1, 2. Чьрʹа баш ә пьрса бьдьн?

ТӘ ТʹӘХМИН кьрийә чаԝа зарʹ һʹьз дькьн пьрса бьдьн? Әԝана бе һʹәсаб пьрса дьдьнә мәзьна, мәсәлә әв чь йә, әв чьрʹа ӧса нә йан ӧса нинә? Щарна дьбәк жи сәва кӧ щаба рʹаст бьди ԝанарʹа, тӧ гәлә щәфе дькʹьшини, ле йәкә мина ве зарʹока кӧ ль сәр шькьл те кʹьфше, әԝана диса жи дьпьрсьн: «Ле чьрʹа?»

² Бь рʹастийе пьрса нә тʹәне зарʹ дьдьн, ле йед мәзьн жи. Мәрьв чьԛас жи мәзьн дьбә, һаԛас һе гәлә тьшта дьхԝазә пебьһʹәсә. Мәсәлә, ча гәрәке мәри бьжи, ԝәки дури кӧл-дәрда у бебәхтийе бә. Ле һәнә мәрьв йед кӧ ида пьрса надьнә хԝә, у щабед ль сәр пьрсед фәрз нагәрʹьн.

3. Чьрʹа гәләк мәри щаба ль сәр пьрсед фәрз нагәрʹьн?

³ Һәла дьшьрмиш бә ль сәр наве ве кʹьтебе, ӧса жи ль сәр пьрсед сәрәщәме у ль сәр пьрсед дәстпека сәре пешийе. Әва пьрсед лапи фәрз ьн дь әʹмьре мәда. Ле гәләк, щабед пьрсед ӧса ида нагәрʹьн. Гәло чьрʹа? Гәло Кʹьтеба Пироз щаба ван пьрса дьдә? Гәләка тʹьре кӧ щабед Кʹьтеба Пироз чәтьн ьн сәва фәʹмкьрьне. Һьнәк жи шәрм дькьн пьрса бьдьн. Ле һәнә йед ӧса жи, йед кӧ  дьшьрмиш дьбьн, ԝәки дәрһәԛа щаба ван пьрса гәрәке тʹәне ӧлмдар у мәрийед зандар дьшьрмиш бьн. Ле тӧ ча дьшьрмиш дьби?

4, 5. Әв һьнә пьрсед фәрз кӧ пешда тен кʹижан ьн, у чьрʹа әм гәрәке щабед ԝан бьгәрʹьн?

⁴ Гәләк мәри, мина тә дьхԝазьн ль сәр пьрсед ӧса фәрз щаба хԝә бьстиньн. Дьбәк тә жи пьрсед ӧса дайә хԝә: ‹Гәло нет-мәрәме әʹмьр чь йә? Әва жийина кӧ мәрьв дьжин, гәрәке ӧса буйа? Гәло Хԝәде йәки ча нә?› Әва рʹьнд ә ԝәки тӧ пьрсед ӧса дьди хԝә, у һʹәта тӧ щаба рʹаст ль сәр ван пьрса нәстини, нәсәкьнә. Чьмки мамостаки навдар, бь наве Иса Мәсиһ * гьлийед ӧса готийә: «Бьхԝазьн һуне бьстиньн, бьгәрʹьн һуне бьбиньн, дәри хьн ԝе бәр ԝә вәбә» (Мәтта 7:7).

⁵ Һәрге һун «бьгәрʹьн» щаба ван пьрсед фәрз, һуне тедәрхьн кӧ әв йәк гәләк кʹаре тинә (Мәтʹәлок 2:1-5). Кʹи жи тәрʹа чь бежә, тӧ сәд сәләфи бьзаньбә, ԝәки щаба пьрсед ӧса һәнә, әԝана дь Кʹьтеба Пирозда ньвиси нә. Щабед Кʹьтеба Пироз бь рʹастийе сәва фәʹмкьрьне чәтьн ниньн. Ле сәрда жи әԝана дькарьн гӧмане бьдьнә тә у әʹмьре тә һе баш кьн. Һинбуна Кʹьтеба Пироз ԝе али тә бькә әʹмьре хԝә ида ирода бәхтәԝар ки. Ԝәрә пешийе әм пебьһʹәсьн щаба пьрсед ӧса ль сәр кʹижани гәләк мәрьв дьфькьрьн.

