1, 2. Dahaka dainai henanadai ita henia be namo?

NATUDIA maragidia ese henanadai momo idia henia karana oi itaia vadaeni, a? Idia momo be herevahereva idia dibaia neganai, henanadai idia henia matamaia. Mai edia ura ida oi idia itaia bona idia henanadai: Dahaka dainai guba be bulu? Dirava ese hisiu be dahaka amo ia karaia? Daika ese manu dekenai ane ia hadibaia? Reana oi hekwarahi unai henanadai oi haerelaidia totona, to nega momo ia be auka. Ena be haere namona oi henia, to unai ese henanadai ma ta ia havaraia: Dahaka dainai?

² Natudia maragidia sibona ese henanadai momo idia henia lasi. Ita tubu daekau lalonai, henanadai momo ita henia danu. Unai bamona ita karaia badina ita ura dala maorona ita dibaia, dika ita hanaia dalana ita dibaia, eiava ita do dibaia lasi gaudia dekenai diba ita abia totona. To, hari taunimanima momo be idia henanadai lasi, hegeregere mai anina bada henanadaidia idia henia lasi. Bona edia haere idia tahua lasi.

3. Dahaka dainai momo be mai anina bada henanadai edia haere tahua toho karana idia hadokoa?

³ Inai buka ena kopina ai ia noho henanadai, hamatamaia kahanai  idia noho henanadai, eiava inai karoa ena matamanai idia noho henanadai mani oi laloa. Unai bamona mai anina bada henanadai haida oi henia diba. To, taunimanima momo idia hesiku vadaeni unai henanadai edia haere idia tahua toho totona. Dahaka dainai? Baibel ese unai henanadai ia haerelaia diba, a? Haida idia laloa unai henanadai edia haere idia lalopararalaia be auka. Ma haida idia laloa henanadai henia karana ese idia do ia hahemaraia. Bona haida idia laloa unai bamona henanadai be tomadiho gunalaia taudia bona hahediba taudia ese idia haerelaia diba. To, oi be edena bamona?

4, 5. Mauri dekenai edena mai anina bada henanadai ita henia diba, bona dahaka dainai edia haere ita tahua be namo?

⁴ To oi ura mauri dekenai mai anina bada henanadai edia haere oi davaria. Unai dainai nega haida oi laloa: ‘Mauri ena anina be dahaka? Mauri be inai sibona, a? Dirava ena kara be edena bamona?’ Unai bamona henanadai oi henia be namo, bona gau badana be oi hesiku lasi, ela bona haere maorodia oi davaria. Hadibaia tauna badana Iesu Keriso, ia gwau: “Umui noinoi, vadaeni Dirava ese do ia henia umui dekenai. Umui tahua, vadaeni do umui davaria. Umui pidipidi, vadaeni iduara do ia kehoa umui dekenai.”​—Mataio 7:7.

⁵ Bema mai anina bada henanadai edia haere oi “tahua” noho, do oi itaia emu tahua karana ese namo ia havaraia diba. (Aonega Herevadia 2:​1-5) Herevana taunimanima haida be oi dekenai dahaka idia hamaoroa vadaeni, to haere idia noho, bona oi davaria diba​—Baibel dekenai. Edia haere be auka lasi, bona oi lalopararalaia diba. Gau namona ta be, ita dekenai helaro bona moale ia mailaia. Bona oi do idia durua hari inai negai mauri namona oi moalelaia totona. Vadaeni, namona be hari taunimanima momo ese idia lalohekwarahilaia henanadaina ita laloa.

