1, 2. Engvângin nge zawhna zawh chu a ṭhat fo?

NAUPANGIN zawhna an zâwt lai i hmu tawh ngai em? Naupang tam tak chuan ṭawng an zir thiam veleh zawhna an zâwt nghâl mai ṭhîn. I chhânna hriat nghâkhlel taka melh kar chung chein hêng zawhna: Engtin nge ka lo pian? Engtin nge ruah hi a lo sûr theih? Tuin nge sava hi hrâm dân zirtîr? tihte an zâwt che a. I theih tâwkin hrilhfiah i han tum a; mahse, a awlsam ṭhîn lo. I theih tâwka i hrilhfiah hnuah pawh, Engati nge? tiin an la zâwt hrâm ṭhîn a ni.

² Naupangte chauh lo pawhin zawhna an zâwt ṭhîn a. Kan lo puitlin tial tial hian zawhna kan zâwt chho zêl a. Kan kawng zawh tûr hriat nân te, thil hlauhawm pumpelh ngai hriat nân te, leh thil hriat châkna kan neih tihreh nân te zawhna kan zâwt ṭhîn a ni. Mahse, mi tam tak chuan zawhna an zâwt ta lo a ang hle; a bîk takin, zawhna pawimawh tak maite chu an zâwt tawh lo. An zâwt a nih pawhin, a chhânna hmuh an tum tawh lo a ni.

3. Engvângin nge mi tam takin zawhna pawimawh ber berte chhânna zawn hmuh chu an tum tâk loh?

 ³ He lehkhabu kâwma zawhna te, a phêk tîr lama zawhna te, leh he Bung 1-na ṭan tîr lama zawhnate hi ngaihtuah teh. Hêngte hi i zawh theih tûr zawhna pawimawh takte zînga mi a ni. Mahse, mi tam tak chuan a chhânna zawn hmuh chu an tum ta lo. Eng nge a chhan? Bible-ah a chhânna a awm em? Ṭhenkhat chuan a chhânnate chu hriatthiam harsa lutuk tûrah an ngai a. Ṭhenkhat erawh chuan zawhna zawh chu thil zahthlâk tak niin an ngai bawk a. Mi dangte chuan chûng zawhnate chu sakhaw hruaitute leh Pathian thu lam zirtîrtute chauh chhân theih tûrah an dah thung a ni. Nang eng nge i ngaih ve dân?

4, 5. Nuna kan zawh theih zawhna pawimawh ber ber ṭhenkhat chu engte nge ni a, engvângin nge a chhânna kan zawn ang?

⁴ Nuna zawhna pawimawh tak takte chhânna hmuh chu i châk ngei a rinawm a. Engemaw châng chuan: ‘Nunin eng nge a tum? He dam chhûng mai hi em ni kan awm dâwn? Pathian dik chu eng ang mi nge a nih?’ tihte hi i ngaihtuah mai thei. Chutiang zawhna zawh chu thil ṭha tak a ni a, a chhânna lungawithlâk tak leh rin tlâk tak i hmuh hma loh zawnga zawn chhunzawm zêl pawh chu thil pawimawh tak a ni bawk. Zirtîrtu hmingthang tak Isua Krista chuan: “Dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u,” tiin a sawi a ni.—Matthaia 7:7.

⁵ Chûng zawhna pawimawh takte chhânna chu i ‘zawn’ zêl chuan manhla i ti hle ang. (Thufingte 2:1-5) Mite chuan eng pawh sawi mah se, a chhânna chu a awm a; chu chu Bible-ah i hmu thei a ni. A chhânna chu hriatthiam harsa lutuk a ni lo va. Chu mai bâkah, beiseina leh hlimna a pe bawk che a. Tin, tûn la la-ah hian lungawithlâk taka nung tûrin a ṭanpui thei bawk che a ni. Mi tam takte tibuaitu zawhna chu lo ngaihtuah ṭan ta ila.

6. Engvângin nge mi tam takin mihringte hrehawm tawrhna chungchângah Pathian chu mite ngaihsakna nei lo nia an ngaih?

⁶ Mi tam tak chuan Pathian chu chutiang a nih an ring a.  ‘Pathianin min ngaihsak se la chuan khawvêl hi tûn ang a ni dâwn em ni?’ tiin an ngaihtuah a ni. Kan hawina lam apiangah indona, inhuatna, leh hrehawm tawrhna hlîr kan hmu a. Tin, a mi mal tak pawhin kan dam lo va, hrehawm kan tuar a, kan hmangaih takte kan sûn bawk a ni. Hêngte avâng hian mi tam tak chuan, ‘Pathian hian keimahni leh kan buainate hi ngaihsak ni se la chuan, chûng thilte chu a thlentîr phal dâwn em ni?,’ an tih phah ṭhîn.

