1, 2. Ngaa maayo gid nga mamangkot?

NAOBSERBAHAN mo bala kon paano mamangkot ang mga bata? Madamo sa ila ang nagapamangkot kon kabalo na sila maghambal. Ang ila mga mata nagadalagku gid samtang nagapamangkot sa imo pareho sang: Ngaa blue ang langit? Ngaa nagasiga ang mga bituon? Ngaa nagahuni ang mga pispis? Ginatinguhaan mo nga sabton sila, pero kon kaisa mabudlay kay bisan nakasabat ka na, mamangkot pa gid sila liwat sing: Ngaa haw?

² Indi lang mga bata ang nagapamangkot. Samtang nagadaku kita, pirme kita nagapamangkot para makatultol sang aton kaladtuan, para makalikaw sa katalagman, ukon para masabat ang mga pamangkot nga gusto gid naton mabal-an. Pero madamo ang daw wala na nagapamangkot. Daw natak-an na sila magpangita  sing mga sabat sa pinakaimportante nga mga pamangkot.

3. Ngaa madamo ang wala na nagapamangkot sang pinakaimportante nga mga pamangkot?

³ Tan-awa liwat ang mga pamangkot sa kober sini nga libro, sa introduksion, ukon sa umpisa sini nga kapitulo. Pila lang ini sa pinakaimportante nga mga pamangkot nga siguro gusto mo gid masabat. Pero madamo ang wala na nagapamangkot sini. Ngaa? May sabat bala ang Biblia? Para sa iban, mabudlay intiendihon ang mga sabat sini. Ang iban naman nahuya mamangkot. Kag siling sang iban, ang mga pari ukon mga pastor lang ang makasabat sini. Ti ikaw ’ya, ano ang imo opinyon sa sini?

4, 5. Ano ang importante gid nga mga pamangkot nga mapamangkot naton, kag ngaa dapat naton pangitaon ang mga sabat?

⁴ Siguro gusto mo gid mabal-an ang mga sabat sa importante nga mga pamangkot sa kabuhi. Sigurado nga nagapamangkot ka kon kaisa: ‘Ano ang katuyuan sang kabuhi? Amo lang bala sini ang kabuhi? Ano nga klase sang persona ang Dios?’ Maayo gid nga ipamangkot ini, kag importante nga indi ka mag-untat asta nga makita mo ang eksakto kag masaligan nga mga sabat. Ang kilala nga manunudlo nga si Jesucristo nagsiling: “Padayon kamo sa pagpangayo, kag kamo pagahatagan; padayon kamo sa pagpangita, kag kamo makakita; padayon kamo sa pagpanuktok, kag kamo pagabuksan.”—Mateo 7:7.

⁵ Maayo gid ang resulta kon ‘padayon mo nga pangitaon’ ang mga sabat sa importante nga mga pamangkot. (Hulubaton 2:1-5) Bisan ano pa ang ginsiling sang iban, may mga sabat gid, kag makita mo ini sa Biblia. Ang mga sabat indi mabudlay intiendihon.  Nagahatag ini sing paglaum kag kalipay. Kag makabulig ini para mangin maayo ang imo kabuhi subong. Sa pagsugod, binagbinagon naton ang pamangkot nga pirme gid ginapamangkot.

6. Ngaa madamo ang nagasiling nga wala nagaulikid ang Dios sa pag-antos sang mga tawo?

⁶ Para sa madamo, huo ang sabat sa sini nga pamangkot. Siling nila, ‘Kon nagaulikid ang Dios, tani indi amo sini ang sitwasyon subong.’ Sa aton palibot, may inaway, pagdumtanay, kag kabudlayan. Nagamasakit man kita, nagaantos, kag napatyan sing mga pinalangga. Gani madamo ang nagasiling, ‘Kon nagaulikid ang Dios kag bal-an niya ang aton mga problema, tani ginpunggan niya nga matabo ini.’