6. Taunimanima idia davaria hisihisi dekenai, dahaka dainai momo idia laloa Dirava be ita ia laloa lasi?

⁶ Taunimanima momo idia laloa unai henanadai ena haere  be, oibe. Idia gwau, ‘Bema Dirava ese ita ia laloa, taunimanima edia noho dalana tanobada dekenai be do ia idau momokani, ani?’ Ita itaia tanobada be tuari, inai heheni karana bona lalohisihisi bada amo ia honu. Bona ita ta ta be ita gorere, hisihisi bona eda lalokau taudia idia mase. Unai dainai, momo idia gwau, ‘Bema Dirava ese ita bona ita davaria hekwakwanai ia laloa, unai gaudia do ia koua bena do idia vara lasi, ani?’

7. (a) Tomadiho hadibaia taudia ese edena bamona taunimanima idia hakaua kerere dainai, idia laloa Dirava ese ita ia hebogahisi henia lasi? (b) Ita davaria hahetoho dekenai, Baibel be dahaka ia hadibaia?

⁷ Ma danu, nega haida tomadiho hadibaia taudia ese taunimanima idia hakaua kerere dainai, idia laloa Dirava be ita ia hebogahisi henia lasi. Edena dala ai unai idia karaia? Dika ia vara neganai, idia gwau unai be Dirava ena ura. To momokani, unai bamona hadibaia taudia idia gwau Dirava ese unai dika ia havaraia. Oi laloa Dirava be unai bamona, a? Baibel be dahaka ia hadibaia momokani? Iamesi 1:13 ia gwau: “Bema tau ta ese dibagani ia davaria, o dika ta ese ia veria noho neganai, inai bamona do ia hereva lasi, ‘Dirava ese lau ia dibagania noho.’ Badina be kara dika ese Dirava ia dibagania diba lasi momokani. Bona Dirava ese tau ta do ia dibagania lasi.” Unai dainai tanobada dekenai idia vara dika be Dirava ese ia havaraia lasi. (Iobu 34:​10-12) Momokani, Ia ese idia vara gau dikadia ia koua lasi. To gau ta ia koua lasi bona ia havaraia edia anina be idau momokani.

8, 9. (a) Kara dika koua lasi bona havaraia edia idau be edena bamona oi haheitalaia diba? (b) Taunimanima ese dala dikana idia badinaia neganai, Dirava ese idia ia koua lasi, dahaka dainai unai kara dekenai Dirava ita maumauraia be maoro lasi?

⁸ Hegeregere, mai ena aonega bona lalokau tamana ta ita laloa. Ia be mai ena natuna mero badana, bona ia be ena tama sina ida ia noho. Natuna ia gwau-edeede bona ena lalona ia hadaia ruma do ia rakatania neganai, ena tamana ese ia koua lasi. Natuna be mauri dikana ia abia hidi bona hekwakwanai ia davaria. Natuna ia davaria hekwakwanai be ena tamana ese ia havaraia, a? Lasi. (Luka 15:​11-13) Unai hegeregerena, taunimanima ese dala dikana idia abia hidi neganai,  Dirava ese ia koudia lasi, to edia kara dainai idia vara hekwakwanai be Ia ese ia havaraia lasi. Momokani, taunimanima idia davaria hekwakwanai ibounai dainai ita gwau lasi unai be Dirava ese ia havaraia.

⁹ Badina namona dainai, Dirava ese taunimanima ia koua lasi dala dikana idia badinaia totona. Ia be aonega bona siahu bada Havaraia Tauna dainai, ita dekenai dika ia koua lasi ena badina idauidau ia gwauraia be anina lasi. To, lalokau dainai unai bamona ia karaia. Karoa 11 dekenai unai badina idauidau do oi dibaia. To namona be oi diba, ita abia hekwakwanai idauidau be Dirava ese ia havaraia lasi. To, unai hekwakwanai do ia haorea dalana be ita dekenai ia hadibaia!​—Isaia 33:2.

