NDRE mamaky gazety iha, ndre manenty tele, ndre mijanjy radio, le misy resaky halatsy miharo vonoan’olo noho aly voho fampihorohoroa avao amy raha rey. Eritsereto koa ty raha mampitseky anao, mety ho arety vasa zay na ty fahafatesa ty longonao. Mety ‘halahelo marè’ iha, manahaky lahilahy soa raiky, kaihy hoe Joba.—Joba 10:15.

Anontaneo ty vatanao hoe:

• Ho zao va ty raha tea Ndranahary hatao ho ahy noho ho ahin’olombelo iaby?

• Aia ro ahazoako fanampea lafa misy raha manahira mahazo ahy?

• Mbo azo tamàny hisy fiadana avao va ty an-tany etoa ndraiky andro any?

Manome valiny mahafa-po amy fanontanea reo ty Baiboly.

“Hofafàny ty ranomaso iaby amy ty mason-drozy, ka tsy hisy fahafatesa sasy, sady tsy hisy sasy ty alahelo na ty fitaraina na ty raha mahararirary.”—Apokalypsy 21:4

“Hahavita hanganiky vohitsy manahaky ty serfa ty malemy tomboky.”—Isaia 35:6

“Hampahità ty maso ty jiky.”—Isaia 35:5

 ‘Hiboaky iaby ze an-dolo any.’—Jaona 5:28, 29

“Tsy hisy olo hivola hoe: ‘Marary aho.’ ”—Isaia 33:24

“Hahavokatsy marè ty tany.”—Salamo 72:16

Ka avy le mieritseritsy hoe nofinofy avao raha nivolany tamy pejy taloha teo iny. Nampitamà Ndranahary fa hotanterahiny raha reo sady manazava ty Baiboly hoe manao akory ty hanaovany raha zay.

Fe misy raha soa hafa koa azo baka amy Baiboly. Manampy anao hana fiaina mahafa-po manomboky henanizao ty Baiboly. Eritsereto tse moa ty raha mampiasa loha anao noho ty fahasahirana mahazo anao! Mety ho tsy fisian-drala zay, na fahasahirana amy fianakavia, na arety, na fahafatesa ty longo. Afaky manampy anao amy ty raha manahira anao henanizao ty Baiboly sady manday fampionona, satria mahavoavaly fanontanea retoa:

• Manino tsika ro mijaly?

• Ino ty hatao lafa misy raha mampiasa loha amy ty fiaina?

• Ino ty azontsika atao mba hahasambatsy ty fianakaviantsika?

• Manao akory ty olo lafa maty?

• Mbo hahita ty longontsika fa nimaty va tsika ndraiky andro any?

• Manino tsika ro mahazo antoky fa hanatanteraky ty raha nampitamàniny Ndranahary?

 Kanao iha mamaky boky toy, le hita hoe ta hahay ze raha ampianary ty Baiboly. Hanampy anao vatany boky toy. Misy fanontanea, le anaty fehintsoratsy ao ty hahitanao ty valiny. Olo an-tapitrisany ro miezaky mamaly fanontanea reo, lafa mianatsy Baiboly miaraky amy ty Vavolombelo Jehovah. Azon-drozy tavy raha zay, ka irìnay iha mba hahazo tavy azy koa. Ho falifaly noho ho afa-po vatany iha, lafa mianatsy hoe ino marina ro ampianary ty Baiboly. Irìnay lahy iha mba hotahỳ Ndranahary, lafa manao raha zay!