КАЙЫ-ДАА солунну номчуп, телевизорну көрүп азы радиону дыңнап көр даан: делегейде кем-херек үүлгедиишкиннери, дайыннар болгаш терроризм болуп-ла турар! Азы бодуңнуң хууда бергелериң дугайында боданып көр даан. Аарып турарың дээш азы чоок кижилериңни чидиргеш, аажок муңгарап турар чадавас сен, ынчангаш чөп-шынныг Иов дег: «Хилинчек-човалаң менче сиңген» — деп, бодуңну миннип турар боор сен (Иов 10:15).

Бодап көрем:

• Бистиң мынчаар чурттаарывысты Бурган күзээн бе?

• Бергелерни шиитпирлээр дизе, дузаны кайыын тып алырыл?

• Чер кырынга кажан-бир тайбың турар деп, идегеп болур бис бе?

Библия ол айтырыгларга бүзүрелдиг харыыларны берип турар.

«Бурган улустуң караанда чаш бүрүзүн чодуп бээр. Моон соңгаар өлүм-даа, ыы-сыы-даа, ажыг-шүжүг-даа, аарышкы-даа турбас» (Ажыдыышкын 21:4)

«Аскак кижи сыын дег, тура халыыр» (Исаия 35:6)

«Караа көрбес улустуң карактары ажыттынып кээр» (Исаия 35:5)

 «Чевеглерде чыдар бүгү улус... туруп кээр» (Иоанның 5:28, 29)

«Чаңгыс-даа чурттакчы “аарыг мен” дивес» (Исаия 33:24)

«Ооң чуртунга, даглар бажынга тараа элбек болзун» (Ырлар 71:16)

Кырында чугаалаан бүгү чүүл — боттанмас күзел-дир деп, бодаарынче далашпа. Ол дээрге Бурганның аазаашкыннары болгай, ынчангаш ол оларны канчаар күүседирин Библия тайылбырлап турар.

Оон артык, Библия ам безин ужур-уткалыг, төлептиг чуртталганы тударынга биске дузалап болур. Бодуңнуң хууда дүвүрелдериң дугайында бодап көр даан. Акша-төгериктиң чедишпези, аарыглар, өг-бүледе алгыш-кырыш, чоок кижилеривистиң өлүмү — сээң чуртталгаңны муңгаранчыг кылып турар бергелерниң чүгле кезии-дир. Ынчалзажок оларны ажып эртеринге Библия сеңээ дузалаар. Ол оожургал берип, чугула айтырыгларга харыылап турар:

• Чүге хилинчектенип турар бис?

• Амыдыралдың бергелерин канчаар ажып эртерил?

• Өг-бүлеге аас-кежикти канчаар чедип алырыл?

• Өлген кижиниң байдалы кандыгыл?

• Чок апарган чоок улузувус-биле кажан-бир ужуражып болур бис бе?

• Бурган шупту аазаашкыннарын күүседир деп, чүге бүзүреп болур бис?

 Бо номну номчуп турарың дээрге-ле библейжи алыс шынны тып алыр күзелиңни көргүзүп турарың ол. Бо ном Библия херек кырында чүге өөредип турарын билип алырынга сеңээ дузалаар. Абзацтарга айтырыглар бердинип турарын, эскерип көр. Миллион-миллион кижилер айтырыглар болгаш харыылар дузазы-биле Библияны Иегованың Херечилери-биле өөренип турар. Ол арга сеңээ база таарымчалыг болур деп, идегээр-дир бис. Чедиишкинниг өөренириңни күзеп тур бис, ынчангаш Библия чүге өөредип турарын билип алыр чүткүлүңнү Бурган йөрээзин!