10. Dahaka dainai ita diba momokani, Dirava ese kara dika dainai idia vara gaudia ibounai do ia haorea vaitani?

¹⁰ Danu, Dirava be helaga. (Isaia 6:3) Unai ena anina be ia be goeva momokani. Ia dekenai dika ta be lasi. Unai dainai ia ita abidadama henia momokani diba. To taunimanima be unai bamona ita abidadama henia momokani diba lasi, badina nega haida idia kara gageva. Kara momokani siahu tauna danu be ia hegeregere lasi taunimanima dikadia ese idia havaraia dika ia hanamoa totona. To, Dirava be siahu ibounai Diravana. Ia be ia hegeregere momokani kara dika dainai taunimanima dekenai idia vara gaudia ia kokia totona. Dirava ese unai ia karaia neganai, dika do ia haorea vaitani dalanai do ia karaia!​—Salamo 37:​9-11.

11. (a) Dirava ese kara gageva be edena bamona ia laloa? (b) Dirava ese emu hisihisi be edena bamona ia laloa?

¹¹ To, Dirava ese tanobada ai bona emu mauri ai idia vara gaudia be edena bamona ia laloa? Baibel ia gwau Dirava ese “kara maoromaoro ia ura henia.” (Salamo 37:28) Unai dainai ia be kara namo bona kara dika ia laloa bada. Ia ese kara gageva idauidau ibounai ia inai henia. Idaunegai, tanobada be kara dika amo ia honu neganai, Baibel ia gwau Dirava ia ‘lalohisihisi bada momokani.’ (Genese 6:​5, 6) Dirava ese ena kara  ia haidaua lasi. (Malaki 3:6) Hari danu, Ia ura lasi tanobada hegegemadai idia vara hisihisi ia itaia. Bona Dirava ia ura lasi taunimanima idia hisihisi. Baibel ia hahedinaraia, Ia ese taunimanima ia laloa bada.​—1 Petero 5:7.

12, 13. (a) Dahaka dainai ita be mai iseda kara namodia hegeregere lalokau, bona lalokau dainai tanobada ai idia vara gaudia be edena bamona ita laloa? (b) Dahaka dainai oi diba momokani Dirava ese tanobada ena hekwakwanai do ia haorea?

¹² Edena bamona ita diba Dirava ia ura lasi hisihisi ia itaia? Unai ia hamomokania gauna be inai. Baibel ia gwau Dirava ese taunimanima be ena toana hegeregerena ia karaia. (Genese 1:26) Ita be mai iseda kara namodia badina Dirava be mai ena kara namodia. Hegeregere, kerere lasi taudia idia hisihisi neganai, oi lalohisihisi, a? Bema kara gageva be unai bamona oi laloa, namona be oi diba Dirava ese unai bamona kara ia lalohisihisilaia bada momokani.

¹³ Taunimanima ese idia hahedinaraia diba kara namo hereana ta be lalokau. Unai ese Dirava ena kara ia hahedinaraia danu. Baibel ia gwau, “Dirava be lalokau.” (1 Ioane 4:8) Lalokau ita hahedinaraia badina Dirava be lalokau. Lalokau dainai tanobada dekenai oi itaia hisihisi bona kara gageva do oi haorea, a? Bema oi be mai emu siahu unai oi karaia totona, do oi karaia, a? Oibe! Unai dainai oi diba momokani Dirava ese hisihisi bona kara gageva do ia haorea. Inai buka ena hamatamaia kahanai idia gwauraia gwauhamatadia be nihi ta eiava helaro kavakavana ta sibona lasi. Dirava ena gwauhamata idauidau be do idia vara momokani! To, unai bamona gwauhamata oi abidadama henia totona, gau badana be unai gwauhamata ia karaia Diravana oi dibaia.

