1, 2. ¿Jamüsü anaka wasakirüle?

WAINMA maʼin tü kasa nasakitkat anain na tepichikana. Eeshii eeka nasakirüin kanüipa naya. Müshii sümaa neirakaain wamüin: «¿Jamüsü wüittaka tü sirumatuʼukat?», «¿Kasa akumajünaka aka tü jolotsükat?» jee «¿Jamüshii naʼyalajaka na wüchiikana?». Eesü isale wachiki süpüshi tü nasakirakalü anain waya. Jaʼitairü waküjüin shia namüin, müshii naya: «¿Jamüsü maka shia?».

² Nnojoishii nayain neʼe na tepichikana asakirüin, müshiʼiya wayakana. Eeshii wasakirüle süpüla wantüin suluʼumüin wanee mma, süpüla nnojoluin mojuin wakuwaʼipa jee wasakirüle neʼe. Eeshii eeka nooʼulaain suulia nasakirüin süchiirua tü kasa anakat maʼin. Nnojotsü nachajaain tü süsouktiakat.

3. ¿Jamüsü nnojotka nachajaain na wayuukana süsouktia tü nasakitkat maʼin anain?

³ Jülüja paaʼin tü asakinnakat sünain süta tü karalouktakat, tü suluʼukat süpana 3 otta tü suʼttiajeekat ekirajaaya 1. Tia  shia soʼutku tü wasakirüinjatkat maʼin anain. Wainma na nnojoliikana achajaain tü süsouktiakat. ¿Jamüsü? ¿Eesüche süpüla wousütüin shia suluʼu tü Wiwüliakat? Eeshii eeka kapüleein namüin tü süküjakat tü Wiwüliakat. Eeshii eeka nnojoluin nasakirüin suulia japülin naya. Eeshii eeka nooʼulaain tia napüla na shikiipuʼukana otta na ekirajüliikana suluʼu iküleesia. ¿Jamüsü saaʼin pümüin tia?

4, 5. ¿Kasa tü anakat maʼin süpüla wasakirüin anain? ¿Jamüsü anaka watüjaale saaʼu tia?

⁴ Eesü pütüjaweere saaʼu tü kasa süsakirakat maʼin anain wayuu. Eesü püsakirüle paaʼin: «¿Kasapülajana yaaka waya mmapaʼa? ¿Shiache neʼe wakuwaʼipakat tüü? ¿Eeshiche süpüla weʼrüin Maleiwa?». Anasü maʼin jülüjale paaʼin tia otta nnojo puuʼulaain suulia achajawaa tü süsouktia shiimainkat. Müsü nünüiki Jesukürisüto, wanee wayuu ekirajüi: ‹Juchunta nümüin Maleiwa. Maʼaka nuchuntüle wanee wayuu, aapüna amüinchi, mekeerüle nia nünta anainrü, nütaletüle miichoʼu, ajutanna apüleechi› (Mateo 7:7, 8).

⁵ ‹Ayatüle püchajaain› süsouktia tü püsakitkat maʼin anain, aneerü maʼin pümüin puusütapa shia (Proverbios 2:1-5). Jaʼitairü jamüin nanüiki na wayuukana pümüin, eesü süpüla pütüjaain saaʼu tia. Suluʼusü shia tü Wiwüliakat otta nnojotsü kapüleein. Anasü maʼin tia süka talatüin waaʼin otta waʼatapajüin wanee kasa anasü sutuma. Wekirajaa palajana sünain wanee kasa süsakitka maʼin anain wayuu.

6. ¿Jamüshii nnojoliika jülüjain waya naaʼin Maleiwa naashin na wayuukana?

⁶ Eeshii eeka nnojo namüin. Naashin na wayuukana anasüjee wakuwaʼipa jülüjale waya naaʼin Maleiwa. Kepiashii waya suluʼu wanee mma eere eein atkawaa, üttaa aaʼin otta müliaa. Ouktüsü wapüshi, ayuuishii otta müliashii  waya. Makalaka eein eeka namüin: «Jülüjale waya naaʼin Maleiwa, nükaaliinjainjee waya suulia tia kasa mojusükat».

