1, 2. Sooq aperisar­neq iluaqutaagajup­pa?

MEEQ­QAT mikisut apersor­tar­nerat maluginiar­tar­piuk? Taak­kua ilar­pas­sui oqalus­sin­naaliin­narlutik apersuler­tar­put. Ueruloorlutik isigalutit aperilis­sap­put: Sooruna qilak tungujor­tuusoq? Ul­loris­sat ul­luk­kut sumiit­tar­tunuku? Sooruna tim­mis­sat qarlor­tar­tut? Sapin­ngisan­nik akisar­patit, ilaan­nili ajor­naatsuin­naasan­ngilaq. Qanorluun­niit akil­luar­tigigaluaruit ima apereq­qit­taraat: “Sooruna?”

² Meeraan­naan­ngitsul­li apersor­tar­put. Peroriar­tor­til­luta apersor­tuar­tar­pugut, soorlu paasiumal­lugu suk­kut ingerlas­sanerluta navianar­tul­lu suut mianersorfigisariaqar­nerlutigit, imaluun­niit alaper­naagin­narluta aperisar­pugut. Inuil­li ilar­pas­sui apersorun­naar­tan­nguatsiar­put, pingaar­tumik apeq­qutit pingaar­ner­paat pil­lugit. Tas­sami akis­sutis­sarsiorun­naar­tar­put.

3. Sooq inuit ilar­pas­suisa inuunermi apeq­qutit pingaar­ner­paar­taat akis­sutis­sarsiorun­naar­tar­paat?

³ Atuak­kap matuma saq­qaani siulequtaanilu kapitalil­lu matuma aal­laq­qaataani apeq­qutigineqar­tut eq­qarsaatigeriak­kit. Tas­saap­put apeq­qutigineqarsin­naasut pingaar­ner­paar­taasa  ilaat. Taamaat­torli inup­pas­suit apeq­qutit taak­ku akis­sutis­sarsiorun­naarsimavaat. Sooq? Apeq­qutit taak­ku Biibilimi akineqar­pat? Inuit ilaat isumaqar­put akis­sutit Biibilimiit­tut paasiuminaap­pal­laar­tut. Al­lat isumaqar­put taama aperineq peq­qusiileqinar­tuusoq. Al­lal­lu isumaqar­put up­perisarsior­nik­kut siut­tut ajoqersuisul­lu kisimik apeq­qutinik taamaat­tunik sam­min­nit­tus­saasut. Il­lit qanoq isumaqar­pit?

4, 5. Inuunermi apeq­qutit pingaar­ner­paar­taasa ilaan­nik eq­qaasaqarit, nas­suiarul­lu sooq taak­ku akis­sutis­sarsiniar­tariaqarivut.

⁴ Inuunermi apeq­qutit pingaar­torsuit akis­sutis­sarserusuk­kunar­patit. Qular­nan­ngitsumik ilaan­nik­kut im­minut ima aperisar­putit: ‘Inuunerup suna siuner­taraa? Inuuneq man­na taan­naan­naava? Guuti qanor­piaq it­tuua?’ Taamatut aperinis­saq isumatusaar­neruvoq, pingaaruteqar­porlu naam­maginar­tunik tutsuiginar­tunil­lu akis­sutis­sarsisin­nani apersorun­naan­ngin­nis­saq. Jiisusi Kristusi ima oqar­poq: “Qinujuaritsi, tunineqas­saasi taava; ujarler­tuaritsi, nanisis­saasi taava; kasut­tor­tuaritsi, map­piun­neqas­saasi taava.” – Mat­thæusi 7:7, NW.

