БЕЛГИ нима эканлигини биласизми? ~ Ушбу китобнинг 46- бобида ўқиганимиздек, Худо бошқа ҳеч қачон дунёни сув билан йўқ қилмаслигини кўрсатадиган белги берган эди. Ҳаворийлар ҳам Исодан унинг қайтиб келишини ва замона охирлаб бораётганини кўрсатадиган белги қандай бўлишини сўрашган эди (Матто 24:3).

Исо осмонда бўлгани сабабли, уни кўриш имконсиздир. Шу боис, одамлар унинг бошқара бошлаганини билиб олиши учун аниқ белги керак эди. Шунинг учун Исо шогирдларига ерда нималар содир бўлишини айтиб берган. Бундан ташқари, улар қандай ҳодисаларга эътибор қаратишлари кераклигини айтган. Бу ҳодисалар содир бўлишни бошлаганида, Исонинг қайтгани ва осмонда Шоҳ бўлиб бошқара бошлагани аниқ бўларди.

Исо шогирдларига ҳушёр бўлишнинг муҳимлигини ўргатиш учун шундай деган: «Анжир ва  бошқа дарахтларга эътибор беринглар: улар куртак чиқараётганини кўрганингизда, ёз яқин эканини биласизлар». Сиз ҳам ёз яқинлашаётганини аниқлай оласиз-а?! Худди шундай, Исонинг айтганлари амалга ошаётганини кўрганингизда, билингки, Армагеддон яқин (Луқо 21:29, 30).

Ушбу ва кейинги бетдаги суратларда Исо айтган белгилар қисман тасвирланган ва улар Худонинг Шоҳлиги яқинлигига ишора қиляпти. Бу белгиларнинг ҳаммаси амалга ошганида,  Худонинг Шоҳлиги Исонинг бошқаруви остида барча ҳукуматларни ер билан яксон қилади. Биз бу ҳақда 46- бобда ўқиган эдик.

Олдинги иккита бетдаги суратларга диққат билан қаранг. Ҳозир улар ҳақида суҳбатлашамиз. Бу суратларда келтирилган ҳодисалар тўғрисида Матто 24:6–14; Луқо 21:9–11- оятларида ўқишингиз мумкин. Ҳар бир суратнинг рақами борлигига эътибор беринг. Худди шу рақамларни расмлар тушунтирилган хат бошларида кўришингиз мумкин. Энди келинг, Исо айтган белгининг аксарият қисми бугунги кунда рўёбга чиқаётганини кўриб чиқамиз.

1. Исо шундай деган: «Ҳар хил жойларда урушлар бўлаётганини эшитасизлар. [...] Халқ халққа қарши, подшоҳлик подшоҳликка қарши кўтарилади». Сиз қачондир урушлар ҳақида хабар эшитганмисиз? ~ Биринчи жаҳон уруши 1914- йилда бошланиб, 1918- йилда тугаган. Иккинчи жаҳон уруши эса 1939- йилда бошланиб, то 1945- йилгача давом этган. Ҳали ҳеч қачон бундай жаҳон урушлари бўлмаганди! Бугунги кунда эса бутун дунё бўйлаб урушлар бўляпти. Деярли ҳар куни телевизор ва радио орқали урушлар ҳақида эшитамиз ёки газеталарда ўқиб қоламиз.

2. Яна Исо шундай деб айтган: «Кўп жойларда озиқ-овқат етишмовчилиги бўлади». Эҳтимол, сиз ҳамма одамларда ҳам ейишга етарлича озиқ-овқат йўқлигини билсангиз керак. Шу туфайли ҳар куни минглаб одамлар ўлмоқда.

3. Исо шуларни ҳам айтган: «Кўп жойларда ўлатлар бўлади». Ўлат нима эканлигини биласизми? ~ Бу, кўпгина одамни ўлдирадиган юқумли касалликдир. Биргина «испанка» гриппидан 1 йил ичида 20 миллион одам ўлган. Бугунги кунда эса бундан ҳам кўп одамлар ОИТС (СПИД)дан ўлиш эҳтимоли бор. Ҳар йили минглаб одамлар саратон, юрак хуружи ёки бошқа касалликлардан ўлишяпти.

