1, 2. Akoz i bon demann kestyon?

ESKI ou’n deza remarke ki mannyer bann manrmay i kontan demann kestyon? Bokou i demann kestyon dek ki zot konmans koze. Zot get ou lizye kler e demann ou bann keksoz parey: Akoz lesyel i ble? Akoz zetwal i alimen? Lekel ki’n montre zwazo sante? Ou kapab sey ou mye pour reponn, me i pa touzour fasil. Menm si ou donn ou pli bon larepons, i annan ankor en lot kestyon ki swiv: Akoz?

² Pa zis bann manrmay ki demann kestyon. Anmezir nou grandi, nou kontinyen demann kestyon. Nou fer sa pour konnen ki direksyon nou pou ale, pour konn bann danze ki nou bezwen evite, oubyen zis akoz nou anvi konn en keksoz. Me i paret ki bokou dimoun nepli demann kestyon, sirtou bann kestyon pli enportan. Oubyen petet zot in aret rod larepons sa bann kestyon.

3. Akoz bokou dimoun in aret rod larepons bann kestyon ki pli enportan?

³ Mazin sa kestyon lo lapo  sa liv, sa bann kestyon dan prefas, oubyen okonmansman sa sapit. Sa i parmi bann kestyon pli enportan ki ou kapab demande. Pourtan, bokou dimoun in aret rod larepons sa bann kestyon. Akoz sa? Eski Labib i kapab reponn sa bann kestyon? I annan dimoun ki krwar son bann larepons i tro difisil pour konpran. Lezot i kanmi pour demann kestyon. Serten i mazinen ki i pli bon les sa bann kestyon dan lanmen bann pret ek ansennyan. Ki ou panse ou?

4, 5. Ki serten kestyon byen enportan nou kapab demande dan lavi? Akoz nou devret rod zot larepons?

⁴ Sirman ou anvi konn larepons bann kestyon enportan dan lavi. Petet parfwa ou’n demann ou lekor: ‘Akoz nou la lo later? Eski i annan en lavi apre sa enn? Ki mannyer Bondye i ete vreman?’ I bon demann bann kestyon koumsa, e i enportan ki ou kontinyen rod zot larepons ziska ou satisfe e konvenki. Zezi Kri, en ansennyan byen popiler, ti dir: “Demande zot a gannyen, rode zot a trouve, frape e laport i a ouver.”—Matye 7:7.

⁵ Si ou ‘kontinyen rod’ larepons sa bann kestyon enportan, ou pou vwar ki i ti vo lapenn. (Proverb 2:1-5) Nenport kwa ki dimoun in kapab dir ou, sa bann kestyon i annan larepons e ou kapab trouv zot dan Labib. Larepons pa tro difisil pour konpran. Deplis, zot donn ou lespwar ek lazwa. Zot osi kapab ed ou trouv satisfaksyon dan lavi depi konmela menm. Pour konmanse, annou vwar en kestyon ki’n trouble bokou dimoun.

6. Akoz bokou dimoun i krwar Bondye pa enterese avek nou bann soufrans?

⁶ Bokou dimoun i krwar sa. Zot dir, ‘Si Bondye ti enterese, lemonn pa ti pou parey i ete ozordi.’ Ler nou get  otour nou, nek nou vwar zis lager, laenn, ek lapovrete. Nou menm parler nou tonm malad, nou soufer, oubyen lanmor i pran en dimoun ki nou ti pros avek. Alors, bokou dimoun i demande, ‘Si Bondye i enterese avek nou e avek nou problenm, akoz i pa anpes sa bann keksoz arive?’

7. (a) Ki mannyer serten larelizyon in fer dimoun krwar ki Bondye napa santiman? (b) Ki Labib i vreman dir lo bann keksoz mal ki arive avek nou?

⁷ Sa ki pli pir ankor, se ki parler serten larelizyon i fer dimoun krwar ki Bondye napa santiman. Akoz nou dir sa? Kan maler i arive, zot dir ki i lavolonte Bondye. Dan en sans, sa bann larelizyon pe blanm Bondye pour sa bann move keksoz ki arive. Me eski sa i leka? Ki Labib i dir vreman? Zak 1:13 i reponn: “Personn pa devre dir, ler i ganny tante, ‘Mon’n ganny tante par Bondye,’ parski Bondye pa kapab ganny tante par sa ki mal, e limenm i pa tant personn.” Alors, bann keksoz mal ki ou vwar otour ou pa zanmen sorti kot Bondye. (Zob 34:10-12) I vre ki i les sa bann move keksoz arive. Me i annan en gran diferans ant les en keksoz arive e fer li arive.

