1, 2. ¿Ibigala nuedi ibmar wisguega ibmar egised?

BE DAGDIIR gebed burwigan ibmar wisgubiedba gadi ibmar egisdamalad, sunmaggalid aggar egised nasiddamalad: “¿We ibua?”, “¿Ibigala?”. Anba be abin sao inigwale, inbaggwa geg anmar abin sog gusdaed.

² Burwiganbii wisgubiedba weyob ibmar egissurdamalad. Anba anmar seredgumaidba ibmar wisguega ibmar egised surgudisurmogad, sun anmar egisdagoed, neggwebur soggwense igi an owarmasale, mer boni amigega sun anmar ibmar egisbalid, sulirdina binsa ibmar wisgubiedbardibe. Auggine bur ibmar nue wisgulege wilubbinaddina dulemar bar dogdar egissurmalad.

3. ¿Ibigala dulemar bur nue ibmar wisgulege wilubbinad egissurdamala?

³ We garda uggagi ibmar naid be absogena, página 3 gined dagbalo, geb we capítulo nodedgi ibmar egislenaid be dagbalina. ¿Biblia we igargi sunmagnadibe? We ibmar dulemar bur nue wisgue wilubmalanad. ¿Ibigala dulemar we ibmar wisguedgi bar binsadisurmala? Abar sogdamala Bibliagi ibmar soglenanaid aggu iddollegeddeye.  Bamaladdi bingedba budar ibmar egisdamalad. Abar binsamarbalid pastormar we igargi sunmaggoeddeye, sulirdi saglagan we igargi sunmaggoye. ¿Igi bedi binsamoga?

4, 5. Abar dulemar, ¿ibu ibmar wisgubi gudidamarmogana, geb ibiga nue we ibmar wisguleged abelege?

⁴ We ibmar nue wisguleged abelesoggua, be wisgubimogar gebed. Sun be binsadiir binsadimogad: “¿Ibigala nabbaneggi dulemar buggusa? ¿Unnila uggiaggwa nabbaneggi gudi guegala anmar buggusa? Bab Dummad ¿dule igi daedi?”. Nuedid be we ibmargi binsadimogar. Be we ibmar wisguega alamagnamogar, mer indaggo, wisguedse sao. Jesucristo bur ewisid emar odurdasadi sogsad: “Bab Dummadse ibmar egismar, ar Bab Dummad bemarga uggoed. Be[mar], Bab Dummadgi ibmar amimar, be[mar] amimaloed. Be[mar], Bab Dummadse gole, bemarga Bab Dummad yawagag egaoed” (Mateo 7:7).

⁵ We ibmar wisguedga be alamagnaile, be dagnoniggoed binsa be alamassuli (Proverbios 2:1-5). Anba dulemar bamalad bega sogdibe, be we ibmar wisguosur guoye, auggine anba be nabir wisgusaled. We ibmar wisgued undarsulid, ar Biblia we ibmargi sunmagnaid. Bibliagi soglenabalid yoogidse anmarga neg nuguoye, geb emi ibaginbela nabir anmar yeer iddodii gudi gusarye. Emidi anmar sunmaggoloena ibmar soggwen dulemar aggu iddodamaladgi.

6. ¿Ibigala dulemar binsadamala Bab Dummad anmargi binsamasurye?

⁶ Abar sogdamalad Bab Dummad anmargi binsamasurye. Sogdamalad anmargi binsamaile weyob neg gunasulirye. Be daggena, emi ibagine urwed yaisur gusad, na isdar dagmalad yaisur gusbalid, wileged yaisur gusbalid. Bela anmargi bonigan yolegedbibalid, geb sun anmar ibe gwenadgan burgwebalid. Aaga abar soggardamalad: “Bab Dummad anmargi binsamaile, degid ¿ibiga anmar wilebugbarsunna?”.

