KENGA adwelie kɛlata biala. Nea tɛlevihyɛne anzɛɛ tie riledio zo edwɛkɛ. Ɛtanelilɛ, konle nee amumuyɛyɛlɛ nwo edwɛkɛ ngome ala a ɛte a! Dwenle ɛdawɔ mumua ne wɔ ngyegyelɛ nwo nea. Bie a ɛnee anwodolɛ anzɛɛ dɔvolɛ bie ewule ɛlɛmaa wɔali nyane kpole. Ɛbahola wɔade nganeɛ kɛ sonla kpalɛ Dwobu, mɔɔ hanle kɛ ye “anwubɛnyunlu ɛnlɛ awieleɛ” la.—Dwobu 3:26.

Biza ɛ nwo kɛ:

• Asoo ɛhye a ɛnee Nyamenle kpondɛ kɛ ɔto me nee alesama mɔɔ ɛha la ɔ?

• Nienwu a mebahola meanyia moalɛ meagyinla me ngyegyelɛ nloa a?

• Asoo anyelazo bie wɔ ɛkɛ ne kɛ anzondwolɛ bara azɛlɛ ye azo ɔ?

Baebolo ne fa mualɛ mɔɔ yɛ ahunludwolɛ la ye kpuyia ɛhye mɔ anloa.

• “Ɔbakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko.”—Yekile 21:4

• “Abuburama bawuluwulu kɛ ahɛtɛboɛ.”—Ayezaya 35:6

• “Anyenzinlirama anye badukue.”—Ayezaya 35:5

•  ‘Bɛdabɛ mɔɔ bɛwɔ ngakyelɛ nla ne mɔ anu la amuala . . . bavinde.’—Dwɔn 5:28, 29

• “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”—Ayezaya 33:24

• ‘Aleɛ dɔɔnwo babu azɛlɛ ne azo.’—Edwɛndolɛ 72:16

Mmaka ye ndɛndɛ kɛ mɔɔ bɛha ye wɔ mukelɛ ne mɔɔ li ɛhye anyunlu la le adwenle nzuzulɛ mgbane ala. Nyamenle ɛbɔ ɛwɔkɛ kɛ ɔbava ninyɛne ɛhye mɔ yeara, na Baebolo ne kilehile kɛzi ɔbayɛ ye zɔ la anu.

Tɛ yemɔ anwo edwɛkɛ angomekye a wɔ Baebolo ne anu a. Ɔmaa ɛnyia mɔɔ ɛlua zolɛ a ɛbanyia asetɛnla mɔɔ nɔhalɛ ahunludwolɛ wɔ nuhua kɛkala la. Gyinla ekyii, na suzu ɛdawɔ mumua ne wɔ adwenledwenle nee wɔ ngyegyelɛ nwo nea. Ɔbahola yeayɛ ezukoa nwo edwɛkɛ, abusua nu ngyegyelɛ, anwodolɛ anzɛɛ dɔvolɛ bie mɔɔ ɛwu. Baebolo ne kola boa wɔ ɔmaa ɛdi wɔ ngyegyelɛ nwo gyima ɛnɛ, na ɔmaa wɔ ahonle tɔ wɔ azule nu ɔlua kpuyia ɛhye mɔ mɔɔ ɔfa nwolɛ mualɛ ɔmaa la azo:

• Duzu ati a yɛnwu amaneɛ a?

• Kɛzi yɛkola yɛgyinla asetɛnla nu ngyegyelɛ nloa ɛ?

• Kɛzi yɛkola yɛmaa yɛ abusua asetɛnla yɛ anyelielɛ ɛ?

• Saa yɛwu a yɛkɔ zo yɛtɛnla aze ɔ?

• Asoo yɛbanwu yɛ alɔvolɛ mɔɔ bɛwu la bieko?

• Kɛzi yɛkola yɛdie yɛdi kɛ ɛwɔkɛ mɔɔ Nyamenle ɛbɔ la bara nu kenlebie ɛ?

 Buluku ɛhye mɔɔ ɛlɛkenga la kile kɛ ɛkulo kɛ ɛnwu mɔɔ Baebolo ne kilehile la. Buluku ɛhye baboa wɔ. Yɛ ye nzonlɛ kɛ ɛdendɛkpunli ko biala kpuyia wɔ mukelɛ ne abo ɛkɛ. Menli mgbe dɔɔnwo mɔɔ Gyihova Alasevolɛ nee bɛ sukoa Baebolo ne la anye ɛlie kpuyia nee nyelebɛnloa mɔɔ bɛfa bɛsuzu nwolɛ la anwo. Yɛze kɛ ɛdawɔ noko ɛ nye balie nwolɛ. Kɛkala mɔɔ ɛlɛsukoa mɔɔ Baebolo ne kilehile amgba mɔɔ yɛ anyelielɛ na eza ɔyɛ ahunludwolɛ la ɔrɛla ye kɛ Nyamenle bayila wɔ!