14. Dirava ena ladana be daika, bona dahaka dainai ita gaukaralaia be namo?

¹⁴ Bema oi ura ta ese oi ia dibaia, reana dahaka do oi karaia? Unai tauna dekenai emu ladana do oi gwauraia, ani? Dirava be mai ena ladana, a? Tomadiho momo idia gwau ena ladana be “Dirava” eiava “Lohiabada,” to unai be ena ladana korikorina lasi. Idia be Dirava ena dagi ladadia, hegeregere “king” bona “presiden” be dagi ladadia bamona. Baibel ia gwau Dirava be mai ena dagi ladadia momo. “Dirava” bona “Lohiabada” be idia haida sibona. To, Baibel ese ita ia hadibaia danu Dirava be mai ena ladana korikorina: Iehova. Salamo 83:18 ia gwau:  “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” Bema emu Baibel dekenai unai ladana ia noho lasi, inai buka ena rau 195-7 dekenai ia noho Apendiks oi itaia, ena badina oi diba totona. Momokani, Baibel ena toretore gunadia dekenai Dirava ena ladana be nega tausen momo ia hedinarai. Unai dainai, Iehova ia ura ena ladana oi dibaia bona oi gaukaralaia. Inai be hegeregere Dirava ese Baibel ia gaukaralaia ita dekenai ia sibona ia gwauraia hedinarai totona.

15. Inai ladana Iehova ena anina be dahaka?

¹⁵ Dirava ese sibona dekenai ia henia ladana be mai ena anina bada. Iena ladana, Iehova, ena anina be Dirava ese ia karaia gwauhamata idauidau bona ia laloa noho gaudia ia hagugurua  diba. * Dirava ena ladana be idau herea momokani. Unai ladana be ia sibona ese ia abia be namo. Dala idauidau ai, Iehova be idau herea. Edena dala ai?

16, 17. Iehova dekenai dahaka ita dibaia inai dagi ladadia amo: (a) “Siahu Ibounai Dirava”? (b) “Noho Hanaihanai King”? (c) “Havaraia Tauna”?

¹⁶ Salamo 83:18 dekenai ita itaia vadaeni, unai siri ese Iehova be inai bamona ia gwauraia: “Oi sibona, Ataiai Momokani Diravana.” Unai hegeregerena, Iehova sibona be “Siahu Ibounai Dirava.” Apokalupo 15:3 ia gwau: “Lohiabada Dirava e, Siahu Ibounai Dirava e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani.” Dirava ena dagi ladana ma ta be “Siahu Ibounai Dirava.” Iena siahu be ma ta ida do ita hahegeregerea diba lasi. Timoteo Ginigunana 1:17 ese Iehova be “Noho Hanaihanai King” ia gwauraia. Inai dagi ladana “Noho Hanaihanai King” ese ita ia hadibaia Iehova be dala ma ta ai ia idau herea. Ia sibona be hanaihanai ia noho. Salamo 90:2 ia gwau: “Oi be nega ibounai, hanaihanai, Dirava oi noho, idaunegai bona gabeai danu.” Unai ita laloa neganai, ita hoa, ani?

¹⁷ Danu, Iehova be idau herea badina ia sibona be Havaraia Tauna. Apokalupo 4:11 ia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” Oi laloa diba gaudia ibounai​—ita itaia lasi laumadia guba dekenai, hanuaboi ai ita itaia hisiu, au huahua, bona davara bona sinavai dekenai idia noho gwarume​—idia noho badina Iehova be Havaraia Tauna!

18. Dahaka dainai taunimanima haida idia laloa idia be Dirava kahirakahira idia lao diba lasi, to Baibel be dahaka ia hadibaia?

¹⁸ Taunimanima haida be Iehova ena kara hereadaedia idia  duahia neganai, idia gari. Idia laloa Dirava be atai herea dainai ia kahirakahira idia lao diba lasi, eiava idia laloa ia dekenai idia be anina lasi. To unai lalohadai be maoro, a? Baibel be unai bamona ia hadibaia lasi. Iehova ia herevalaia neganai, ia gwau: “Momokani, Dirava be daudau lasi ita ta ta dekenai.” (Kara 17:27) Baibel ese ita ia hagoadaia: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”​—Iamesi 4:8.

