MO GEDINGA ai waraga apangbanga. Mo bingo terevizioni, watadu ka gia radio. Badungu apangbanga duho rogo agi ahe re tipa gu gbegberẽ apai aboro amangaha, avura, na gu kereapai nga ga abamoi! Mo berẽnga tipa gu fudifudiapai namanga ro nitiro. Si rengbe kadu nga kaza namanga ro watadu kpio gamo boro nafu bakere gberãrago foro. Mo rengbe ka bi tiro wakina gu ruru kumba nangia Eyobo, naya wẽ ko ‘hi be pazee, kini ngere kuti gako gberãngbi.’—Eyobo 10:15.

Sidu, mo sananga tiro nga:

• Ya mo gere nga agu apai Mbori aida si niimangi re na kini mangi kura aboro?

• Wari rengbe mi ka gbia undo ni tipa agu apai nafuda re?

• Ya mo ani abi ndikidi zereda auru kpotosende?

Ziazia Kekeapai nafu wene akaragapai kuti agi asanahe re dunduko.

‘Ko awega aume ti bangiri aboro kusayo dunduko. Kpio adunga berewe te, rungo adunga na akpee na ima a te.’—Yugoti 21:4

“Terengeterenge aboro agúka wa ngbiimo.”—Yesaya 35:6

“Bangiri airavurari azá.”—Yesaya 35:5

 ‘Agu aboro dunduko du rogo amurã yo nika kura.’—Yoane 5:28, 29

“A nga boro kporo sa ayá, ‘Mi nawoka’ te.”—Yesaya 33:24

‘Zende ahe azuko rogo ringara kpaima.’—Atambuahe 72:16

Ka mo gunga ka tikango agu apai gumbayo paha rogo agu akpewaraga ye mbata fu gere ya. Mbori du kidopa agi apai re, na Ziazia Kekeapai nagumbapa wai ko nika mangaha.

Ono anga kina pa wai ko nika mangaha sa Ziazia Kekeapai agumbaha te. Si nagumba agu apai agumba a rengbe ka sa rani ani raki wene raka awere na ku mbatayo. Mo berẽnga kuriipa agu apai nafuda ro. Si rengbe kadu nga zingo marã namanga ro, fudifudiapai gudu ho rogo gamo ramukporo, kaza namanga ro, watadu gamo boro kpi. Ziazia Kekeapai rengbe arengba ka fu undo foro tipa agu apai nafuda ro. Na si rengbe ka fu wasa fu boro ho si akaragapai ni sa agu asanahe duwa:

• Tipagine ani arungo ti ni be apai?

• Ginipai rengbe ani ka mangaha sa gu fudifudiapai ani agbiatirani na ni?

• Wai rengbe ani ka sa gaani ramukporo si du ni wenehe gbe?

• Wari boro nindu kuhoni ho ní akpi ni?

• Ya mo ani abi gu gaani aboro berewe naakpiki?

• Ginipai nayugoho nzunzu nga Mbori nika manga agu apai amanga kidoko paha ku mbatayo?

 Wa duhe nga mo nageda gi buku re, si nayugo gupai nga mo nakpinyemu ka ino agu apai Ziazia Kekeapai ayugoho. Gi buku re nika undo ro aundo mo inihe. Agenewaraga na asanahe ti ni keyo ho mburu kpewaraga yo. ADezire Yekova naawisigo Ziazia Kekeapai na aboro ngba gu gene nga boro nata sanahe guni nikaragaha. Dungu amirioni aboro ngba gipai re tiyo. Ani nabihe nga si angbaangba a tiro ka mangaha wo. Ga Mbori maku dunga adu kuriro wa mo nikaa wirika agu apai nzunzu Ziazia Kekeapai ayugoho!