7. (a) Paano napapati sang mga lider sang relihion ang mga tawo nga wala sing balatyagon ang Dios? (b) Ano gid ang ginatudlo sang Biblia parte sa mga pagtilaw nga aton ginaantos?

⁷ Kon kaisa, ginapapati sang mga lider sang relihion ang mga tawo nga wala sing balatyagon ang Dios. Paano? Kay kon may malain nga matabo, nagasiling sila nga pagbuot ini sang Dios. Gani pareho lang nga ginabasol nila ang Dios sa mga trahedya nga nagakatabo. Amo bala ini ang kamatuoran parte sa Dios? Ano gid ang ginatudlo sang Biblia? Ang Santiago 1:13 nagasiling: “Kon ang isa yara sa pagtilaw, indi sia magsiling: ‘Ginatilawan ako sang Dios.’ Kay ang Dios indi matilawan paagi sa malaut nga mga butang kag wala man sia nagatilaw sa kay bisan sin-o.” Gani, wala gid nagahalin sa Dios ang malaut nga mga butang nga makita mo sa palibot. (Basaha ang Job 34:10-12.) Nagapasugot sia nga matabo ang malain nga mga sitwasyon.  Pero nagapasugot lang sia, kag indi sia ang ginahalinan sini.

8, 9. (a) Ngaa lain ang pagpasugot nga matabo ang malaut nga mga butang sangsa ikaw mismo ang ginhalinan sini? Maghatag sing halimbawa. (b) Ngaa indi gid maayo nga duhaduhaan naton ang desisyon sang Dios nga pasugtan ang mga tawo nga pilion ang malain nga pagkabuhi?

⁸ Halimbawa, may maalam kag mapinalanggaon nga amay nga may soltero na nga bata nga ara gihapon sa ila poder. Sang nagrebelde ang bata kag nagdesisyon nga maghalin sa ila balay, wala sia ginpunggan sang iya amay. Ginpili sang bata ang malain nga pagkabuhi kag nag-antos sia. Ang amay bala ang ginhalinan sang mga problema sang iya bata? Indi. (Lucas 15:11-13) Amo man sini ang Dios. Wala niya ginpunggan ang mga tawo sang ginpili nila ang malain nga pagkabuhi, pero indi sia ang ginhalinan sang mga problema nga resulta sini. Gani, indi gid maayo nga basulon ang Dios sa tanan nga pag-antos sang tawo.

⁹ May maayo nga mga rason ang Dios kon ngaa ginapasugtan niya ang mga tawo nga maghimo sing malain. Sia ang aton maalam kag gamhanan nga Manunuga, amo nga indi na kinahanglan nga ipaathag niya sa aton ang iya mga rason. Pero bangod sang iya gugma, ginpaathag niya ini. Matun-an mo pa gid ini nga mga rason sa Kapitulo 11. Pero makasiguro ka nga indi ang Dios ang nagahimo sang aton mga problema. Sa baylo, ginahatagan niya kita sing paglaum nga amo lamang ang solusyon sa aton mga problema!—Isaias 33:2.

10. Ngaa makasalig kita nga dulaon sang Dios ang tanan nga epekto sang kalautan?

¹⁰ Isa pa, ang Dios balaan. (Isaias 6:3) Buot silingon, putli sia kag matinlo. Wala gid sing malain sa iya. Gani  masaligan gid naton sia. Pero indi naton ina masiling sa mga tawo, kay kon kaisa nagahimo sila sing malain. Bisan ang pinakamaayo nga tawo nga may awtoridad indi gid pirme makasarang magdula sang halit nga ginhimo sang mga malain. Pero ang Dios labing gamhanan. Masarangan niya dulaon ang tanan nga epekto sang kalautan nga natabo sa mga tawo, kag himuon gid niya ini. Kon maghulag na ang Dios, dulaon niya sing permanente ang kalautan!—Basaha ang Salmo 37:9-11.

