IJKUAK tiktlajtoltia periódico, tikita televisión, noso tikaki radio, tikita ken miakej sapanoa tlachtekij, onka miak guerras uan miak tlamantli tlen amo kuali. Axkan ximokuayejyeko itech nochi ouijkayotl tlen tikpiaj. Uelis mitstekipachoa se kokolistli noso se itech mokalchanejkauan yomikik. Uelis tejuatsin timomachilia ijkon ken Job, se tlakatl yolkuali tlen okijto “sapanoa okitekipachoaya tlajyouilistli” (Job 10:15).

Uelis timotlajtlania:

• ¿Nin tlen okinekiaya toTajtsin Dios pampa ne uan oksekimej tlaltikpaktlakamej?

• ¿Kanin uelis nikajsis tlapaleuilistli pampa nikxikos ouijkayotl?

• ¿Se tonal yetos yolseuilistli?

Biblia kuali kinankilia ninmej tlajtlanilmej.

“Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli.” (Apocalipsis 21:4)

“Akin amo nejnemi tlejkos ijkon ken se masatl.” (Isaías 35:6)

“Inmixtololouan akinmej amo tlachiaj motlaposkej.” (Isaías 35:5)

 “Nochteh non yomikkeh [...] kisaskeh.” (Juan 5:28, 29)

“Nion se tlaltikpaktlakatl kijtos: ‘Nimokokoa’.” (Isaías 33:24)

“Yetos miak xinachtli [noso tlakuali] itech Tlaltikpak.” (Salmo 72:16)

Amo ximokuayejyeko nochi tlen achto otikitakej amo mochiuas. ToTajtsin Dios yokijto kichiuas uan itech Biblia techiluia ken kichiuas.

Maski ijkon, Biblia amo san non tlen kijtoa. Noijki techiluia ken uelis tiyolpakiskej axkan. Ximokuayejyeko itech tlen mitstlajyouiltijtok. Uelis mitstekipachoa tomin, mokalchanejkauan, kokolistli noso akin otiktlasojtlaya omikik. Ik non, Biblia techpaleuia pampa tikxikoskej ouijkayotl uan noijki techyolseuia ijkuak kinankilia ninmej tlajtlanilmej:

• ¿Tleka titlajyouiaj?

• ¿Ken uelis tikixnamikiskej nochi tlen techtekipachoa?

• ¿Tlen uelis tikchiuaskej pampa tokalchanejkauan ma yolpakikan?

• ¿Tlen techpanoa ijkuak timikij?

• ¿Uelis oksepa tikinmitaskej tokalchanejkauan tlen yomikej?

• ¿Uelis titlaneltokaskej itech tlen toTajtsin Dios okijto kichiuas satepan?

 Pampa tiktlajtoltijtok nochi nin, kijtosneki tikneki tikmatis tlen Biblia tlamachtia. Nin amochtli uelis mitspaleuis. Uelis tikitas ken párrafos kinpiaj tlajtlanilmej. Sapanoa miakej tlaltikpaktlakamej kinpaktia tlajtlanilmej uan tlanankililmej tlen kitekitiltiaj itlaixpantijkauan Jehová pampa tlamachtiskej ika Biblia. Tikchiaj tejuatsin noijki ma mitspakti. Jehová ma mitsteochiua ijkuak timomachtijtias tlen melauak tlamachtia Biblia.