XI GUIRÁʼ ránnaluʼ ora gúʼndaluʼ periódicu, ora gúʼyaluʼ tele o gucaadiágaluʼ radiu. Nabé rieeteʼ careecabe lu binni, cadinde ca guidxi ca ne dede nuu tu cayuuti binni para guchibi gobiernu. Yanna, guníʼ ique ca guendanagana stiluʼ. Zándaca cayuubaʼ ladxidoʼloʼ pur xiixa guendahuará, pur guti tuuxa binnilídxiluʼ o ti xhamíguluʼ. Zándaca guni sentirluʼ casi biʼniʼ sentir Job, ti hombre chaʼhuiʼ ni guníʼ maʼ bidxaga pur guiráʼ guendananá ni gupa (Job 10:15).

Zándaca guinabadiidxaluʼ:

• Ñee ndiʼ nga ni gucalaʼdxiʼ Dios para naa ne para guiráʼ xixé binni la?

• Paraa zanda guidxelaʼ ni gacané naa para gudxieeluáʼ ca guendanagana stinneʼ yaʼ

• Ñee zadxiña dxi chuʼ guendariuudxi lu Guidxilayú riʼ la?

Jneza modo ricabi Biblia ca guendarinabadiidxaʼ riʼ.

«Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ.» (Apocalipsis 21:4)

«Zachesa ca binni nachiitaʼ ñee casi richesa ti bidxiña.» (Isaías 35:6)

«Zuuyaʼ cani nacheepaʼ lú.» (Isaías 35:5)

 «Irá cani nuu ndaani baʼ [...] zaree caʼ.» (Juan 5:28, 29)

«Guirutiʼ tu cueza racá zaníʼ: “Huaraʼyaʼ”.» (Isaías 33:24)

«Ziuu stale biidxiʼ [o guendaró] lu guidxilayú.» (Salmo 72:16)

Cadi nagueendaca guiníʼ íqueluʼ ti bacaandaʼ si nga ni zeeda lu yaza gudídinu ca. Dios guníʼ zuni ni ne Biblia cusiene ximodo chigúnibe ni.

Peru cadi nga si nga rusiidiʼ Biblia. Laaca cusiidiʼ ni laanu ximodo guibáninu galán dede nagasi. Guníʼ ique ca guendanagana stiluʼ ne guiráʼ ni riguu xizaa lii. Zándaca nuuluʼ xizaa pur bueltu, binnilídxiluʼ, guendanazaaca stiluʼ ne ora gatiʼ tuuxa ni nadxiiluʼ. Biblia racané laanu gudxiilunu cani ne riguixhedxí ni ladxidoʼno ora guicabi ni cani rinabadiidxanu, casi cani zeeda raríʼ:

• Xiñee racananu

• Ximodo gudxíʼlunu ca guendanagana riguu xizaa laanu

• Xi zanda gúninu ti guibaninenu binnilídxinu jma nayecheʼ

• Xi rácanu ora maʼ gútinu

• Ñee ziuu dxi gúʼyanu ca binnilídxinu ni maʼ guti la?

• Xiñee nanna dxíchinu zuni Dios cani maʼ guníʼ

 Cumu cayuundaluʼ cani zeeda raríʼ la? cusihuínniluʼ racaláʼdxiluʼ gánnaluʼ ni rusiidiʼ Biblia. Ne libru riʼ zacané lii gánnaluʼ ni. Pa gúʼyaluʼ ñee ca yaza ca zeeda caadxi pregunta para ca párrafo ca. Guizáʼ stale binni riuulaʼdxiʼ modo rusiidiʼ ca testigu stiʼ Jiobá purtiʼ rinabadiidxacabe ne ribézacabe guicabi binni ora ruundanécabe laacaʼ Biblia, ribézadu laaca chuuláʼdxiluʼ modo rúnicabe. Dios cuʼ ndaayaʼ lii pur stipa gúniluʼ para guiziidiluʼ xipeʼ ndiʼ cusiidiʼ Biblia.