8, 9. (a) Ki legzanp ou kapab servi pour montre diferans ant les bann move keksoz arive e fer sa bann keksoz arive? (b) Akoz i pa zis pour nou kritik Bondye pour les imen anmenn en move lavi?

⁸ Par egzanp, mazin en bon papa ki kontan son zanfan. Son gran garson ki ankor pe reste avek li i konmans viv mannyer i oule e deside pour kit lakour. Son papa pa anpes li. I anmenn en move lavi e i rankontre bokou problenm. Eski sa papa ki’n fer son garson ganny tou sa problenm? Non. (Lik 15:11-13) I parey avek Bondye. I pa’n anpes bann imen viv mannyer zot oule. Me pa li ki’n fer zot ganny sa bann problenm ki’n swiv apre. Alors, i pa zis pour blanm Bondye pour tou sa bann problenm otour nou.

 ⁹ Bondye i annan bann bon rezon pour les bann imen viv zot move lavi. I pa oblize eksplik nou son rezon parski li ki’n kree nou. Deplis i konn tou e i tou pwisan. Me akoz i kontan nou, i’n deside eksplik nou. Ou pou aprann plis konsernan sa bann rezon dan Sapit 11. Selman asire ki Bondye pa responsab pour sa bann problenm ki nou rankontre. Okontrer, i donn nou sa sel lespwar ki pou annan en solisyon!—Izai 33:2.

10. Akoz nou kapab krwar ki Bondye pou efas tou konsekans mesanste?

¹⁰ Deplis, Bondye i sen. (Izai 6:3) Savedir i pir e prop. Napa ni menm en pti tras mesanste dan li. Alors, nou kapab met tou nou konfyans dan li. Nou pa kapab dir menm keksoz pour bann imen, parski imen i kapab ganny enfliyanse par sa ki mal. Menm bann dimoun pli onnet dan lotorite napa sa pouvwar pour repar bann domaz ki bann move dimoun i fer. Me Bondye i tou pwisan. I kapab e i pou retir tou konsekans ki mesanste in anmennen lo imen. Kan Bondye pou pran aksyon kont mesanste, i pou met en lafen avek li enn fwa pour tou!—Psonm 37:9-11.

11. (a) Ki mannyer Bondye i santi ler i vwar tou sa lenzistis lo later? (b) Ki mannyer Bondye i santi ler i vwar ou soufer?

¹¹ Me antretan, ki mannyer Bondye i santi ler i vwar tou sa ki pe pase lo later e dan ou lavi? Premyerman, Labib i dir ki Bondye i “kontan lazistis.” (Psonm 37:28) Alors, i pa konmsi i pa enterese si nou fer sa ki byen ou sa ki mal. I deteste tou kalite lenzistis. Labib i dir “leker [Bondye] ti fer mal” kan i ti vwar sa kantite mesanste lo later dan lepase. (Zenez 6:5, 6) Bondye pa’n sanze. (Malaki 3:6) I ankor pa kontan kan i vwar tou sa soufrans partou lo later. Bondye  pa kontan vwar dimoun soufer. Labib i dir ki i vreman enterese avek ou byennet.—1 Pyer 5:7.

12, 13. (a) Akoz nou annan bann bon kalite parey lanmour, e ki lanmour i fer nou anvi fer ler nou get sa lemonn? (b) Akoz ou asire ki Bondye pou vreman met en lafen avek sa bann problenm dan lemonn?

¹² Akoz nou asire Bondye pa kontan vwar nou soufer? La en lot laprev. Labib i dir zonm in ganny fer dan resanblans Bondye. (Zenez 1:26) Alors, nou annan bann bon kalite akoz Bondye i annan bann bon kalite. Par egzanp, ler ou vwar bann inosan soufer, sa pa fatig ou? Si i fatig ou, asire ki i fatig Bondye plis ankor.

