Eki Nikyo Ruhanga Yaagyendereire?

KU ORIKUSHOMA omu mpapura z’amakuru, nooshanga ziijwire ebitebyo ebirikukwata aha buzahambuuki, entaro hamwe n’ebikorwa by’obugomi. Teekateeka aha mirabanamu iwe ei oine. Obundi oburwaire nari okufa kw’omukundwa waawe nibikureetera amaganya maingi. Noobasa kweshanga ori nk’oku Yobu omushaija omurungi yaayeshangire ari, owaagizire ati: ‘Nyijwire obusaasi.’—Yobu 10:15

Yebuuze:

▪ Eki Nikyo Ruhanga yaanteekateekiire hamwe n’abantu boona?

▪ Ni nkahi ei ndikubaasa kwiha obuhwezi omu kushoborora oburemeezi obu nyine?

▪ Hariho amatsiko goona ngu nitwija kugira obusingye omu nsi?

Baibuli neeheereza eby’okugarukamu eby’ebibuuzo ebi ebirikugwisa gye omutima.

 BAIBULI NEEYEGYESA NGU RUHANGA NAIJA KUREETAHO EMITUURIRE NK’EGI OMU NSI.

“Aryaraagaza amarira goona aha maisho gaabo; tiharibaho kufa bundi n’obu kwakuba okucura nari okurira nari obusaasi, ahakuba ebya ira biryaba bihweireho.”​—Okushuuruurwa 21:4

“Ekirema kiryaguruka nk’empara.”​—Isaaya 35:6

“Amaisho g’empumi garyahumuurwa.”​—Isaaya 35:5

 “Abari omu bituuro boona abarikwijukwa . . . baryarugamu.”​—Yohaana 5:28, 29

“Tihaine mutuuzi waayo origira ati: ‘Ndwaire.’”​—Isaaya 33:24

“Haryabaho omweru mwingi omu nsi.”​—Zaaburi 72:16

 GASIRWA KURUGA OMU BI BAIBULI ERIKWEGYESA

Otakaatwara ebyagambwaho aha mpapura ezaabanza nk’ekiteekateekako kwonka. Ruhanga akaraganisa kureetaho ebintu ebi, kandi Baibuli neeshoborora oku arikwija kukikora.

Baibuli neegasha n’omu miringo endiijo. Nikyo kishumuruzo ekirikukuhitsya omu magara agarikwesiimisa nahati. Twara akaanya oteekateekya aha buremeezi n’aha mirabanamu ebi oine. Nibibaasa kutwariramu okuburwa sente, oburemeezi omuka, okugira amagara mabi, nari okufa kw’omukundwa. Baibuli neebaasa kukuhwera kushoborora oburemeezi ebiro ebi, kandi nekuhuumuriza erikugarukamu ebibuuzo nk’ebi:

▪ Ahabw’enki nitubonabona?

▪ Nitubaasa kwemera tuta ebirikutwerarikiriza omu magara?

▪ Nitubaasa kwongyera tuta okushemererwa omu ka yaitu?

▪ Omuntu naayeyongyera kubaho ahanyima y’okufa?

▪ Turyagaruka tureebe abakundwa baitu abafiire?

▪ Nitubaasa kuhamya tuta ngu Ruhanga naija kuhikiiriza ebi yaaraganiise eby’omu biro by’omu maisho?

 Iwe okushoma ekitabo eki nikworeka ngu nooyenda kumanya ebi Baibuli erikwegyesa. Ekitabo eki nikiija kukuhwera. Yetegyereze ngu obucweka bwakyo bwine ebibuuzo byabwo aha ntangiro y’orupapura. Obukaikuru n’obukaikuru bw’abantu nibashemererwa omuringo gw’okubuuza n’okugarukamu baaba nibeega aha by’omuri Baibuli bari n’Abajurizi ba Yehova. Twine amatsiko ngu naiwe noija kushemererwa enkora egi. Ka tukwendeze emigisha ya Ruhanga nk’oku hati orikushemererwa ebirikuruga omu kwega kwawe okw’ebi Baibuli buzima erikwegyesa!

[Akabokisi/Ekishushani ekiri aha rupapura 7]

MANYA GYE BAIBULI YAAWE

BAIBULI erimu ebitabo 66 otwariiremu n’amabaruha. Ebitabo ebi bibaganisiibwe omu shuura hamwe n’enyiriri okubaasa kwanguhirwa okugishoma. Ebyahandiikirwe ku birikujurizibwa omu kitabo eki, enamba y’okubanza bwanyima y’eiziina ry’ekitabo neemanyisa eshuura y’ekitabo nari ebaruha y’omu Baibuli, kandi enamba erikukurataho neemanyisa orunyiriri. Nk’eky’okureeberaho, kyayorekwa “2 Timoseo 3:16” nikiba nikimanyisa ebaruha ya kabiri eyaahandiikiirwe Timoseo, eshuura ya 3, orunyiriri rwa 16.

Noija kurahuka kumanya gye Baibuli yaawe orikusherura omu Baibuli Ebyahandiikirwe ebyajurizibwa omu kitabo eki. Mbwenu ahabw’enki otarikutandika enteekateeka y’okushoma Baibuli buri izooba? Orikushoma eshuura ishatu, ina nari itaano buri izooba, noija kumara kushoma Baibuli yoona omu mwaka gumwe.