6. Чьрʹа гәләк жь мәрийа дьшьрмиш дьбьн, ԝәки Хԝәде бона мә хәм накә?

⁶ Гәләк жь мәрийа дьбежьн ԝәки на. ‹Һәрге Хԝәде дьлрʹәʹм буйа, әʹмьр дь дьнйайеда ԝе баш буйа›. Гава әм ль дьне дьньһерʹьн әм тʹәне шәрʹ, нәһәԛийе у зӧлмийе дьбиньн. У әм хԝәха жи тʹьме нәхԝәш дькʹәвьн дьчәрчьрьн у мәрииед хԝәйә незик ӧнда дькьн. Ләма жи гәләк дьбежьн: ‹Һәрге Хԝәде бона мә хәм бькьра, әԝи ԝе нәһишта ԝәки һаԛас нәһәԛи у зӧлми бенә сәре мә›.

7. (а) Ча ӧлмдар у кʹаһин мәрийа дьдьнә баԝәркьрьне, кӧ сәбәбе һʹәму кӧл-дәрда Хԝәде йә? (б) Чь һин дькә Кʹьтеба Пироз дәрһәԛа кӧл-дәрдед мә?

 ⁷ Һе әʹщеб әԝ ә, ԝәки щарна хԝәха ӧлмдар у кʹаһин мәрийа дьдьнә баԝәр кьрьне кӧ сәбәбе һʹәму кӧл-дәрда Хԝәде йә. Мәсәлә чахе тьштәки хьраб ль сәре кәсәки дьԛәԝьмә, әԝана дьбежьн, ԝәки ԛьрара Хԝәде бу. Бь ԝе йәке әԝана Хԝәде нәһәԛ дәрдьхьн. Ле әва рʹаст ә? Гәло чь һин дькә Кʹьтеба Пироз? Дь кʹьтеба Аԛуб 1:13-да ньвисар ә: «Бьра тʹӧ кәс, йе кӧ нава щерʹьбандьнеда йә, нәбежә: ‹Хԝәде мьн бь хьрабийе дьщерʹьбинә›, чьмки Хԝәде хьрабийада найе щерʹьбандьне у нә жи йәки дьщерʹьбинә». Демәк әв нәһәԛийед кӧ ль дьне дьԛәԝьмьн, кьред Хԝәде ниньн. (Бьхунә Ибо 34:10-12.) Рʹаст ә әԝ дьһелә кӧ тьштед хьраб бьԛәԝьмьн. Ле кʹӧ тӧ тьштәки бьһели бьԛәԝьмә у кʹӧ хԝәха әве йәке бьки. Ортʹа ԝан фьрԛийа мәзьн һәйә.

8, 9. (а) Бь кʹижан мәсәле тӧ дькари нишан ки, ԝәки фьрԛи һәйә, ортʹа нәһәԛийе бьһели, йан жи хԝәха бьки? (б) Рʹаст ә Хԝәде һишт ԝәки мәрьв дь рʹийа хьрабда һәрʹьн, ле чьрʹа нәрʹаст ә, ԝәки әм сәва ве йәке Хԝәде нәһәԛ дәрхьн?

⁸ Ԝәрә әм ль сәр мәсәләке дьшьрмиш бьн, дәрһәԛа бавәки ԛәнщ у билан, у кӧрʹе ԝийи мәзьн, йе кӧ һе мала де-баве хԝәда дьжи. Дәрбәке әԝ сафи дькә жь де-баве хԝә башԛә бә у рʹийа хԝәда һәрә. Бьдә һʹәсабе хԝә, әԝи рʹекә хьраб жьбарт у бу хԝәйе кӧл-дәрда. Тʹәхмина ԝә әԝ кӧл-дәрдед ԝи, баве ԝи ани ль сәре ԝи? Фәʹмдари йә, ԝәки на (Луԛа 15:11-13). Дәрһәԛа Хԝәде жи әм дькарьн ӧса бежьн. Рʹаст ә Хԝәде һишт, ԝәки инсанәт жь ԝи башԛә бә у рʹекә хьрабда һәрʹә. Ле әв найе һʹәсабе, ԝәки Хԝәде хԝәха кӧл-дәрд ани ль сәре ԝан. Ләма жи әв гӧнәки мәзьн ә, кӧ мәрьв бона һʹәму кӧл-дәрдед хԝә, Хԝәде нәһәԛ дькьн.

