O LENĀ e te iloa le mea e taʻu o le faailoga, a ea?— Ua uma ona tatou faitau i le Mataupu e 46 e faatatau i le faailoga na tuu mai e le Atua e na te lē toe faaumatiaina le lalolagi i se lolo. E lē gata i lea, na talosaga atu le ʻauaposetolo i se faailoga e iloa ai le faatasi mai o Iesu ma le lata mai o le iʻuga o le lalolagi, po o lenei faiga o mea.​—Mataio 24:3.

Talu ai e lē vaaia Iesu i le lagi, ua moomia ai se faailoga e vaaia e tagata ina ia iloa ai ua amata ona pule Iesu. Na taʻua la e Iesu mea o le a tutupu i le lalolagi, e moomia ona mataala ai ona soo. Afai loa e taunuu mea nei, o lona uiga ua toe afio mai Iesu ma ua fai o ia ma Tupu i luga i le lagi.

Ina ia aʻoaʻo atu i ona soo le tāua o le mataala pea, na fetalai atu Iesu iā i latou: “Inā vaai ia i le mati atoa ma laau uma; pe a faatoʻā  matala mai lau, ua outou vaai, ona outou iloa ai lea ua latalata le tausaga vevela.” E iloa lava e tagata le taimi e oo mai ai le tau vevela. E tatou te iloa foʻi le lata mai o Amaketo pe a tatou vāai ua taunuu mea na taʻua e Iesu.​—Luka 21:29, 30.

O le a tatou talanoa i ata o mea ua tutupu na fetalai i ai Iesu, e fai ma vaega o le faailoga o le lata mai o le Malo o le Atua, lea o loo maua i le itulau lenei ma le itulau o loo sosoo mai. Pe afai e taunuu uma mea nei, ona faaumatia loa lea e le  Malo o le Atua o loo Pule ai Iesu, isi malo uma e pei ona sa tatou faitau ai i le Mataupu e 46.

Ia tilotilo lelei i ata i itulau e lua na muamua atu ma o le a tatou talatalanoa i ai. E mafai ona e faitau i le Mataio 24:6-14 ma le Luka 21:9-11, e faatatau i mea o e vaaia i ata. E lē gata i lea, seʻi mātau le fuainumera o loo i ata taʻitasi. O fuainumera foʻi na o loo maua i amataga o palakalafa ia o loo faamatala ai uiga o ata. O lea la, seʻi tatou vaai pe ua faataunuu i aso nei nisi vala o le faailoga lea na taʻua e Iesu.

(1) Na fetalai mai Iesu: “E faalogo outou i taua ma tala o taua; . . . e sii le taua e le tasi nuu i le tasi nuu, ma le tasi malo i le tasi malo.” Ua e faalogo i ni tala o taua?— Na faia le taua muamua a le lalolagi i le 1914 seʻia oo i le 1918, ma na faia le Taua Lona Lua a le Lalolagi i le 1939 seʻia oo i le 1945. O taimi muamua ia na fai ai taua a le lalolagi aoao! I le taimi la lenei, o loo tau ai taua i le lalolagi aoao. E foliga mai o aso uma lava ua tatou faalogo ma faitau ai i tala o taua i le televise, leitiō ma nusipepa.

(2) Na fetalai mai foʻi Iesu: “Ona oo mai ai lea o oge, . . . i lea mea ma lea mea.” Atonu e te iloa e lē tofu meaʻai tagata uma. E faitau afe tagata e feoti i aso taʻitasi ona o le lē lava o a latou meaʻai.

(3) E lē gata i lea, na faapea mai Iesu: ʻE iai faamaʻi i lea mea ma lea mea.’ Ua tele ina feoti tagata i faamaʻi. O se tasi o faamaʻi tele, o le fulū Sepania lea na feoti ai tagata e tusa ma le 20 miliona i le tausaga e tasi. Peitaʻi, e toʻatele atu tagata i aso nei atonu o le a feoti ona o le faamaʻi oti o le AIDS. E lē gata i lea, e faitau afe tagata e feoti i tausaga taʻitasi i le kanesa, maʻi fatu ma isi faamaʻi.

 (4) Na taʻua foʻi e Iesu se isi vala o le faailoga: “Ona oo mai ai lea o . . . mafuiʻe i lea mea ma lea mea.” E te iloa le mea e taʻu o le mafuiʻe?— E lūlūina e mafuiʻe le eleele. E paʻūʻū ai fale ma e masani foʻi ona feoti ai tagata. Talu mai le 1914, o le tele ia o mafuiʻe i tausaga taʻitasi. Pe na e faalogo i tala i mafuiʻe?—

(5) Na fetalai mai Iesu o se tasi o vala o le faailoga, o le “tupu tele o le amio leaga.” O le māfuaaga lenā ua tele ai le gaoi ma faiga sauā. E toʻatele tagata ua fefefe ina neʻi gaoia e se tagata a latou mea. Ua sili atu ona tele le amio leaga ma faiga sauā i le lalolagi aoao i aso nei, na i lo aso la.

(6) Na taʻua e Iesu se vala tāua o le faailoga: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) A faapea e te talitonu moni lava i “lenei tala lelei,” e tatau la ona e talanoa atu i isi tagata. O le faia faapea, ua fai ai foʻi lau vaega i le faataunuuina o le vala lenei o le faailoga.

Atonu e faapea mai isi, e tutupu soo mea na faamatalaina e Iesu. Peitaʻi, e leʻi tutupu muamua faatasi i le taimi e tasi, nei mea i le tele o atunuu i le lalolagi. Ua e malamalama la i le faailoga?— A tatou vaai ua tutupu mea uma nei, o lona uiga ua toeitiiti ona aveesea lea o le lalolagi amioleaga lenei, ae sui i le lalolagi fou a le Atua.

A o taʻua e Iesu lenei faailoga, na ia taʻua ai foʻi se tau faapitoa o le tausaga. Na ia fetalai mai: ʻA ia outou tatalo ina neʻi outou sosola i le tau mālūlū.’ (Mataio 24:20) O le ā sou manatu, o le ā le uiga o le fetalaiga a Iesu?—

A faapea e tatau ona sola ese se tasi i le tau mālūlū ona o se mala, e faigatā lava ona o le leaga o le tau ma atonu e lamatia ai  lona ola pe a malaga, o le ā le mea e ono tupu?— E mautinoa e faigatā tele ona sola ese lenā tagata ma sao ai. O se mea e faanoanoa ai pe afai e maumau le ola o se tagata i se matagi malosi ona ua pisi tele i isi mea, ma tuai ai ona sola ese, a ea?—

Po ua e malamalama la i le manatu tāua na taʻu mai e Iesu, e aua le faatali i le tau mālūlū e sola ese ai?— O loo faapea mai Iesu, talu ai ua tatou iloa le lata mai o Amaketo, e lē tatau ona tatou faatali seʻi toeitiiti ona faaali lea o lo tatou alofa i le Atua e ala i le auauna iā te ia. A tuai tele ona tatou gaoioi, atonu o le a lē lava le taimi. Ua tutusa la i tatou ma tagata i le taimi o le Lolo, o ē na faalogo i le lapataʻiga a Noa ae lē ō i totonu o le vaa.

Seʻi o tatou vaai la i le mataupu o sosoo mai, pe faapeʻī le lalolagi pe a mavae Amaketo. O le a tatou iloa ai faamanuiaga a le Atua mo i latou e alolofa ma auauna iā te ia i le taimi nei.