1, 2. Wetin mek i fayn fɔ de aks kwɛstyɔn?

YU DƆN ɛva si di we aw pikin dɛn de aks kwɛstyɔn? Plɛnti pan dɛn kin bigin aks kwɛstyɔn as dɛn bigin tɔk so. Dɛn go tɔn to yu ɛn bigin aks yu kwɛstyɔn dɛn lɛk: Wetin dis? Usay Gɔd de? Udat mek dis? Yu kin tray fɔ ansa di kwɛstyɔn dɛn, bɔt i nɔ kin izi. Ivin we yu go dɔn gi dɛn yu bɛst ansa, dɛn go stil aks yu bak: Wetin mek?

² Nɔto pikin dɛn nɔmɔ kin aks kwɛstyɔn. Big pipul dɛnsɛf kin aks kwɛstyɔn. Wi kin aks kwɛstyɔn dɛn so dat wi go no usay wi de go, fɔ mek bad tin nɔ mit wi, ɛn fɔ no mɔ bɔt sɔntin. Bɔt bɔku pipul dɛn dɔn lɛf fɔ aks kwɛstyɔn, ivin di impɔtant kwɛstyɔn dɛn. Dat min se, dɛn dɔn lɛf fɔ fɛn di ansa dɛn.

3. Wetin mek plɛnti pipul dɛn dɔn lɛf fɔ aks sɔm pan di impɔtant kwɛstyɔn dɛn?

³ Tink bɔt di kwɛstyɔn we de na di fɔs pej na dis buk, ɛn di kwɛstyɔn dɛn we de na  pej tri ɛn pej siks. Dɛn kwɛstyɔn ya na sɔm pan di impɔtant kwɛstyɔn dɛn we yu go lɛk fɔ aks. Bɔt plɛnti pipul dɛn dɔn stɔp fɔ fɛn di ansa to dɛn kwɛstyɔn ya. Yu no wetin mek? Sɔm dɛn de dawt if di Baybul gɛt di ansa dɛn. Sɔm de fil se di ansa dɛn at fɔ ɔndastand. Ɔda wan dɛn de shem fɔ aks kwɛstyɔn. Ɛn sɔm dɛn de tink se na di bigman dɛn pan Gɔd biznɛs nɔmɔ fɔ no di ansa dɛn. Wetin yu tink?

4, 5. Us impɔtant kwɛstyɔn dɛn wi kin aks? Wetin mek wi fɔ tray fɔ no di ansa dɛn?

⁴ Sɔntɛm yu go want fɔ no di ansa to di impɔtant kwɛstyɔn dɛn na layf. Sɔm pan dɛn kwɛstyɔn ya na: ‘Wetin mek Gɔd gi wi layf? Gɔd mek wi fɔ lɛ dɛn jɔs bɔn wi, wi ol, dɔn wi day? Aw Gɔd tan lɛk?’ I fayn fɔ de aks dɛn kwɛstyɔn ya, ɛn yu fɔ kɔntinyu fɔ fɛn di ansa dɛn te yu fɛn di kɔrɛkt ansa dɛn. Jizɔs Krays bin se: “Una aks Gɔd fɔ ɛnitin, i go gi una; una luk gud, una go fɛn wetin una de luk fɔ; una kɔnk, Gɔd go opin di do fɔ una.”—Matyu 7:​7.

⁵ If yu kɔntinyu fɔ “luk gud” fɔ di ansa dɛn to dɛn kwɛstyɔn ya, yu go si se nɔto fɔ natin yu bin de fɛn dɛn. (Prɔvabs 2:​1-5) Ilɛk wetin ɔda pipul dɛn bin dɔn tɛl yu, di ansa dɛn de, ɛn yu go ebul fɛn dɛn na di Baybul. Di ansa dɛn nɔ at fɔ ɔndastand. Pantap dat, dɛn de mek wi gɛt op ɛn gladi at. Ɛn dɛn go ɛp yu fɔ ɛnjɔy yu layf rayt naw. Naw, wi de kam tɔk bɔt wan kwɛstyɔn we de mɔna bɔku pipul dɛn.

