¿ITECH tlenon tlajtouaj ijkuak tikpoua periódico, tikita televisión noso tijkaki radio? ¡Ompa noijtoua itech tlaltikpakchanejkej akin nochiuiliaj tlemach tlen xkuajli, ika onka guerras niman miyek okseki tlen xkuajli! Aman xnemili ipan tlen tlaueltin tipanotika. Kanaj titlajyouijtika ipampa kokolistli noso omik se mochanejkauj noso se akin iuan timouika melak kitlajyouiltijtokej. Kanaj timomachilia ijkon ken Job, se kuajli tlakatl akin okijto “nikpiya miyek ajmantli” (Job 10:15).

Kanaj timotlajtoltia:

• ¿ToTajtsin kinekiya nopan manochiua yejuin niman noijki ijkon inpan manochiua oksekimej?

• ¿Kanon uelis niknextis tlen nechpaleuis manikinyektlali notlaueluan?

• ¿Yejkos tonajli ijkuak onias yolseuilistli ipan tlaltikpaktli?

Biblia kuajli kinankilia yejuin.

“Dios kimpopolouilis nochi ajmantli, niman xok onias mikilistli, nion chokistli, nion ajmantli, nion kokolistli.” (Apocalipsis [Revelación] 21:4)

“Akin xueli nejnemi notlalos ijkon kentla se masatl.” (Isaías 35:6)

“Akin xtlachiaj uelis tlachiaskej.” (Isaías 35:5)

 ‘Nochimej akin omijkej [akin toTajtsin xkimilkaua] [...] kisaskej ipan intlalkon.’ (Juan 5:28, 29)

“Nion se tlaltikpakchane xkijtos: ‘Nikualo’.” (Isaías 33:24)

“Yejuamej, tej, xok tlajyouiskej ikan apistli, nion amiktli.” (Apocalipsis 7:16)

Maka xnemili ika tlen yotikitakej xmelak nochiuas. ToTajtsin yokijto ika kichiuas, niman Biblia techtomilia kenon panos.

San ika, xsan yejuin kijtoua. Biblia noijki techmachtia kenon tinemiskej ika paktli ipan yejuin tonaltin. Xnemili itech motlaueluan niman tlen mitstekipachoua. Kanaj timotekipachoua ipampa mochanejkauan, kokolistli, ika omik se akin tiktlasojtla noso pampa xtikpiya tomin. Biblia techpaleuiya matikixnamikikan tlemach tlen xkuajli topan nochiua, niman noijki techyolseuiya ijkuak technankilia yejuin tlajtoltilistin:

• ¿Tleka titlajyouiyaj?

• ¿Kenon uelis tikxikoskej tlen techajmana?

• ¿Tlenon uelis tikchiuaskej tla tiknekij tinemiskej ika paktli iuan tochanejkauan?

• ¿Tlenon topan nochiua ijkuak timikij?

• ¿Oksejpa tikimitaskej tochanejkauan akin yomijkej?

• ¿Tleka tikmatstokej ika toTajtsin kichiuas tlen yokijto?

 Pampa tikpoujtika yejuin, tikteititia ika tikneki tikmatis tlen Biblia temachtia. Yejuin amoxtli mitspaleuis. Xkita ika tlatsintlan uajlauej intlajtoltilisuan párrafos. Melak miyekej kuelitaj kenon iteixpantijkauan Jehová temachtiaj Biblia, pampa tetlajtoltiaj niman akin kimachtiaj tlanankilia. Tikchiaj ika tejua noijki xkuelita. ToTajtsin mamitsteochiua ika tiuelis tlen melauak temachtia Biblia.