 4. Исо белгининг яна бир қисмини айтган: «Кўп жойларда зилзилалар бўлади». Зилзила нима эканлигини биласизми? ~ Бу, ер қимирлаши, тебраниши демакдир. Зилзила бўлганда уйлар қулайди ва кўпинча одамлар ўлади. 1914- йилдан бошлаб, ҳар йили кўплаб зилзилалар бўляпти. Сиз зилзилалар ҳақида эшитганмисиз? ~

5. Исо белгининг тағин бир қисмини келтириб, «қонунсизлик кўпайиши» тўғрисида айтган. Ана шу сабабдан, дунёда ўғрилик ва зўравонлик шунчалик кўпайиб кетган. Одамлар уйларига ўғри тушишидан қўрқиб яшамоқдалар. Ҳозир ер юзида содир этилаётган жиноят ва зўравонлик ҳали ҳеч қачон шу даражага етмаган.

6. Исо яна бир муҳим бўлган белгининг қисмини айтган: «Шоҳлик ҳақидаги хушхабар ҳамма халқларга шаҳодат берилиши учун бутун дунё бўйлаб ваъз қилинади. Ана ўшандагина охират бўлади» (Матто 24:14). Агар сиз бу «хушхабар»га ишонсангиз, унда бошқаларга ҳам уни айтиб беришингиз керак. Шундай йўл тутиб, сиз ҳам белгининг бу қисми амалга ошишида иштирок эта оласиз.

Бироқ, айрим одамлар Исонинг айтганлари олдин ҳам бўлган, дейиши мумкин. Лекин авваллари бу белгиларнинг ҳаммаси бир пайтнинг ўзида, дунёнинг кўп жойларида бўлмаган. Энди бу белги нимани англатишини тушундингизми? ~ Буларнинг ҳаммаси содир бўлаётганини кўриб, бу ёвуз дунёнинг охири яқинлигини ва Худонинг янги дунёси келишини тушунамиз.

Исо бу белги ҳақида айтаётиб, йилнинг ўзига хос бир фаслини тилга олган. У шундай деган: «Қочиш вақтингиз қишга тўғри келиб қолмаслиги учун ибодат қилинглар» (Матто 24:20). Сизнингча, у нимани назарда тутган? ~

Қиш пайтида яқинлашиб келаётган фалокатдан қутулиш осонми? ~ Албатта, йўқ. Чунки қишда ҳаво жудаям совуқ бўлиб,  қаергадир қочиш қийин кечади. Ҳатто қочиб кетган тақдирда ҳам одам зўрға қутулади. Борди-ю, у ўз ишлари билан овора бўлиб, огоҳлантиришга парво қилмагани туфайли ўлиб кетса, алам қилмайдими? ~

Исо нима учун қишни кутмасдан қочиб қутулиш муҳим, деб айтганини энди тушундингизми? ~ Исонинг сўзларидан, Армагеддон яқинлигини билиб олдик. Шунинг учун Худони севишимизни исботлаб, Унга хизмат қилишни кечиктирмаслигимиз лозим. Агар Яҳовага хизмат қилишни пайсалга солиб юрсак, биз учун жуда кеч бўлиши мумкин. Шунда бизнинг аҳволимиз Нуҳнинг давридаги Тўфонгача яшаган одамларникига ўхшаб қолиши ҳеч гап эмас. Улар Нуҳнинг огоҳлантиришини эшитишган, аммо кемага киришмаган.

Энди келинг, Буюк Армагеддон жанги тугаганидан кейин ҳаёт қандай бўлиши ҳақида гаплашайлик. Худони севиб, Унга хизмат қилаётган барчамизга У нима тайёрлаб қўйганини билиб оламиз.