7. (a) Engtin nge sakhaw hruaitute chuan mi tam takte chu ‘Pathianin lainatna a nei lo,’ tih ngaih dân an neihtîr? (b) Chhiatna râpthlâk kan tawh theihte chungchângah Bible-in eng nge min zirtîr?

⁷ Chu aia pawi zâwk chu, sakhaw hruaitute’n mite chu, ‘Pathianin lainatna a nei lo,’ tih ngaih dân neihtîr châng an nei ṭhîn hi a ni. Engtin nge chutiang ngaih dân chu an neihtîr? Chhiatna râpthlâk tak a lo thlen hian, ‘Pathian remruat a ni,’ tiin an sawi ṭhîn a. A nihna takah chuan, chûng sakhaw hruaitute chuan thil ṭha lo, lo thleng ṭhînte hi Pathian awmtîrah an puh tihna a ni. Chûng chu Pathian thlentîr a ni tak zet em? He mi chungchângah hian Bible zirtîrna dik tak chu eng nge ni? Jeremia Ṭah Hla 3:33 chuan heti hian a chhâng a ni: “Mihring fate tihhrehawm leh tihvui hi a duhzâwng a ni si lo,” tiin. Chuvângin, Pathian chu i chhehvêla i hmuh suahsualnate awmtîrtu a ni lo rêng rêng. (Joba 34:10-12) Thil ṭha lote a thlen erawh a remti hrih a. Mahse, thil engemaw a thlen remtitu leh a thlentîrtu nih erawh chu a inang lo hle a ni.

8, 9. (a) Engtin nge suahsualna awm remtihna leh thlentîrtu nih danglamna chu i hrilhfiah ang? (b) Engvângin nge mihringte’n kawng sual an zawh rem a tih avânga Pathian dem chu a dik loh vang?

⁸ Entîr nân, fapa puitling tawh nei pa fing tak leh hmangaihna ngah tak chungchâng han ngaihtuah ta la. A fapa chu a lo sual a, in chhuahsan a han tum chuan, a pa chuan chhuak lo tûrin a dang lo. In a chhuahsan hnu chuan nun kawng ṭha lo zawhin, buaina khurah a tlu lût ta a ni. Chu buaina chu a pa thlentîr a ni thei ang em? Ni thei lo ve. (Luka 15:11-13) Chutiang bawkin, Pathian hian mihringte’n an duhthua nun kawng ṭha lo an zawhin, zawh lo tûrin a dang lo; mahse, chu kawng ṭha lo an zawh avânga harsatna an tawhte chu Pathian thlentîr tihna  a ni lo. Chutiang a nih si chuan, mihringte hrehawm tawrhna zawng zawnga Pathian mawhpuh chu thil dik lo tak a ni ngei ang.

⁹ Pathianin mihringte’n kawng sual an zawh rem a tih chhan ṭha tak a awm a. Min Siamtu fing tak leh thiltithei tak a nih angin, chutianga rem a tih chhan chu min hrilhfiah kher a ngai lo. Amaherawhchu, min hmangaih avângin a chhan min hrilhfiah a ni. Chu mi chungchâng chu Bung 11-naah kan zir chiang lehzual ang a. Mahse, chu mi hma chuan Pathian chu kan hrehawm tawrhnate thlentîrtu a ni lo tih ring tlat ang che. Chutih ahnêkin, ani chuan harsatnate chinfel dân kawng awmchhun chu min hawnsak zâwk a ni.—Isaia 33:2.