6. Wetin mek bɔku pipul dɛn de tink se Gɔd nɔ bisin bɔt wi?

⁶ Bɔku pipul dɛn de tink se Gɔd nɔ bisin bɔt wi. Dɛn kin se, ‘If Gɔd bisin bɔt wi, i bin fɔ dɔn mek di bad bad tin dɛn we de apin na di wɔl, lɛf fɔ apin.’ Ɔlsay  na di wɔl, yu go yɛri bɔt wɔ, bad at ɛn plɛnti ɔda bad bad tin dɛn. Apat frɔm dat, wisɛf kin sik, wi kin sɔfa, ɛn pipul dɛn we wi lɛk kin day. Na dat mek bɔku pipul dɛn kin tɔk se, ‘If Gɔd bisin bɔt wi, i bin fɔ dɔn mek ɔl dɛn bad tin ya lɛf fɔ apin.’

7. (a) Aw di bigman dɛn pan Gɔd biznɛs kin mek pipul dɛn fil se Gɔd nɔ bisin bɔt wi? (b) Wetin di Baybul se bɔt di bad bad tin dɛn we kin apin?

⁷ Di tin we bad pas ɔl na dat, di bigman dɛn pan Gɔd biznɛs kin mek pipul dɛn fil se Gɔd nɔ bisin bɔt wi. Aw dɛn kin du dat? We bad tin kin apin, dɛn kin tɔk se na Gɔd mak am. So, dɛn pipul ya de blem Gɔd fɔ di bad tin dɛn we de apin. Na Gɔd de mak dɛn tin ya? Wetin rili di Baybul se? Jems 1:​13 se: “Wɛn ɛnitin mit pɔsin we go mek di pɔsin want fɔ du bad, i nɔ fɔ se, ‘Na Gɔd mek a want du dis bad ya.’ Bikɔs Gɔd nɔ de du bad ɛn i nɔ de du ɛnibɔdi ɛnitin we go mek di pɔsin fil fɔ du bad.” So nɔto Gɔd de mek dɛn bad tin ya de apin na di wɔl. (Rid Job 34:​10-12.) Bɔt i de alaw bad tin dɛn fɔ apin. Fɔ mek sɔntin apin ɛn fɔ alaw am fɔ apin, na tu difrɛn tin.

8, 9. (a) Us ɛgzampul sho se fɔ alaw bad tin fɔ apin ɛn fɔ mek bad tin apin, na tu difrɛn tin? (b) Wetin mek i nɔ fayn fɔ blem Gɔd fɔ we i alaw mɔtalman fɔ liv bad layf?

⁸ Fɔ ɛgzampul, tink bɔt wan papa we gɛt sɛns ɛn we lɛk in bɔy pikin. Di bɔbɔ dɔn big ɛn i stil de na os wit in papa. Wan de, di bɔbɔ tɛl in papa se i want go de fɔ insɛf. In papa nɔ stɔp am. Di bɔbɔ go liv bad layf ɛn gɛt trɔbul. Wi go se na in papa mek i gɛt trɔbul? Nɔ, nɔto in papa. (Lyuk 15:​11-13) Semweso, we mɔtalman bigin fɔ liv bad layf, Gɔd nɔ stɔp wi. Bɔt nɔto in de mek bad tin dɛn de mit wi. So, i nɔ rili fayn fɔ blem Gɔd fɔ di bad tin dɛn we de apin to wi.

 ⁹ Gɔd gɛt gud rizin we mek i de alaw bad tin dɛn fɔ apin. I gɛt sɛns, i gɛt pawa, ɛn na in mek wi, so i nɔ nid fɔ tɛl wi wetin mek i de alaw dɛn bad tin ya fɔ apin. Bɔt Gɔd tɛl wi bikɔs i lɛk wi. Na Chapta 11, wi go lan mɔ bɔt wetin mek Gɔd de alaw bad tin dɛn fɔ apin. Bɔt no se, nɔto Gɔd de mek bad tin dɛn apin to wi. Bɔt, na in nɔmɔ go ebul sɔlv wi prɔblɛm dɛn!—Sam 46:​1.

10. Wetin mek wi biliv se Gɔd go stɔp ɔl di bad tin dɛn we de apin?

¹⁰ Pantap dat, Jiova na oli Gɔd. (Ayzaya 6:​3) Dis min se i klin pas ɛnitin we yu kin tink bɔt. Gɔd nɔ de du ɛnitin we bad. So wi fɔ biliv am tranga tranga wan. Bɔt wi nɔ go biliv mɔtalman da kayn we de, bikɔs dɛn kin du bad. Sɔm pipul dɛn kin want fɔ stɔp di bad tin dɛn we pipul dɛn de du, bɔt dɛn nɔ gɛt di pawa fɔ stɔp dɛn. Bɔt Gɔd gɛt pawa pas ɔlman. I ebul ɛn i go stɔp ɔl di bad bad tin dɛn we mɔtalman de du. We Gɔd du dis, ɔl di bad tin dɛn we de apin naw, nɔ go apin igen!—Rid Sam 37:​9-11.