11. (a) Ano ang ginabatyag sang Dios kon wala sing katarungan? (b) Ano ang ginabatyag sang Dios sa imo pag-antos?

¹¹ Sa karon, ano ang ginabatyag sang Dios sa mga nagakatabo sa palibot kag sa imo kabuhi? Ang Biblia nagatudlo sa aton nga ang Dios “mahigugmaon sa katarungan.” (Salmo 37:28) Gani importante sa iya kon ano ang husto kag sala. Ginadumtan niya ang tanan nga sitwasyon nga wala sing katarungan. Ang Biblia nagasiling nga ‘nasubuan gid ang tagipusuon’ sang Dios kay ang mga tawo sadto malain katama. (Genesis 6:5, 6) Wala nagbag-o ang Dios. (Malaquias 3:6) Asta subong, ginadumtan niya ang pag-antos nga nagakatabo sa bilog nga kalibutan. Kag naugot gid sia magtan-aw nga nagaantos ang mga tawo. “Nagaulikid sia sa inyo,” siling sang Biblia.—Basaha ang 1 Pedro 5:7.

12, 13. (a) Ngaa may maayo kita nga mga kinaiya pareho sang gugma, kag bangod sa gugma, ano ang aton pamatyag kon may makita kita nga nagaantos? (b) Ngaa sigurado gid nga may himuon ang Dios sa mga problema sa kalibutan?

¹² Ngaa makasiguro kita nga naugot gid ang Dios  magtan-aw sa pag-antos? Ari ang isa pa ka ebidensia. Ginatudlo sang Biblia nga ang tawo gintuga sa larawan sang Dios. (Genesis 1:26) Ang aton maayo nga mga kinaiya ebidensia nga ang Dios may maayo nga mga kinaiya. Halimbawa, nalainan ka bala magtan-aw nga nagaantos ang inosente nga mga tawo? Kon nalainan ka, masiguro mo nga mas nalainan gid ang Dios.

¹³ Ang isa sa pinakamaayo nga mahimo sang mga tawo amo ang paghigugma. Amo man sina ang Dios. Ginatudlo sang Biblia nga “ang Dios gugma.” (1 Juan 4:8) Nagahigugma kita kay nagahigugma ang Dios. Indi bala nga bangod sa gugma, indi mo gusto nga wala sing katarungan kag nagaantos ang mga tawo? Kon may gahom ka, dulaon mo bala ini nga mga sitwasyon? Siempre! Makasalig ka man nga dulaon ini sang Dios. Ang mga saad nga mabasa sa introduksion sini nga libro indi lamang mga damgo ukon wala pulos nga mga paglaum. Ang mga saad sang Dios sigurado gid nga matuman! Pero para makasalig ka sa sini nga mga saad, kinahanglan nga makilala mo pa gid ang Dios nga nagsaad sini.

14. Ano ang ngalan sang Dios, kag ngaa dapat naton sia tawgon sa iya personal nga ngalan?

¹⁴ Kon gusto mo nga makilala ka sang isa ka tawo, ano ang himuon mo? Indi bala nga isugid mo sa iya ang imo ngalan? May ngalan bala ang Dios? Madamo nga relihion ang nagasiling nga ang iya ngalan amo ang “Dios” ukon “Ginuo,” pero indi ini personal nga mga ngalan. Mga titulo ini, pareho sang “hari” kag “presidente.” Ginatudlo sang Biblia nga madamo  sing titulo ang Dios, pareho sang “Dios” kag “Ginuo.” Pero, ginatudlo man sang Biblia nga may personal gid sia nga ngalan: Jehova. Ang Salmo 83:18 nagasiling: “Ikaw, nga ang ngalan amo si Jehova, ikaw lamang ang Labing Mataas sa bug-os nga duta.” Kon indi mo mabasa sa imo Biblia ini nga ngalan, puede mo tan-awon ang artikulo sa Apendise nga “Ang Ngalan sang Dios—Ang Paggamit Sini kag ang Kahulugan Sini” para mabal-an mo ang rason. Ang ngalan sang Dios mabasa sing linibo ka beses sa daan nga mga sinulatan sang Biblia. Gani, gusto ni Jehova nga makilala mo sia kag tawgon sia sa iya personal nga ngalan. Paagi sa Biblia, ginapakilala niya sa imo ang iya kaugalingon.

