TANGA julunale ye-yense. Tala televijo nansha kwimvwana ladiyo. Bine ukamona amba nsekununi mivule i ya butapani, ya mavita, ne ya butumbula! Pano ela milangwe ku bikambija byobe. Padi misongo nansha lufu lwa muntu oswele i bikupe bushiyena. Ukokeja padi kwimona pamo na mwēmwenine Yoba, muntu muyampe, wānene amba: “Nakolwe masusu.”—Yoba 10:15, Bisonekwa Bitokele.

Wiipangule:

• Le mo mwādi musakila Leza pondi ne pa muzo onso wa muntu?

• Le nkatana bukwashi kwepi mwa kulwila na makambakano ami?

• Lelo tukokeja kukulupila’mba tukamona ndoe pano pa ntanda?

Bible ulondolola senene bino bipangujo.

“Ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”—Kusokwelwa 21:4.

“Usunkuta ukatumbuka’nka bwa kasha kalume.”—Isaya 35:6

“Meso a bampofu akapūtulwa.”—Isaya 35:5

“Bonso badi mu bibundu . . . bakatamba’mo.”—Yoano 5:28, 29.

“Mwikadi kakanenapo’mba: Nabela.”—Isaya 33:24

“Kukēkalanga bungibungi bwa mebele panopantanda.”—Ñimbo 72:16

Kokiyumbila kala kupela byobya byanenwa mu mapaje abadikila’a amba i mfwatakani’tu bitupu. Leza i mulaye kufikidija bino bintu, ne Bible ushintulula mwasa kufikidija’byo.

Inoko Bible kemaninepo’nka papo. I mukupe lufungulo lwa kuloelelwa būmi bya binebine tamba’nka pano. Langa bidi bintu bikuzumbijanga mutyima ne kukukambija. Padi i misokwe ya lupeto, makambakano a mu kisaka, kubelabela, nansha lufu lwa muntu oswele. Bible ukokeja kukukwasha unekenye ano makambakano dyalelo, kadi ukokeja kukupa malondololo atūkija mutyima ku bipangujo pamo bwa bino:

• Mwanda waka tususuka?

• Le tukanekenya bikoleja bya umbūmi namani?

• Tukaleta nsangaji mu kisaka namani?

• Shi muntu wafu wikalanga namani?

• Lelo tukemona monka na baswe betu bafwile?

• I muswelo’ka otukokeja kukulupila amba Leza ukafikidija milao yandi mu mafuku āya kumeso?

 Kutanga kotanga dino dibuku kulombola amba usakanga kuyuka byobya bifundija Bible. Dino dibuku disa kukukwasha. Yuka amba misango idi na bipangujo kunshi kwa paje. Bantu midiyo ne midiyo basangelanga kulonda manwa a bipangujo ne malondololo pobesambanga myanda ya mu Bible na Batumoni ba Yehova. Tukulupile amba nobe ukeasangela. Tulomba Leza akwesele pano poloelelwa kwifunda na nsangaji byobya bine bifundija Bible!