VERENGANYI phepha riri rese ro masoko. Vonanyi terevhizau, kana kupurukira radhio. Kuno ndhorondho zinji jo ugandanga, hondo, zve no uthyisijiri! Mecimborangariranyi ngo zvineso zvenyu. Kangaije ndhendha no kufihwa ngo mudiwa zviri kumuviisira bonezi. Nguva jimweni mungazwa inga Jobe mwanarume wakanaka, wakananga kuti “ndakazara ngo bonezi no nyathwa.”—Job. 10:15.

Jibvunjisenyi kuti:

• Ndicona cidisiso ca Mwari kwandiri no kuno vandhu vese here?

• Ndingariwana kwapi besero ro kuti ndihwisane no zvineso zvangu?

• Kuno vetero yo kuti tinozovona runyararo pasi pano here?

Bhaibheri rino mupinguro jinodakajisa jo mubvunjo iji.

“Anozopukusa musoji yo mu meso mavo. Akucazovi no kufa nokuti mariji, kurira nokuti kuhwaja.”—Apokalipsi [Cakapangijihwa] 21:4

“Bzigono bzinozophuka inga gono ro xoma.”—Isaia 35:6

“Majiso o mapofu anozopembenuka.”—Isaia 35:5

‘Vese vaya vari mu makuva anorangarihwa . . . vanozomuka.’—Johani 5:28, 29, Tradução do Novo Mundo

“Apana na umwe wo vagari vo guta angazonanga kuti: ‘Ndiri kuhwaja’.”—Isaia 33:24

‘Munda inozobara mbeu jakawanda’.—Nduyo 72:16

Mucakasika kuramba zvaperari kunangwa pa matsamba atabvari kuvona inga murangariro wa biresi. Mwari wakagondesa kuti anozozvikwanirisa, zve Bhaibheri rinodurujira kuti anozozviitisa kudini.

Bhaibheri rinobesera mu njira jakawanda maningi. Rinomupekeja njira yo kuti muve no mudakaro wokadi-kadi mu upenyu pikija nyamasi uno. Cimborangariranyi padoko ngo kuthimwa-thimwa kwenyu kamare pomwe no zvineso. Kangaije zvingabatanija kutama mare, zvineso zvo pa mbhuri, kuneseka mu uhomi kana kutamikihwa ngo mudiwa. Bhaibheri ringamubesera kuti muhwisane no zvineso nyamasi uno, zve ringapa nyarajo ngo kupingura mubvunjo jakadari inga iji:

• Ngenyi tinotambujika?

• Tingahwisana kudini no kuthimwa-thimwa mu upenyu?

• Tingaitisa kudini kuti upenyu hwo mbhuri yedu udakajise?

• Zvicinyi zvinoitika pa tinofa?

• Tinozombovonazve vadiwa vedu vakafaya here?

• Tingava kudini no cokwadi co kuti Mwari ano cidisiso co kukwanirisa zvigondiso zvake?

 Kuverenga kwenyu bhuku iri, zvinovonesa kuti munoda kufumbhura zvinojijisa Bhaibheri. Bhuku iri rinozomubesera. Vonanyi kuti ndima jino mubvunjo yajo. Zviuru zvo vandhu zviri kudakara ngo kushandisa maitiro o mubvunjo no mupinguro pavanonga vecibhuisana ngo Bhaibheri no Zvapupu zva Jehovha. Tinovetera kuti munozodakaravo. Munozova no makomborero a Mwari pamunonga mecibusa mudakaro no zviitiko zvinodakajisa zvo kujija zviyani zvinojijisa Bhaibheri Kamare!