15. Ano ang kahulugan sang ngalan nga Jehova?

¹⁵ Ginhingalanan sang Dios ang iya kaugalingon sing ngalan nga puno sing kahulugan. Ang iya ngalan, nga Jehova, nagakahulugan nga matuman niya ang bisan ano nga iya ginasaad kag ginatuyo. * Ang ngalan sang Dios lain sa tanan. Sia lamang ang may amo sini nga ngalan. Wala man si Jehova sing kapareho sa madamo nga paagi. Paano?

16, 17. Ngaa gintawag si Jehova nga: (a) “Labing Gamhanan”? (b) “Hari nga dayon”? (c) “Manunuga”?

¹⁶ Natun-an naton nga ang Salmo  83:18 nagsiling parte kay Jehova: “Ikaw lamang ang Labing Mataas.” Magluwas sini, si Jehova lamang ang gintawag nga “Labing Gamhanan.” Ang Bugna 15:3 nagasiling: “Daku kag makatilingala ang imo mga binuhatan, Jehova nga Dios, ang Labing Gamhanan. Matarong kag matuod ang imo mga dalanon, Hari nga dayon.” Ang titulo nga “Labing Gamhanan” nagatudlo sa aton nga si Jehova ang pinakagamhanan nga persona. Ang iya gahom indi matupungan kag amo ini ang pinakamakusog nga gahom. Ginapadumdom man sa aton sang titulo nga “Hari nga dayon” ang isa  pa ka rason kon ngaa lain gid si Jehova. Sia lamang ang wala sing ginsuguran kag wala sing katapusan. Ang Salmo 90:2 nagasiling: “Halin sa wala sing katubtuban tubtob sa wala sing katubtuban, ikaw Dios.” Indi bala nga magadayaw ka gid sa sini nga kamatuoran?

¹⁷ Si Jehova wala man sing pareho kay sia lamang ang Manunuga. Ang Bugna 4:11 nagasiling: “Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.” Ang tanan sa palibot—halin sa indi makita nga mga tinuga sa langit, sa madamo katama nga bituon kon gab-i, sa bunga sang mga kahoy, asta sa mga isda nga nagalangoy sa dagat  kag sa mga suba—nagluntad tanan bangod si Jehova amo ang Manunuga!

18. Ngaa daw imposible para sa iban nga mangin malapit sa Dios, pero ano ang ginatudlo sang Biblia?

¹⁸ Kon mabasahan sang iban nga tawo ang parte sa dalayawon nga mga kinaiya ni Jehova, nagabatyag sila nga manubo sila. Pamatyag nila ang Dios tuman kataas, gani imposible mangin malapit sa iya ukon indi sila pagsapakon sang amo sini kataas nga Dios. Eksakto bala ini? Lain ang ginatudlo sang Biblia. Nagasiling ini parte kay Jehova: “Ang matuod, indi sia malayo sa tagsa sa aton.” (Binuhatan 17:27) Ang Biblia nagasiling man: “Magpalapit kamo sa Dios, kag magapalapit sia sa inyo.”—Santiago 4:8.

19. (a) Ano ang una naton nga himuon para mangin malapit kita sa Dios, kag ano ang mabaton naton kon himuon naton ini? (b) Ano nga mga kinaiya sang Dios ang nanamian mo gid?