10. Engvângin nge Pathianin suahsualna nghawng ṭha lo zawng zawngte chu a sût vek dâwn tih kan rin tlat theih?

¹⁰ Chu bâkah, Pathian chu a thianghlim a. (Isaia 6:3) A awmzia chu a faiin, engmaha pawlh bawlhhlawh loh a ni, tihna a ni. Amahah chuan suahsualna rêng rêng a awm lo. Chuvângin, kan ring tlat thei a ni. Dik lohna leh bawlhhlawh châng nei mihringte chu chutiang chuan kan ring ve thei lo. Mihring thuneitute zînga a rinawm ber pawh hian mi sual thil tih khaw lohte siam ṭha tûrin thiltihtheihna a nei tâwk lo fo ṭhîn. Mahse, Pathian chu engkimtithei a ni a. Ani chuan suahsualnain mihringte chunga nghawng ṭha lo a neih zawng zawngte a sût theiin, a sût ngei dâwn bawk a ni. Pathianin chutianga a sût hunah chuan suahsualna chu a bo hlen tawh ang!—Sâm 37:9-11.

11. (a) Engtin nge Pathianin rorêlna dik lo chu a ngaih? (b) Engtin nge Pathianin i hrehawm tawrhna chu a ngaih?

¹¹ Suahsualna a tihtâwp vek hma hian engtin nge Pathianin khawvêl leh i nuna thilthlengte chu a ngaih le? Aw le, Pathian chuan “rorêlna fel a ngaina” tih Bible-in min zirtîr a ni. (Sâm 37:28) Chuvângin, thil dik leh dik lo chu a vei êm êm a. Rorêlna fel lo rêng rêng chu a haw êm êm bawk a ni. Suahsualnaa hmân lai khawvêl a khah khân, Pathianin “rilru nat nân a hman phah” tih Bible chuan min hrilh a. (Genesis 6:5, 6) Pathian chu a  danglam ngai lo. (Malakia 3:6) Khawvêl puma hrehawm tawrhna thlengte leh mite hrehawm tuar lai chu hmuh hrehawm a la ti reng a. Bible chuan: “Anin a ngaihsak ṭhin che u,” tiin min hrilh a ni.—1 Petera 5:7.

12, 13. (a) Engvângin nge mize ṭha tak hmangaihna angte hi kan neih a, chu chuan engtin nge khawvêl kan thlir dân a nghawng? (b) Engvângin nge Pathianin khawvêla harsatnate hi a tibo tak zet dâwn tih kan hriat chian theih?

¹² Pathianin hrehawm tawrhna a hmu hreh tih engtin nge kan hriat chian theih? Hei hi finfiahna dang chu a ni. Bible chuan mihringte hi Pathian anpuia siam kan nih thu min hrilh a. (Genesis 1:26) Chuvângin, mize ṭha kan neihna chu Pathianin mize ṭha a nei tih finfiahna a ni. Entîr nân, pawi sawi lo mite’n hrehawm an tuar i hmuh hian hmuh hrehawm i ti em? I ti a nih chuan, Pathian phei chuan hmuh hrehawm a ti lehzual dâwn tih ring tlat ang che.

¹³ Mihringte ṭhatna ber mai chu hmangaihna an nei hi a ni. Chu pawh chuan Pathian nihna a târ lang bawk. Bible chuan: “Pathian chu hmangaihna a ni,” tih min zirtîr a. (1 Johana 4:8) Pathianin hmangaihna a neih avângin keini pawhin kan nei ve a ni. Hmangaihna chuan khawvêla hrehawm tawrhna leh rorêl dik lohna kan hmuhte hi titâwp tûrin a chêttîr che ang em? Chutianga titâwp tûr chuan thiltihtheihna nei ta la, i titâwp ang em? I titâwp ngei ang! Chutiang bawkin, Pathian pawhin hrehawm tawrhna leh rorêl dik lohnate chu a titâwp ngei ang tih i ring tlat thei a ni. He lehkhabu phêk ṭan tîr lama thutiam târ lante kha duhthusâm mai emaw, beiseina satliah mai emaw a ni lo. Pathian thutiamte chu a rawn thleng famkim ngei dâwn! Mahse, chûng thutiamte ring  tlat tûr chuan a tiamtu Pathian chungchâng chu i hriat tam lehzual a ngai a ni.