⁹ Ле гәло чьрʹа Хԝәде һишт, ԝәки инсанәт рʹекә хьрабда һәрʹә? Хԝәде һәйә Әʹфьрандаре мәйи һьмзор у билан, әԝ борщдар нинә һʹәму кьред хԝә мәрʹа шьровәкә. Ле чьмки әԝ мә һʹьз дькә, ләма жи әԝи хԝәха хԝәст мәрʹа һʹәму тьшти шьровәкә. Дәрһәԛа ве йәке һе зедә әме дь сәре 11-да пебьһʹәсьн. Ча жи һәбә тʹӧ щар дьшьрмиш нәбә, ԝәки сәва  проблемед мә Хԝәде йә нәһәԛ. Дәԝса ве йәке бьзаньбә кӧ Хԝәде гӧмане дьдә мә, ԝәки проблемед мә ԝе сафи бьн! (Ишайа 33:2).

10. Чьрʹа әм дькарьн баԝәр бькьн кӧ Хԝәде һʹәму зӧлми ԝе бьдә һьлдане?

¹⁰ Хенщи ԝе йәке, Хԝәде пироз ә (Ишайа 6:3). Әв те һʹәсабе, ԝәки Хԝәде рʹаст у тʹәмьз ә. Әԝ бе ԛӧсур ә. Ләма жи әм дькарьн бь тʹәмамийе, итʹбарийа хԝә Хԝәде биньн. Ле әм дькарьн ӧса итʹбарийа хԝә мәрийа биньн? Һьлбәт на, чьмки мәри дькарә нәһәԛийе у нәрʹастийе бькә. Һәрге һәнә мәрийед һәԛ у рʹаст, дь дәсте кʹижанада сәрԝерти һәйә, әԝана йәкә нькарьн дәԝса ԝан зийана дадьн, йед кӧ мәрийед зӧлм дьдьнә мә. Ле Хԝәдайе мә һьмзор ә, у әԝ һьн дькарә у һьн жи дьхԝазә зӧлмийе бьдә һьлдане. Хԝәде ԝе ӧса бькә, ԝәки зӧлми ида тʹӧщар тʹӧнә бә. (Бьхунә Зәбур 37:9-11.)

11. (а) Ча Хԝәде дьньһерʹә ль сәр нәһәԛийед ве дьнйайе? (б) Хԝәде чь ль сәр хԝә тʹәхмин дькә, чахе дьбинә кӧ тӧ дьчәрчьри?

¹¹ Чахе Хԝәде нәһәԛийед ве дьнйайе у нәһәԛийед кӧ һьмбәри тә тенә кьрьне дьбинә, гәло әԝ чь ль сәр хԝә тʹәхмин дькә? Кʹьтеба Пироз мә һин дькә, ԝәки Хԝәде «кʹамьл ә у һәԛ ә» (Ԛануна Дӧщари 32:4, ПКʹМ). Ләма жи Хԝәде дьхԝазә ԝәки мәрьв һәԛийе бькьн, нә кӧ нәһәԛийе. Әва гәләк фәрз ә сәва Хԝәде, чьмки һʹәму нәһәԛийед кӧ мәрьв дькьн бәр чʹәʹве Хԝәде рʹәш ә. Кʹьтеба Пироз дьбежә, кӧ бәре, чахе дьнйа бь зӧлмийе тʹьжә бу Хԝәде «гәләки дьлтәнг бу» (Дәстпебун 6:5, 6, ПКʹМ). Хԝәде нәһатийә гӧһастьне (Малахи 3:6). Бәр чʹәʹве ԝи диса жи һʹәму зӧлмийa ве дьнйайе рʹәш ә. У әԝ бәрхԝә дькʹәвә чахе дьбинә кӧ мәрьв чаԝа дьчәрчьрьн. Кʹьтеба Пироз дьбежә кӧ: «Әԝ бона ԝә хәм дькә». (Бьхунә 1 Пәтрус 5:7.)

