1, 2. Ami prosn kiteak vichartat?

BHURGIM vichartat te prosn tumi kednam-i aikoleat? Khubxim bhurgim ulounk lagtanch prosn vicharunk suru kortat. Suria konnem kelo? Disachim noketram khoim voitat? Suknneank uddonk konnem xikoilem? Osle zaite prosn tankam astat. Ani, tanchea prosnanche zobab divop sompem nhoi. Tumi kitlo-i boro zobab dilear pasun, ‘oxem kiteak’ mhunn tim rokddinch portun vichartat.

² Lhan astananch bhurgim prosn vichartat oxem nhoi, vhodd zatat toxe, amchea-i monant khub prosn ietat. Te vicharlear, amkam khubxi mahiti melltta, fuddli vatt ami zannam zaunk pavtat ani mukhar ietolea trasam thaun ami pois ravonk xoktat. Punn zaite lok, aplea jivitantle gorjeche prosn vicharpache bond  kortat. Ani tanchea monant prosn aile-i zalear, tankam tanche zobab sodhunk nakat.

3. Khubso lok aplea jivitantlea gorjechea prosnanche zobab kiteak sodhunk vochona?

³ Hea pustokachem nanv polloiat. Toxench, tisrea panar vo hea odheai-achea survatek dilole prosn vachat. He gorjeche prosn zaun asat, ani tanche zobab amkam Bible-ant mellttat. Torui astana, khubxe lok tanche zobab sodhunk vochonant. Oxem kiteak zait? Karonn tankam, tanche zobab somzonk khub kotthin oxem dista. Thodde, osle prosn vicharlear apleak loz zait mhunn fattim sortat. Ani thoddim, oslea prosnanche zobab sodhchem kam fokot dhormik fuddareanchem mhunn somzotat. Tumkam kitem dista?

4, 5. (a) Jivitant sogleant gorjeche prosn khoinche? (b) Tanche zobab zannam zal’lean tumkam kitem mellttolem?

⁴ Tumchea-i jivitant, tumkam khubxe gorjeche prosn astole. Zoxe, Devan amkam kiteak rochleant? Fokot zolmak ieunk, thoddo kall jieunk ani ek dis moron vochonk? Devak kosle gunn asat? Osle prosn vicharop borem, ani tanche sarke zobab mello porian tumi te sodhit ravonk zai. Karonn, ‘Magot ravlim zalear tumkam mellttolem, sodhit ravlim zalear tumkam gavtolem, darar marit ravlim zalear tumkam tem ugoddtolem,’ mhunn Jezu Kristan sanglam.—Matev 7:7.

⁵ Voir dileat toslea prosnanche zobab sodhit ravlim zalear, tumcho proitn funkott voicho na. (Mhonn’nneo 2:1-5) Dusro lok tumkam kitem-i sangom, tumchea prosnanche zobab asat, ani te tumkam Bible-ant mellttole. He zobab somzonk kotthin nhoi. Ani te zobab zannam zal’lean, fuddara vixim tumcho bhorvonso ghott zatolo, ani tumkam khuxalkai  mellttoli. Itlench nhoi, tumchea prosnanche zobab mell’llolean tumi dhadoxi zatolim. Atam ami, zaito lok chint’ta toslea eka prosna vixim polloum-ia.

6. Devak amchi kallji na oxem zaite lok kiteak mhunnttat?

⁶ Zaito lok, Devak amchi kallji na mhunn somzotat. Tankam oxem kiteak dista zait? Karonn, sonvsarant sogleak zhuzam, dves ani dukh khub vaddlam. Toxench, amchea-i jivitant ami duent zatat, amkam koxtt sosche poddttat, ani amcher moronn ieta. Hem soglem ghoddtta tem polloun, ‘Devak amchi kallji asli zalear, to amcher itle tras kiteak ieunk dita aslo?’, oxem te vichartat.