11. (a) Aw Gɔd de fil bɔt di tin dɛn we nɔ rayt? (b) Aw Gɔd de fil we yu de sɔfa?

¹¹ Aw Gɔd de fil bɔt di tin dɛn we de apin na yu layf ɛn na di wɔl? Di Baybul tɔk se, “Jiova lɛk fɔ du tin tret.” (Sam 37:​28, NW) So, Gɔd want lɛ pipul dɛn du wetin rayt. Dis na impɔtant tin to am. I et ɛnitin we nɔ rayt. Di Baybul se trade trade, Gɔd “in at pwɛl” we mɔtalman bin de du bad ɔlsay na di wɔl. (Jɛnɛsis 6:​5, 6) Gɔd nɔ de chenj. (Jems 1:​17) I stil et di bad bad tin dɛn we de apin na di wɔl. Ɛn i nɔ lɛk fɔ si we pipul dɛn de sɔfa. Di Baybul se Gɔd “bisin bɔt una.”—Rid Pita In Fɔs Lɛta 5:​7, NW.

12, 13. (a) Wetin mek wi lɛk ɔda pipul dɛn? Aw dis de mek wi fil we wi de si pipul dɛn de sɔfa? (b) Wetin mek yu shɔ se Gɔd go mɔs pul ɔl di bad bad tin dɛn we de apin na di wɔl?

 ¹² Di ɔda tin we mek wi biliv se Gɔd nɔ lɛk fɔ si we wi de sɔfa na bikɔs di Baybul se, Gɔd mek wi lɛk aw i de. (Jɛnɛsis 1:​26) So wi gɛt fayn kwaliti dɛn bikɔs Gɔd gɛt fayn kwaliti dɛn. Fɔ ɛgzampul, yu kin fil am we yu de si gud pipul dɛn de sɔfa, nɔto so? If yu kin fil am, na fɔ no se Gɔd de fil am pas yu.

¹³ Wan fayn kwaliti we mɔtalman gɛt, na we wi ebul lɛk pɔsin ɔ sɔntin. Na so Gɔd sɛf de. Di Baybul se “Gɔd na di wan we nɔ de tap fɔ lɛk.” (Jɔn In Fɔs Lɛta 4:​8) Wi kin lɛk ɔda pipul dɛn bikɔs Gɔd lɛk wi. Yu lɛk fɔ si we pipul dɛn de sɔfa? If yu bin gɛt di pawa fɔ mek pipul dɛn lɛf fɔ sɔfa, wetin yu bin fɔ dɔn du? Yu bin fɔ dɔn mek dɛn lɛf fɔ sɔfa, nɔto so? So na fɔ biliv se Gɔd go pul ɔl di tin dɛn we de mek wi sɔfa ɛn di tin dɛn we nɔ rayt. Di fayn fayn prɔmis dɛn we wi bin tɔk bɔt na pej 4 ɛn pej 5, na tin dɛn we gɛt fɔ apin. Ɛnitin we Gɔd prɔmis, i mɔs apin! Fɔ lɛ yu biliv ɔl dɛn prɔmis ya, i go fayn fɔ mek yu no fɔs bɔt di Gɔd we se i go du dɛn.

14. Wetin na Gɔd in nem? Wetin mek wi fɔ yuz am?

¹⁴ Wetin yu go du if yu want mek pɔsin sabi yu? Yu nɔ go sho am  yu nem? Gɔd gɛt nem? Bɔku rilijɔn dɛn se na in nem “Gɔd” ɔ “Lɔd.” Bɔt dande dɛn nɔto nem. Dɛn na taytul dɛn lɛk “kiŋ” ɛn “prɛsidɛnt.” Di Baybul se Gɔd gɛt bɔku bɔku taytul dɛn. Sɔm pan dɛn na “Gɔd” ɛn “Lɔd.” Bɔt di Baybul tɔk bak se Gɔd gɛt nem. I se Gɔd in nem na Jiova. Di Baybul tɔk na Sam 83:​18 (NW) se: “Yu, we nem Jiova, na yu wangren de oba ɔlman na di wɔl.” If di Baybul we yu de yuz nɔ gɛt Gɔd in nem, na fɔ rid pej 195 to pej 197 fɔ no wetin mek i nɔ gɛt am. Fɔs fɔstɛm we dɛn bin rayt di Baybul, Gɔd in nem bin de de lɛk 7,000 tɛm so. Jiova want mek yu sabi in nem ɛn mek  yu go de yuz am. So wi go se, Gɔd de yuz di Baybul fɔ mek wi no am.