12, 13. (а) Жь кʹӧ щәм мә һәйә һʹӧнӧред лапи баш, демәк һʹьзкьрьн? (б) Чьма тӧ дькари баԝәр ки, ԝәки Хԝәде әʹсәйи һʹәму нәһәԛийа у чәтьнайа бьдә һьлдане?

¹² Әм жь кʹӧ заньн ԝәки нәһәԛийед ве дьнйайе Хԝәде  хԝәш найен? Бона ве йәке гәлә избаткьрьн һәнә. Мәсәлә Кʹьтеба Пироз дьбежә, ԝәки Хԝәде мәри мина хԝә әʹфьрандийә (Дәстпебун 1:26). Әв һʹӧнӧред баш чь кӧ щәм мә һәнә, жь Хԝәде нә. Мәсәлә, тӧ чь ль сәр хԝә тʹәхмин дьки чахе дьбини кӧ мәрики ԛәнщ у һәԛ дьчәрчьрә? Һәрге нәһәԛийед ӧса тә хԝәш найен, бьзаньбә ԝәки һе зедә Хԝәде хԝәш найен.

¹³ Һʹӧнӧрәки лапи баш йе кӧ щәм мә һәйә, әв һʹьзкьрьн ә. Әва жи жь Хԝәде йә. Кʹьтеба Пироз дьбежә, ԝәки «Хԝәде һʹьзкьрьн ә» (1 Йуһʹәнна 4:8). Демәк щәм мә һʹьзкьрьн ләма һәйә, чьмки Хԝәде әв һʹӧнӧре хԝә дәрбази мә кьрийә. Рʹожа иройин әм дьбиньн кӧ дьнйайеда гәлә нәһәԛи тенә кьрьне. Ԝәки дәсте тә бьһата, тәйе һʹәму нәһәԛи бьда һьлдане? Һьлбәт тәйе бьхԝәста әв йәк бькьра, чьмки һʹьзкьрьна тә һәйә. Һәрге әм дьхԝазьн хьрабийе бьдьнә һьлдане, демәк Хԝәде жь мә зәʹфтьр дьхԝазә. Ләма жи Хԝәде әʹсәйи һʹәму нәһәԛи у зӧлми ԝе бьдә һьлдане. Әв созед кӧ ль сәр рʹупʹела 4 һатийә ньвисаре, нә тʹәне хԝәстьна дьла йә, у нә жи чʹирʹок ьн. Әв созед Хԝәде нә у әʹсәйи ԝе бенә сери! Ләма жи тӧ чьԛаси зәʹф дәрһәԛа Хԝәде пебьһʹәси, һаԛаси баԝәрийа тә һьндава созед ԝи ԝе һе зедә бә.

14. Наве Хԝәде чь йә, у чьрʹа әм гәрәке әви нави бьдьнә хәбате?

