BACHA meh surat kabar. Peda meh TV, tauka dinga meh radio. Mayuh berita pasal penyai, perang enggau pengawa ngelaban perintah! Pikirka penusah nuan empu. Penyakit tauka pemati orang ti dikesayau engka ngasuh nuan merinsa. Nuan engka ngasaika pemerinsa Jop. Iya madahka diri “balat merinsa.”—Jop 10:15.

Tanya diri empu:

• Kati tu dikedeka Petara ba aku enggau semua mensia ke bukai?

• Nama utai ulih nulung aku mutarka penusah diri?

• Kati kitai bisi peluang ngasaika pemaik ba dunya tu?

Bup Kudus meri saut ti ngemuaska ati ngagai tanya tu.

“Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.”—Pemandang 21:4

“Orang ke enda ulih bejalai, deka merejuk lalu betanda.”—Isaiah 35:6

“Orang ke buta ulih meda.”—Isaiah 35:5

 “Semua orang ke udah mati deka . . . pansut ari kubur.”—John 5:28, 29

“Nadai orang deka mutap madahka diri sakit.”—Isaiah 33:24

“Awakka gandum seruran mayuh di menua.”—Masmur 72:16

Anang ngumbai utai ti dipadah ba lambar 4 enggau 5 nya semina mimpi aja. Petara udah besemaya deka ngamatka semua utai nya, lalu Bup Kudus nerangka chara Iya deka ngaga semua utai tu.

Tang, Bup Kudus madah mayuh agi pasal utai bukai. Iya nyediaka jalai pengidup ti ngemuaska ati kitai kemaya hari tu. Uji pikir pasal pengirau ati enggau utai ti ngenusahka ati nuan empu. Nuan engka irau ati pasal duit, penusah diri sebilik, pengerai, tauka pemati orang ti dikesayau. Taja pia, Bup Kudus ulih nulung mutarka penusah nuan kemaya hari tu. Iya ulih nulung nuan bulih saut ngagai tanya baka ke dipadah ba baruh tu:

• Nama kebuah kitai merinsa?

• Baka ni kitai ulih ngelaban pengirau ati ba pengidup?

• Baka ni pengidup diri sebilik ulih lantang agi?

• Nama nyadi ngagai kitai maya kitai mati?

• Ulih kitai betemu baru enggau orang ti dikesayau ke udah mati?

• Nama kebuah kitai ulih pechaya Petara deka ngenataika semua semaya Iya ba dunya tu jemah ila?

 Nuan macha bup tu laban nuan deka nemu utai ti diajar ba Bup Kudus. Peratika, tiap genteran bisi tanya ba baruh tiap lambar. Bejuta iku orang rindu ati ngena chara tanya-saut maya berandauka Bup Kudus enggau Saksi-Saksi Jehovah. Kami mega arapka nuan baka nya. Arapka nuan bulih berekat ari Petara maya nuan belajarka utai ti bendar ba Bup Kudus!