⁵ Apeq­qutit pingaaruteqar­tut akis­sutaat ‘ujar­tuaruk­kit’ paasilis­savat ilungersuanitit asuliin­naan­ngitsut. (Us­satit 2:1-5) Al­lat qanorluun­niit oqalut­tuus­simagaluar­patsit apeq­qutit taak­ku akissutissaqarput, aamma nanisinnaavatit – Biibilimi. Akis­sutit ima paasiuminaatsigin­ngil­lat paasineqarsin­naanatik. Taman­naan­naan­ngilarli, aam­ma neriuutis­saqalersitsip­put nuan­naarutis­saqalersitsil­lutil­lu. Aam­mat­taaq maan­nangaaq pil­luar­nar­tumik siuner­taqarluar­tumil­lu inuunis­san­nut iluaqutigisin­naavatit. Apeq­qut inup­pas­suit eq­qarsaatigisarsimasaat aal­lar­tis­sutigeriar­tigu.

6. Sooq inup­pas­suit isumaqar­pat Guuti inuit an­niaataan­nut tun­ngatil­lugu misigit­taatsuusoq?

⁶ Inup­pas­suit isumaqarunar­put akis­sutaa aap­piusoq. Ima aperisar­put: ‘Guutip soqutigigaluar­patigut nunarsuarmi pis­sutsit al­laanerul­luin­nas­sagaluar­put, ilaa?’ Silarsuarmi sorsun­nerit, uumis­suinerit atugarlior­neril­lu ingasaqaat. Tamat­talu inut­tut ataasiak­kaatut nap­parsimasar­pugut, an­niaateqar­tar­pugut qanigisatsin­nil­lu toqusoor­tarluta. Taamaat­tumik inup­pas­suit ima  aperisar­put: ‘Guuti uagutsin­nik ajor­nar­torsiutitsin­nil­lu soqutigin­nit­tuugaluaruni tamak­kor­pas­suar­nik pinaveersaar­titsisimas­san­ngik­kaluar­pa?’

7. (a) Up­perisarsior­nik­kut ajoqersuisut qanoq inuit isumaqalersit­tar­paat Guuti naak­kit­taatsuusoq? (b) Ajor­tut nalaat­tak­kavut pil­lugit Biibilimi qanoq al­las­simasoqar­pa?

⁷ Suli ajor­nerusar­poq up­perisarsior­nik­kut ajoqersuisut inuit isumaqalersik­kaangatigit Guuti naak­kit­taatsuusoq. Inuit tas­san­ngaan­naq ajunaar­nermit nalaan­neqaraangata ajoqersuisut taak­ku oqar­tar­put taman­na Guutip piumasarigaa. Tas­sa Guuti pisar­tunut ajor­tunut pisuutit­tar­paat. Taman­na Guuti pil­lugu ilumoor­tuua? Biibilimi suna ajoqersuutigineqar­pa? Habak­kukip al­lagai 1:13-imi Guuti pil­lugu ima al­las­simasoqar­poq: ‘Il­lit iseqar­putit ajus­sutsimik isigisaqas­sal­lutit minguip­pal­laar­tunik, ajunaar­nermik ilagin­naagin­nar­neq saper­putit.’ Tas­sa Guuti ajor­tunut silarsuarmi avatangiisitsin­ni pisar­tunut pisuunngisaannarpoq. (Jobi 34:10-12 atuakkit). Ilumoor­poq ajor­tunik pisoqar­tar­nera akuerigaa. Kisian­ni akuerinninneq aam­ma pisuuneq as­sigiin­ngitsorujus­suup­put.

8, 9. (a) Ajus­sutsimik akuerin­nin­nerup ajus­sutsimul­lu pisuunerup as­sigiin­ngis­sutaat as­sersuusiorluni qanoq paasiuminarsar­neqarsin­naava? (b) Sooq Guutip inuit nam­min­neq iluarisamin­nik iliorsin­naatim­magit ajorinias­san­ngilar­put?

