BALA kuranta le ge e ka ba efe. Bogela thelebišene, goba theetša radio. Go na le ditaba tše dintši kudu tša bosenyi, ntwa le botšhošetši! Nagana ka mathata a gago ka noši. Mohlomongwe bolwetši goba lehu la yo o mo ratago le go bakela manyami a magolo. O ka ikwa go swana le kamoo monna wa go loka Jobo a ilego a ikwa ka gona ge a be a bolela gore o be a “bona mohlako.”—Jobo 10:15, PK.

Ipotšiše:

• Na se ke seo Modimo a se reretšego nna gotee le batho ka moka?

• Nka hwetša kae thušo ya go lebeletšana le mathata a-ka?

• Na go na le kholofelo le ge e le efe ya gore re tla ka ra bona khutšo lefaseng?

Beibele e nea dikarabo tše di kgotsofatšago mabapi le dipotšišo tše.

• “O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—Kutollo 21:4.

• “Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.”—Jesaya 35:6.

• “Ké mo xo tl’o xo budollwa mahlô a difofu.”—Jesaya 35:5.

•  ‘Bohle bao ba lego mabitleng a kgopotšo ba tlo tšwa.’—Johane 5:28, 29.

• “Mo xo ba ba axilexo fá xo ka se bê le e a rexo: Ke a babya!”—Jesaya 33:24.

• “Xo tlo ba le mohora wa mabêlêʹ mo naxeng.”—Psalme 72:16.

O se ke wa kitimela go gana seo se bontšhitšwego matlakaleng a fetilego ka go bolela gore e fo ba go iphora ka lefeela. Modimo o holofeditše gore o tla tliša dilo tše, gomme Beibele e hlalosa kamoo a tlago go dira seo ka gona.

Eupša Beibele e dira se se fetago seo. E nea senotlelo seo se dirago gore re thabele bophelo bjo bo kgotsofatšago e le ka kgonthe le gona bjale. Nagana ka metsotswana ka dipelaelo tša gago le mathata. Di ka akaretša ditaba tša tša ditšhelete, mathata a lapa, go se phele gabotse mmeleng goba lehu la yo a ratwago. Beibele e ka go thuša gore o lebeletšane le mathata lehono gomme e ka tliša kimollo ka go araba dipotšišo tše di swanago le tše:

• Ke ka baka la’ng re tlaišega?

• Re ka lebeletšana bjang le dipelaelo tša bophelo?

• Re ka dira bjang gore bophelo bja lapa la rena e be bjo bo thabišago?

• Go direga’ng ka rena ge re e-hwa?

• Na re tla ka ra bona gape baratiwa ba rena ba hwilego?

• Re ka kgonthišega bjang gore Modimo o tla phethagatša dikholofetšo tša gagwe bakeng sa bokamoso?

 Taba ya gore o bala puku ye e bontšha gore o tla rata go tseba seo Beibele e se rutago. Puku ye e tla go thuša. Ela hloko gore dirapa di na le dipotšišo tšeo di sepedišanago le tšona botlaseng bja letlakala. Ba dimilione ba ile ba thabela go diriša mokgwa wa dipotšišo le dikarabo ge ba ahla-ahla Beibele le Dihlatse tša Jehofa. Re holofela gore le wena o tla thabela seo. Eka o ka tlelwa ke tšhegofatšo ya Modimo ge ga bjale o dutše o thabela phihlelo e thabišago le e kgotsofatšago ya go ithuta seo ge e le gabotse Beibele e se rutago!