¹⁴ Чахе тӧ дьхԝази тʹәви йәке бьби нас, тӧ чь дьки? Пешийе наве хԝә жерʹа дьбежи, ӧса нинә? Ле гәло наве Хԝәде чь йә? Иро ниве зәʹф жь мәрийа баԝәр дькьн ԝәки гәлә хӧдан һәнә, у наве ԝан һәр кәса һәйә. Ле Кʹьтеба Пироз һин дькә, ԝәки Хԝәдайе рʹаст  йәк ә. Һьнә ӧлмдар жи дьбежьн ԝәки Хԝәде йәк ә у наве ԝи «Хӧдан ә», йан жи «Хԝәде» йә. Ле бь рʹастийе әв наве Хԝәде нин ьн. Әв сәрнав ьн, мәсәлә ча «пʹадша» йан «сәрок». Кʹьтеба Пироз һин дькә, ԝәки сәрнавед Хԝәде гәләк һәнә, «Хӧдан» «Хԝәде» әв тʹәне һьнә жь ван сәрнава нә. Һьн жи Кʹьтеба Пироз һин дькә, ԝәки тʹәне навәки Хԝәде һәйә, Йаһоԝа. Дь Кʹьтеба Пирозда йа сәр зьмане Кӧрманщи, кʹьтеба Дәркʹәтьне 3:15-да, дина хԝә бьдә насийа бь стәйрке нишанкьри, кʹидәре ӧса ньвисар ә: «Бь зьмане ибрани хәбәра «Хӧдан» ЙҺԜҺ ньвисар ә у те хԝәндьне чаԝа «Йаһԝәһ», йан жи «Йаһоԝа (ПКʹМ)». Һәрге дь ԝәлгәрʹандьна Кʹьтеба Пирозда йе кӧ бал тә һәйә, наве  Йаһоԝа тʹӧнә, тӧ дькари дь ве кʹьтебеда бьньһерʹи рʹупʹела 195-197 у пебьһʹәси чьрʹа әԝ жь һьнә ԝәлгәрʹандьна һатийә дәрхьстьне. Ле бь рʹастийе дь Кʹьтеба Пирозә орижиналеда наве Хԝәде ԝәкә бь һʹәзара щар һәйә. Бь ве йәке те кʹьфше, ԝәки Йаһоԝа хԝәха дьхԝазә кӧ әм наве ԝи бьзаньбьн у һьлдьн. Демәк Йаһоԝа Хԝәде дьхԝазә пе Кʹьтеба Пироз хԝә тәрʹа әʹйан бькә.

15. Наве Йаһоԝа чь дьдә кʹьфше?

¹⁵ Хԝәде наве ӧса хԝәрʹа жьбартийә, кӧ гәлә тьштед фәрз те һʹәсабе. Наве ԝи Йаһоԝа, те һʹәсабе кӧ әԝ һәр созәки хԝә дькарә бинә сери у һәр нетәкә хԝә, кӧ данийә пешийа хԝә, ԝе бинә сери. * Навәки ӧса ида тʹӧнә йә, әв нав тʹәк ә. Тʹәне Хԝәде һежайи ви нави йә у тʹәне ԝирʹа әв нав  дькʹәвә. Демәк жь һʹәму алийава йәки мина Йаһоԝа тʹӧнә, у тʹӧ кәс нькарә бәрамбәри ԝи бә. Гәло әв чь те һʹәсабе?

16, 17. Әм чь педьһʹәсьн жь Кʹьтеба Пироз дәрһәԛа Йаһоԝа жь ԝан гьлийа: (а) Хԝәдайе «Һʹәму Зорайийе»? (б) Хԝәдайе «жь бәрʹийа һʹәму һәбуне, һʹәта-һʹәтайе»? (в) «Әʹфьрандар»?

¹⁶ Зәбура 83:18 бона Йаһоԝа дьбежә, кӧ әԝ Хԝәдайе «һәри мәзьн ә». Тʹәне бона Хԝәде Йаһоԝа те готьне ԝәки әԝ ә «Хԝәдейе һʹәму Зорайийе». Әʹйанти 15:3 дьбежә: «Кьред тә мәзьн у әʹщеб ьн Хӧдан Хԝәдейе Һʹәму Зорайийе!» Әв гьли кӧ Йаһоԝа Хԝәдайе «Һʹәму Зорайийе йә», те һʹәсабе, кӧ Йаһоԝа жь һʹәмуйа зортьр у ԛәԝаттьр ә. Йәки мина ԝи тʹӧнә йә, у әԝ ль сәр һʹәмуйарʹа йә. Чьмки дәстпебуна һәр тьшти һәбуйә, ле дәстпебуна Йаһоԝа тʹӧнә, әԝ тʹьме һәбу у ԝе һәбә. Кʹьтеба Зәбура 90:2 дьбежә: «Жь бәрʹийа тʹәвайә һәбуне һʹәта-һʹәтайе, тʹәне тӧ Хԝәда йи (АБ)». Әв фькьр мәрийа дьдә ләрьзандьне, ӧса нинә?