⁸ Takorlooriaruk ataataasoq silatooq asan­nit­torlu suli im­min­ni najugaqar­tumik inersimasumik er­nilik. Er­nini pikitsitsim­mat nuun­niarlunilu aalajangermat nangar­tan­ngilaa. Er­nera inuunerlut­tun­ngor­poq ajor­nar­torsiulerlunilu. Ataataasoq er­nermi ajor­nar­torsior­neranut pisuua? Soorunami naamik. (Lukasi 15:11-13) Taamatul­li Guutip inuit ajor­tumik piniarlutik aalajangersimasut unitsin­niar­neq ajor­pai, imaan­ngilarli ajor­nar­torsiuler­neran­nut pisuusoq. Taamaat­tumik naaper­tuil­luar­nerus­san­ngilaq Guuti inuiaat ajor­nar­torsiutaan­nut pisuutis­sal­lugu.

⁹ Guuti pis­sutis­saqarluarluni inuiaat kuk­kusumik siun­nerfeqarlutik ingerlaneran­nik akuerin­nip­poq. Pin­ngor­titsisuugamilu silatooq pis­saaneqangaar­torlu pis­sutigisaminik tamak­kunin­nga nas­suiaaf­figisariaqan­ngilaatigut. Taamaat­toq asan­nil­luni aalajangersimavoq tamak­kunin­nga paasitin­niarluta. Kapitali  11-mi pis­sutigisai tamak­ku pil­lugit paasisaqar­nerujumaar­putit. Qularin­ngil­luin­narsin­naaval­li Guuti ajor­nar­torsiutitsin­nut akisus­saasuun­ngitsoq. Taan­natuaavorli ajor­nar­torsiutit­ta aaq­qin­neqar­nis­saan­nik uagutsin­nut neriuutis­saqalersitsisoq. – Esaja 33:2.

10. Sooq up­peril­luin­narsin­naavar­put ajus­sutsip kingunipilui tamaasa Guutip aaq­qik­kumaarai?

¹⁰ Aam­ma Guuti il­ler­nar­tuuvoq. (Esaja 6:3) Tas­sa minguil­luin­nar­tuuvoq. Ajus­suseqan­ngil­luin­nar­poq. Taamaat­tumik tatigil­luin­narsin­naavar­put. Inuit ilaan­nik­kut peq­quserlut­taramik tatigil­luin­nar­neqarsin­naan­ngil­lat. Oqar­tus­saasut un­neq­qarin­ner­paal­luun­niit inuit ajor­tut ajoqusiinerinik qaqutiguin­naq aaq­qiisin­naasar­put. Guutili ajugaqan­ngitsuuvoq. Taas­suma ajus­sutsip inuian­nut kingunipilui tamaasa aaq­qis­sin­naavai aaq­qik­kumal­lugil­lu. Guutip akuliuk­kuni ajus­suseq suujun­naarsil­luin­narumaar­paa! – Tussiaat 37:9-11 atuakkit.

11. (a) Guutip naaper­tuil­luan­ngitsulior­neq qanoq isigaa? (b) Inuit naal­liuutaat qanoq isigai?

¹¹ Guutip akuliun­nis­sami tungaanut silarsuarmi pisar­tut uagul­lu inut­tut ataasiak­kaatut nalaat­tak­kavut qanoq isigai? Biibilimi al­las­simavoq Guutip ‘eq­qor­toq iluarigaa’. (Tus­siaat 37:28) Taamaat­tumik pisut tamaasa – eq­qor­tut eq­qun­ngitsul­lu – maluginiaq­qis­saar­tar­pai. Naaper­tuil­luan­ngitsulior­nerit tamaasa uumigai. Itsaq nunarsuarmi ajus­suseqangaalermat “aliasuler­poq”. (1 Mosesi 6:5, 6) Guuti al­lan­ngorsiman­ngilaq. (Malaki 3:6) Naal­liuutit nunarsuarmi tamarmi inun­nit atugaasut takul­lugit maajugin­nin­nerujus­suarmik misigisaqar­tar­poq. Inuit naal­liun­nerat nuan­narin­ngil­luin­nar­paa. ‘Isumas­sor­paasi,’ Biibilimi al­las­simavoq. – 1 Petrusi 5:7 atuaruk.