14. Pathian hming chu eng nge ni a, engvângin nge kan hman ang?

¹⁴ Tuemawin a hriat che duh ta la, eng nge i tih ang? I hming i hrilh dâwn lâwm ni? Pathianin hming a nei em? Sakhaw tam tak chuan a hming chu “Pathian” emaw, “Lalpa” emaw ni angin an sawi a; mahse, chûngte chu mi mal hming a ni lo. “Lal” leh “president” chu nihna a ni ang bawk hian, chûngte chu nihna mai a ni. Bible chuan Pathianin nihna tam tak a nei tih min hrilh a. “Pathian” leh “Lalpa” tih chu a nihna zînga mi a ni.  Mahse, Bible chuan mi mal hming a neih thu pawh min hrilh bawk a, chu chu Jehova a ni. Sam 83:18 chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a sawi. I Bible-ah chu hming chu a chuang lo a nih chuan, a chuan loh chhan hriat nân he lehkhabu phêk 195-7-a Thu Belhna i râwn thei ang. Dik tak chuan, hmân lai kutziak Bible-ah chu hming chu vawi sâng tam tak a chuang a ni. Chuvângin, Jehova chuan a hming chu hria a, hmang tûrin a duh che a. Bible hmangin i hnênah a rawn inhriattîr, a tih theih a ni.

15. Jehova tih hming chuan a chungchâng eng nge a târ lan?

¹⁵ Pathian chuan hming awmze nei tak a invuah a. A hming, Jehova tih awmzia chu a thutiam engpawh a hlen chhuak theiin, a thiltum neih engpawh chu a tihlawhtling thei tihna a ni. *  Pathian hming chu danglam bîk tak a ni a. Chu chu ata liau liau a ni. Kawng tam takah Jehova chu a danglam bîk êm êm bawk. Engtin nge a danglam bîk?

16, 17. Hêng nihna (a) “Engkimtithei” tih te, (b) ‘chatuan Lal’ tih te, (c) “Siamtu” tihte aṭang hian Jehova chungchâng eng nge kan hriat theih?

¹⁶ Sam 83:18 chuan Jehova chungchângah: ‘Nangmah chauh hi Chungnungber i ni,’ tia a sawi kan hmu tawh a. Chutiang bawkin, Jehova chauh chu “Engkimtithei” tia koh a ni bawk. Thu Puan 15:3 chuan: “Aw Lalpa Pathian, Engkimtithei, i thiltihte chu a ropuiin a mak a; nang, hnam tin Lalber, i kawngte chu a felin a dik a ni,” tiin a sawi a. “Engkimtithei” tih nihna sawina chuan Jehova chu thiltihtheihna nasa ber neitu a nihzia min hriattîr a ni. A thiltihtheihna chu engmahin a tluk lo; a chungnung lawr lak a ni. Jeremia 10:10-ah Jehova chu ‘chatuan Lal’ tia koh a ni a. Chu nihna chuan Jehova chu kawng danga a danglam bîkzia min hriattîr bawk. Amah chauh hi engtik lai pawha awm renga chu a ni. Sâm 90:2 chuan: “Chatuan ata chatuan thleng pawhin nang chu Pathian i ni,” tiin a sawi. Chu chu a ropuiin, a mak hle a ni lâwm ni?

¹⁷ Siamtu awmchhun a nihna pawh hian Jehova chu a tidanglam bîk a. Thu Puan 4:10, 11 chuan: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tih min hrilh a ni. Hêng thil engkim—thlarau thil siam hmuh theih lohte aṭanga zâna kan hmuh theih arsite, rah chhuahtu thing chi hrang hrangte, leh lui leh tuipuia awm sanghate thlengin—i ngaihtuah chhuah theih apiang chu Jehova Siamtu a nih avânga lo awm vek a ni.

18. Engvângin nge mi ṭhenkhatin Pathian an hnaih theih an rin loh va; mahse, Bible-in eng nge min zirtîr?

¹⁸ Jehova nihna ropui tak takte han chhiarna chuan mi ṭhenkhatte chu ngaih ṭhat lohna a pe a. ‘Pathian chu a sân lutuk avângin, kan tân chuan hnaih theih rual a ni lo vang a, a tân lah engmah tham kan ni hek lo vang,’ tih ngaih dân an nei a ni.  Mahse, chu ngaih dân chu a dik em? Bible chuan chu mi kalh chiah chu min zirtîr hlauh zâwk a ni, Jehova chungchângah: “Ani chuan min hlat lo ṭheuh si a,” tiin. (Tirhkohte 17:27) Tin, Pathian Thu chuan: “Pathian hnaih rawh u, tichuan anin a hnaih ang che u,” tiin min fuih hial bawk a ni.—Jakoba 4:8.

19. (a) Pathian chu engtin nge kan hnaih ṭan theih ang a, chu mi aṭang chuan eng hlâwkna nge lo awm ang? (b) Pathian miziate zînga a engin nge hîp ber che?

