TOTOU ke he ha nusipepa. Onoono ke he televisoni, po ke fanogonogo ke he letio. Kua ha ha ai e tau tala loga ke he holifono, felakutaki, mo e fakamatakutakuina! Manamanatu ke he tau lekua ni haau. Kua liga tupetupe lahi a koe ha ko e gagao po ke mate e haau a fakahele. Kua liga tatai e logonaaga haau mo e tagata mitaki ko Iopu, ne pehē “kua puke au ke he ma, kua kitekite foki au ke he haku a matematekelea.”—Iopu 10:15.

Hūhū ki a koe ni:

• Ko e finagalo kia he Atua anei ma haaku mo e tau tagata oti kana?

• To moua i fe e au e lagomatai ke fahia mo e tau lekua haaku?

• Kua fai amaamanakiaga nakai to kitia e tautolu e mafola ke he lalolagi?

Kua foaki he Tohi Tapu e tau tali mauokafua ke he tau hūhū nei.

“To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.”—Fakakiteaga 21:4

“To hopohopo ai e tagata kulikuli tuga ne aila.”—Isaia 35:6

“To fakaala ai e tau mata he tau tagata mata pouli.”—Isaia 35:5

 ‘Ko lautolu katoa ha he tau tuagamau fakamanatu to o mai ki fafo.’—Ioane 5:28, 29, NW

“To nakai pehe mai foki taha kua nofo ai, Kua gagao au.”—Isaia 33:24

“To ha i ai e puke aloalolima he tau saito ke he motu.”—Salamo 72:16

Kia nakai mafiti ke fakaheu e tau mena ne talahau he tau lau tohi i mua ke eke mo tau mena fakateaga. Ne mavehe he Atua ke tamai e tau mena nei mo e fakamaama he Tohi Tapu e puhala ka taute ai e ia.

Ka e mahomo atu e mena ne taute he Tohi Tapu. Kua foaki ki a koe e kei ke olioli e moui makona mooli he magaaho nei foki. Manamanatu fakaku la ke he tau fakaagitau mo e tau lekua haau. Liga putoia ki ai e tau lekua fakatupe, lekua he magafaoa, nakai tino malolō, po ke mate he fakahele. Maeke he Tohi Tapu ke lagomatai a koe ke fehagai mo e tau lekua he vahā nei, mo e ke foaki e fakatotokaaga he tali e tau hūhū tuga anei:

• Ko e ha ne matematekelea ai a tautolu?

• Maeke fēfē ia tautolu ke fahia ke he tau fakaagitau he moui?

• Maeke fēfē ia tautolu ke fakafiafia lahi e moui fakamagafaoa ha tautolu?

• Ko e heigoa ka tupu ki a tautolu ka mamate?

• To liliu nakai ke kitia e tau fakahele ha tautolu ne mamate?

• Maeke fēfē ia tautolu ke mauokafua to fakamooli he Atua e tau maveheaga haana ma e anoiha?

 Ko e kakano kua totou e koe e tohi nei kua fakakite kua manako a koe ke iloa e mena ne fakaako he Tohi Tapu. To lagomatai he tohi nei a koe. Mailoga kua igatia e tau paratafa mo e tau hūhū ne hagaao ki ai. Kua totou miliona ne fiafia ke fakaaoga e puhala hūhū mo e tali he magaaho ka fakatutala ke he Tohi Tapu mo e Tau Fakamoli a Iehova. Amanaki a mautolu to fiafia foki a koe. Kia moua e koe e fakamonuina he Atua he olioli e koe e fiafia mo e mauokafua he ako e tau mena ne fakaako mooli he Tohi Tapu!