12, 13. (a) Sooq ajun­ngitsunik pis­suseqar­pugut soorlu asan­nin­nermik, silarsuarmilu pisar­tunut isigin­nit­taaser­put qanoq asan­nin­nermit sun­ner­neqar­tar­pa? (b) Sooq up­peril­luin­narsin­naavar­put silarsuarmi ajor­nar­torsiutit Guutip iliuuseqarfigiumaarai?

¹² Sooq qularin­ngilar­put inuit naal­liun­nerat Guutip nuan­narin­ngil­luin­naraa? Tun­ngavilersuut suli al­la eq­qaaneqarsin­naavoq.  Biibilimi ajoqersuutigineqar­poq inuk Guuti as­silil­lugu pin­ngor­tin­neqar­toq. (1 Mosesi 1:26) Taamaat­tumik pis­suserin­ner­put Guutip pis­suserin­neranik pis­suteqar­poq. Inuit pisuus­suteqan­ngitsut naal­liun­nerat an­niaatigisar­piuk? Taamaap­pat qularin­ngil­luin­narsin­naavat Guutip suli an­nerusumik an­niaatigisaraa.

¹³ Uagut inuit pis­suserisat­ta nuan­ner­ner­paat ilaat tas­saavoq asan­nit­tuliorsin­naaner­put. Aam­ma tamatumani Guutimut as­singuvugut. Biibilimi ima al­las­simavoq: ‘Guuti tas­saavoq asan­nin­neq.’ (1 Johan­nesi 4:8) Guuti asan­nit­tuum­mat asan­nit­tuuvugut. Il­lit asan­nin­nerit kajumis­sis­sutigalugu silarsuarmi naal­liuutit naaper­tuil­luan­ngitsulior­neril­lu nungutis­sagaluar­pigit, taamaalior­nis­samut pis­saaneqar­tuugaluaruit? Soorunami! Taamaam­mat qularin­ngil­luin­narsin­naavat Guutip tamak­ku nungutik­kumaarai. Neriorsuutit atuak­kap matuma siulequtaani eq­qaaneqar­tut tas­saan­ngil­lat piviusorsiun­ngitsumik isumaliuutit asuliin­narluun­niit neriuutit. Guutip neriorsuutai qular­nan­ngivis­sumik eq­quuk­kumaar­put. Taman­nali up­perilis­saguk­ku Guuti tamak­kunin­nga neriorsuuteqar­toq pil­lugu ilisimasaqar­neruler­tariaqar­putit.

14. Guuti qanoq ateqar­pa, aam­ma sooq aq­qa ator­tariaqar­par­put?

¹⁴ Inum­mit al­lamit ilisarisimaneqalerusuk­kaan­ni qanoq ilior­toqar­tar­pa? Qanoq ateqar­neq siul­ler­paajutil­lugu oqaatigineqar­tan­ngin­ner­pa? Guuti ateqar­pa? Up­perisarsior­nerit ilar­pas­suini ‘Guutimik’ imaluun­niit ‘Naalak­kamik’ taagin­nar­neqar­tar­poq, taak­kuli atiun­ngil­lat; taaguutaap­put, soorlu “kun­ngi” aam­ma “præsidenti”  taaguutaasut. Biibili naaper­torlugu Guuti taaguuter­pas­suaqar­poq, ilaatigut “Guuti” aam­ma “Naalagaq”. Biibilimili aam­ma ajoqersuutigineqar­poq Guuti nam­minerisaminik ateqar­toq aq­qalu tas­saasoq Jehova. Tus­siaat 83:19-imi ima al­las­simavoq: ‘Il­lit kisivit – aq­qit tas­saasoq Jahve [Jehova, NW] – Qutsin­nerus­saar­tuuvutit nunarsuarmi tamarmi.’ Ateq taan­na Biibilimik nutsik­kami il­lit atuk­kan­ni al­las­siman­ngip­pat, sooq taamaan­nersoq paasiniarlugu tapilius­sami nas­suiaat “Guutip aq­qata ator­neqar­nera isumaalu” im­maqa atuarusus­savat. Itsaq Biibili as­silil­lugu as­sam­mik al­latani Guutip aq­qa tuusintilip­pas­suariarluni ator­neqar­poq. Jehovap kis­saatigaa aq­qi ilik­kas­sagit atus­sagil­lu. Oqar­toqarsin­naavoq Biibili atorlugu uagutsin­nut im­minut ilisaritit­toq.