19. (a) Edena dala ai Dirava kahirakahira ita lao diba, bona ena namo be dahaka? (b) Dirava ena kara momo amo edena oi moalelaia bada?

¹⁹ Edena dala ai Dirava kahirakahira oi lao diba? Gau badana be hari oi karaia bamona, Dirava oi dibaia noho. Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Oibe, Baibel ia gwau Iehova bona Iesu ita dibaia neganai, “mauri hanaihanai” do ita abia! Ita herevalaia vadaeni hegeregerena, “Dirava be lalokau.” (1 Ioane 4:16) Iehova be mai ena kara namodia ma haida danu. Hegeregere, Baibel ia gwau Iehova be ‘bogahisihisi bona hariharibada Diravana, badu dekenai ia haraga lasi, to bogahisihisi bona lalokau dekenai ia be haraga.’ (Esodo 34:6) Ia be mai ena “bogahisihisi, bona kara dika [ia] gwauatao noho.” (Salamo 86:5) Dirava be ia haheauka. (2 Petero 3:9) Ia be badinaia karana ia hahedinaraia. (Apokalupo 15:​4, NW) Baibel oi duahia momo neganai, Iehova ese unai kara bona kara namodia ma haida ia hahedinaraia dalana do oi itaia.

20-22. (a) Dirava ita itaia diba lasi dainai, ia kahirakahira do ita lao lasi, a? Gwauraia hedinarai. (b) Taunimanima haida ese oi do idia hamaoroa dahaka oi karaia totona, to dahaka oi karaia be namo?

²⁰ Momokani, Dirava oi itaia diba lasi badina ia be lauma tauna. (Ioane 1:18; 4:24; 1 Timoteo 1:17) To, Baibel ena hereva oi stadilaia karana amo ia do oi dibaia namonamo. Salamo torea tauna ia hereva bamona, Iehova “ena namo” do oi itaia. (Salamo 27:4; Roma 1:20) Iehova oi dibaia namonamo neganai, do oi diba ia noho momokani bona unai badina dainai ia do oi lalokau henia bona ia kahirakahira do oi lao.

²¹ Baibel ia gwau, Iehova be iseda Tamana bamona do ita laloa ena badina do oi lalopararalaia. (Mataio 6:9) Ia ese iseda mauri ia henia sibona lasi, to ia ura mauri namona ita abia​—lalokau tamana ta do ia ura ena natudia be unai bamona mauri idia abia. (Salamo 36:9) Baibel ia gwau  taunimanima ese Iehova idia tura henia diba. (Iamesi 2:23) Mani oi laloa​—iunives ia Havaraia Tauna ena turana ai oi lao diba!

²² Baibel oi dibaia noho lalonai, taunimanima haida ese oi do idia hamaoroa emu stadi oi hadokoa totona. Reana do idia lalohekwarahi badina oi abia dae lalohadaidia do oi haidaua. To namo lasi ma ta ese emu hetura karana namona Dirava ida ia koua.

23, 24. (a) Dahaka dainai oi dibaia gaudia dekenai henanadai oi henia noho be namo? (b) Karoa gabena dekenai dahaka do ita herevalaia?

²³ Momokani, matamanai gau haida do oi lalopararalaia lasi. Mai manau ida heduru oi noia diba, to namo lasi hemarai dainai oi henanadai lasi. Iesu ia gwau natuna maragina bamona ita manau be namo. (Mataio 18:​2-4) Bona ita diba natudia maragidia be henanadai momo idia henia. Dirava ia ura edia haere oi dibaia. Dirava idia ura dibaia taudia haida be Baibel ese ia hanamodia. Idia ese Baibel idia tahua namonamo, unai amo idia itaia idia dibaia gaudia be momokani.​—Kara 17:11.

²⁴ Dirava ita dibaia dalana namona be Baibel ita stadilaia. Ia be buka iboudiai amo ia idau. Edena dala ai? Karoa gabena ese unai do ia herevalaia.