NOOMANYA akamanyiso, tikwo?— Omu Shuura 46 ey’ekitabo eki tushomire aha kamanyiso aku Ruhanga yaahaire, kworeka ngu tarigaruka kucwekyereza ensi n’omwegyemure. Kandi, entumwa nabo bakashaba Yesu akamanyiso kubaasa kumanya obu yaabaire naija kugaruka n’obu emperu y’ensi egi yaabaire neija kubaho.​—Matayo 24:3.

Obu Yesu yaabaire naija kuba ari omu iguru atarikureebwa, abantu bakaba nibeetenga akamanyiso akaakworekire ngu Yesu atandikire kutegyeka. N’ahabw’ekyo Yesu akagamba aha bintu ebi abeegi be baabaire nibaija kureeba omu nsi. Ebintu ebyo ku byakubaireho, bakaamanyire ngu Yesu agarukire kandi atandikire kutegyeka nk’Omukama omu iguru.

Kubaasa kwegyesa abeegi be obukuru  bw’okuguma nibareeba, Yesu akabagira ati: ‘Mwetegyereze omutiini n’emiti endiijo yoona ku etooka amababi, mwagareeba, mumanya ku obunaku bw’okugyesha buri haihi.’ Hariho ebi orikubaasa kureeba okamanya ngu obwire bw’okugyesha buri haihi kuhika. Nahabw’ekyo noobaasa kwetegyereza ngu Haramagedoni eri haihi kubaho waareeba ebi Yesu yaagambireho birikubaho.​—Luka 21:29, 30.

Aha rupapura oru n’orurikukurataho, hariho ebishushani by’ebintu ebi Yesu yaagizire ngu ni bimwe  aha kamanyiso akarikworeka ngu Obukama bwa Ruhanga buri haihi kutegyeka. Ebi byona ku biraabeho, Obukama bwa Ruhanga oburikutegyekwa Kristo nibwija kucwekyereza obutegyeki bwona nk’oku tushomire omu Shuura 46 ey’ekitabo eki.

N’ahabw’ekyo yetegyereze ebishushani ebiri aha mpapura ibiri ez’enyima, reero nitwija kubigambaho. Omuri Matayo 24:6-14 na Luka 21:9-11, nimwo orikubaasa kushoma ebikwatiraine n’ebi orikureeba omu bishushani ebyo. Kandi, yetegyereze enamba enkye eziri ahari buri kishushani. Enamba ezo nizo zimwe eziri aha buri kutandika kwa buri kacweka akarikushoboorora buri kishushani. Hati ka tureebe bingi aha biri omu kamanyiso aku Yesu yaahaire ku biraabe biriyo nibihikiirizibwa ebiro ebi.

(1) Yesu akagira ati: “Muryahurira engamba n’okurangaanwa kwazo; . . . eihanga riryateera erindi ihanga, n’obugabe buryateera obundi bugabe.” Oraahuriireho abantu nibagamba aha ntaro?— Orutaro rw’Ensi Yoona orw’okubanza rukabaho kuruga 1914 kuhika 1918, kandi hakaija haabaho Orutaro rw’Ensi Yoona orwa kabiri, kuruga 1939 kuhika 1945. Hakaba hatakabahoga zindi ntaro z’ensi yoona. Hati ensi yoona erimu entaro omu bicweka bitari bimwe na bimwe. Buri izooba ahari tiivi, ahari radiyo n’empapura z’amakuru, nituhurira nari tushoma aha ntaro.

(2) Kandi Yesu akagira ati: “Haryabaho enjara . . . omu myanya mingi.” Nk’oku orikubaasa kuba nookimanya, tiburi omwe ngu aine eby’okurya ebirikumara. Buri izooba abantu baingi nibafa ahabw’okugira ngu tibaine by’okurya birikumara.

