TANGA kese jornale. Tala o televisau ine okutehelela o ladio. Motale okuti mueyula vala omahipululo oungangala, novita, noufwanga. Pahe soka kovitateka viove muene. Pamue omauvela, ine ononkhia mbomunthu mombunga, mbukahi nokukuetela ononkhumbi. Upondola okulitehelela nga Jobe omulume umue ondalawa, wapopile okuti ame ndyikahi mononkhumbi ononyingi.—Jó 10:15.

Lipula okuti:

• Okuti etyi ankho otyo Huku ahandele pala ame no pala ovanthu aveho?

• Opi mandyikavasa ekuateso opo ndyityivile okulwisa ovitateka viange?

• Tupondola okukevelela okuti nthiki imue matukakala nombembwa pano pohi?

Ombimbiliya yaava omakumbululo ayandyuluka konthele yomapulo oo.

“Huku makasekuna ononkhuka momaiho avo, ononkhia, nokulila, no nongembia, kamavikakalako vali.”—Revelação [Apocalipse] 21:4.

“Otyilema matyikalombauka ngombambi.”—Isaías 35:6.

“Omaiho ovamphoki maakapatuluka”.—Isaías 35:5.

 “Aveho vekahi momalangalo . . . mavakatundamo.”—João 5:28, 29.

“Nawike omunthu kombanda yo ohi makati: ‘Ame ndyivela.’”—Isaías 33:24.

“Makukakala ovilia ovinyingi kombanda yo ohi.”—Salmo 72:16.

Wahasoke okuti etyi tyapopiwa pomafo opo ondyoi vala. Huku walaa okuti makafuisapo ovipuka ovio, iya Ombimbiliya ilekesa oñgeni Huku meketyilinga.

Mahi, Ombimbiliya ipopia vali ovipuka ovinyingi. Ikupopila oñgeni ove upondola okuvasa ehambu liotyotyili pahetyino nomuenyo omuwa. Sokolola vala komasukalalo no kovitateka viove muene. Soka komauvela, koluhepo, novitateka mombunga, ine ononkhia mbomunthu umue uhole. Ombimbiliya ipondola okukukuatesako okulwisa ovitateka viove hono. Tupu ipondola okukukuatesako okuvasa omakumbululo omapulo ngaa:

• Omokonda yatyi tumonena ononkhumbi?

• Oñgeni tupondola okulwisa omasukalalo omuenyo?

• Oityi tuesukisa okulinga opo ombunga yetu ikale nomuenyo wehambu?

• Oityi tyipita nonthue tyina tunkhia?

• Okuti nthiki imue matukelivasa vali nombunga yetu no mapanga etu vokuankhia?

• Oityi tyilekesa okuti Huku makafuisapo omilao viae?

 Etyi ukahi nokutanga omukanda ou, tyilekesa okuti ove uhanda okunoñgonoka oityi Ombimbiliya ilongesa. Omukanda ou maukukuatesako. Tala omapulo a kese palagrafu ekahi pombuelo ya kese efo. Ovanthu ovanyingi velilongesa Ombimbiliya no Nombangi mba Jeova, vetyihole tyokuundapesa omapulo nomakumbululo. Tukevelela okuti nove motyihambukilwa. Putyina utualako okukala nehambu liokulilongesa etyi Ombimbiliya tyili ilongesa, Huku mekuavela ononkhano onongwa!