခါမှ မရှိခဲ့ဖူးဘူး။
(၆) ယေရှုက နိမိတ်လက္ခဏာရဲ့ သိပ်အရေးကြီးတဲ့ အစိတ်အပိုင်းတစ်ခုအကြောင်းကို ဒီလိုပြောခဲ့တယ်– “နိုင်ငံတော်သတင်းကောင်းကို လူနေထိုင်ရာ မြေတစ်ခွင်လုံးမှာ ဟောပြောရလိမ့်မယ်။ ပြီးမှ အဆုံးရောက်လာလိမ့်မယ်။” (မဿဲ ၂၄:၁၄) ကလေးတို့ ‘သတင်းကောင်း’ ကို ယုံကြည်တယ်ဆိုရင် ဒီအကြောင်းကို တခြားလူတွေကို ပြောပြရမှာပေါ့။ ဒီနည်းနဲ့ နိမိတ်လက္ခဏာရဲ့ ဒီအပိုင်းကို ပြည့်စုံစေတဲ့နေရာမှာ ကလေးတို့လည်း ပါဝင်နိုင်တာပေါ့။
ယေရှု ကြိုပြောခဲ့တဲ့ အမှုအရာတွေဟာ အမြဲလိုလို ရှိခဲ့တာပဲလို့ တချို့လူတွေ ပြောရင်ပြောမယ်။ ဒါပေမဲ့ ကမ္ဘာ့ဒေသ ဒီလောက်များများမှာ အဲဒီအမှုအရာတွေ အားလုံး တစ်ချိန်တည်းမှာ ဖြစ်ခဲ့တာမျိုး တစ်ခါမှ မရှိခဲ့ဖူးဘူး။ ဒီတော့ ဒီနိမိတ်လက္ခဏာရဲ့ အဓိပ္ပာယ်ဟာ ဘာလဲဆိုတာ သိသလား။— အဲဒါတွေအာလုံး ဖြစ်ပျက်နေတာကို တွေ့ရပြီဆိုရင် မကြာခင် ဆိုးညစ်တဲ့ ဒီလောက ကုန်ဆုံးပြီး ဘုရားသခင်ရဲ့ကမ္ဘာသစ် ရောက်လာတော့မယ်ဆိုတဲ့ အဓိပ္ပာယ်ပဲ။
ဒီနိမိတ်လက္ခဏာကို ပေးတဲ့အခါမှာ ယေရှုက တစ်နှစ်တာရဲ့ အထူးရာသီတစ်ခုအကြောင်းလည်း ပြောခဲ့တယ်။ ‘ခင်ဗျားတို့ ထွက်ပြေးရမယ့် အချိန်ဟာ ဆောင်းရာသီ . . . မကျဖို့ ဆုတောင်းနေကြပါ’ လို့ပြောခဲ့တယ်။ (မဿဲ ၂၄:၂၀) ယေရှုရဲ့စကားက ဘာကို ဆိုလိုတယ်လို့ ထင်သလဲ။—
ရာသီဥတုကြောင့် ခရီးသွားလာရတာ ခက်ခဲရုံမက အန္တရာယ်တောင် ရှိတတ်တဲ့ဆောင်းတွင်းမှာ ကပ်ဘေးတစ်ခုခုကြောင့် လူတစ်ယောက် ထွက်ပြေးရမယ်ဆိုရင် ဘာဖြစ်နိုင်သလဲ။—
နောက်ဆုံး ထွက်ပြေးလွတ်မြောက်ရင်တောင် အခက်အခဲအများကြီး ကျော်ဖြတ်ခဲ့ရမှာပဲ။ တကယ်လို့ သူဟာ စောစောစီးစီး ခရီးထွက်ဖို့ မလုပ်ဘဲ အရေးမကြီးတဲ့ တခြားဟာတွေနဲ့ အလုပ်များနေတဲ့အတွက် ဆောင်းမုန်တိုင်း မိပြီး သေသွားမယ်ဆိုရင် ဝမ်းနည်းစရာ မကောင်းဘူးလား။—ထွက်ပြေးဖို့ ဆောင်းရာသီအထိ မစောင့်ပါနဲ့လို့ ယေရှု ပြောခဲ့တဲ့စကားရဲ့ လိုရင်းသဘောကို နားလည်ရဲ့လား။— တို့တစ်တွေ အာမဂေဒုန် နီးနေပြီဆိုတာ သိထားတဲ့အတွက် ဘုရားသခင်ကို ချစ်ကြောင်း အမှုတော်ကို ထမ်းဆောင်ခြင်းအားဖြင့် အလုပ်နဲ့ သက်သေပြဖို့ အချိန်မဆွဲပါနဲ့လို့ ယေရှု ပြောနေတာ ဖြစ်တယ်။ အချိန်ဆွဲမယ်ဆိုရင် သိပ်နောက်ကျသွားမယ်။ အဲဒီလိုဆိုရင် တို့တစ်တွေလည်း ရေလွှမ်းမိုးဘေးကြီး ကျရောက်တုန်းက နောဧရဲ့ သတိပေးစကားကို ကြားရပေမဲ့ သင်္ဘောထဲကို မဝင်ခဲ့တဲ့လူတွေနဲ့ တူသွားမှာပေါ့။
နောက်အခန်းကျရင် အာမဂေဒုန်စစ်ပွဲကြီး ပြီးတဲ့နောက်မှာ အခြေအနေ ဘယ်လို ဖြစ်လာမယ် ဆိုတဲ့အကြောင်း ပြောကြရအောင်။ အခုပဲ ဘုရားသခင်ကို ချစ်ပြီး ဝတ်ပြုကြသူတွေ အားလုံးအတွက် ဘုရားသခင် အသင့်ပြင်ဆင်ပေးထားတဲ့ အရာတွေအကြောင်း သိရပါမယ်။
အောက်ပါကျမ်းချက်တွေဟာ အာမဂေဒုန် နီးပြီဆိုတာပြတဲ့ နောက်ထပ်ကျမ်းချက်တွေ ဖြစ်တယ်– ၂ တိမောသေ ၃:၁-၅။ ၂ ပေတရု ၃:၃၊ ၄။