(3) Yesu akongyera yaagira ati: ‘Haryabaho orufu omu myanya mingi.’ Orufu nikimanyisa ki?— N’endwara erikwita abantu baingi. Endwara emwe y’amaani erikwetwa Spanish flu ekaita abantu barikurenga omu bukaikuru 20 omu mwaka nka gumwe. Omu bunaku obu, abantu abarikurenga ahari abo nibabaasa kwija kwitwa Siriimu.  Kandi hariho ekookoro, endwara y’omutima, n’endwara ezindi ezirikwita abantu baingi buri mwaka.

(4) Yesu akongyera yaagira ati: ‘Haryabaho emitsitsa omu myanya mingi.’ Omutsitsa noogumanya?— Omutsitsa nigutengyetsa ensi. Amaju nigagwa, kandi obumwe abantu bafa. Kuruga omu mwaka 1914, hatwire nihabaho emitsitsa mingi buri mwaka. Oraahuriireho ebirikukwata aha mitsitsa?—

(5) Yesu akagira ngu ekindi ekyakubaire omu kamanyiso ako ‘n’okukanya kw’obubi.’ Niyo nshonga ahabw’enki hariho obushuma bwingi n’obushaarizi bwingi. Buri hamwe abantu nibatiina ngu abashuma nibabaasa kuhenda amaju gaabo. Okuhenda ebiragiro n’obushaarizi ebiriho ebiro ebi omu nsi yoona tibikabahoga.

(6) Yesu akaha ekindi ekikuru ekyakubaire omu kamanyiso ako obu yaagira ati: ‘Amakuru marungi aga ag’Obukama garyabuurirwa omu nsi yoona okuba eky’okuhamya aha mahanga goona; obwo nibwo emperu erihika.’ (Matayo 24:14) Ku oraabe noomanya omugasho ‘gw’amakuru marungi aga,’ oshemereire kugabuurira abandi. Omu muringo ogwo nooba noohikiiriza kimwe aha biri omu kamanyiso aku Yesu yaahaire.

Abantu abamwe nibabaasa kugira ngu ebintu ebi Yesu yaagambireho bitwire nibibaho. Kwonka tihariho obu ebintu nk’ebyo byona birabaireho omu bicweka by’ensi bingi kandi bikabaho omu bwire bumwe nka hati. Mbwenu waayetegyereza amakuru g’akamanyiso?— Nikimanyisa ngu ku turaareebe ebintu ebyo byona nibibaho, tumanye ngu ensi ya Ruhanga ensya eri haihi kuza omu mwanya gw’ensi egi embi.

Obu Yesu yaaha akamanyiso ako, akagamba n’aha bwire bw’omutaano omu mwaka. Akagira ati: ‘Mugume nimushaba ngu okuhunga kwanyu kutaribaho omu biro by’obutiti.’ (Matayo 24:20) Nooteekateeka ngu akaba naamanyisa ki?—

Omuntu ku yaakuhunga akabi omu bwire bw’obutiti, obu kirikuba  kigumire nari kiri eky’akabi kugyenda, niki ekirikubaasa kubaho?— Nangwa n’obu yaakuhunga, kwonka nikiba kimugumiire munonga. Mbwenu shi tikikaabaire kibi munonga omuntu kufeera omu eihunga ahabw’okugira ngu akaba aine bingi by’okukora byamuremesa kuhunga kare?—

Waayetegyereza eki Yesu yaabaire naamanyisa, obu yaagamba aha kutategyereza obwire bw’obutiti kubaasa kuhunga?— Akaba naatugambira ngu obu turikumanya ngu Haramagedoni eri haihi kubaho, titushemereire kweziringa kukyoreka ngu nitukunda Ruhanga turikumuheereza. Twayeziringa, obwire bw’okuheereza Yehova nibubaasa kuhwayo. N’ahabw’ekyo nituba turi nk’abantu abaatwirwe Omwegyemure, abaahuriire okurabura kwa Noa kwonka bakanga kuza omu bwato.

Kandi, nitwija kureeba oku embeera eraabe neeshusha bwanyima y’orugamba orukuru Haramagedoni. Nitwija kwega aha bi Ruhanga atebeekanisiize twena abarikumukunda kandi bakamuheereza obwire obu.