7. a) ¿Ibiga be sogsale, Bab igar wismaladi agga dule isganaga Bab Dummad imaddamarye? b) Bibliagi nue igi soglenai, ¿Bab Dummad, dulemar wiomadibe?

 ⁷ Be iddobalina, pastormardega, geb saglagandega dulemarga soggardamarmogad, Bab Dummad urwemaye. Ibmar aggar gunonisundibe, soggardamalad, Bab Dummad sogedba ibmar gusye. Degsoggu bela ibmar isgana gunaidi agga Bab Dummadgi nasiddamalad. ¿Ar bule Bab Dummad ibmar isgana imagmadibe? Bibliagi ¿nue igi soglenai? Santiago 1:13 gine sognai: “Ar dule wargwen isguedgi wilub daglear sogele, mer sogo: Bab Dummad isguedgi an wilub dagnaiye.” Ar Bab Dummad isguedse geg wilub dagleged, deginbali, Bab Dummad isguedgi dulemar wilub dagsurbalid”. Degsoggu geg anmar soged, Bab Dummad neg oisgumaye (Job 34:10-12 absogo). Bab Dummad neg isgunaid nudagmasulidbali, soglesulid, aa nuggine neg isgunasunye.

8, 9. a) ¿Ibiga be sogsale massigwa isgudedba wiledii gudele, e bab nugginsurye? b) ¿Ibiga nuedsuli neg isgunaid Bab Dummadgi nasigged?

⁸ Be binsaena dule wargwen binsaed nigga, geb sabedgi na neguya sediidgi. E massi dummad ega isgudedba egi waggidded. E bab gassulid mer naega. We massi igar isganaba nader, geb ega neg isgudele, ¿e massiga e bab nuggi neg isgudye be sogsale? Deyob be sogsasuliled, ar e bab ega sogsasulid be igar isganaba naye (Lucas 15:11-13). Aayobmogad, Bab Dummad, dulemar gamasurmo inigwale mer igar isganaba namalaga, sogmasulid igar isganaba namarye. Degsoggu, soglegedsulid Bab Dummad nuggi dulemar wiledii guardaye. Ar aaga nuedsulid ibmar isgana gunaidba dulemar wilealir, Bab Dummadgi nasiggedi.

⁹ Bab Dummad nue ibmar wisidsoggua, geb yeer gangubarsoggua, anmarga soge wilubsulinad, ibiga neg isgusnai. Ar edina wisid ibu ular dulemar gamasuli mer igar isganaba namalaga. Degi inigwale, anmar sabedba anmarga sogmaid ibiga deyob neg gunai. Capítulo 11 gine bur nueggwa we ibmargi  sunmaglegoed. Auggine ebinsao, Bab Dummad nuggi anmarga neg isgunasulid. Ar Bab Dummaddi anmarga sogmaid, yoogidse an bemarga neg nudaggoye (Isaías 33:2).

10. ¿Ibiga anmar bensuli Bab Dummad bela neg isgusnaid onudaggoe?

¹⁰ Anba Bab Dummad dule gwage swilidiggidbalid (Isaías 6:3). Degsoggu isgued bibbisaar egi naisulid. Aaga bibbisaar anmar, Bab Dummad benguedsulid. Dulemardi deyobsulid, inbaggwa isguddamarbalid. Anba dule gwage nued neg idumairbela dulemar neg dargwen imasale gegbar onudagged. Bab Dummaddina bela belad gangued niggad. Degsoggu, neg isgunaidba dulemar wilebuggwad bendaggedsegoed. Neg onudagde sogele bibbisaar neg bar isguosulid, uggiar onudaggosulid (Salmo 37:9-11 absogo).

11. a) ¿Igi Bab Dummad dagdae ibmar nued imaglesulir? b) ¿Igi Bab Dummad iddodae wiledii dulemar daggalir?