¹⁷ Йәки мина Йаһоԝа Хԝәде тʹӧнә, чьмки тʹәне әԝ ә Әʹфьрандар. Кʹьтеба Әʹйанти 4:11 дьбежә: «Йа Хӧдан Хԝәдейе мә, тӧ һежа йи кӧ рʹумәт, һӧрмәте у ԛәԝате бьстини. Чьмки тә һәр тьшт әʹфьрандьн у бь хԝәстьна тә әԝ әʹфьрин у һәнә». Һʹәму тьштед кӧ тӧ дькари бьбини, дәстпебуйи жь стәйрка кӧ дьчʹурьсьн, һʹәта даред щурʹә-щурʹә у мәʹсийед дь бәʹреда у чʹемда, әʹфьрандьна Йаһоԝа нә!

18. Чьрʹа һьнә мәрийа тʹьре, кӧ әԝана тʹӧ щар нькарьн незики Йаһоԝа Хԝәде бьн, ле чь һин дькә Кʹьтеба Пироз?

¹⁸ Гава мәрьв дьхуньн дәрһәԛа һьмзорйа Йаһоԝа, тьрс дькʹәвә дьле ԝан. Ԝана тʹьре кӧ Йаһоԝа Хԝәде жь ԝан гәләк дур ә, у әԝана тʹӧ щар нькарьн незики ԝи бьн, у дьбәк жи бәр чʹәʹве Хԝәде ԛә тʹӧ тьшт жи найенә һʹәсабе. Ле әва рʹаст ә? Кʹьтеба Пироз щурʹәки майин һин дькә. Дәрһәԛа Йаһоԝа әԝ дьбежә: «Ле әԝ Хԝәде жь мә һәр кәси нә дур ә» (Кʹаред Шандийа 17: 27). Ӧса жи Кʹьтеба Пироз мә ширәт дькә: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8).

19. (а) Ча әм дькарьн хԝә ль Хԝәде бьгьрьн, у әв йәк чь кʹаре ԝе мәрʹа бинә? (б) Кʹижан һʹӧнӧред Хԝәде жь һʹәмушка зедәтьр тә хԝәш тен?

 ¹⁹ Ле ча тӧ дькари незики Йаһоԝа Хԝәде би? Йа пешьн, һәрге тӧ диса һе зедә пебьһʹәси у һин би дәрһәԛа Хԝәде. Дь Кʹьтеба Пирозда ӧса ньвисар ә: «Әв ә жийина һʹәта-һʹәтайе, ԝәки әԝ тә нас кьн, чаԝа Хԝәдейе рʹасти бешьрики-беһәвал у ӧса жи Иса Мәсиһе кӧ тә шандийә» (Йуһʹәнна 17:3). Демәк Кʹьтеба Пироз һин дькә, кӧ һәрге әм һин бьн дәрһәԛа Йаһоԝа әме «жийина һʹәтаһʹәтайе» бьстиньн! Ча ида һатьбу готьне Хԝәде рʹасти жи «һʹьзкьрьн ә» (1 Йуһʹәнна 4:16). Ле хенщи һʹьзкьрьне, диса гәләк һʹӧнӧред баш бал Йаһоԝа Хԝәде һәнә. Мәсәлә Кʹьтеба Пироз сәва Йаһоԝа һа дьбежә, ԝәки әԝ һәйә «Хԝәдейе рʹәʹм у кʹәрәме, сәбьр-ськʹане, бь һӧб у амьнийеда хьнейо» (Дәркʹәтьн 34:6, ПКʹМ). Әԝ ԛәнщ ә у бахшандьнерʹа һазьр ә (Зәбур 86:5). Хԝәде сәбьр дькә (2 Пәтрус 3:9). Әԝ амьн ә (Ибрани 11:11). Ԝәʹде хԝәндьна Кʹьтеба Пироз тӧйе һе зедә пебьһʹәси, ԝәки Йаһоԝа Хԝәде чаԝа ван һʹӧнӧред баш дьдә хәбате у әʹйан дькә.

20-22. (а) Рʹаст ә әм нькарьн Хԝәде бьбиньн, ле әв те һʹәсабе ԝәки әм нькарьн незики ԝи бьн? Шьровәкә. (б) Һьнә мәри ча хер-хԝазе тә, чь дькарьн бькьн, ле тӧ чь гәрәке бьки?