15. Ateq Jehova qanoq isumaqar­pa?

 ¹⁵ Guuti im­minut atsersimavoq isumalerujus­suarmik. Aq­qa, Jehova, isumaqar­poq qanorluun­niit neriorsuigaangami neriorsuum­minik eq­quutititsisin­naasoq siuner­taminil­lu sumil­luun­niit naam­mas­sin­nis­sin­naasoq. * Guutip aq­qa as­seqan­ngil­luin­nar­tuuvoq, im­mik­korluin­naq it­tuuvoq. Taas­suma kisimi naleq­qut­tumik aterisin­naavaa. Jehova sor­pas­suar­tigut as­seqan­ngil­luin­nar­tuuvoq. Tas­sa qanoq?

16, 17. Taaguutinit ukunan­nga Jehova pil­lugu sumik paasisaqar­pugut: (a) “Ajugaqan­ngitsoq”? (b) ‘Naas­saan­ngil­luin­nar­tumik kun­ngi’? (c) “Pin­ngor­titsisoq”?

¹⁶ Tus­siaat 83:19 is­suaaf­figereer­par­put ima al­las­simasoq: ‘Il­lit kisivit Qutsin­nerus­saar­tuuvutit.’ Taamatut­taaq Biibilimi Jehova kisimi ima taaneqar­poq: “Ajugaqan­ngitsoq.” Saq­qum­mersitat  15:3-mi ima al­las­simavoq: “Suliatit angeqalutil­lu tupin­nangaar­put, il­lit Naalagaq Guuti, Ajugaqan­ngitsoq; naaper­tuil­luar­tuul­lutil­lu ilumoor­tuup­put aq­qutitit, il­lit inuian­nut kun­ngiusutit.” Jehova ‘Ajugaqan­ngitsumik’ taaguuteqarmat paasisin­naavar­put taan­na tas­saasoq pis­saaneqar­ner­paaq. Pis­saanera nalis­saqan­ngilaq; sumil­luun­niit nal­ler­neqarsin­naan­ngilaq. Timotheusimut al­lak­kat siul­liit 1:17-imi Jehova ‘naas­saan­ngil­luin­nar­tumik kun­ngiusutut’ eq­qaaneqar­poq. Taaguut ‘naas­saan­ngil­luin­nar­tumik kun­ngi’ uagutsin­nut eq­qaasitsis­sutaavoq Jehovap aam­ma al­lak­kut as­seqan­ngil­luin­nar­tuuneranik: Taan­na kisivim­mi piujuaan­narsimavoq. Tus­siaat 90:2-mi ima al­las­simavoq: “Nuna silarsuarlu pin­ngor­titaan­ngik­kal­larmata Guutiuvutit naas­saan­ngil­luin­nar­tumik.” Eq­qarsaat taman­na mianerin­niler­nar­poq, ilaa?

¹⁷ Jehova aam­ma as­seqan­ngil­luin­nar­tuuvoq sunik tamanik Pin­ngor­titsisuugami. Biibilimi Saq­qum­mersitat 4:11-mi ima al­las­simavoq: “Il­lit, Naalagar­put Guuter­pul­lu, qin­ngaq­qun­nan­ngil­lat pigis­sal­lugit naalan­naat ataq­qinaal­lu pis­saanerlu; il­lim­mi suut tamaasa pin­ngor­tip­patit, il­lit piumasak­kut piuler­put pin­ngor­titaal­lutil­lu.” Suul­luun­niit takorloor­neqarsin­naasut – soorlu qilam­mi pin­ngor­titat anersaajusut takus­saan­ngitsut, un­nuami ul­loris­sat, or­piit paar­naat aam­ma aalisak­kat im­mamiit­tut kuus­suar­niit­tul­lu – tamarmik Jehovamit pin­ngor­titaagamik piup­put; taan­na Pin­ngor­titsisuum­mat!