¹¹ ¿Igi Bab Dummad iddomai neg isgunaidba, geb anmarga neg undar gualir igi iddodabali? Bibliagi soglenaid “Bab Dummad igar inniggi imagleged yeer dagda[ye]” (Salmo 37:28). Dagmaid ibmar nuegan imaglenadibe, imaglenasurdibe, ibmar nuegan imaglenasulile Bab Dummad sae iddodaed. Bibliagi soglenabalid ebbenne neg isgunai gusadba Bab Dummad gwage nunmag iddomai gusye (Génesis 6:5, 6). Bab Dummad gwagmasulid (Malaquías 3:6). Degsoggua anba ibmar isgana gued nabir dagmasulid, dulemar wilebugmalad wile dagmabalid. Aaga Bibliagi soglenaid, “Bab Dummad bela bemar nue aggwe[maye]” (1 Pedro 5:7 absogo).

12, 13. a) ¿Ibiga nabir anmar emar sabgue? Be, dulemar sabele, ¿igi be iddosale be daggalir dule wargwen wiledii? b) ¿Ibiga anmar nue wisi Bab Dummad neg isgusnaid nudaggoe?

¹² ¿Igi anmar nue wisi Bab Dummad nunmag iddodae wiledii anmar daggalir? Anmar dagbaloena ibiga anmar  weyob soge: Ar Bibliagi soglenaid Bab Dummadi eyob dae anmar imasye (Génesis 1:26). Bab Dummad dule nuedsoggua, aaga anmar nued damogad. Be iddogena, be, dule wiledi daggalir ibmar oaggalossuli, be wile dagsaled. Bab Dummad bulesunna, sun bur wile daggosursi.

¹³ Bela anmar nabir emar sabguedbiid, wegi daedba anmar, Bab Dummadyobbalid, ar Bibliagi soglenaid, “Bab Dummad bela bela dulemar sabguma[ye]” (1 Juan 4:8). Ar Bab Dummad dulemar sabedsoggua, aaga anmar nabir emar sabgumogad. Be, dulemar wilebuggwad sabele, geb be nabir bendagbalile, be, dulemar bendasaled. Degsoggua, Bab Dummad bulesunna, sun dulemar bendaggosur guosi. Página 4 gine be ibmar absosadi, geb página 5 gine ibmar soglenaidi gagganga guosulid, ibmar gunoniggoedgine sunmagnaid, Bab Dummad we ibmar guoye sogmaid, degsoggu guedsegoed. Auggi mer be we ibmar benguega, be wisgued abeleged Bab Dummad nue dule igi daedi.

14. ¿Bab Dummad igi nuga, geb ibiga anmar dulemarga e nuggi sunmagged abelebali?

¹⁴ Dulemar wisguega be doagi, be, be nug ega soger gebed. Anmar bela nug niggadbisoggua, ¿Bab Dummad nug nigmodibe? Buggidar Bab igargi emar odurdagmaladi sogmar inigwale, Bab Dummad nugye “Dios”, auggine wedi e nug sunnadsulid. Ar igi binsa dulemarse gorledamoga “sagla”, “gamdur”, we aayobmogad. Bibliagi soglenaid Bab Dummadse irgwenna  gorlesurmoye, soglenaid inbaggwa biledabarye, “Dios”, “Bab Dummad”. Degi nai inigwale Bibliagi soglenaid: Jehová, Bab Dummad e nug sunnadye. Salmo 83:18 gine soglenaid: “Na wisgumala, bebi Bab Jehová gued, weyobi be nugad. Na wisgumala, nabneggine, bebi unnila Bab Dummad Bur Birigined gued”. Be Bibliagi Bab Dummad nug nasulile, be wisgubibalile ibiga nasuli, nabir be absoged apéndicegi “Bab nuga, ¿ibu obare geb ibiga ebuleged abelege?”. Ar gebbe Biblia narmagleargu e narmasmalad Bab Dummad nug sunnad miliba narmasmalad. Aaga, Jehová abeged be e nug wisgued, geb e nuggine be emarga sunmagbalid. Degsoggu Bab Dummad anmarga Biblia ugsad, anmar nabir e igar durdaggega.