¹⁹ Engtin nge Pathian chu i hnaih theih? A bul ṭan nân, tûna i thiltih—Pathian chungchâng zirna—hi chhunzawm zêl ang che. Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” a ti. (Johana 17:3) Ni e, Bible chuan Jehova leh Isua chungchâng zirnain “chatuana nunna” min thlen tih min zirtîr a! Kan hriat tawh angin, “Pathian chu hmangaihna a ni.” (1 Johana 4:16) Jehova chuan mize ṭha leh duhawm dang tam tak a la nei a. Entîr nân, Bible chuan Jehova chu “lainatnaa khat, mi khawngaih thei tak, thin nel tak, ngilneihna leh thu tak ngah” a nih thu min hrilh a ni. (Exodus 34:6) Ani chu ‘a ṭha a, ngaihdam a peih a’ (Sam 86:5); a dawhthei bawk a (2 Petera 3:9); tin, a rinawm bawk a ni. (Deuteronomy 32:4) Bible i chhiar tam chuan, Jehova’n kan sawi tâk miziate leh mize dang duhawm tam tak a nei tih i lo hria ang.

20-22. (a) Pathian kan hmuh theih lohna chuan amah kan hnaihna tûr a dâl em? Hrilhfiah rawh. (b) Nangmah duhsaktu mi ṭhenkhatte’n eng ti tûrin nge an nawr mai theih che a, mahse eng nge i tih ang?

²⁰ Pathian chu thlarau a nih avângin i hmu thei lo ngei mai. (Johana 1:18; 4:24; 1 Timothea 1:17) Mahse, Bible-a a chanchin târ lante zirna aṭangin, amah chu mi mal angin i hre chiang thei a. Fakna hla phuahtu sawi ang hian, ‘LALPA mawizia chu i hmu’ thei a ni. (Sâm 27:4; Rom 1:20) Jehova chungchâng i zir tam poh leh i tân amah chu a lo tak deuh deuh vang a, amah hmangaih chhan tûr leh hnaih chhan tûr i nei tam deuh deuh vang.

²¹ Bible-in Jehova chu kan Pa anga ngai tûra min zirtîr chhan chu zawi zawiin i lo hre thiam chho vang a. (Matthaia 6:9) Ani chuan nunna min pe mai ni lovin, pa ber hmangaihna nei tawh phawtin an fate tâna thil ṭha ber an duhsak ang bawkin, kan tân  pawh nun kawng ṭha ber chu min duhsak a. (Sâm 36:9) Bible chuan mihringte hi Jehova ṭhian kan ni thei tih min zirtîr bawk a ni. (Jakoba 2:23) Lei leh vân Siamtu ṭhiana i siam thei hi han ngaihtuah teh!

²² Bible i han zir belh zêl chuan, nangmah duhsaktu mi ṭhenkhatin zir zawm lo tûrin an nawr mai thei che a. Anni chuan i awmna kohhran i chhuahsan an hlau pawh a ni thei. Mahse, ṭhian ṭha ber i siamna tûr chu tumah indantîr suh ang che.

23, 24. (a) Engvângin nge i thu zirte chungchângah zawhna i zawh belh zêl ang? (b) A dawtah eng thu nge kan ngaihtuah dâwn?

²³ Thil hriatthiam nghâl mai lohte pawh i nei ngei ang a. Chûng i hriatthiam lohte zâwt tûr chuan inngaihtlâwmna neih a ngai deuh mai thei; mahse, thil zahthlâka i ngaih avâng maiin zawh loh phah suh. Isua chuan naupang tê ang maia inngaihtlâwm chu thil ṭha a nih thu a sawi. (Matthaia 18:2-4) Kan hriat angin, naupangte chuan zawhna an ngah ṭhîn hle a. Pathian chuan a chhânna i zawn hmuh chu a duh a ni. Bible chuan Pathian chungchâng hriat châkna nei mi ṭhenkhatte chu a fak hle a. Chûng mite chuan an thu zirte chu thu tak a nih leh nih loh an hriat chian nân, Pathian Lehkha Thu-ah ngun takin an zawng ṭhîn a ni.—Tirhkohte 17:11.

²⁴ Jehova chungchâng zir dân kawng ṭha ber chu Bible bih chian hi a ni a. Lehkhabu dang zawng zawng lakah a danglam bîk a ni. Eng kawngin nge? Bung 2-naah hian chu mi chungchâng chu ngaihtuah a ni ang.