’E Ko Te Fakatu’utu’u Koa ’Aia ’a Te ’Atua?
KA KOUTOU lau he sulunale, pe’e koutou sio’i te televisio, pe’e koutou fakalogo ki te lātio,’e koutou ma’u ai anai he ’u tu’uga logo ’o ’uhiga mo te agamālohi, mo te tau, pea mo te fai fakapō. ’O hilifaki kiai, ’e ’i ai mo te ’u me’a ’aē ’e koutou tu’ania kiai. E lagi koutou tau mo he lotomamahi, ’uhi ko te mahaki pe’e ko he tahi kua mate kae ne’e koutou ’ofa ai. Lagi ’e malave kiā koutou ohage ko tona malave ki te tagata agalelei ko Sopo, ’aē ne’e ina ’ui kua “ma’uli mamahi ’aupito.”—Sopo 10:15.
Koutou fai te ’u fehu’i ’aenī:
- ’E ko te gata’aga pe koa ’aia ’o te fakatu’utu’u ’a te ’Atua ’o ’uhiga mo au pea mo te malamanei?
- ’E au lava ma’u ’ifea he tokoni ki taku ’u fihifihia ’aia?
- ’E tou lava ’amanaki koa ki he tokalelei ’i te kele?
’E tuku mai ’i te Tohi-Tapu te ’u tali totonu ki te ’u fehu’i ’aia.
’E AKO’I MAI ’I TE TOHI-TAPU, ’E FAKAHOKO ANAI E TE ’ATUA IA TE ’U FETOGI ’AENĪ KI TE KELE.
“’E ina holoholo’i anai te ’u lo’imata fuli pe ’i ’onatou mata, pea ko te mate ’e puli anai ia; ’e mole toe ’i ai anai he putu, he lauga, he mamahi.”—Apokalipesi 21:4, MN
“Ko te ketu ’e kake anai ohage he tia.”—Isaia 35:6
“’E ava anai te ’u mata ’o te kau kivi.”—Isaia 35:5
“Ko nātou fuli ’aē ’e nonofo ’i te ’u falemaka fakamanatu…’e nātou hū mai anai ki tu’a.”—Soane 5:28, 29, MN
“’E mole he tahi ’e ina ’ui anai: ‘’E au mahaki.’”—Isaia 33:24
“’E mahu anai te pulapula ’i te kele.”—Pesalemo 72:16
KE ’AOGA KIĀ KOUTOU IA TE ’U AKONAKI ’A TE TOHI-TAPU
’Aua na’a koutou manatu ko te ’u me’a ’aē ne’e fakahā atu, ’e ko he ’u faka’amu pe ia. Kote’uhi ne’e fakapapau mai e te ’Atua ’e ina fakahoko anai te ’u fa’ahi ’aia, pea ’e fakamahino mai e te Tohi-Tapu tona fa’ahiga fakahoko.
Ko te koloā’aga ’o te Tohi-Tapu, he’e ina foaki mai te pule’aki ke tou ma’uli fiafia mo’oni ’i te temi nei. Ko tokotou ’u fihifihia pea mo takotou ’u tu’ania ’i te fa’ahi ’o te pa’aga, pe’e ko he ’u fihifihia faka famili, pe’e ko hokotou ’u mahaki, pe’e ko te mate ’a he tahi ne’e koutou ’ofa ai, ’e lava tokoni atu ia te Tohi-Tapu ke koutou ma’u pule’aki ki te ’u fihifihia ’aia ia ’aho nei, pea ’e ina lava foaki atu he faka fīmālie he’e ma’u ai te ’u tali ki te ’u fehu’i ’aenī:
- He ko’e ’e tou ma’uli mamahi?
- E feafea’i hatatou ’utaki’i te ’u faigata’a’ia ’o te ma’uli?
- Koteā ’aē ’e tonu ke tou fai ke ma’uli fiafia age totatou famili?
- Koteā ’aē ’e hoko kiā tatou mokā tou mamate?
- ’E tou toe sisio anai koa ki te kau mate ’aē ne’e tou ’o’ofa ai?
- E feafea’i hatatou ’ilo’i papau ko te ’Atua ’e ina fakahoko anai tana ’u fakapapau ki te ka ha’u?
Ko takotou lau ia te tohi ’aenī, ’e hā mai ai ’e koutou fia ’ilo’i te ’u me’a ’aē ’e ako’i mai ’i te Tohi-Tapu. ’E tokoni atu anai te tohi ’aenī. Koutou fakatokaga’i ko te ’u palakalafe ’e ’i ai tonatou ’u fehu’i ’i te lalo pasina. Ko te lau’i miliona haha’i mokā nātou fai palalau mo te kau Fakamo’oni ’a Sehova ki te Tohi-Tapu, ’e nātou mulimuli ki te fa’ahiga fai ’aia, ’o te ’u fehu’i pea mo te ’u tali. ’E mātou faka’amu ke koutou fai mo koutou ia te fa’ahi ’aia, pea ’ofa pe ke tapuakina’i koutou e te ’Atua, ’i takotou ma’u te fiafia ’i te ’u me’a ’aē ’e ako’i mo’oni mai ’i te Tohi-Tapu.
KOUTOU FAKAMĀMĀHANI MO TAKOTOU TOHI-TAPU
KO TE Tohi-Tapu ’e fa’ufa’u ’aki te ’u tohi e 66. Ke feala hatatou ma’u gafua, ko te ’u tohi ’aia ’e vahe’i ’aki te ’u kapite pea mo ’ona vaega. ’I te ’u vaega faka Tohi-Tapu ’o te tohi ’aenī, ko tona ’uluaki numelo ’e ko te kapite, pea ko te numelo ’aē ’e muli mai ’e ko te vaega. Ohage la, ko “2 Timoteo 3:16,” ko tona faka ’uhiga ko te lua tohi ’o Timoteo, kapite 3, vaega 16.
’E vave anai takotou fakamāmāhani mo te Tohi-Tapu, mo kapau ’e koutou vaka’i te ’u vaega ’aē ’e tu’u ’i te tohi ’aenī. Tahi ’aē, ’e koutou lava kamata hakotou polokalama lau ’o te Tohi-Tapu ’i te ’aho fuli, ’o koutou lau he ’u kapite e tolu pe’e nima ’i te ’aho fuli, ’o feala ai hakotou lau te Tohi-Tapu kātoa ’i te ta’u e tahi.