18. Sooq inuit ilaat misigisimap­pat Jehovamut qanil­lisin­naan­ngisaan­nas­sal­lutik, Biibilimili qanoq paasitin­neqar­pugut?

¹⁸ Inuit ilaasa Jehovap pis­susii mianer­nangaar­tut pil­lugit atuar­ner­tik eq­qis­siun­naarutigisar­paat. Isumakuluutigisar­paat Guuti im­min­nit qutsin­neroqim­mat taas­sumun­nga qanil­lisin­naan­ngisaan­nas­sal­lutik imaluun­niit taas­suma isaani soqutaalin­ngisaan­nas­sal­lutik. Taman­nali ilumoor­pa? Biibilimi tamatuma akerlerluin­naanik paasitin­neqar­pugut. Tas­sani al­las­simavoq Guuti ‘ilatsin­nit kimil­luun­niit ungasin­ngitsoq’. (Apustilit Suliaat 17:27) Aam­ma Jaakup al­lagai 4:8-mi ima kajumis­saar­neqar­pugut: “Guuti qanin­niarsiuk, taava taan­na ilis­sin­nut qanil­lis­saaq.”

19. (a) Guutimut qanoq qanil­lisoqarsin­naava, qanil­linik­kul­lu suna anguneqarsin­naava? (b) Guutip pis­susii sorliit nuan­nariner­paavigit?

 ¹⁹ Qanoq ilil­lutit Jehovamut qanil­lisin­naavit? Siul­lermik maan­nak­kor­piaq iliuuserisat ingerlatiin­nas­savat – tas­sa Guuti pil­lugu ilin­niar­nerus­saatit. Jiisusi ima oqar­poq: ‘Inuuneq naas­saan­ngitsoq tas­saavoq ilin­nik, ilumut kisimi Guutiusumik aal­lar­titan­nil­lu Jiisusi-Kristusimik, ilisiman­nin­neq.’ (Johan­nesi 17:3) Tas­sa Biibilimi al­las­simavoq Jehovamik Jiisusimil­lu ilisiman­nin­neq, imaluun­niit ilisarisiman­niler­neq, ‘inuunermik naas­saan­ngitsumik’ kinguneqarsin­naasoq. Eq­qaaneqareersutut aam­ma al­las­simavoq ‘Guuti tas­saasoq asan­nin­neq’. (1 Johan­nesi 4:16) Jehovali aam­ma al­lar­pas­suar­nik pis­suseqar­poq nuan­nersunik kajunger­nar­tunil­lu. As­sersuutigalugu Biibilimi al­las­simavoq Jehova tas­saasoq “Guuti nal­lit­tuisoq saam­maasorlu, kamajaatsoq ilumoor­nermik sal­lusuis­sum­mil­lu peqangaar­toq”. (2 Mosesi 34:6) ‘Ajun­ngitsuuvoq isumak­keerfigin­nik­kumasarlunilu.’ (Tus­siaat 86:5) Erinitsajuitsuuvoq. (2 Petrusi 3:9) Ilumoorfigin­nitsini im­miniigin­nan­ngisaan­nar­pai. (Tus­siaat 94:14) Biibili atuar­nerujar­tor­til­lugu paasilis­savat Jehovap tamak­kunin­nga al­lar­pas­suar­nil­lu ajun­ngitsunik pis­suseqar­nini ersersis­simagaa.

20-22. (a) Guutimik takun­nis­sin­naan­ngin­nat­ta imaap­pa taas­sumun­nga qanil­lisin­naan­ngitsugut? Nas­suiaruk. (b) Inuit ajun­ngitsumik isumaqarlutik qanoq nangar­tarsin­naavaatsit, tusaaniar­tariaqar­pigil­li?