7. (a) Devak amchi kallji na mhunn dhormik fuddari koxe dakhoun ditat? (b) Amcher ieupi trasam vixim Bible kitem xikoita?

⁷ Thodde pavtt dhormik fuddari pasun, Devak amchi kallji na mhunn dakhoun ditat. Lokancher sonkoxtt vo tras ietat tednam, ‘ti Devachich khuxi’ mhunn te sangtat. Oxe toren, soglea vaittponnacho zobabdar Dev mhunn te dakhoitat. Tumkam-i oxench dista? Bible hea vixim kitem xikoita? Bible-ant, Jakob 1:13 sangta, “Vaitt korunk apnnacher tallnni ieta tednam, konnench oxem mhonnche nhoi: ‘Dev mhaka he tallnnent ghalta’; kiteak vaitt korchi tallnni Devak lagoch na, nhoi mhunn Dev-ui konnakuch vaitt korche tallnnent ghalina.” Hache voilean, Dev kednanch vaitt korina mhunn amkam kollon ieta. Taka lagon, vaittponnacho zobabdar Dev oxem amchean mhunnonk zaina. (Job 34:10-12 vachat.) Sonvsarant ghoddtta tem vaittponn, Dev addaunk vochona, to tem toxench ghoddonk dita.  Punn vaitt ghoddonk divop ani vaitt korop, hantunt ontor asa.

8, 9. (a) Vaitt ghoddonk divop ani vaitt korop, hacho ontor ek udharonn diun somzaiat? (b) Munxank vaitt rostean vochonk dilam tachim karonnam Devan amkam kiteak sangpachi goroz na?

⁸ Vaitt ghoddonk divop ani vaitt korop, hanche modem kitem ontor asa tem somzonk, eka mogall bapaichem udharonn polloum-ia. Tacho put vhodd zala ani to tachem kainch aikona. Ek dis ragan to ghor soddun voita, ani uprant vaitt kamam korun trasant poddtta. Ho put trasant poddonk, tacho bapui zobabdar asa kai? Na! (Lukas 15:11-13) Teach bhaxen, lok vaitt kamam kortat tednam Dev tankam addaina. Ani, tea kamank lagon zal’lea vaitt porinnamacho zobabdar Dev nhoi. Taka lagon, munxancher ailole sogle tras Devan dhaddleat oxem mhunnop chukichem zatolem.

⁹ Munxancher ailolem vaittponn Dev polloita, ani thoddea karonnank lagon to vogi asa. To sorvxoktivont ani khub zannvaiecho Dev zal’lean, tannem amkam him karonnam sangchi goroz na. Torui astana, to amcho mog korta dekhun amkam tim somzaita, ani tanchea vixim ami odheai 11-ant chodd xiktolim. Tor, amcher ieta tea trasancho zobabdar Dev nhoi mhunn tumi purnn khatri dovrunk zata. Hea soglea koxttam thaun, to amkam beginuch soddoitolo.—Izaias 33:2.

10. Dev soglem vaittponn kaddun uddoitolo mhunn ami kiteak visvas dovrunk zata?

¹⁰ Dev soglem vaittponn kaddun uddoitolo mhunn ami kiteak sangonk zata? Karonn Dev povitr. (Izaias 6:3) Mhunnchem, tachim chintnam ekdom xud’d ani tachea bhitor vaittponnachem ek dekhun khot na. Taka  lagon, ami tacher purnn visvas dovrunk zata. Punn munxancher ami oso visvas dovrunk xokona, karonn tanchea monant borem toxench vaittui asta. Munis kitlo-i boro asum vo taka kitlo-i vhodd odhikar asum, tachean sonvsarantlem vaittponn kaddun uddounk zaina. Punn Devak sogli podvi asa. Munxakullacher ailolem vaittponn kaddun, soglem borem korunk taka tank asa. Devan hem vaittponn kabar kelea uprant, sonvsarant porot kednanch vaitt ghoddchem na.—Stotr 37:9-11 vachat.