¹⁹ Paano ka mangin malapit sa Dios? Una, sigeha ang imo ginahimo subong—ang pagtuon parte sa Dios. Si Jesus nagsiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Gani, ginatudlo sang Biblia nga kon magtuon ka parte kay Jehova kag kay Jesus, makabaton ka sing “kabuhi nga wala sing katapusan”! Pareho sa natun-an na naton, “ang Dios gugma.” (1 Juan 4:16) Madamo pa si Jehova sing maayo nga mga kinaiya nga manamian mo gid. Halimbawa, ang Biblia nagasiling nga si Jehova “isa ka Dios nga maluluy-on kag mainawaon, indi dali  maakig kag bugana sa mainunungon nga gugma kag kamatuoran.” (Exodo 34:6) Sia “maayo kag handa sa pagpatawad.” (Salmo 86:5) Ang Dios mapailubon. (2 Pedro 3:9) Mainunungon sia. (Bugna 15:4) Kon basahon mo pirme ang Biblia, mabal-an mo kon paano ginpakita ni Jehova indi lamang ini nga mga kinaiya, kundi madamo pa.

20-22. (a) Imposible bala nga mangin malapit kita sa Dios kay indi naton sia makita? Ipaathag. (b) Ano ang puede himuon sa imo sang iban, pero ano ang maayo nga himuon mo?

²⁰ Indi mo makita ang Dios kay Espiritu sia. (Juan 1:18; 4:24; 1 Timoteo 1:17) Pero kon magtuon ka parte sa iya paagi sa Biblia, makilala mo sia subong isa ka Persona. Pareho sa ginsiling sang manunulat sang salmo, “makita [mo] ang kaayo ni Jehova.” (Salmo 27:4; Roma 1:20) Samtang nagadamo ang imo natun-an parte kay Jehova, mangin mas matuod sia sa imo kag magadugang ang imo rason nga higugmaon sia kag mangin malapit sa iya.

²¹ Maintiendihan mo kon ngaa ang Biblia nagatudlo sa aton nga kabigon si Jehova bilang aton Amay. (Mateo 6:9) Naghalin sa iya ang aton kabuhi kag gusto niya ang pinakamaayo nga kabuhi para sa aton—kay amo sini ang gusto sang tanan nga mapinalanggaon nga amay para sa ila kabataan. (Salmo 36:9) Ginatudlo man sang Biblia nga ang mga tawo mahimo mangin mga abyan ni Jehova. (Santiago 2:23) Daw sa ano bala nga puede ka mangin abyan sang Manunuga sang uniberso!

²² Samtang nagadugang ang imo nabal-an sa Biblia, mahimo kumbinsihon ka sang iban nga mag-untat sa pagtuon. Ayhan maayo man ang ila intension. Basi nabalaka  sila nga masaylo ka sa iban nga relihion. Pero indi sila pagpasugti nga punggan ka nga makasugod sing pinakamaayo nga pag-abyanay.

23, 24. (a) Ngaa dapat mamangkot ka gid kon may indi ka maintiendihan sa imo ginatun-an? (b) Ano ang matun-an mo sa masunod nga kapitulo?

²³ Natural lang nga sa primero may indi ka maintiendihan sa imo ginatun-an. Mahimo kinahanglan mo magpatudlo, gani indi ka lang mahuya magpamangkot. Nagsiling si Jesus nga maayo gid nga magpaubos, pareho sang gamay nga bata. (Mateo 18:2-4) Kag nabal-an naton nga palapamangkot gid ang mga bata. Gusto sang Dios nga mabal-an mo ang mga sabat. Ginadayaw sang Biblia ang mga tawo nga gusto gid makatuon parte sa Dios. Ginausisa nila sing maayo ang Kasulatan para masiguro nila nga ang ila ginatun-an amo ang kamatuoran.—Basaha ang Binuhatan 17:11.

²⁴ Ang pinakamaayo nga paagi para makatuon parte kay Jehova amo ang pag-usisa sa Biblia. Matun-an mo sa masunod nga kapitulo kon ngaa lain gid ang Biblia sa bisan ano nga libro.