¹³ Enn bann pli bon keksoz ki imen i annan se abilite pour kontan. Sa osi nou’n ganny avek Bondye. Labib i dir “Bondye i lanmour.” (1 Zan 4:8) Nou kontan akoz Bondye i kontan. Eski lanmour ti pou pous ou pour met en lafen avek sa bann soufrans ek lenzistis ki ou vwar otour ou? Si ou ti annan pouvwar pour fer sa, eski ou ti pou fer li? Byensir! Be alor, asire ki Bondye pou met en lafen avek soufrans ek lenzistis. Sa bann promes ki nou’n mansyonnen dan prefas sa liv pa zis en rev oubyen bann ekspektasyon bet. Bondye pou vreman gard son promes! Me pour ou annan lafwa dan sa bann promes, ou bezwen konn plis lo sa Bondye ki’n fer sa bann promes.

14. Ki mannyer Bondye i apele, e akoz nou devret servi son non?

¹⁴ Si ou anvi en dimoun konn ou,  ki ou pou fer? Pa ou pou dir li ou non? Eski Bondye i annan en non? Bokou larelizyon i dir ki son non i “Bondye” oubyen “Senyer.” Me sa pa en non? I en tit, zis parey “lerwa” ek “prezidan” i en tit. Labib i montre ki Bondye i annan plizyer tit. “Bondye” ek “Senyer” i parmi sa bann tit. Me Labib i fer vwar ki Bondye i annan son prop non. Sa i Zeova. Psonm 83:18 i dir: “Ki dimoun i konnen ki ou, ki ou non i Zeova, ou tousel ki Tre O lo later antye.” Si dan ou Labib napa sa non, ou kapab vwar “Non Bondye—ki i vedir e akoz nou devret servi li?” anba Lezot lenformasyon pour konnen akoz. An realite, non Bondye i aparet apepre 7,000 fwa dan bann ansyen  roulo Labib. Alors, Zeova i anvi ou konn son non e servi li. Nou kapab dir ki i pe servi Labib pour entrodwir son lekor avek ou.

15. Ki non Zeova i vedir?

¹⁵ Bondye in swazir en non pour li ki dir nou bokou lo li. Sa non, Zeova, i vedir ki Bondye i kapab akonpli nenport promes ki i fer e realiz nenport plan ki i annan antet. * Non Bondye i vreman spesyal. I zis pour li tousel. Zeova i spesyal dan plizyer fason. Konman?

16, 17. Ki nou kapab aprann lo Zeova par sa bann tit: (a) “Toupisan”? (b) “Lerwa eternel”? (c) “Kreater”?

¹⁶ Nou’n vwar ki Psonm 83:18 i dir sa lo Zeova: “Ou tousel ki Tre O.” Pareyman, zis Zeova tousel ki ganny  apele “Toupisan.” Revelasyon 15:3 i dir: “Senyer Bondye Toupisan! Ou travay i gran e merveye. Lerwa bann nasyon! Tou ou bann plan i zis e vre.” Sa tit “Toupisan” i montre nou ki Zeova i pli pwisan dan liniver antye. Napa personn ki annan sa kalite pwisans; i pli for ki zot tou. Dan 1 Timote 1:17, Zeova i ganny apele “Lerwa eternel.” Sa i rapel nou ki Zeova i spesyal dan ankor en lot fason. Zis li tousel ki’n touzour egziste. Psonm 90:2 i dir ki Zeova in toultan e i pou toultan Bondye. Pa sa panse i fer nou annan en gran respe pour li?

¹⁷ Zeova i osi spesyal dan le sans ki zis li tousel ki Kreater. Nou lir dan Revelasyon 4:11: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” Tou sa ki ou kapab mazinen, bann lanz envizib dan lesyel, sa kantite zetwal ki ranpli lesyel aswar, bann fri lo pye dibwa, bann pwason dan lanmer e dan larivyer, tousala i egziste akoz Zeova in kree zot!

18. Akoz serten dimoun i krwar zot pa pou zanmen kapab vin pros avek Bondye, me ki Labib i dir?

¹⁸ Kan serten dimoun i lir lo bann kalite merveye Zeova, zot kapab pa santi zot alez. Zot realize ki Bondye i bokou pli siperyer ki zot. Alors zot krwar zot pa pou zanmen kapab vin pros avek li ouswa zot pa vo nanryen devan li. Me eski sa i vre? Labib i dir tou lekontrer. I dir sa lo Zeova: “An realite i pa lwen avek sakenn parmi nou.” (Akt 17:27) Labib i menm sipliy nou: “Apros avek Bondye, e i ava apros avek zot.”—Zak 4:8.