²⁰ Ilumoor­poq Guuti takusin­naan­ngik­kip­put, anersaajum­mat takus­saan­ngitsoq. (Johan­nesi 1:18; 4:24; 1 Timotheusi 1:17) Biibilili iluaqutigalugu kinaas­susilit­tut ilisarisimalersin­naavar­put. ‘Jehovap alutor­nas­susia tipaatsuutigisin­naavar­put’, soorlu Biibilimi tus­siaasior­tut ilaat taama al­lat­toq. (Tus­siaat 27:4; Romamiut 1:20) Jehova pil­lugu ilik­kagaqar­nerujar­tor­til­lutit taan­na piviusutut isiginerujar­tus­savat, pis­sutis­saqar­nerulis­saatil­lu asanis­saanut taas­sumun­ngalu qanit­tumik at­taveqar­tutut misiginis­san­nut.

²¹ Paasiar­tuaalis­savat sooq Biibilimi ilin­niar­tin­neqar­tugut Jehova Ataatatsitut isigis­sagip­put. (Mat­thæusi 6:9) Inuunermik tuniin­narata aam­mat­taaq inuunermik pitsaaner­paamik kis­saap­paatigut – soorlu ataataq asan­nit­toq kinaluun­niit taama kis­saas­sisar­toq. (Tus­siaat 36:10) Aam­ma Biibilimi al­las­simavoq uagut inuit Jehovamut ikin­ngutaalersin­naasugut. (Jaaku 2:23) Eq­qarsaatigeriaruk:  Qilam­mik nunarsuarmil­lu Pin­ngor­titsisoq ikin­ngutigilersin­naavat!

²² Biibili ilin­niar­nerorut­tulerit im­maqa inuit ilaasa ajun­ngitsumik isumaqarlutik ilungersorlutik ilin­niarun­naaq­qus­savaatsit. Im­maqa er­numas­sutigaat al­lamik up­perisaqaler­nis­sat inuunermul­luun­niit al­latut isigin­nit­taaseqaler­nis­sat. Kisian­ni ikin­ngutigiin­nermik pitsaaner­paamik, tas­sa Guutimik ikin­nguteqar­nermik, angusaqar­niar­nin­ni kimil­luun­niit akor­nuser­neqaqinak.

23, 24. (a) Sooq ilin­niak­katit pil­lugit aperiuar­tariaqar­pit? (b) Kapitalimi tul­liut­tumi suna sam­mineqar­pa?

²³ Soorunami aal­laq­qaam­mut paasin­ngisaqar­tas­sagunar­putit. Ikioq­qus­sagaan­ni maniguun­nis­saq pisariaqarsin­naavoq, aperinis­san­nul­li tunuarsimaaqinak. Meeq­qat mikisut maniguut­tuunerat­tut maniguut­tuunis­saq Jiisusip ajun­ngitsuunerar­paa. (Mat­thæusi 18:2-4) Aam­mami meeq­qat mikisut apersor­tar­put. Ila apersor­taqaat. Guutip kis­saatigaa apeq­qutitit akis­sutis­sarsis­sagitit. Itsaq kajumil­lutik Guutimik ilisarisiman­niler­niar­tut ilaat Biibilimi nersualaar­neqar­put. Taak­ku Al­lak­kanik misis­sueq­qis­saar­tar­put qulak­keer­niarlugu ilin­niak­katik ilumoor­nersut. – Apustilit Suliaat 17:11 atuaruk.

²⁴ Jehovamik ilisarisiman­niler­niaraan­ni iliuuseq pitsaaner­paaq tas­saavoq Biibilimik misis­suineq. Atuak­kanit al­lanit tamanit al­laaneruvoq. Qanoq? Apeq­qut taman­na kapitalimi tul­liut­tumi sam­mineqar­poq.