7. (1) ¿Jamüshii nnojoliika jülüjain waya naaʼin Maleiwa naashin na shikiipuʼukana tü iküleesia nnojotkat shiimain? (2) ¿Kasa shikirajaka maʼin tü Wiwüliakat süchiki tü müliaakat?

⁷ Nnojoishii waya jülüjain naaʼin Maleiwa naashin na shikiipuʼukana tü iküleesia nnojotkat shiimain. Sülatüle wanee kasa mojusü «alejatia nutuma Maleiwa» müshii naya. Nia Maleiwa kasitka naashin. ¿Shiimainche tia? ¿Kasa shikirajaka maʼin tü Wiwüliakat? Santiago 1:13 müsü sünüiki: ‹Nnojotsü anain müleka «nia Maleiwa kaainjalaka atuma waya» wamüle. Watüjaa aaʼuchi chi Maleiwakai nnojoluin naaʼinrireein wayuu kasa mojusü›. Nnojoishi niain Maleiwa kasirüin tü kasa mojusü eekat mmapaʼa (paashajeʼera Job 34:10-12). Nuuʼulaain Maleiwa sülatüin tü kasa mojusükat, nnojoipajaʼa niain kasirüin tü kasa mojusü alatakat.

8, 9. (1) Piʼitaa wanee shiyaakua süpüla watüjaain saaʼu tü ooʼulawaakat jee tü aaʼinraakat kasa mojusü. (2) ¿Jamüsü nnojotka anain mojule wanüiki sükajee nuuʼulaain Maleiwa mojuin sukuwaʼipa wayuu?

⁸ Eeshi wanee wayuu kekiishi sümaa aipüralin nia, kepiashi nümaa wanee nüchon ataralüichi. Mojulaajaapa chi nüchonkai sümaa nuʼunuin nipialuʼujee, nuuʼulaain chi nüshikai nuʼunuin. Mapa mojuka nukuwaʼipa chi nüchonkai. ¿Nia kasitka chi nüshikai tü alatakat nümüin? Nnojo (Lucas 15:11-13). Müshia Maleiwa nuuʼulaain na wayuukana mojuin nakuwaʼipa, akaisaʼa nia nnojotsü nüsirüin tü kasa mojusü alatakat namüin süka nachajaalain shia. Nnojotsü anain wamüle: ‹Nia Maleiwa kasitka tü kasa mojusü alatakat sümüin wayuu›.

⁹ Eesü tü nuuʼulaakat anainjee Maleiwa mojuin sukuwaʼipa wayuu. Sükajee nukumajalain waya otta kekiin maʼin nia, nnojotsü nüküjüinjatüin wamüin jamüin sülataka tia. Akaisaʼa nia nüküjüin shia wamüin süka alin  waya nüpüla. Suluʼu ekirajaaya 11 wekirajaajeerü anain jamüin müliaka waya. Shiimain nnojoluin niain Maleiwa kasirüin tü kasa mojusü alatakat wamüin. Nüküjüin wamüin najaʼlajeʼerüinjatüin shia (Isaías 33:2).

10. ¿Jamüsü watüjaaka saaʼu najaʼlajeʼerüinjatüin Maleiwa tü müliaakat?

¹⁰ Maainjalasai Maleiwa (Alateetkat Mapeena 4:8). Tia maluʼulu wulein nukuwaʼipa. Sutuma tia, eesü süpüla weʼitaain waaʼin nünain. Nnojotsü waainjain tia naka na wayuukana süka mojulaain naya. Jaʼitaichi niain wanee aluwataai eeka lotuin nukuwaʼipa isasü nüchiki nünoukteʼerüin tü naainjakat na mojulaashiikana. Akaisaʼa Maleiwa pülashi maʼin nia, eesü süpüla najaʼlajeʼerüin tü müliaakat. Naainjapa shia müiria nnojoluin eein kasa mojusü (paashajeʼera Salmo 37:9-11).

11. (1) ¿Jamüsü nünüiki Maleiwa süchiki tü kasa mojusükat? (2) ¿Jamüsü naaʼin Maleiwa müliale waya?