19. (a) Ki mannyer nou kapab konmans apros avek Bondye, e ki byenfe nou pou gannyen? (b) Ki kalite ou pli admire dan Bondye?

¹⁹ Ki mannyer ou kapab vin pros avek Bondye?  Premyerman, kontinyen fer sa ki ou pe fer la, savedir aprann konn Bondye. Zezi ti dir: “Savedir, pour ganny lavi eternel zot bezwen aprann konn ou konman sel vre Bondye ek sa enn ki ou’n anvoye, Zezi Kri.” (Zan 17:3, NW) Wi, Labib i dir ki aprann konn Zeova ek Zezi i kapab fer ou ganny “lavi eternel”! Nou ti vwar ki “Bondye i lanmour.” (1 Zan 4:16) Zeova i annan ankor bokou lezot zoli kalite ki vreman atiran. Par egzanp, Labib i dir ki Zeova i en Bondye ki pran pitye e ki konpran nou. I pa ankoler vitman e i toultan koz laverite. (Egzod 34:6) I “bon e pare pour pardonnen.” (Psonm 86:5) Bondye i annan pasyans. (2 Pyer 3:9) I fidel. (1 Korentyen 1:9) Pli ou lir Labib, ou pou remarke ki Zeova i annan sa bann kalite e bokou lezot zoli kalite.

20-22. (a) Eski lefe ki nou pa vwar Bondye i anpes nou vin pros avek li? Eksplike. (b) Ki serten dimoun i kapab dekouraz ou pour fer, me ki ou devret fer?

²⁰ I vre ki ou pa kapab vwar Bondye akoz i en lespri e i envizib. (Zan 1:18; 4:24; 1 Timote 1:17) Me ler ou aprann konsernan li dan Labib, ou kapab arive konn li parey ou konn en nenport dimoun. Parey dan Psonm i dir, ou kapab admir labote personnalite Zeova. (Psonm 27:4; Romen 1:20) Pli ou aprann konn Zeova, pli i pou vin reel pour ou e ou pou annan plis rezon pour kontan li e santi ou pros avek li.

²¹ Avek letan ou pou arive konpran akoz Labib i oule nou vwar Zeova konman nou Papa. (Matye 6:9) I pa zis akoz i’n donn nou lavi me i anvi sa ki pli bon dan lavi pour nou, zis parey nenport papa ti a anvi pour son zanfan. (Psonm 36:9) Labib i osi montre ki bann imen i kapab vin zanmi avek Zeova. (Zak 2:23) Zis mazin sa! Ou kapab vin zanmi avek sa Enn ki’n kree liniver!

²² Anmezir ou aprann plis lo Labib, petet serten dimoun  pou dekouraz ou pour kontinyen etidye Labib. Zot kapab fer li avek en bon lentansyon, petet zot pe mazinen ki ou pe sanz ou larelizyon. Me pa les personn anpes ou vin zanmi avek Bondye. I pli bon zanmi ki ou kapab annan.

23, 24. (a) Akoz ou devret kontinyen demann kestyon konsernan sa ki ou pe aprann? (b) Ki nou pou diskite dan lot sapit?

²³ Byensir okonmansman pou annan serten keksoz ki ou pa pou konpran. Petet premye kou ou pou vwar li en pe difisil pour demann led. Me Zezi ti dir i bon abes nou, parey en pti zanfan. (Matye 18:2-4) Parey nou konnen, bann zanfan i kontan demann kestyon. Bondye i anvi ou rod larepons. Labib i koz an byen lo serten dimoun ki ti vreman enterese pour aprann konsernan Bondye. Zot ti pran letan pour egzamin Lekritir pour fer sir sa ki zot ti pe aprann ti laverite.—Akt 17:11.

²⁴ Pli bon fason pour aprann konn Zeova se par egzamin Labib. Labib pa parey okenn lezot liv. Dan ki fason? Nou pou diskit sa size dan lot sapit.