²⁰ Рʹаст ә тӧ нькари Йаһоԝа бьбини, чьмки әԝ Рʹӧһʹ ә у найе дитьне (Йуһʹәнна 1:18; 4:24; 1 Тимотʹейо 1:17). Ле бь сайа хԝәндьна Кʹьтеба Пироз тӧйе бькарьби ԝи нас ки, ча Кәсе кӧ рʹасти жи һәйә. Ча зәбурбеж гот әм рʹасти жи дькарьн рʹәʹма Йаһоԝа бьбиньн (Зәбур 27:4; Рʹомайи 1:20). Тӧ чьԛас зәʹф Кʹьтеба Пироз бьхуни, һаԛас зәʹф Йаһоԝа сәва тә ԝе бьбә кәсе рʹасти у зенди, у һе зедә мәʹни ԝе тәрʹа һәбьн, ԝәки Йаһоԝа һʹьз бьки у һе незики ԝи бьби.

²¹ Паше тӧйе пебьһʹәси, ԝәки чьрʹа дь Кʹьтеба Пирозда сәр Йаһоԝа те готьне Бав (Мәтта 6:9). Әԝи нә тʹәне әʹмьр дайә мә, ле ча Бавәки зарʹед хԝә һʹьз дькә, әԝ мәрʹа ԛәнщийе дьхԝазә у һьн жи дьхԝазә ԝәки әм бәхтәԝар бьн (Зәбур 36:9). Хенщи ве йәке Кʹьтеба Пироз һин дькә, ԝәки мәри дькарьн бьбьнә достед Йаһоԝа Хԝәде (Аԛуб 2:23). Дә  тӧ тʹәне бьдә һʹәсабе хԝә, ԝәки Әʹфьрандаре дьнйайе дькарә бьбә досте тә!

²² Һәрге тӧ һинбуна Кʹьтеба Пироз бәрдәԝан ки, дьԛәԝьмә һьнә мәри ча хер-хԝазе тә, тә бьдьнә зоре ԝәки тӧ Кʹьтеба Пироз һин нәби. Әԝана дькарьн бәрхԝә кʹәвьн дәрһәԛа ԝе йәке, кӧ тӧ жь дине хԝә дәрдькʹәви. Ле изьне нәдә тʹӧ кәси жь ԝана рʹийа тә бьгьрьн, ԝәки достийе һәвале лапи башрʹа бьки.

23, 24. (а) Чьрʹа гәрәке шәрм нәки тʹьме пьрса бьди? (б) Дәрһәԛа чь әме дь сәре дьнда пебьһʹәсьн?

²³ Дьбәк кӧ тьштәк тәрʹа ԝе фәʹмдари нибә. Ле шәрм нәкә аликʹарийе бьхԝази. Сәва ве йәке һьлбәт тәрʹа мьлукти лазьм ә. Һәла һе дь Кʹьтеба Пирозда жи те готьне, ԝәки әм гәрәке мина зарʹа мьлук бьн (Мәтта 18:2-4). Ле зарʹ шәрм накьн гәлә пьрса бьдьн. Ләма жи Хԝәде дьхԝазә ԝәки тӧ пьрса бьди у щабед ԝан бьстини. Кʹьтеба Пироз пәсьне ԝан мәрийа дьдә, йед кӧ дьхԝәстьн пебьһʹәсьн дәрһәԛа Хԝәде. Әԝана кʹур Кʹьтеба Пироз леколин дькьрьн, ԝәки рʹаст бьзаньбьн һәла тьштед кӧ әԝана дьхуньн рʹаст ьн, йан на. (Бьхунә Кʹаред Шандийа 17:11.)

²⁴ Бь сайа һинбуна Кʹьтеба Пироз тӧйе һе баш пебьһʹәси дәрһәԛа Йаһоԝа Хԝәде. Кʹьтеба Пироз нә мина һʹәму кʹьтеба нә. Ле гәло чьрʹа? Дәрһәԛа ве йәке әме дь сәре дьнда пебьһʹәсьн.