15. ¿Ibiga Bab Dummad nuga, Jehová?

 ¹⁵ Bab Dummad e sunnad na nug amisad, nuggusad, Jehová. We nuga binsa nug yogasaaledsulid. We nug sogleged Jehová sogsale ibmar soggwen imaggoye, imaggedse daed. * Degsoggua unnila Bab Dummadbii Jehováye nugad. Dule baid Jehováyobidi sadded. ¿Ibigala?

16, 17. Ibigala Jehovága sogledae: a) “Bela belad gangued niggad[ye]” b) “Rey Dummad degi sadegu maid[ye]” c) “Bela ibmar obinyisad[ye]”.

¹⁶ Baddo anmar durdasad Salmo 83:18 gine sognai: “Bebii unnila Bab Dummad Bur Birigined gued”. Aagala Jehovásebii gorlebalid,“Bur Birigined Bela Gangued Niggad[ye]”. Apocalipsis 15:3 gine sognaid: “Bab Dummad Bur Birigined Bela Gangued Niggad, be ibmar imaggedi, nue  dummarbad. Be ibmar imaggedi, geger daglegedid. Be, dulemar yar baid baidgi bugmalad e Reyd”. Soglegedi, “Bur Birigined Bela Gangued Niggad[ye]”, sogledo, dule baid Jehováyobi gangued niggad saddeye. 1 Timoteo 1:17 gi sognamogad, Jehová “Rey Dummad degi sadegu maid[ye]”. Wedi soglebarsundo, Jehovádina burgosur guoye, berguosur guoye. Salmo 90:2 gine sognabalid: “Degi sadegu diggasur gus, emi ibadse, baddo bedi Bab Dummad gued”. ¡Nue be iddogena, bule Bab Dummaddega yeer gangu be iddosunna!

¹⁷ Ar Jehovábii bela ibmar naid obinyisadbalid. Apocalipsis 4:11 gine sognaid: “Bab Dummad, anmar Dummad, be nug ogannoleged, be nug odummoleged, degine be, dummadga gued, ar ade bela ibmar naid be obinyisad, degine be sogedba bela ibmar gudiid, degine bela be sogedba ibmar binyis buggwabalid”. Jehová bela ibmar naid obinyisadid. Jehová obinyisa ángelmar nibneggi buggwadi, niisgwamala, bela sabbi durbamar sanmagbuggwadi, uamala, geb bela ugaggase ibmar buggwadi.

18. ¿Ibigala dulemar binsadamala geg Bab Dummad aiga guleye, auggine igi Bibliagindina soglenai?

¹⁸ Ar Jehová dule dummadsoggua abar dobdamalad. Binsamalad Bab Dummad diggasur nibneggi masoggua igi anmardega e aiga guoye. Gwen bibbisaar dulemargi binsamasurye sogdamarbalid. ¿Bule nabir binsamar be soge? Bibliagindina soglenaid, Jehová “anmargi diggasur maisur[ye]” (Gusmalad 17:27). Ar Bibliagi anmarga sognaid, Bab Dummadse dagmarye, Bab Dummad bemarse dagmogoye (Santiago 4:8).

19. a) ¿Igi be nabir Bab Dummad aiga gusale? b) ¿Igi Bab Dummad daedba be e aiga gubimoga?