11. (a) On’neai-a vixim Devak kitem dista? (b) Tumkam tras sosche poddtta tem polloun Devak koxem dista?

¹¹ Sonvsarant, vo tumchea jivitant vaitt ghoddtta tem polloun Devak koxem dista zait? Bible-ant, Devak “nitivont” mhunnttla. (Stotr 37:28; Prokasovnni 16:5) Ani taka lagon, sogle munis neai-nitin vaglole taka zai. To soglea torechea on’neai-acho dves korta. Tea pasot, adlea kallar sonvsarant vaittponn vaddlolem tednam, Dev “dukhi zalo ani tachem kalliz khontovlem” mhunn Bible dakhoita. (Utpoti 6:5, 6) Dev bodlonk na, taka aizui toxench dista. (Malaki 3:6) Sonvsarantlea soglea vaittponnacho to aizui dves korta. Lokank tras sosche poddtta tem polloun, taka dukh zata. Devak “tumchi kallji asa” mhunn Bible sangta.—1 Pedru 5:7 vachat.

12, 13. (a) Amkam bore gunn khoinchean aile? (b) Mog aslolean niropradi lokancher on’neai zata te polloun tumkam koxem dista? (c) Sonvsarantle koxtt Dev sompoitolo mhunn ami kiteak khatri dovrunk zata?

¹² Sonvsarantle tras polloun Devak dukh bhogta  mhunn ami kiteak manunk zata? Karonn munxak, Devan aple gunn diun rochla mhunn Bible sangta. (Utpoti 1:26) Ani taka lagon, amkam asa te gunn Devakui asat mhunn amkam kolltta. Niropradi lokancher on’neai zata te polloun, tumkam dukh zaina? Amkam itlem dukh zata zalear, Devak kitlem dukh bhogta astolem nhoi!

¹³ Amkam aslolea zaitea gunnam modlo ek gunn, mog. Ho gunn Devakui asa mhunn amkam kollon ieta, karonn “Dev mhunnttlear mog”, oxem Bible sangta. (1 Juanv 4:8) Dev mogall dekhun ami-i mog dakhounk xokta. Ani mog aslolean, sonvsarant zata tem vaittponn ani on’neai polloun amkam-i khub dukh zata. Tumchea lagim ghoddttalem zalear, tumi hem soglem vaittponn kaddun uddoitolim aslim nhoi? Tumi oxench korpachim! Toxench, Devui amcho khub mog korta, ani to sonvsarant aslole sogle koxtt ani on’neai sompoitolo mhunn amchean khatri dovrunk zata. Pan char ani panchacher asat tim chitram porot polloiat. Tim fokot chitram, vo ek sopon mhunn chintinakat. Devan bhasailam tem, to khorench kortolo. Ani hea bhasaunneancher tumi visvas dovortolim zalear, jea Devan tem bhasailam, tachea vixim tumi chodd zannam zaunchi goroz asa.

14. Devachem nanv kitem ani ami tem kiteak uzar korunk zai?

¹⁴ Konnakui apli vollokh diunk tumi kitem kortolim? Tankam, tumi aplem nanv sangtolim nhoi! Toxem zalear, Deva vixim kitem? Taka-i ek nanv asa kai?  Zaite dhorm tachem nanv “Dev”, “Bap” vo “Sorvespor” mhunnttat. Punn him tachim nanvam nhoi. Ami “Raza”, “Dotor”, “Advogad” mhunnttat toxim, him utram uzar keleant, punn tankam-i ek nanv asta. Teach bhaxen, Devakui ek nanv asa. Ani tem nanv Jehova. Stotr 83:18 sangta, “Zannam zaum soglle: Tujem ekleachench nanv Sorvespor [Jehova, NW], ak’khe prithume voir tum ekloch bhov vorto!” Tumchea Bible-ant Devachem nanv na zalear, tem tantunt kiteak na, hem somzonk tumi hea pustokachem pan 225-227 polloum ieta. Khorem mhunnttlear, survatek Bible boroilolo tednam Devachem nanv tantunt sumar sat hozar pavtt aslem. Hache voilean, Jehovak tumi, tachem nanv uzar kel’lem zai mhunn kollon ieta ani Bible-antlean to amkam apli vollokh dita.