¹¹ ¿Jamüsü naaʼin Maleiwa sutuma tü kasa alatakat mmapaʼa otta wamüin? Saashin tü Wiwüliakat ‹anasü nümüin tü kasa lotusükat› (Salmo 37:28, TNM). Jülüjasü maʼin naaʼin anale otta mojule wanee kasa. Üttüsü naaʼin sünain tü kasa mojusükat. Saashin tü Wiwüliakat «mojusü maʼin naaʼin» süka mojulaain maʼin wayuu sümaiwa (Génesis 6:5, 6). Matüjüinsai Maleiwa aʼwanajawaa nukuwaʼipa (Malaquías 3:6). Ayatüsü nüʼürülain tü kasa mojusükat otta nümülialaain naalii na müliakana. Müsü tü Wiwüliakat wamüin: «Naaʼinmajüin jia» (paashajeʼera 1 Pedro 5:7).

12, 13. (1) ¿Jamüshii aipüraliika waya? ¿Jamüsü waaʼin sutuma müliain wayuu mmapaʼa? (2) ¿Jamüsü shiimainka najaʼlajeʼerüinjatüin Maleiwa tü kasa mojusü alatakat?

¹² ¿Jamüsü watüjaaka saaʼu alin nümüin Maleiwa müliale waya? Wekirajaa sünain. Saashin tü Wiwüliakat  nukumajüin Maleiwa na wayuukana maa aka naaʼin (Génesis 1:26). Eesü akuwaʼipaa anasü wanain süka eein shia nünain Maleiwa. ¿Mojusüche paaʼin piʼrüle müliain wayuu eeka maainjalain? Mojule tia pümüin, mojuleesia shia nümüin Maleiwa.

¹³ Wanee wakuwaʼipa anaka maʼin shia aipüraliin waya. Sutuma tia, müshii waya maa aka naaʼin Maleiwa. Saashin tü Wiwüliakat ‹aishii waya nüpüla› (1 Juan 4:8). Aipüralii waya süka aipüralin Maleiwa. Pütüjale süpüleerua pajaʼlajeʼerüin tü müliaakat otta tü kasa mojusü eekat mmapaʼa, eesü süpüla paainjain shia ¿aashimüin? Paainjeerü shia süka alin püpüla na wayuukana. Müshia Maleiwa najaʼlajeʼerüinjatü tü kasa mojusü alatakat sümüin wayuu. Tü pütchi paashajeʼerakat suʼttiajee tü karalouktakat nnojotsü alawaain: nüküjala shia Maleiwa otta shiimain shikeraajeerüin. Süpüla wanoujain tü nüküjakat Maleiwa weʼraajüinjachi maʼin nia.

14. ¿Kasaichi nünülia Maleiwa? ¿Jamüsü wachuntüinjatka shia?

¹⁴ ¿Kasa püküjaka palajana piʼraajüneere sutuma wayuu? Püküjüin pünülia ¿aashimüin? ¿Kanüliashiche Maleiwa? Nünülia Maleiwa saashin wainma iküleesia shia «Senyotkai» jee «Maleiwa». Akatsaʼa tia nnojotsü nünüliain Maleiwa, nünüliayaasü, müsü aka saaʼin «aluwataai» nümünüle wanee wayuu. Wainma nünüliayaasü  Maleiwa saashin tü Wiwüliakat, eesü «Maleiwa» otta «Senyotkai». Akaisaʼa nia, Jeʼwaa nünülia saashin tü Wiwüliakat. Salmo 83:18, TNM müsü sünüiki: «Piain neʼe pümüiwaʼa chi Miyoʼushikai saaʼu tü mmakat süpüshuaʼa, piakai chi kanüliakai Jeʼwaa». Nnojorüle nünülia Maleiwa suluʼu tü Wiwülia pümaʼanakat, paashajeʼera tü pütchikat «Nünülia Maleiwa otta jamaluʼulu shia». Sümaiwa, ashajünüsü kojuyatua nünülia Maleiwa sünain tü Wiwüliakat. Makalaka keeʼireein naaʼin piʼraajüin nünülia jee puchuntüin shia. Naapüin Jeʼwaa tü Wiwüliakat süpüla piʼraajüin nia.

15. ¿Jamaluʼulu tü anülieekat Jeʼwaa?