¹⁹ ¿Igi be nabir Bab Dummad aiga gusale? Gebbegwa, Bab Dummadsiggi ibmar durdagnaid mer indaggo, bela  Bab Dummadsiggi ibmar durdaggedse sao. Bibliagi soglenaid: “Bab Dummad binsamaid, bela dulemar biddigi abonolesana gadinye, degine, bela igar nabbiragwad wisgumalana yeerbanye” (1 Timoteo 2:4). Degsoggua, Bibliagi soglenaid, be Jehová igar durdaggele geb be Jesús igar durdagbalile nabir be bendaglesarye, nabir be sadegua gudi gusarye. Ar bad anmar durdasbalid “Bab Dummad bela bela dulemar sab[ye]” (1 Juan 4:16). Auggine Jehová unnila belagwa dulemar sabgumasurbalid. Bibliagi soglenabalid, “Ani an dulemar wile dagged dummarbadid, Ani an nue dulemar wile daggedid. Ani an wissur gwae gwae urwedid, Ani an nue dulemar saberbadid. An ibmar soged, nabbiragwadid” (Éxodo 34:6). “Bab Dummad, be dule nued gued, isgudsuliyob be emar daggedid” (Salmo 86:5, TNM). Bab Dummad uggurmaggar ibmar imagsulid (2 Pedro 3:9). Wissur emar yardagged (Apocalipsis 15:4). Biblia absomaidba be durdagmaoed, Jehová gusgu weyob dae.

20-22. a) Anmar, Bab Dummad dagsur inigwale, ¿nabir anmar e aiga gusardibe? Ibigala be deyob soge. b) Dulemar igi binsaedba ¿sun igi bega sogdamaloe, auggi bedi ibu imagged abelege?

²⁰ Ar Bab Dummad dule burbaledsoggua anmar geg dagged (Juan 1:18; 4:24; 1 Timoteo 1:17). Anmar geg dagge inigwale Bibliagi soglenaid Bab Dummad dule igi daedi. Salmogi soglenaiyobi be nabir Jehová e ibmar yeer dagleged imagmaid dagmogad (Salmo 27:4; Romanos 1:20). Bur bule be Jehová igar durdadele, bar be binsaosulid bule nue madibeye, degsoggu be, Jehová sabgudoed, geb be e aiga gunoniggoed.

²¹ Binna binna be durdagmai gudoed ibiga Bibliagi soglenai, Bab Dummad anmar bab sunnadyobi anmar dagged abeleye (Mateo 6:9). Unnila binsa dula anmar sedisulid, anmarga igar ugmabalid anmar nued gudi guega, ar igi babgan abemoga na e burwigan nued gudi gued, deyob gudi gued Bab Dummad anmar abemogad (Gusmalad 17:28). Bibliagi  soglenaid bela dulemar nabir Jehová aiga gumarye (Santiago 2:23). Be iddogena, ¡be nabir Bab Dummad aiga gusmogaled!

²² Dulemar, Biblia durdagnai be daggalile, sun dulemar bega sogdamaloed, mer Biblia durdagye. Abaggar sergan Bab igargi be odurdasad indaggalirye begi binsamaladba, deyob bega sogdamaloed. Auggine, mer dulemar, Bab Dummadgi be obanega imaggo, Bab Dummad anmar aiga imagged bur nuedid.

23, 24. a) Be ibmar durdagnaid aggu iddoger ¿ibigala be binge binge egisedsuli? b) Capítulo 2 gine, ¿ibugine sunmaglegoe?

²³ Gebbe be, Biblia durdader bela mag be iddogosulid. Auggi wis be aggu iddoger mer binge egisdao, ar Bab Dummad abeged be we ibmar wisgued. Jesús sogsad nuedye anmar burwiganyobi daele (Mateo 18:2-4). Ar anmar wisid burwigandina ibmar wisgubier bingesur ibmar egisdamalad. Bibliagi nued sunmagnaid ebbenne dulemar Bab Dummad igar nueggwa durdagbi gusmaladgi. Aaga nueggwa Biblia durdasmalad, daggega, bule emar ibmar nabbiragwad durdagnanadibeye (Gusmalad 17:11 absogo).

²⁴ Be nue wisgubiele Jehová dule igi daedi, be, Biblia durdagger gebed. Biblia bamalad libromaryobsulid. ¿Ibiga bamalad libromarbogwa aggala? Capítulo 2 gine we ibmargi sunmaglegoed.