¿Jimba yom bʌ Dios iliyi?
¿CHUQUI bʌ noticia maʼ taj a qʼuel yaʼ ti periódico, ti televisión yicʼot cheʼ maʼ ñʌchʼtan jiñi radio? ¡Maʼ taj a qʼuel cabʌl tsʌnsʌntel, guerra tac yicʼot terrorismo! Ñaʼtancu jaʼel jiñi a bajñel wocol am bʌ a chaʼan. Tajol cheʼ maʼ cʼamʼan, cheʼ miʼ chʌmel juntiquil a familia o juntiquil a wamigo, miʼ yʌqʼueñet cabʌl a chʼijiyemlel. Tajol cheʼ maʼ wubin a bʌ bajcheʼ Job, juntiquil wiñic toj bʌ, tsiʼ yʌlʌ: «Tsiʼ tajayon wocol» (Job 10:15).
Tajol maʼ cʼajtiben a bʌ:
-
¿Jimba yom bʌ Dios chaʼan joñon iliyi yicʼot chaʼan tiʼ pejtelel wiñicob xʼixicob?
-
¿Baqui miʼ mejlel c taj coltʌntel chaʼan mic lʌtʼ jiñi c wocol tac?
-
¿Muʼ ba i cajel ñʌchʼtʌlel ila ti Pañimil?
Jiñi Biblia miʼ yʌqʼueñonla i jacʼbal muʼ bʌ i yʌqʼueñonla lac tijicñʌyel.
JIÑI BIBLIA MIʼ CɅNTESAÑONLA CHAʼAN DIOS MI CAJ I MEL CHUQUI WEM BɅ WɅʼ TI PAÑIMIL.
«Dios mi caj i sujcubeñob i yaʼlel i wut. Maʼañix majch miʼ caj ti chʌmel. Maʼañix ucʼtaya mi uqʼuel mi wocol ti pejtelel ora. Come tsaʼix ñumi jiñi ñaxan tac bʌ.»(Apocalipsis [Revelación] 21:4)
«Jiñi qʼuichqʼuichña bʌ i yoc mi caj i tijpʼel.» (Isaías 35:6)
«Mi caj i chaʼ cʼotel i wut jiñi xpotsʼob.» (Isaías 35:5)
«Jiñi añoʼ bʌ ti mucoñibʌl [...] mi caj i chʼojyelob loqʼuel ti mucoñibʌl.» (Juan 5:28, 29)
«Mi juntiquilic muʼ bʌ caj i yʌl: ‹Cʼamon›.» (Isaías 33:24)
«Mi caj i yʌcʼ cabʌl i cuch jiñi cholel.» (Salmo 72:16)
TAJA A COLTɅNTEL TI JIÑI CɅNTESA AM BɅ TI BIBLIA
Maxto yomic maʼ wʌl chaʼan jumpʼejl jach ñajal jiñi tsaʼ bʌ a qʼuele yaʼ tiʼ yopol 4 yicʼot 5. Dios tsiʼ yʌcʼʌ i tʼan chaʼan miʼ mel jiñi, yaʼ ti Biblia miʼ tsictesan bajcheʼ mi caj i mel.
Pero mach jiñic jach jiñi. Jiñi Biblia miʼ cʌntesañonla jaʼel chaʼan bajcheʼ mi lac mejlel ti chumtʌl ti wen ili ora. Ñaʼtancu jumucʼ chuqui choncol a cʼojoʼtan yicʼot baqui bʌ wocol woli a ñusan ili ora. Tajol chaʼan maʼañic a taqʼuin, maʼ cʼojoʼtan a familia, a cʼamʌjel o chaʼan tsaʼ chʌmi juntiquil a piʼʌl yaʼ ti a wotot. Jiñi Biblia miʼ cʌntesañonla bajcheʼ miʼ mejlel lac lʌtʼ jiñi wocol tac, cheʼ jaʼel, miʼ yʌqʼueñonla lac tijicñʌyel cheʼ miʼ pʌsbeñonla baqui bʌ i jacʼbal ili cʼajtiya tac:
-
¿Chucoch mi la quilan wocol?
-
¿Bajcheʼ miʼ mejlel lac lʌtʼ jiñi woli bʌ laj cʼojoʼtan ti laj cuxtʌlel?
-
¿Chuqui yom mi lac mel chaʼan tijicña miʼ chumtʌl lac familia?
-
¿Chuqui mi lac chaʼlen cheʼ mi lac chʌmel?
-
¿Muʼ ba caj lac chaʼ qʼuel ti jumpʼejl bʌ qʼuin jiñi lac piʼʌlob tsaʼix bʌ chʌmiyob?
-
¿Chucoch mucʼʌch lac ñop chaʼan Dios mi caj i tsʼʌctesan jiñi wʌn albil bʌ i chaʼan?
Cheʼ woli a pejcan ili libro, woli a pʌs chaʼan a womʌch a cʌn chuqui miʼ pʌsbeñonla jiñi Biblia. Ili libro mi caj i coltañet a cʌn jiñi. Qʼuele yaʼ tiʼ yebal jiñi i yopol tac, baqui miʼ chʼʌm tilel cʼajtiya tac chaʼan jiñi párrafo tac. Yonlel wiñicob xʼixicob miʼ mulañob chaʼan bajcheʼ jiñi i testigojob Jehová miʼ melob jiñi cʼajtiya tac, yicʼot bajcheʼ miʼ yʌqʼueñob i jacʼbal loqʼuem bʌ ti Biblia. Weñʌch mi cheʼʌch maʼ wubin jaʼel. Laʼ to i coltañet Dios cheʼ woliyʌch a cʌn majlel jiñi sujmlel muʼ bʌ i yʌl jiñi Biblia.