15. Wetin Gɔd in nem min?

¹⁵ Di nem we Gɔd gi insɛf, gɛt minin. Di nem Jiova, min se Gɔd ebul fɔ du ɛnitin we i prɔmis ɛn i ebul fɔ du ɛnitin we i want fɔ du. * Gɔd in nem spɛshal. Na in wangren gɛt da nem de. Bɔt nɔto da we de nɔmɔ Jiova spɛshal; ɔda we dɛn de we i spɛshal. Wetin mek wi se so?

16, 17. Wetin di Baybul min we i se Jiova: (a) na “di Ɔlmayti”? (b) “nɔ de day”? (c) Apat frɔm dɛn tu tin ya, wetin bak mek Jiova spɛshal?

¹⁶ Insay Sam 83:​18 (NW), di Baybul se na Jiova  “wangren de oba ɔlman na di wɔl.” Di Baybul tɔk bak se na Jiova in wan na di “Ɔlmayti.” Insay Sam 71:​16, di Baybul se Jiova “na GƆD Ɔlmayti.” We di Baybul se Gɔd Ɔlmayti, i min se Jiova gɛt pawa pas ɔlman. Nɔbɔdi nɔ gɛt di kayn pawa we i gɛt. Insay Fɔs Lɛta To Timoti 1:​17, di Baybul se Gɔd na “di Kiŋ we bin de, we de naw ɛn we go de sote go, we nɔ de day.” Dis de sho wi se na Gɔd wangren nɔ gɛt biginin ɛn nɔ gɛt ɛndin. Na dat mek Sam 90:​2 se: “Bifo yu mek di mawnten dɛn ɛn infakt sɛf bifo yu mek di wɔl, yu bin dɔn bi di PAPA GƆD we wi de wɔship, ɛn yu go stil bi wi PAPA GƆD sote go.” Dis de sho se Gɔd wɔndaful, nɔto so?

¹⁷ Na Jiova in wangren mek ɔltin. Dis na ɔda rizin we mek Jiova spɛshal. Na dat mek Rɛvɛleshɔn 4:​11 se: “Wi Masta ɛn wi Gɔd! Yu fit fɔ mek wi fɔdɔm na yu fut, ɛn prez yu, ɛn sho se yu gɛt pawa, bikɔs na yu mek ɔltin ɛn yu mek dɛn ɛn gi dɛn layf bikɔs na dat yu want.” Na Jiova mek ɔltin. Na in mek di enjɛl dɛn we de na ɛvin, di sta dɛn we de na di skay, di frut dɛn we de gro na di tik dɛn ɛn di fish dɛn we de swim na wata.

18. Wetin mek sɔm pipul dɛn kin fil se dɛn nɔ go ɛva ebul go nia Gɔd? Bɔt wetin di Baybul se?

¹⁸ Sɔm pipul dɛn kin fred we dɛn kin rid bɔt di kwaliti dɛn we Jiova gɛt. Dɛn kin fil se bikɔs Gɔd de pantap ɔlman, i nɔ go izi fɔ go nia am. Ɛn dɛn kin fil bak se dɛn nɔ min natin na Gɔd in yay. Bɔt dat na tru? Di Baybul se nɔto so Gɔd de. I se Jiova “de [nia] wi ɔl.” (Di Apɔsul Dɛn Wok [Akt] 17:​27) Di Baybul ivin tɛl wi se: “Una kam klos [nia] Gɔd ɛn i go kam klos [nia] una.”—Jems 4:​8.

19. (a) Aw wi go ebul go nia Gɔd? Wetin dat go gi wi? (b) Us kwaliti dɛn we Gɔd gɛt we yu lɛk?