15. Jehova hea nanvacho orth kitem?

¹⁵ Devan apnnak dilolea nanvak, khub orth asa. Jehova hea nanv-acho orth, to bhasaita tem sodanch purnn korta. Ani apnnem bhasailolem soglem korunk, Devak tank asa. * Sonvsarantlea her soglea nanvam thaun, Devachem nanv vegllem ani tem fokot takach sobta. Jehova Dev zaitea ritin vegllo asa. To koso?

16, 17. Jehova Devak Sorvpodvedar, Kallam-iugancho Raza ani Rochnnar kiteak mhunnttla?

 ¹⁶ Stotr 83:18 hea vachpant, Jehova “ekloch bhov vorto” mhunn ami zannam zalim. Toxench, fokot Jehova “Sorvpodvedar” mhunn Bible sangta. Tachea vixim Prokasovnni 15:3 mhunntta, “Sorvespora, Sorv-podvedar Deva, kitlim vhoddlim ani vichitr Tujim kortutvam! Raxttranchea Raia, kitleo nitivontponn-acheo ani sotacheo Tujeo vatto!” Tor “Sorvpodvedar” hea utra voilean, Jehova sogleam poros xoktivont mhunn amkam kollon ieta. Taka asa titli xokti anik  konnakuch na. 1 Timotak 1:17-ant, Jehova Devak ‘Kallam-iugancho Raza’ mhunnttla, ani hache voilean to anik ek ritin vegllo mhunn amkam kollon ieta. Taka survat na ani xevottui na, to poilim thaun aslolo ani sodanch astolo. Hea vixim Stotr 90:2 sangta, “Porvot rochun ieunche adim, prithum ani sonvsar utpon zaunche adim, sasnnak thaun sasnnak porian Tum Dev!” Khorench Dev kitlo vhodd nhoi!

¹⁷ Jehova Dev ekloch soglea vostuncho Rochnnar. Prokasovnni 4:11 mhunntta, “Sorvespora, amchea  Deva, sogllea vostuncho Rochnnar Tum, Tuje khuxen teo rochun aileat ani vortunk lagleat, dekhun, Tuji podvi vollkhun, soglleamnim Tuka mhoima ani bhovman diunk favo.” Amchean chintunk zata tem soglem, zoxem sorgar aslole ainz, ratchim distat tim hozaramnim noketram, zhaddancher zaupi fulam-follam, nhoim-ent ani doriant aslolem nustem, Jehova Devan rochlam!

18. Devache ixtt zavop kotthin oxem thoddea lokank kiteak dista, punn Bible hachea vixim kitem sangta?

¹⁸ Jehova Dev sogleancho rochnnar ani khub xoktivont mhunn zannam zal’lean, thoddea lokank tachi bhirant dista. To itlo vorto dekhun tache ixtt zavop kotthin oxem te somzotat. Punn hem khorem nhoi. Jehova vixim Bible sangta, “To amche thaun pois na.” (Itihas 17:27) “Jitlim tumi Devak lagim sortat, titlo Dev tumkam lagim sortolo” mhunn, Bible amkam khatri dita.—Jakob 4:8.

19. (a) Ami Devache ixtt koxe zaum ieta ani toxem kel’lean amkam kitem mellttolem? (b) Devache khoinche gunn tuka bore disle?