 ¹⁵ ¿Jamaluʼulu tü anülieekat Jeʼwaa? Nikeraajeerü süpüshuaʼa tü nüküjakat achiki otta naainjeerü süpüshuaʼa tü keeʼireekat naaʼin maluʼulu. * Nünülia neʼe Maleiwa shia Jeʼwaa otta nnojoishi jaralin müin aka nia. Wekirajaa sünain.

16, 17. ¿Kasa shikirajaka anain waya tü nünüliayaasükat Jeʼwaa: (1) «Chi Pülashikai maʼin»? (2) «Chi Aluwataai matüjüinkai ouktaa»? (3) «Chi Kakumalakai tü kasakat süpüshuaʼa»?

¹⁶ Wekirajaaitpa anain tü sümakat Salmo 83:18 nüchiki Jeʼwaa: «Piain neʼe pümüiwaʼa chi Miyoʼushikai». Otta nia neʼe «Pülashika maʼin» nümüiwaʼa. Alateetkat Mapeena 15:3 müsü sünüiki: «Maleiwakalee, pia chi Aluwataashikai  Pülashikai maʼi, waʼwaajüin pia süka alanaʼaleein maʼi pia sünain anain tü paaʼinrakat». Tia shiiʼiyatüin niain neʼe Jeʼwaa chi «Pülashikai» nümüiwaʼa. Nnojoishi jaralin müin aka naaʼin. 1 Timoteo 1:17 müsü sünüiki: ‹Nia chi Aluwataashikai süpüla kaʼika süpüshuaʼa süka matüjain ouktaa nia›. Chi ‹Aluwataai matüjainkai ouktaa› münüshi nia süka eein nia süpüla kaʼika süpüshuaʼa. Anashaatasü maʼin tia ¿aashimüin?

¹⁷ Nnojoishi jaralin müin aka Jeʼwaa süka Nukumajalain tü kasakat süpüshuaʼa. Alateetkat Mapeena 4:11 müsü sünüiki: ‹Maleiwakalee, waʼwaajüin pia süka piainjaʼa neʼe aluwataain waaʼu. Alanaʼaleeshia maʼin pia süka piainjaʼa kakumalain tü kasakat süpüshuaʼa›. Nukumajala Jeʼwaa tü kasakat süpüshuaʼa maʼaka na meʼrujusaliikana chaaʼaya sirumatuʼu, tü jolotsükalüirua, tü süchonkat wunuʼu, tü jimekalüirua otta waneeirua.

18. ¿Jamüshii nnojoliika süpüla narütkaain nünainmüin Maleiwa noʼutku na wayuukana? ¿Kasa shikirajaka tü Wiwüliakat?

¹⁸ Eeshii eeka mmoluin seema nukuwaʼipa Jeʼwaa. Nnojoishii süpüla narütkaain nünainmüin otta kachipünaain naaʼin naashin süka wattain nia iipünaa. ¿Shiimainche tia? Naata tü shikirajakat tü Wiwüliakat, müsü sünüiki: «Nnojoishijasa wattain Maleiwakai woulia waneʼewai wakua» (Aluwataaushikana 17:27). Otta shia, müsü wamüin: «Jürütkaale nünainmüin Maleiwa, arütkaajeechi nia jünainmüin» (Santiago 4:8).

19. (1) ¿Kasa waainjainjatka süpüla warütkaain nünainmüin Maleiwa? ¿Kaseerü naapaka wamüin? (2) ¿Jarat tü nukuwaʼipa Maleiwa anakat maʼin pümüin?

