Qo Beka na iNaki ni Kalou?
SE MANI niusiveva cava o wilika, porokaramu ni retioyaloyalo o sarava, se siteseni ni retio o vakarorogo kina, o na vakadinata ni sa ka ni veisiga na basulawa, ivalu, kei na vakacaca ni batikadi! Vakacava na leqa sara ga o dau sotava? De dua e vakamosia voli na yalomu ena gauna qo na nona tauvimate se mate e dua na wekamu voleka. O rairai vakila tale ga na ka a yacovi Jope ni a kaya “niu luvuci ena madua kei na rarawa.”
Tarogi iko mada:
-
Qo beka na inaki ni Kalou vei au kei na kawatamata kece?
-
O cei e rawa ni vukei au ena noqu leqa?
-
Ena yaco na bula vakacegu e vuravura?
E veivakacegui na ka e kaya na iVolatabu me baleta na veika qo.
E KAYA NA IVOLATABU NI QO ESO NA VEISAU ENA VAKAYACORA NA KALOU E VURAVURA.
“Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.”
“Ena ladelade na lokiloki me vaka na dia.”
“Ena rai na matadra na mataboko.”
“O ira kece na tu ena ibulubulu nanumi mera tucake mai.”
“Ena sega ni kaya e dua na lewenivanua: ‘Au tauvimate.’”
“Ena levu na covuata e vuravura.”
ME YAGA VEI IKO NA KA E KAYA NA IVOLATABU
Kua ni nanuma ni tadra wale ga na veika e tabaki ena tabana e va kei na lima. Sa yalataka na Kalou ni na vakayacora na veika qo, sa vakamacalataka tale ga na iVolatabu na sala ena vakayacori kina.
Ia e sega ni tukuna ga qori na iVolatabu. E vakarautaka tale ga na yavu mo marautaka kina na bula ena gauna sara mada ga qo. Vakasamataka mada na veika o dau lomaocaocataka kei na leqa o dau sotava. Leqa beka vakailavo, leqa vakavuvale, tauvimate, se nona takali e dua na wekamu voleka. E tu ena iVolatabu na ivakasala yaga ena veika e vauca na nomu leqa ena gauna qo, ena vakacegui iko tale ga ena saumi ni lomatarotaro va qo:
-
Na cava eda rarawa voli kina?
-
Eda na walia vakacava na noda nuiqawaqawa?
-
Na cava meda cakava meda marautaka kina noda bula vakavuvale?
-
Na cava e yacovi keda nida mate?
-
Eda na raici ira tale na wekada voleka era sa takali yani?
-
Na ivakadei cava e tu meda kila kina ni na vakayacora dina na Kalou na nona vosa ni yalayala?
Nomu wilika tiko na ivola qo e dusia ni o vinakata mo kila na ka e kaya na iVolatabu. Ena yaga vei iko na ivola qo. O na raica ni vakarautaki na taro ni veiparakaravu ena boto ni drauniveva. E vica vata na milioni era sa vakadinadinataka na yaga ni nodra veivosakitaka na iVolatabu kei ira na iVakadinadina i Jiova ni taurivaki na ivola e dau vakarautaki na kena taro. E nuitaki ni na yaga tale ga vei kemuni. Me vakalougatataki kemuni mada ga na Kalou ena nomuni vulica na ka sara ga e kaya na iVolatabu!