 ¹⁹ Aw yu go ebul go nia Gɔd? Di fɔs tin we yu fɔ du, na fɔ kɔntinyu fɔ du wetin yu de du rayt naw. Jizɔs bin se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ no Jizɔs Krays, we yu sɛn kam to dɛn.” (Jɔn 17:​3) Di Baybul se fɔ lɛ wi gɛt da layf de, wi gɛt fɔ lan bɔt Jiova ɛn Jizɔs. Wi bin dɔn lan se, “Gɔd na di wan we nɔ de tap fɔ lɛk.” (Jɔn In Fɔs Lɛta 4:​16) Nɔto da kwaliti de nɔmɔ Jiova gɛt. I gɛt ɔda fayn fayn kwaliti dɛn. Fɔ ɛgzampul, di Baybul se Jiova na Gɔd we ‘gɛt sɔri-at, i nɔ gɛt wamat ɛn di lɔv we i gɛt fɔ wi nɔ de chenj, dɔn bak, i nɔ de kɔmɔt biɛn wi.’ (Sam 86:​15) Di Baybul tɔk bak se Jiova “na gud PAPA GƆD ɛn [i] de fɔgiv.” (Sam 86:​5) Jiova na Gɔd we “de bia” wit wi. (Pita In Sɛkɛn Lɛta 3:​9) I nɔ de lɛf udat de fala am. (Rɛvɛleshɔn 15:​4, NW) As yu de rid di Baybul, na so yu go de si aw Jiova de sho se i gɛt bɔku fayn fayn kwaliti dɛn.

20-22. (a) Ɛksplen aw wi go ebul go nia Gɔd pan ɔl we wi nɔ de si am. (b) Wetin sɔm pan yu padi ɛn fambul dɛn go want mek yu du? Bɔt wetin yu fɔ du?

²⁰ Gɔd na Spirit, wi nɔ de si am. (Jɔn 1:​18; 4:​24; Fɔs Lɛta To Timoti 1:​17) Bɔt we wi de lan bɔt am na di Baybul, wi go ebul fɔ no mɔ bɔt am. Di Baybul se we wi lan bɔt Jiova, wi go ebul fɔ “ɛnjɔy in gudnɛs.” (Sam 27:​4; Lɛta Fɔ Rom 1:​20) As yu de lan bɔt Jiova, na so una padi biznɛs go de tayt mɔ ɛn mɔ, ɛn na so yu go de lɛk am ɛn want fɔ de nia am.

²¹ Yu go de no smɔl smɔl wetin mek di Baybul se Gɔd na wi Papa. (Matyu 6:​9) Na in gi wi layf. Lɛk ɛni papa we lɛk in pikin dɛn, Gɔd want mek wi ɛnjɔy layf. (Sam 36:​9) Di Baybul tɔk bak se wi go ebul bi Jiova in  padi. (Jems 2:​23) Jɔs tink bɔt dat, yu ɛn di Pɔsin we mek di wan ol wɔl go bi padi!

²² As yu de lan mɔ bɔt di Baybul, sɔm pan yu padi ɛn fambul dɛn go want mek yu lɛf fɔ stɔdi di Baybul. Dɛn go de tink se yu de kam bigin biliv difrɛn tin ɛn lɛf fɔ du di tin dɛn we una ɔl bin de du. Bɔt nɔ mek ɛnibɔdi stɔp yu fɔ lan bɔt aw yu go bi Gɔd in padi.

23, 24. (a) Wetin mek i fayn fɔ de aks kwɛstyɔn bɔt di tin dɛn we yu de lan? (b) Wetin wi go tɔk bɔt na di nɛks chapta?

²³ Nɔto ɔltin yu go ebul ɔndastand wantɛm wantɛm. I go fayn fɔ mek yu put yusɛf dɔŋ ɛn aks kwɛstyɔn. Nɔ shem fɔ aks. Jizɔs bin se, i fayn fɔ put wisɛf dɔŋ lɛk smɔl pikin. (Matyu 18:​2-4) Wi no se pikin dɛn kin aks bɔku kwɛstyɔn. Gɔd want lɛ yu no di ansa dɛn to di kwɛstyɔn dɛn we yu gɛt. Di Baybul bin tɔk fayn bɔt sɔm pipul dɛn we bin rɛdi fɔ lan bɔt Gɔd. Dɛn bin de rid di Baybul gud gud wan fɔ no if wetin dɛn de lan, na di tru.—Rid Di Apɔsul Dɛn Wok [Akt] 17:​11.

²⁴ Di bɛst we fɔ lan bɔt Jiova na fɔ stɔdi di Baybul. Di Baybul difrɛn frɔm ɔda buk dɛn. Wetin mek wi se so? Di nɛks chapta go tɔk bɔt dat.