¹⁹ ¿Kasa paainjainjatka süpüla pürütkaain nünainmüin Jeʼwaa? Palajana ayata pikirajaain nüchiki Maleiwa. Müshi Jesuu: ‹Eejeechi nümaa Maleiwa waneepia  [kateerü noʼu waneepia, TNM] eeka niyaawatüin tü shiimüin ekirajünakat püchiki sünain waneeshin pia sünain Maleiwain jee tachiki tayakai Jesukürisüto sünain püjünalain taya› (Juan 17:2, 3). Saashin tü Wiwüliakat ‹kateerü woʼu waneepia› wekirajaale nünain Jeʼwaa otta Jesuu. Wekirajaaitpa anain ‹alin waya nüpüla Maleiwa› (1 Juan 4:16). Akaisaʼa nia wainma nukuwaʼipa anashaatasü maʼin. Saashin tü Wiwüliakat «amüliajüi ooʼulaka anashi maʼin nia, kamaʼashi süpüla jashichijawaa otta aipürai maʼin nia sümaa nüküjüin tü shiimainkat» (Éxodo 34:6, TNM). «Anamia nia otta motusü naaʼin waainjala» (Salmo 86:5, TNM). Aʼatapajüi nia (2 Pedro 3:9). Maainjalasai nia (Alateetkat Mapeena 15:4). Ayatüle paashajeʼerüin tü Wiwüliakat pütüjaajeerü aaʼu kojuyatuain niiʼiyatüin Jeʼwaa tia nukuwaʼipakat.

20-22. (1) ¿Nnojoishiiche süpüla warütkaain nünainmüin Maleiwa sükajee nnojoluin weʼrüin nia? ¿Jamüsü maka pünüiki? (2) ¿Kasapülajatü nachiajaaka pia na wayuukana? ¿Kasa tü paainjainjatkat?

²⁰ Shiimain nnojoluin weʼrüin Maleiwa süka meʼrujuin nia (Juan 1:18; 4:24; 1 Timoteo 1:17). Akatsaʼa tü Wiwüliakat süküjüin jamüin nukuwaʼipa. Maʼaka nünüiki David «pütüjaajeechi aaʼu anain maʼin Jeʼwaa» (Salmo 27:4, TNM; Roma 1:20). Pikirajaale maʼin nünain, shiimainjeechi eein nia pümüin, aijeechi püpüla otta pümaajeechi nia.

²¹ Pütüjaajeerü aaʼu jamüin niainjachika Jeʼwaa Washin saashin tü Wiwüliakat (Mateo 6:9). Nnojotsü katüin neʼe woʼu nutuma, keeʼireesü naaʼin anain watuma wakuwaʼipa maʼaka aneein sukuwaʼipa nüchonnii wanee wayuu nutuma (Aluwataaushikana 17:28). Eeshii süpüla naʼaleewain waya Jeʼwaa saashin tü Wiwüliakat (Santiago 2:23). ¡Eeshi süpüla paʼaleewain chi Kakumalakai tü kasakat süpüshuaʼa!

²² Pütüjapa sünainjee tü Wiwüliakat, eejeena wayuu  eeka nachiaain pia süpüla puuʼulaain suulia pikirajaain sünain. Eesü naainjale tia shiiʼiree nnojoluin puuʼulaain suulia tü punoujakalü anain. Akatsaʼa, nnojo puuʼulaain sutuma tia, nia Maleiwa anaka maʼin süpüla paʼaleewain.

23, 24. (1) ¿Jamüsü nnojoluinjatka mmoluin paaʼin püsakirüle süchiki tü pikirajaakalü anain? (2) ¿Kasa wekirajaainjatka anain suluʼu tü wanee ekirajaayakat?

²³ Eejeerü kasa eeka nnojoluin pütüjaain saaʼu pikirajaaiwaʼaya. Nnojo mmoluin pia, püsakira süpüla pükaaliinjünüin. Naashin Jesuu anasü nnojorüle yaletüin waaʼin maʼaka nnojoluin yaletüin naaʼin wanee jintüi (Mateo 18:2-4). Watüjaaitpa aaʼu nasakirüliin na tepichikana. Keeʼireesü naaʼin Maleiwa pütüjaain saaʼu tü püsakirakalü anain. Anasü sünüiki tü Wiwüliakat nachiki wanee wayuuinnua namaiwajana eʼraajeeka Maleiwa. Sutuma tia, ekirajaashii sünain tü Wiwüliakat süpüla natüjaain saaʼu shiimainre tü nekirajaakalü anain (paashajeʼera Aluwataaushikana 17:11).

²⁴ Süpüla weʼraajüin Jeʼwaa wekirajaainjatü anain tü Wiwüliakat, naata shia suulia wanee karalouktairua. ¿Jamüsü naataka shia? Wekirajaajeerü anain tia suluʼu tü wanee ekirajaayakat.