¹⁹ Tumi Devache ixtt koxe zaum ieta? Deva vixim tumi atam xiktat, toxim xikot ravat. Hem xikop bond korinakat. Karonn Jezun mhunnttlam, “ekleach khorea Devak, ani Zaka Tunvem pattoilai tea Jezu Kristak vollkhun ghevop, hench tem Sasnnik Jivit.” (Juanv 17:3) Tor sasnachem jivit mellonk, ami Jehova ani Jezu vixim xikot ravonk zai. ‘Dev mhunnttlear mog’, hem ami xiklim. (1 Juanv 4:16) Jehova Devak anikui gunn asat. Bible sangta, Jehova “doiall-movall Kallzacho . . .  To rokddoch ragar zaina.” (Suttka 34:6) To “maiemogan bhorlolo.” (Stotr 86:5) To ‘sosnikaiecho’. (2 Pedru 3:9) To ‘visvaxi’. (1 Korintkarank 1:9) Zoxim tumi Bible vachtolim, Jehovan aple he ani dusre gunn koxe dakhoileat, tem tumkam kollon ietolem.

20-22. (a) Devak konnacheanuch pollounk zaina torui ami taka koxim vollkhotolim? (b) Tumchim ghorchim, soirim, xezari vo ixtt tumcher koslo dobhav haddunk xokta ani tednam tumi kitem kortolim?

²⁰ Dev ek atmo ani taka rogta-masachi kudd na. Hea pasot, taka konnacheanuch pollounk zaina. (Juanv 1:18; 4:24; 1 Timotak 1:17) Punn Bible-antlean tachea vixim xikon, tumi taka vollkhonk pavtolim. Taka lagon Bible-achea Stotr pustokant, tumi tachi “goddsann chakun” pollounk zata mhunn sanglam. (Stotr 27:4; Romkarank 1:20) Jitlim tumi Jehova vixim xiktolim, titli tumkam tachi vollokh mellttoli ani tache ixtt zaunk tumkam sompem zatolem.

²¹ Zoxim tumi Bible xikot ravtolim, Jehova Dev amcho Bap mhunn Bible kiteak xikoita, hem tumkam kollon ietolem. (Matev 6:9) Eka mogall bapaik aplim bhurgim khuxal ravlolim zai, toxench Jehova Devakui ami khuxalkaiechem jivit jielolim zai. Tannech amkam jivit dilam, ani tem bore toren koxem jieunchem tem taka khobor asa. (Stotr 36:9) Ami Jehova Devache ixtt zaunk xoktat hem-ui Bible amkam xikoita. (Jakob 2:23) Ak’khea vixvachea rochnnar Devache ami ixtt zavop mhunnttlear, amkam kitlo vhoddlo man nhoi!

²² Tumi Bible xiktat tem polloun, ghoddie tumchim ghorchim, soirim, xezari vo tumche ixtt hem xikop bond korunk tumcher dobhav haddit. Bible xikon, poilim mantalim tem tumi soddun di-it oxem  tankam disot. Punn, Deva thaim asloli tumchi ixttagot, konnakuch moddunk dium nakat.

23, 24. (a) Tumi Bible-ant jem xiktat tache vixim prosn kiteak vicharit ravonk zai? (b) Fuddlea odheai-ant ami kitem xiktolim?

²³ Bible xiktana, survatek ghoddie tumkam thoddeo vostu somzonk kotthin lagot. Oslea vellar tumi khaltikaien modot magonk zata. Lojen fattim soronakat. Jezun sanglolem, ami bhurgeam sarkim lhan, mhunnttlear khaltim zaunk zai. (Matev 18:2-4) Bhurgim kitle prosn vichartat tem tumi zannanch nhoi! Teach toren, tumi-i prosn vicharlole Devak zai. Ani tanche zobab zannam zaunk to tumkam modot kortolo. Deva vixim chodd zannam zaunk sodhtale toslea thoddea lokanchim udharonnam amkam Bible-ant mellttat. Te lok, apunn xiktat tem khorench sot zalear pollounk, barkaien Devachim utram topastale.—Itihas 17:11 vachat.

²⁴ Jehovak bore toren vollkhonk fokot Bible amkam modot korta. To her soglea pustokam poros vegllo zaun asa. Punn khoinchea ritin? Hea vixim ami fuddlea odheai-ant xiktolim.